Paglahutay sa Adlaw diha ni Kristo

Usa kadto ka adlaw nga puno sa prangka ug direkta nga mga sambingay, komplikado nga mga pangutana, ug lawom nga doktrina. Human mohatag og sakit nga pangasaba niadtong sama sa “pinaputi nga mga panteyon nga sa gawas managpakita sa katahom, apan sa sulod kini sila puno sa mga bukog sa mga patay, ug sa tanang kahugawan,”¹ si Jesus nagtudlo og tulo pa ka dugang nga mga sambingay mahitungod sa espirituhanong pagpangandam ug pagkadisipulo. Usa niini mao ang sambingay mahitungod sa napulo ka dalaga.

“Dayon ang gingharian sa langit ikatandi siya ngadto sa napulo ka dalaga, diin midala sa ilang mga suga ug nanglakaw aron sa pagsugat sa pamanhonon.

“Ug danghag ang lima kanila, ug maalamon ang laing lima.

“Ang mga danghag nagdala sa ilang mga suga, apan wala magtagana og lana nga igdudugang:

“Samtang ang mga maalamon nagdalag mga sudlanan nga puno sa lana uban sa ilang mga suga.

“Ang pamanhonon nalangan pag-abot busa nagduka ug nakatulog ang mga dalaga.

“Tungang gabii na kadto sa dihang milanog ang usa ka singgit, Ania na ang pamanhonon; dali kamo ug sugata siya.

“Nangmata ang tanang dalaga, ug giandam nila ang ilang mga suga.

“Unya ang mga danghag miingon sa mga maalamon, Hatagi kamig diyotay sa inyong lana; kay hapit na mangapalong ang among mga suga.

“Apan ang mga maalamon mitubag, Ayaw; dili na paigo ang lana kon manghatag pa kami kaninyo: lakaw hinuon kamo sa tindahan, ug pagpalit kamog inyo.

“Ug sa wala na sila didto, miabot ang pamanhonon; ug silang mga andam misulod uban kaniya ngadto sa kombira sa kasal: ug gisirhan ang pultahan.

“Unya miabot ang ubang mga dalaga, ug misangpit sila, Senyor, Senyor, pasudla kami”²

“Apan siya mitubag nga nag-ingon, ‘Wala ako makaila kaninyo.³

“Busa, pagtukaw kamo kay wala kamo mahibalo sa adlaw o sa takna.”⁴

Si Presidente Dallin H. Oaks mihatag sa mosunod nga makakutaw sa hunahuna nga mga pangutana nga may kalabotan sa pag-abot sa Pamanhonon:⁵ “Unsa kaha kon ang adlaw sa Iyang pag-abot kay ugma? Kon kita nahibalo nga makigkita kita sa Ginoo ugma—pinaagi sa atong kamatayon nga wala sa oras o pinaagi sa Iyang kalit nga pag-abot—unsa may atong buhaton karon?”⁶

Akong nakat-onan gikan sa personal nga kasinatian nga ang espirituhanong pagpangandam alang sa pag-abot sa Ginoo dili lang mahinungdanon apan ang bugtong nga paagi aron makakaplag og tinuod nga kalinaw ug kalipay.

Usa kadto ka bugnaw ug hayag nga adlaw sa tinglarag sa dihang una nako nga nadungog ang mga pulong nga “Ikaw adunay kanser.” Ang akong bana ug ako nakuratan! Samtang nagmaneho kami pauli sa balay diha sa kahilom, nga naghunahuna sa balita, ang akong kasingkasing nabalaka sa akong tulo ka anak nga lalaki.

Sa akong hunahuna nangutana ko sa Langitnong Amahan, “Mamatay na ba ko?”

Ang Espiritu Santo mihunghong, “Mahimong maayo ra ang tanan.”

Dayon nangutana ko, “Mabuhi ba ko?”

Og usab, ang tubag miabot: “Mahimong maayo ra ang tanan.”

Naglibog ko. Nganong nakadawat man ko sa parehas gayod nga tubag kon mabuhi ba ko o mamatay?

