Atong Kauban sa Kanunay

Minahal kong kaigsoonan, niini nga komperensiya napanalanginan kita sa buhong nga pagpadayag. Ang mga sulugoon ni Ginoong Jesukristo namulong ug mamulong og mga pulong sa kamatuoran, pag-awhag, ug direksiyon.

Natandog ako sa mga pagpamatuod nga gihatag atol niini nga komperensiya nga ang Ginoo namulong kanato sa personal pinaagi sa Espiritu Santo. Samtang mag-ampo kita dayon mopatalinghog sa mga pag-aghat sa Espiritu, makaangkon kita og mas dakong panglantaw ug mga panalangin nga mogiya kanato latas niining nagkalisod nga mga adlaw sa unahan.

Nadungog na usab nato ang pasidaan ni Presidente Russell M. Nelson nga sa umaabot nga mga adlaw, dili na posible ang espirituhanong pagsugakod kon wala ang paggiya, pagdumala, paghupay, ug makanunayon nga impluwensya sa Espiritu Santo.”¹

Kana nga propetikanhong pasidaan nagdala kanako sa pagpamalandong kon unsay akong itudlo sa akong mga anak, mga apo, ug mga apo sa tuhod mahitungod kon unsaon sa pag-angkon nianang mahinungdanong giya sa lisod nga mga adlaw sa unahan alang kanila.

Busa kini nga mensahe karon usa ka mubo nga sulat ngadto sa akong mga kaliwatan nga tingali makatabang nila kon ako dili na nila kauban sa mahinamong mga adlaw sa unahan. Gusto nako nga mahibaloan nila unsay akong nahibaloan nga makatabang nila.

Mas nasabtan na nako unsay ilang gikinahanglan aron kanunay nga maanaa kanila ang padayon nga impluwensya sa Espiritu Santo sa mga adlaw diin sila magpuyo. Ug gibati nako ang impresyon nga ipamulong karon ang mahitungod sa akong personal nga kasinatian sa pagdapit sa Espiritu Santo, kutob sa akong mahimo, nga mahimo nakong ikauban sa kanunay. Ang akong pag-ampo mao nga unta ako makahimo sa pag-awhag kanila.

Akong sugdan nga sila maghunahuna mahitungod sa ug mag-ampo mahitungod sa mga anak nga lalaki ni Helaman, nga si Nephi ug Lehi, ug sa ubang mga sulugoon sa Ginoo nga naghago uban kanila. Nag-atubang sila og grabing oposisyon. Nagserbisyo sila sa daotan nga dapit ug nag-atubang og grabing mga pagpanglingla. Nakabaton ako og kaisog, ug kamo usab, gikan niining usa ka bersikulo gikan sa rekord ni Helaman:

“Ug sa ikapitoan ug siyam nga tuig misugod ang daghan nga panagbangi. Apan nahinabo nga si Nephi ug si Lehi, ug daghan sa ilang mga kaigsoonan kinsa nasayod mahitungod sa tinuod nga mga punto sa doktrina, nakabaton og daghan nga mga pagpadayag matag adlaw, busa sila misangyaw ngadto sa mga katawhan, hangtod nga sila mitapos sa ilang mga panagbangi nianang mao nga tuig.”²

Kini nga asoy nag-awhag kanako , ug makaawhag usab kini kaninyo. Ang mga anak nga lalaki ni Helaman gitudloan ug gigiyahan og sunod-sunod nga mga kasinatian sa Espiritu Santo. Kini naghatag nako og kaseguroan nga kita mahimong matudloan ug makakat-on gikan sa Espiritu lagda human sa usa ka lagda, makadawat sa unsay atong gikinahanglan, ug dayon kon kita andam na makadawat kita og daghan pa.

Nadasig ako sa samang paagi sa asoy ni Nephi kinsa gihangyo nga mobalik sa Jerusalem alang sa mga palid ni Laban. Hinumdomi ang pagpili nga iyang gihimo. Miingon siya, “Ako moadto ug mobuhat sa mga butang nga ang Ginoo nagsugo.”³

Ang kasinatian ni Nephi kauban sa Espiritu Santo niana nga buluhaton naghatag kanako og kaisog sa daghang higayon dihang gibuhat nako ang mga tahas nga nahibaloan nakong mga buluhaton gikan sa Ginoo apan ingon og mas lisod kini kay sa akong naagian nga kasinatian ug lapas sa unsay akong nakita isip akong kapasidad.

Inyong mahinumdoman unsay gisulti ni Nephi bahin sa iyang kasinatian: “Ug niana nga pagkagabii; ug ako misugo nga [ang akong mga igsoong lalaki] motago sa gawas sa mga paril. Ug sa diha nga nakatago na sila, ako, si Nephi, mikamang ngadto sa sulod sa dakbayan ug mipadulong sa balay ni Laban.”

