Paghatag og Pagsaksi kang Jesukristo sa Pulong ug sa mga Buhat

Sa bunyag usa sa mga saad nga atong gihimo mao nga kita andam modala diha kanato sa ngalan ni Jesukristo. Ang akong katuyoan karon mao ang pagpahinumdom kanato nga kita makapakita sa Dios nga kita modala sa ngalan sa Iyang Anak diha sa atong mga kaugalingon pinaagi sa pagpamatuod sa pulong ug sa buhat, ug sa kanunay kutob sa atong mahimo, nga si Jesus mao ang Kristo.

Sa dihang nangalagad ug nagtudlo sa mga tawo didto sa Amerika human sa Iyang Pagkabanhaw, ang Manluluwas namahayag:

“Wala ba sila magbasa sa mga kasulatan, diin nag-ingon nga kamo kinahanglan modala nganha kaninyo sa ngalan ni Kristo, diin mao ang akong ngalan? Kay pinaagi niini nga ngalan kamo pagatawgon sa kataposan nga adlaw;

“Ug bisan kinsa nga modala nganha kaniya sa akong ngalan, ug molahutay hangtod sa kataposan, ang mao maluwas sa kataposan nga adlaw.”¹

Si Presidente Russell M. Nelson nagtudlo kanato nga ang “pagdala sa ngalan sa Manluluwas diha kanato naglakip sa pagpahayag ug pagsaksi ngadto sa uban—pinaagi sa atong mga lihok ug sa atong mga pulong—nga si Jesus mao ang Kristo.”²

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita adunay panalangin ug pribiliheyo sa pagbarog isip mga saksi sa Ginoo ug sa Iyang ngalan bisan asa kita.³ Samtang kita maningkamot sa pagpuyo sa atong kinabuhi nga nahiuyon sa ebanghelyo ni Jesukristo, ang atong gawi mahimong usa ka buhi nga pagpamatuod sa atong Manunubos ug sa Iyang ngalan. Dugang pa, kita mosaksi kang Kristo diha sa pulong pinaagi sa pagpakigbahin sa uban kon unsa ang atong gituohan, gibati, o nahibaloan bahin ni Jesukristo.

Kon kita mapainubsanon nga mopakigbahin sa atong pagpamatuod sa Ginoo pinaagi sa atong mga pulong ug mga buhat, ang Espiritu Santo mokompirmar⁴ ngadto niadtong adunay tinuod nga tumong, bukas nga mga kasingkasing, ug andam nga mga hunahuna nga si Jesus mao gayod ang Kristo.⁵

Ganahan ko nga mopakigbahin og duha sa bag-o lang ug makadasig nga mga ehemplo sa mga miyembro kinsa nagpakita ngadto sa Dios nga ilang gidala ang ngalan ni Jesukristo diha sa ilang kaugalingon pinaagi sa paghisgot bahin Kaniya ug sa paghatag og putli nga pagsaksi sa Ginoo diha sa mga miting sa Simbahan.

Unang ehamplo: Sa dihang ang akong asawa, si Elaine, ug ako miadto sa Spanya niadtong 2022, kami mitambong og mga miting sa Dominggo sa usa ka gamay nga yunit sa Simbahan didto. Samtang naglingkod ko diha sa atubangan ug ang akong asawa diha sa kongregasyon, akong nabantayan nga siya naglingkod tupad sa mas tigulang nga babaye. Sa dihang nahuman na ang miting sa sakramento, miduol ko paingon ni Elaine ug mihangyo kaniya nga ipa-ila-ila ko ngadto sa iyang bag-ong higala. Gibuhat niya ug mipasabot nga kini nga babaye, kinsa dili usa ka miyembro sa Simbahan, nagbisita sa Simbahan sulod na sa mga duha ka tuig. Sa dihang ako nakadungog niana, nangutana ko niining mahadlokon sa Dios nga babaye kon unsa man ang nakapabalik-balik kaniya ug motambong sa atong mga miting sulod sa ingon ka dugay nga panahon. Ang babaye mahigugmaon nga mitubag, “Ganahan ko nga moanhi tungod kay kamo namulong bahin ni Jesukristo diha sa inyong mga miting.”

Klaro kaayo, ang mga miyembro sa Simbahan niana nga yunit sa Spanya, mihisgot, mitudlo, ug mipamatuod bahin ni Kristo diha sa ilang mga miting.

Ikaduha nga ehemplo: Human sa pagserbisyo didto sa Brazil Area, nakadawat ko og bag-o nga buluhaton sa pagserbisyo sa punoang buhatan sa Simbahan. Sa dihang mibalhin kami ngadto sa Siyudad sa Salt Lake sa kataposan sa Hulyo niining tuiga, mitambong kami og mga miting sa Domiggo ngadto sa among bag-o ug maanindot nga ward. Usa niini nga mga miting mao ang miting sa pagpuasa ug pagpamatuod. Human sa matinahoron nga pag-ambit sa sakramento, ang mga miyembro nagbanos-banos sa pagbarog ug sa paghatag og kinasingkasing nga mga pagpamatuod bahin sa Maluluwas. Ang miting nakasentro diha ni Jesukristo, ug klaro namong mabati ang Espiritu. Kami nadasig, ug ang among hugot nga pagtuo napalig-on. Kon ang mga higala sa Simbahan, nga matinuoron nga nangita sa kamatuoran, nakaadto niana nga miting, ilang mailhan nga kini ang Simbahan ni Jesukristo.