Dayon sa kalit lang ang akong tibuok nga kalawasan napuno sa bug-os nga kalinaw samtang ako gipahinumdoman: Kami dili kinahanglan nga magdali sa pagpauli sa panimalay ug motudlo sa among mga anak unsaon sa pag-ampo. Sila nakahibalo unsaon sa pagdawat og mga tubag ug kahupayan gikan sa pag-ampo. Kami dili kinahanglan nga magdali sa pagpauli sa panimalay ug motudlo kanila mahitungod sa mga kasulatan o mga pulong sa buhi nga mga propeta. Kadto nga mga pulong pamilyar na nga tinubdan sa kalig-on ug panabot. Kami dili kinahanglan nga magdali sa pagpauli sa panimalay ug motudlo kanila mahitungod sa paghinulsol, sa Pagkabanhaw, sa Pagpahiuli, sa plano sa kaluwasan, mahangtoron nga mga pamilya, o ang doktrina gayod ni Jesukristo.

Nianang higayona ang matag leksiyon sa family home evening, sesyon sa pagtuon sa kasulatan, gihalad nga pag-ampo nga dunay hugot nga pagtuo, panalangin nga gihatag, gipakigbahin nga pagpamatuod, pakigsaad nga gihimo ug gituman, balay sa Ginoo nga gitambongan, ug adlawng Igpapahulay nga gisunod importante—ah, unsa gayod ka importante! Ulahi na kaayo ang pagbutang og lana sa among mga suga. Kami nagkinahanglan sa matag tulô, ug kami nagkinahanglan niini karon dayon!

Tungod ni Jesukristo ug sa Iyang gipahiuli nga ebanghelyo, kon ako mamatay, ang akong pamilya mahupay, malig-on, ug sa umaabot nga adlaw mapahiuli. Kon ako mabuhi, ako makabaton og katungod sa labing dako nga gahom sa kalibotan aron motabang nga mohupay, mopalahutay, ug moayo kanako. Sa kataposan, tungod ni Jesukristo, ang tanan mamaayo ra.

Atong makat-onan gikan sa mainampingon nga pagtuon sa Doktrina ug mga Pakigsaad unsa ang buot ipasabot sa “maayo ra”:

“Ug niana nga adlaw, kon Ako moanhi sa akong himaya, nga ang sambingay matuman diin Ako namulong mahitungod sa napulo ka mga birhen.

“Kay sila mga maalamon ug nakadawat sa kamatuoran, ug nakadawat sa Balaan nga Espiritu Santo alang sa ilang paggiya, ug wala malimbongi—sa pagkatinuod Ako moingon nganha kaninyo, sila dili pagaputlon ug ilabay ngadto sa kalayo, apan molahutay niana nga adlaw.”⁷

Si Jesukristo mihimong posible alang kanato nga “molahutay niana nga adlaw.” Ang paglahutay niana nga adlaw wala magpasabot nga pun-an ang nagkadugang nga lista sa mga buhatonon. Hunahunaa ang usa ka salamin nga magpadako og butang [magnifying glass]. Ang bugtong katuyoan niini dili lang ang paghimo sa mga butang nga mas dako tan-awon. Kini usab mopundok ug mopunting og kahayag aron kini mahimong mas gamhanan. Kita kinahanglan nga mopayano, motutok sa atong mga paningkamot, ug mahimong mga tigpundok sa Kahayag ni Jesukristo. Kita nagkinahanglan og mas balaan ug makapadayag nga mga kasinatian.

Nahimutang sa amihanang kasadpan sa Israel mao ang usa ka maanindot nga linya sa mga bungtod nga kasagaran gitawag og “bukid nga kanunayng lunhaw [evergreen mountain].” Ang Mount Carmel⁸ nagpabilin nga berde tibuok tuig sa dako nga bahin tungod sa ginagmay nga mga yamog. Ang pag-amuma mahitabo matag adlaw. Sama sa mga “yamog sa Carmel,”⁹ samtang kita mangita sa pag-amuma sa atong mga kalag “sa mga butang kabahin sa pagkamatarong,”¹⁰ ang gagmay ug yano nga mga butang,”¹¹ ang atong mga pagpamatuod ug ang mga pagpamatuod sa atong mga anak mabuhi!

Karon, tingali kamo maghunahuna, “Apan Sister Wright, wala ka makahibalo sa akong pamilya. Kami naglisod gayod ug lahi kaayo ang among sitwasyon sa sitwasyon ninyo.” Eksakto ka. Wala ako makahibalo sa imong pamilya. Apan ang Dios nga adunay walay kataposan nga gugma, kalooy, gahom, kahibalo, ug kahimayaan nakahibalo.

