E Na’o le Faatekinolosi: Talavou Matutua
Fausia i luga o le Papa: Suesuega Loloto o Upumoni Faigofie
E le manaomia ona tatou iloa auiliiliga uma e uiga i le talalelei e faatumauina ai a tatou molimau. Ae e manaomia ona tatou maua se malamalama loloto i upumoni o le talalelei.
O le tagata pu’e leo po o vitio e tuu i luga o le initoneti, o le tagata faatosina, o le tusitala, o le faipule, o le uo, o le tuaoi, o le tagata ese.
E tuu atu e le initoneti i tagata uma le mana e faaleo ai se manatu—ma e le o taimi uma e siaki ai nei tusiga mo le upumoni. O nisi tagata e faasoa atu anotusi e foliga mai e ogatusa ma le talalelei a Iesu Keriso, ae o o latou manatu e mafai ona se ese mai aoaoga faavae mama o loo aoao mai i tusitusiga paia ma perofeta o vaitausaga uma. E pei ona aoao mai talu ai nei Peresitene Russell M. Nelson, “O leo ma uunaiga a le lalolagi o loo punouai ma anoanoai. Ae ua tele na’ua leo e taufaasese, faatosina, ma mafai ona tosoesea i tatou mai le ala o feagaiga.”1
Ua iloa e Satani e tau le faatauina i tatou i ni mea sese e le taufaaleaga, ae atonu o le a tatou lafoai ese le upumoni mama e talia ai eseesega e lei maea o upumoni tatou te faitauina i luga o le initoneti. O nei eseesega e lei maea, po o se vaega o upumoni, o “uaea vavae”2 Ua taumafai Satani e lafoai ese i tatou mai le ala o feagaiga (2 Nifae 26:22).
E faapefea la ona tatou iloa le eseesega o uaea vavae o mea sese mai le upumoni mama? Na sili ona lelei le saunoaga a Peresitene Nelson: “Faafailele oe lava i upu a perofeta anamua ma aso nei, … aoao mea uma e te mafaia e uiga i le talalelei, … [ma] faatofu oe lava i le faatanoa mauoa o faaaliga ua tatou maua i o tatou tamātama’ilima.”3
O Le A se Mea e Mafai Ona Ou Suesueina?
O se malamalama loloto i le talalelei o le a fesoasoani ia i tatou e iloa ai le eseesega i le va o le upumoni mama ma se vaega. O le a sili ona faamanuiaina i tatou pe afai tatou te taulai atu lo tatou malosi e atiae ai “luga o le papa o lo tatou Togiola” (Helamana 5:12).
A o avea o ia ma se tasi o Fitugafulu, na saunoa mai Elder Lawrence E. Corbridge: “O loo i ai faamatalaga e le faatapulaaina ma manatu e tetee i le upumoni. … E mafai ona e faaaluina se olaga atoa e mataitu ai le tali i aia uma … ma e le oo lava i se malamalama o upumoni sili ona taua.”4
Nai lo le faaaluina o lou malosi e mataitu ai tali taitasi i taimi uma e te maua ai se fesili, faaalu se taimi i aso taitasi e faaloloto ai lou malamalama i na upumoni faavae e taula ai lou faatuatua i le Papa, o Iesu Keriso.
O le aoaoga faavae autu o le talalelei a Iesu Keriso e aofia ai le faatuatua, salamo, feagaiga, perofeta, faaaliga, le Togiola a Iesu Keriso, le ata o le faaolataga, ma lo tatou faasinomaga paia o ni fanau a le Atua.5 O nei upumoni e fesoasoani ia i tatou e agai atu ai i luga o le ala o feagaiga; e taua mo lo tatou faaeaga.
O upumoni faalelalolagi, i le isi itu, e le taua mo lo tatou faaolataga.
E Tele Atu Isi Mea e Aoaoina
O nisi taimi tatou te manatu ai ua tatou malamalama lelei i upumoni autu o le talalelei. Atonu ua faafia selau ona tatou faalogo i ai.
Ae o le ala ua tatou malamalama ai i le taimi nei i mataupu faavae o le talalelei atonu e le atoatoa e pei o le ala e malamalama i ai le Atua. Seia oo ina avea i tatou e faapei o le Atua, e i ai lava i taimi uma se mea e mafai ona tatou aoaoina. “O ia o lē e mauaina le malamalama, ma tumau pea i le Atua, e mauaina le malamalama atili” (Mataupu Faavae ma Feagaiga 50:24; faaopoopo le faamamafa). O lena mea e aofia ai le malamalama fou e uiga i mataupu faavae autu o le talalelei.
O Peresitene Nelson o se faataitaiga sili o le faaauau pea ona faalolotoina lona malamalama. Ina ua mavae le avea ma se Aposetolo mo le 36 tausaga, sa ia fai mai, “Sa taitaiina atu a’u talu ai nei i se malamalamaaga fou.”6
Afai e mafai e le fiailoa, filiga, ma le Agaga Paia ona taitai le perofeta a le Atua i se malamalama fou e uiga i aoaoga faavae autu o le talalelei, o le saili “e ala i le suesue ma le faatuatua foi” (Mataupu Faavae ma Feagaiga 88:118) e mafai ona faia lea lava mea e tasi mo i tatou.
Saili Se Molimau Patino
A o tatou sailia le upumoni i le lotolotoi o le tele o leo lea e osofaia i tatou i luga o le initoneti, o la tatou meafaigaluega silisili lava o la tatou lava molimau patino lea mai le Agaga Paia.
Na aoao mai Peresitene Iosefa Filitia Samita (1876–1972) e faapea, “E ala mai i le Agaga Paia e oo atu ai le upu moni i neura ma musele o le tino ina ia le mafai ona galo ai.”7 Tatou te aoao i lagona o le Agaga Paia e faamautu mai ai upumoni mama i o tatou loto.
E ala i le mana o le Agaga Paia e mafai ona tatou “iloa ai le moni o mea uma lava” (Moronae 10:5 Ma e ui e moni lena mea, e taua le manatua o se tasi o matafaioi a le Agaga Paia o le fesoasoani lea ia i tatou ia maua se molimau o aoaoga faavae autu—”o Iesu Keriso ma Lana galuega ma le galuega a Ana auauna i luga o le fogaeleele” (Bible Dictionary, “Holy Ghost”).
O le suesueina o upumoni faata’eta’ealuga e le o se mea leaga. Ma o nisi taimi e mafai ona faamalosia ai a tatou molimau pe a tatou maua tali i a tatou fesili “faaletaua”. Ae o molimau e le mafai ona faavaeina i luga o upumoni faata’eta’ealuga. Na saunoa mai Elder Joseph B. Wirthlin (1917–2008) o le Korama a Aposetolo e Toasefululua, “E tatau ona tatou malamalama ma ola i upumoni faavae faigofie ma ia le faafaigataina. O o tatou faavae e tatau ona mausali ma maua’a loloto.”8
O le suesue i lenei auala e mafai ona fesoasoani tatou te le fenumia’i ai i le tele o leo o loo siomia ai i tatou. Tatou te “faasolo malolosi i le malamalama o le upumoni” ma avea ma tagata “i se malamalama lelei” (Alema 17:2). Ma e pei ona augani mai Peresitene Nelson, tatou te faia la tatou vaega e atiina a’e “se faavae mausalifaaleagaga ua fausia i luga o le papa o lo tatou Togiola, o Iesu Keriso.”9