Mipadayon siya sa pag-ingon nga: “Ug ako giubanan sa Espiritu, wala masayod sa sinugdanan sa mga butang nga ako mobuhat.”⁴

Nadasig ako gumikan sa pagkahibalo nga si Nephi gigiyahan sa Espiritu sa matag minuto sa tibuok gabii sa buluhaton sa Ginoo.

Kita nagkinahanglan, ug kamo magkinahanglan, sa padayon nga pakig-uban sa Espiritu Santo. Karon, nagtinguha kita niini, apan nasayod kita gikan sa kasinatian nga dili kini sayon nga kab-oton. Matag usa kanato makahunahuna ug makasulti, ug makabuhat og mga butang sa atong inadlaw nga pagpakabuhi nga makapasilo sa Espiritu.

Kon mahitabo kana, kay kini mahitabo man, tingali bation nato ang dili pag-aprobar sa Ginoo. Ug tingali matintal kita sa pagbati nga kita nag-inusara. Importante ang paghinumdom sa segurado nga saad nga atong madawat matag semana samtang kita maghinulsol ug moambit sa sakramento, “Nga sila unta sa kanunay makabaton sa iyang Espiritu uban kanila.”⁵

Kon kamo mibati sa impluwensya sa Espiritu Santo karon, mahimo ninyong isipon kini nga matahom nga ebidensiya nga ang Pag-ula naglihok sa inyong kinabuhi.

Sigon sa gisulti ni Elder Jeffrey R. Holland: “Kon moabot kining atong grabe nga mga problema, kinahanglang dili kita magpadala sa kahadlok nga kita gibiyaan sa Dios o nga Siya wala na maminaw sa atong mga pag-ampo. Siya gayod maminaw kanato. Siya gayod makakita kanato. Siya gayod nahigugma kanato.”⁶

Kana nga kaseguroan nakatabang kanako. Kon mobati ko nga layo sa Ginoo, kon ang mga tubag sa akong pag-ampo ingon og nalangay, nakakat-on ako sa pagsunod sa tambag ni Presidente Nelson sa pagrebyo sa akong kinabuhi alang sa mga oportunidad nga makahinulsol. Siya nagpahinumdom kanato, “Ang matag adlaw nga paghinulsol mao ang agianan ngadto sa kaputli, ug ang kaputli magdala og gahom.”⁷

Kon makita ninyong naglisod kamo sa pagbati sa Espiritu Santo, tingali makapamalandong kamo kon aduna bay butang nga angay ninyong hinulsolan ug makadawat og kapasayloan.⁸ Makaampo kamo uban sa hugot nga pagtuo aron makahibalo unsay buhaton aron malimpyohan ug sa ingon mas mosarang sa kanunay nga pagpakig-uban sa Espiritu Santo.

Kon gusto kamo nga makadawat sa pakig-uban sa Espiritu Santo, kinahanglan nga tinguhaon ninyo kini sa matarong nga mga rason. Ang inyong mga katuyoan kinahanglan nga mao ang katuyoan sa Ginoo. Kon ang inyong mga motibo hilabihan ka hinakog, makita ninyo nga lisod ang pagkadawat og mga pag-aghat sa Espiritu.

Ang mahinungdanon para kanako ug kanimo mao ang pagtinguha sa unsay tinguha sa Manluluwas. Ang atong mga motibo kinahanglan nga pinasikad sa tiunay nga gugma ni Kristo. Ang atong mga pag-ampo kinahanglan nga “Tanan nga akong tinguha mao ang imong tinguha. Ang Imong kabubut-on mao ang matuman.”

Gipaningkamotan nako ang paghinumdom sa sakripisyo sa Manluluwas ug sa Iyang gugma alang kanako. Dayon, kon mag-ampo ko sa Langitnong Amahan aron sa pagpasalamat, mobati ko sa gugma ug kaseguroan nga ang akong mga pag-ampo gidungog ug nga ako makadawat sa bisan unsa nga labing maayo kanako ug niadtong akong mga gipangga. Nakapalig-on kini sa akong pagpamatuod.

Sa tanang butang nga gipamatu-dan sa Espiritu Santo, ang labing bililhon alang kanato mao nga si Jesus mao ang Kristo, ang buhi nga Anak sa Dios. Ang Manluluwas nagsaad: “Kon moanhi ang Magtatabang, nga akong igapadala kaninyo gikan sa Amahan, gani ang Espiritu sa kamatuoran, nga magagikan sa Amahan, magsaksi siya mahitungod kanako.”⁹

Mga tuig ang milabay nakadawat ko og tawag sa telepono gikan sa nasagmuyo nga inahan. Miingon siya nako nga ang iyang anak nga babaye mibalhin og puyo nga layo sa iyang balay. Iyang gibati gikan sa daklit nga pagkontak sa iyang anak nga babaye nga adunay nahitabo nga dili gayod maayo. Mihangyo siya nako nga tabangan.

