Mataolela Laiti a Angela

Ata

tuugamau ma mataolela i ona tafatafa

Ata na tusia e Dilleen Marsh

I se tasi afiafi o se Aso Toonai i le 2009, sa ma saofafai ai ma la’u soa faifeautalai, o Sister Alison Vevea i se falesa e matamata i le Sauniga Aoao a le Aualofa. Sa ou mafaufau ia Angela, o se tamaitai sa ma fesoasoani e saunia mo le papatisoga.

I le lua tausaga na muamua atu, na fasiotia ai le tamatama a Angela. O Angela sa lē faigaluega i le taimi nei ma, e ui ina sa fiafia e papatisoina, ae sa masani ona lagona le tuuatoatasi ma le faanoanoa. I lena afiafi a o lumanai le faasalalauga, sa ma tatalo ai ma Sister Vevea mo se musumusuga ia iloa pe faapefea ona fesoasoani ia Angela.

A o saunoa peresitene Henry B. Eyring, sa ou lagona le uunaiga e avatu se mea ia Angela. Ae o le a? Ona tau mai lea e le Agaga ia te a’u, “E manaomia e Angela ni fugalaau.” Na toetoe lava o le taimi lava lena, na faasoa mai ai e Peresitene Eyring se tala e uiga i se tamaitai sa uunaia e ave atu ni tulipe i se tuafafine o le Aualofa.¹ Sa faamautu mai e lana tala ia te a’u e faapea o Angela, po o le ā lava le mafuaaga, na manaomia ni fugalaau.

Ina ua uma le faasalalauga, sa ou ta’u atu i la’u soa le mea na musumusu mai ai le Agaga ia te a’u. E aunoa ma le faatuai, sa ma tietie atu i le faleoloa aupito lata ane. A o ou tilotilo atu i fugalaau o le faleoloa, sa ou pikiina se teufugalaau o daisies.

“Ou te lē iloa,” na fai mai ai Sister Vevea. “Ae ā ni mataolela?”

Sa ou faasino atu i le latou tau maualuga atu, ae sa finau mai pea la’u soa. “Ou te lagona moni lava e tatau ona ta aumaia ni mataolela,” o lana tala lea.

I ni nai minute mulimuli ane, sa ma tutū ai i le faapaologa a Angela, ma mataolela o loo uuina. Ou te lē manatua le faafeiloai na matou fefaasoaa’i ai ina ua matala mai le faitotoa. Ou te manatua na o loimata o Angela.

Sa faamatala e Angela na te faasino i lana fanau taitoatasi o ana “mataolela laiti.” Soo se taimi lava na te asiasi atu ai i le tuugamau a lona atalii, na te tuuina lava ni mataolela i lona maa faamanatu. Peitai, o le aso na muamua atu, sa leai se mea na alu ma ia. E ui lava i ana sailiiliga uma, ae sa le’i mafai ona ia maua ni mataolela i soo se mea. Faatasi ai ma le ma meaalofa, sa ia fuafua ai e toe fo’i i le fanuatanu i le aso na sosoo ai e faaauau lana tu masani.

I lena afiafi sa galue ai le Agaga e ala mai ia Peresitene Eyring, la’u soa, ma a’u e tuuina atu se sāvali o le alofa ia Angela mai lona Tama Faalelagi. Ou te faafetai mo musumusuga a le Agaga Paia. Sa la aoaoina a’u i le popofou o la’u misiona e silafia e le Atua Ana fanau ma ua saunia lava o Ia e fesoasoani ia i tatou e faataunuu Lana galuega.