Mga Importanteng Panghitabo sa Ika-193 nga Matag Tunga sa Tuig nga Kinatibuk-ang Komperensiya

Ang lingkoranan ni Presidente Russell M. Nelson nagpabilin nga walay naglingkod atol sa kinatibuk-ang komperensiya, apan ang mga miyembro sa Simbahan nagmaya nga nakadawat og tambag ug pagpamatuod gikan sa 99 anyos nga propeta sa pagkahuman sa kataposang sesyon pinaagi sa girekord nang daan nga mensahe.

Si Presidente Nelson miingon nga ang kasakit tungod sa bag-ong kadaot sa likod nakapadugang sa iyang “pagpasalamat alang ni Jesukristo ug sa dili matugkad nga gasa sa Pag-ula.” Sa pag-awhag sa mga miyembro sa “paghunahuna og celestial,” siya mipakigbahin og mga butang nga iyang nakat-onan mahitungod sa “hingpit nga plano” sa Langitnong Amahan:

• “Ang mga butang gayod nga makapahimo sa inyong mortal nga kinabuhi nga labing maayo nga kini mahimo mao gayod ang samang mga butang nga makapahimo sa inyong kinabuhi hangtod sa kahangtoran nga labing maayo nga kini mahimo!”

• “Ang inyong mga pagpili karon motino og tulo ka butang: asa kamo magpuyo hangtod sa kahangtoran, ang matang sa lawas nga kamo mabanhaw, ug kadtong inyong ikauban sa pagpuyo sa kahangtoran” (pahina 117).

Si Presidente Dallin H. Oaks misaksi sa kahimayaan nga naghulat sa matinud-anon nga mga Santos (tan-awa sa pahina 26). Si Presidente Henry B. Eyring mipamatuod sa giya sa Espiritu Santo nga gisaad ngadto sa takos nga mga Santos (tan-awa sa pahina 92; tan-awa usab kang Elder Stevenson, pahina 42). Ug si Presidente M. Russell Ballard mihatag og gamhanan nga pagpamatuod sa kang Propeta Joseph Smith nga “mahimayaong responsibilidad nga nahimong propeta … sa dispensasyon sa kahingpitan sa mga panahon.” (pahina 74).

Ang mga mamumulong sa komperensiya mitudlo nga ang atong labing importante nga mga pagpili sa pagka-mortal nasentro diha ni Ginoong Jesukristo ug sa pagkamasulundon sa Iyang mga sugo, lakip sa balaod sa ikapulo (tan-awa kang Presidente Nelson ug Elder Andersen, mga pahina 117 ug 32). Nagtudlo usab sila nga kita makakaplag og kalipay, pagkaayo, ug paglaom pinaagi sa Manluluwas samtang kita mopadayon diha sa dalan sa pakigsaad (tan-awa kang Elder Bednar, Godoy, Choi, ug Cook, mga pahina 6, 16, 46, ug 82; Brother Newman, pahina 36; ug kang Sister Wright, Freeman, ug Runia, mga pahina 9, 76, ug 62) ug “atong mapadayag ang atong mga pasalig sa pagkigsaad sa sakramento ngadto ni Jesukristo ug sa matag usa pinaagi sa atong mga calling sa Simbahan, pag-inigsoonay, pagpakigdait, ug pagserbisyo.” (Elder Gong, pahina 111).

Ang mga lider sa Simbahan miawhag sa mga miyembro sa pagdawat “sa gasa sa paghinulsol” (Elder Renlund, pahina 96; tan-awa usab kang Presidente Eyring ug Elder Uchtdorf, mga pahina 92 ug 86). Nagtudlo sila nga ang Pagpahiuli naghatag og kahayag sa atong “balaan nga kinaiya, kabilin, ug potensyal,” (Elder Soares, pahina 70; tan-awa usab kang Elder Phillips, Giraud-Carrier, ug Sabin, mga pahina 49, 114, ug 56). Ug ilang gipahinumdoman ang mga Santos sa Ulahing mga Adlaw “aron mapundok ang Israel kita nagkinahanglan og mga misyonaryo—mas daghan pa kaysa nagserbisyo,” ilabi na sa senior nga mga magtiayon (Elder Rasband, pahina 52; tan-awa usab kang Elder Parrella, pahina 80).

Sa pagpahibalo sa pagtukod sa 20 ka bag-ong templo, si Presidente Nelson miingon, “ang inyong pagserbisyo ug pagsimba diha sa templo motabang ninyo sa paghunahuna og celestial” (pahina 117; tan-awa usab kang Elder Christofferson ug Esplin, mga pahina 19 ug 108).