Pagkanindot nga panalangin nga makita nga ang atong mga miting sa Simbahan mao ang pinili nga mga oportunidad alang kanato sa pagpamatuod ni Kristo ug mosinyas ngadto sa Dios nga kita nagmaya sa pagdala sa ngalan sa Iyang Anak ngari kanato.

Karon, tugoti ko sa paghisgot og usa ka gamhanan nga ehemplo sa pagdala ngari kanato sa ngalan ni Jesukristo pinaagi sa paghatag og pagpamatuod bahin Kaniya pinaagi sa mga buhat.

Sa miaging Agosto, gikuyogan nako si Elder Jonathan S. Schmitt ngadto sa open house sa Feather River California Temple didto sa Yuba City. Didto, nakabaton ako panalangin sa paggiya og mga grupo diha sa usa ka paglibot sa templo. Usa niini nga mga grupo naglakip sa usa ka miyembro sa Simbahan, si Virgil Atkinson, ug pito ka higala sa lain nga tinuohan. Sa pagtapos na sa pagbisita, diha sa usa ka lawak sa pagselyo sa templo, si Brother Atkinson naemosyonal samtang siya mipahayag sa iyang gugma alang sa iyang mga higala kinsa miadto sa templo nianang adlawa. Hapit dihadiha dayon human nga siya mibuhat sa ingon, usa ka babaye diha sa grupo mibarog ug miingon, “Kaming tanan nagmahal ni Virgil. Wala gayod niya gipugos ang iyang tinuohan ngari kanamo. Apan wala usab niya gikaulaw ang mahitungod niini. Siya nagsunod lang gayod kon unsa ang iyang gituohan.”

Paglabay sa katuigan, ang Kristohanon nga pagpakabuhi ni Brother Atkinson nagsilbi isip usa ka gamhanan nga pagpamatuod ngadto sa iyang mga higala. Ang iyang ehemplo usa ka lig-on nga ebidensiya nga gidala niya sa iyang kaugalingon ang ngalan ni Kristo.

Sa pagtapos, tugoti ko nga mopakigbahin sa leksiyon nga akong nakat-onan mahitungod kon unsaon sa pagdala ngari kanato ang ngalan ni Kristo ug mopamatuod kabahin Kaniya pinaagi sa paggamit sa husto nga ngalan sa Simbahan.

Si Presidente Nelson, ang buhi nga propeta sa Dios, niadtong 2018 nga kinatibuk-ang komperensiya sa pakigpulong nga giulohan og “Ang Sakto nga Ngalan sa Simbahan,” miingon: “Kini mao ang usa ka pagkoriher. Kini mao ang sugo sa Ginoo. Si Joseph Smith wala mingalan sa gipahiuli nga Simbahan pinaagi kaniya; mao usab si Mormon. Ang Manluluwas Mismo ang nag-ingon, ‘Kay sa ingon ang akong simbahan pagatawgon sa katap[o]san nga mga adlaw, gani Ang Simbahan ni Jesukristo sa mga Santos sa Ulahing mga Adlaw’ [Doktrina ug mga Pakigsaad 115:4].”⁶

Kaming tanan mibiya sa kinatibuk-ang komperensiya nianang adlawa nga mapasaligon ug determinado sa pagsunod sa propeta ug sa paggamit sa gipadayag nga ngalan sa Simbahan sukad niadto. Akoa gayod nga gibantayan ang akong kaugalingon aron sa pagseguro nga akong gigamit ang husto nga ngalan sa Simbahan. Sa unang pipila ka higayon, kinahanglan ko nga magmahunahunaon sa hilabihan ug dili itugot ang akong kaugalingon sa pagbalik sa mga pamaagi kaniadto. Human sa unang mga pagsulay, mibati ko og dugang kakomportable sa paggamit sa gipadayag nga ngalan sa Simbahan. Moangkon ko nga sa makadaghang higayon, paspas kaayo nakong gisulti ang ngalan sa Simbahan. Mibati ko og kabalaka nga ang mga tawo dili mohatag og pagtagad sa tibuok ngalan sa Simbahan ug nga sila tingali maghunahuna nga medyo taas kaayo kini.

Apan, sa kadugayan akong naamgohan nga ang pagsulti sa tibuok ngalan sa Simbahan nga adunay tumong nakahatag nako og bililhon nga mga oportunidad sa pagsulti sa ngalan ni Jesukristo ug sa pagkatinuod mohatag og pagpamatuod sa Manluluwas pinaagi sa pagpamahayag sa Iyang ngalan diha sa ngalan sa Iyang Simbahan. Akoa usab nabantayan nga kon ako mosulti sa sakto nga ngalan sa Simbahan ngadto sa uban, mas kanunay nakong mahinumdoman si Jesukristo ug mibati sa Iyang impluwensiya sa akong kinabuhi.

Pinaagi sa pagsunod sa propeta, kitang tanan makakat-on nga mas magpamatuod ni Jesukristo pinaagi sa paggamit sa husto nga ngalan sa Simbahan, busa modala ngari kanato sa mas hingpit sa ngalan sa Ginoo.

Niining kabuntagon sa Igpapahulay, ako malipayong mopamatuod nga si Presidente Nelson mao ang buhi nga propeta sa Dios ug nga Ang Simbahan ni Jesukristo sa mga Santos sa Ulahing mga Adlaw mao ang gipahiuli nga Simbahan ni Kristo. Ako mapaubsanon nga mosaksi sa Anak sa Dios ug sa Iyang kabalaan. Siya ang Unang Anak sa Dios ug ang Bugtong Anak, atong Manluluwas ug Manunubos, ang Emmanuel.⁷ Sa ngalan ni Jesukristo, amen.