Akong nahibaloan kon si kinsa ang home teacher sa iyang anak nga babaye. Mahibaloan nimo pinaagi niana nga ngalan nga kadto dugay na kaayo. Gitawagan nako siya. Siya batan-on pa. Hinoon siya misulti nako nga siya ug ang iyang kompanyon nakamata nianang gabhiona nga wala lamang mabalaka alang sa babaye apan uban sa pasidaan nga siya hapit na mohimo og mga pagpili nga makadala og kaguol ug kaalaot. Pinaagi lang niana nga inspirasyon sa Espiritu, sila miadto aron makigkita kaniya.

Sa sinugdanan, dili siya gustong motug-an kanila kabahin sa iyang sitwasyon. Ubos sa inspirasyon, mihangyo sila kaniya sa paghinulsol ug sa pagpili sa pagsunod sa dalan nga giandam sa Ginoo alang kaniya. Dayon nakaamgo siya, mituo ko pinaagi sa Espiritu, nga ang bugtong paagi nga mahibaloan nila kon unsay ilang nahibaloan mahitungod sa iyang kinabuhi naggikan sa Dios. Gisalig sa maong batan-ong inahan ang iyang mahigugmaong mga kabalaka ngadto sa Langitnong Amahan ug sa Manluluwas. Ang Espiritu Santo gipadala niadtong mga home teacher tungod kay sila andam nga moserbsiyo sa Ginoo. Gisunod nila ang tambag ug saad nga anaa sa Doktrina ug mga Pakigsaad:

“Himoa usab ang inyong mga kasingkasing nga mapuno sa gugma nga putli ngadto sa tanan nga mga tawo, ug ngadto sa mga sakop sa pagtuo, ug himoa ang hiyas nga modayan-dayan sa inyong mga hunahuna nga walay paghunong; unya ang imong pagsalig mosamot pagkalig-on diha sa atubangan sa Dios; ug ang doktrina sa pagkapari motuhop diha sa imong kalag ingon sa mga yamog nga gikan sa langit.

“Ang Espiritu Santo mao ang inyong kauban sa kanunay, ug ang inyong pagmando usa ka dili mausabon nga pagmando sa pagkamatarong ug kamatuoran; ug ang inyong kamandoan mao ang usa ka walay kataposan nga kamandoan, ug walay pagpugos nga paagi kini mokanap nganha kanimo hangtod sa kahangtoran.”¹⁰

Ako mopamatuod nga ang Ginoo mituman sa Iyang saad. Ang Espiritu Santo gipadala ngadto sa mga matinud-anon sa pakigsaad nga mga miyembro sa Simbahan ni Jesukristo. Karon, ang inyong mga kasinatian talagsaon, ug ang Espiritu mogiya kaninyo sa dalan nga haom kaayo sa inyong hugot nga pagtuo ug kapasidad sa pagdawat og pagpadayag alang kaninyo ug niadtong inyong gihigugma ug giserbisyohan. Ako nag-ampo sa tibuok nakong kasingkasing nga ang inyong pagsalig molambo.

Ako mohatag sa akong pagsaksi nga ang Dios nga Amahan buhi. Siya nahigugma kaninyo. Siya naminaw sa inyong matag pag-ampo. Si Jesukristo nag-ampo gayod sa Amahan aron ipadala ang Espiritu Santo sa paggiya, paghupay, ug pagpamatuod sa kamatuoran ngari kanato. Ang Amahan ug ang Iyang Pinalanggang Anak mipakita ngadto ni Joseph Smith didto sa kakahoyan. Si Propeta Joseph Smith mihubad sa Basahon ni Mormon pinaagi sa gasa ug gahom sa Dios.

Ang Langitnong mga mensahero mipahiuli sa mga yawe sa pagkapari. Si Presidente Russell M. Nelson mao ang propeta sa Dios sa tibuok yuta.

Isip saksi ni Jesukristo, nahibalo ko nga Siya buhi ug nangulo sa Iyang Simbahan. Kamo ug ako adunay oportunidad nga makabaton sa Espiritu Santo isip atong kanunay nga kauban ug makompirma niadto nga mga kamatuoran samtang kita naghinumdom ug nahigugma sa Manluluwas, naghinulsol, ug naghangyo sa Iyang gugma nga maanaa sa atong mga kasingkasing. Ako nag-ampo nga kita makabaton niana nga panalangin ug sa pakig-uban sa Espiritu Santo karong adlawa ug sa matag adlaw sa atong kinabuhi. Gimahal ko kamo. Sa sagrado nga ngalan ni Jesukristo, amen.