Ang mga pangutana nga tingali inyong ipangutana mao ang mga pangutana nga gusto gayod ninyo nga naay tubag nga nakapabalaka kaayo ninyo. Ang sama nga mga pangutana makita diha sa mga kasulatan:

“Magtutudlo, wala ka ba mabalaka nga hapit na man [ang akong pamilya] malunod?”¹²

“Hain na man ang akong paglaom?”¹³

“Unsa ang [akong] buhaton, aron kini nga panganod nga mangitngit mahimo nga makuha gikan sa pagpandong [kanako]?”¹⁴

“Hain man ang tinubdan sa kaalam? ug asa man hikaplagi ang pagsabot?”¹⁵

“Unsaon nga mahimo ang paghupot [nako] sa matag maayo nga butang?”¹⁶

“Ginoo, unsa ang buot nimong ipabuhat kanako?”¹⁷

Ug dayon sa tumang kaaghop ang tubag miabot:

“Motuo ba ikaw sa gahom ni Kristo ngadto sa kaluwasan?”¹⁸

“Ang Ginoo nagsugo ba kang bisan kinsa nga sila dili moambit sa iyang kaayo?”¹⁹

“Nagatuo ba kamo nga [Siya] makahimo niini?”²⁰

“Nagtuo ka ba sa mga propeta?”²¹

“Kamo ba naghupot sa hugot nga pagtuo diha sa pagtubos kaniya kinsa milalang kaninyo?”²²

“Dili ba ang Maghuhukom sa tibuok nga yuta magabuhat sa matarong?”²³

Akong minahal nga mga higala, dili nato mapakigbahin ang atong lana, apan makapakigbahin kita sa Iyang kahayag. Ang lana sa atong mga suga dili lang motabang nato nga “molahutay niana nga adlaw” apan mahimo usab nga paagi sa pagdan-ag sa agianan nga mogiya niadtong atong mga gihigugma ngadto sa Manluluwas, kinsa nagbarog nga andam “uban sa bukas nga mga bukton sa pagdawat” kanila.²⁴

“Mao kini ang giingon sa Ginoo; Pugngi ang imong tingog sa paghilak, ug pugngi ang imong mga mata sa pagpatulô sa mga luha: kay ang imong mga buhat pagabalosan, … ug sila moanhi pag-usab gikan sa yuta sa kaaway.

“Ug adunay paglaom alang sa imong kaugmaon, nagaingon ang Ginoo, ug ang imong mga anak moanhi pag-usab sa ilang kaugalingong utlanan.”²⁵

Si Jesukristo mao ang “paglaom alang sa imong kaugmaon.” Walay gibuhat nato o wala mabuhat nga lapas sa makab-ot sa Iyang walay kataposan ug mahangtorong sakripisyo. Siya ang hinungdan ngano nga dili pa gayod kini ang kataposan sa atong istorya.²⁶ Busa kita “kinahanglan gayod mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaom, ug usa ka gugma sa Dios ug sa tanan nga mga tawo. Busa, kon [kita] mopadayon sa unahan, magbusog sa pulong ni Kristo, ug molahutay hangtod sa kataposan, tan-awa, sa ingon miingon ang Amahan: [Kita] makabaton og kinabuhi nga dayon.”²⁷

Ang mahangtorong kinabuhi mao ang mahangtorong kamaya. Ang hingpit nga kamaya niini nga kinabuhi, karon dayon—dili bisan pa man sa mga hagit sa atong panahon apan tungod sa tabang sa Ginoo nga makat-onan ug sa kataposan mabuntog kini—ug dili masukod nga kamaya sa umaabot nga kinabuhi. Ang mga luha mauga, ang nasakitan nga mga kasingkasing maulian, kon unsa ang nawala kay makit-an, ang mga kabalaka masulbad, ang mga pamilya mapahiuli, ug ang tanan nga anaa sa Amahan maatoa.²⁸

Hangad ngadto kang Jesukristo ug mabuhi²⁹ mao ang akong pagpamatuod diha sa sagrado ug balaan nga ngalan sa hinigugma nga “Magbalantay ug Obispo sa [atong] mga kalag,”³⁰ si Jesukristo, amen.