Paghunahuna og Celestial!

Minahal kong kaigsoonan, mapasalamaton kaayo ko nga mamulong kaninyo karon. Sa akong edad, ang matag adlaw magdala og talagsaon ingon man usab ka mahagitong mga sorprisa. Tulo ka semana ang milabay, nadaot ang akong kaunoran sa likod. Mao nga, samtang ako nakahatag og sobra sa 100 ka pakigpulong sa kinatibuk-ang komperensiya nga nagtindog, karon naghunahuna ko nga himoon nako nga maglingkod. Ako nag-ampo nga ang Espiritu modala sa akong mensahe nganha sa inyong mga kasingkasing.

Ako bag-o lang nagsaulog sa akong ika-99 nga adlaw nga natawhan sa ingon nagsugod na ang akong ika-100 nga tuig sa pagpakabuhi. Ako kanunay nga gipangutana sa sekreto sa taas nga kinabuhi. Ang mas maayo nga pangutana mao ang “Unsay akong nakat-onan sa dul-an sa usa ka siglo nga pagpakabuhi?”

Ang panahon karon dili makatugot nako sa pagtubag sa hingpit niana nga pangutana, apan ako mopakigbahin og usa sa labing importante nga mga leksiyon nga akong nakat-onan.

Akong nakat-onan nga ang plano sa Langitnong Amahan alang nato talagsaon, nga unsay atong gihimo niini nga kinabuhi importante gayod, ug nga ang Pag-ula sa Manluluwas maoy nakapahimong posible sa plano sa Amahan.¹

Samtang nakigbisog ako sa grabe nga kasakit tungod sa bag-ong kadaot sa akong lawas, akong gibati ang mas lawom nga pagpasalamat alang ni Jesukristo ug sa dili matugkad nga gasa sa Pag-ula. Hunahunaa kana! Ang Manluluwas nag-antos sa “mga sakit ug kasakit ug mga pagtintal sa matag matang”² aron nga Siya makahupay kanato, makaayo kanato, makaluwas kanato, sa mga panahon sa panginahanglan.³ Si Jesukristo mihulagway sa Iyang kasinatian didto sa Getsemani ug sa Kalbaryo: “Kansang pag-antos nakapahimo sa akong kaugalingon, gani ang Dios, ang labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit.”⁴ Ang akong kadaot nakapahinuklog nako pag-usab ug pag-usab sa “pagkawalay kataposan nianang Usa nga Balaan sa Israel.”⁵ Atol sa akong pagkaayo, ang Ginoo mipakita sa Iyang balaan nga gahom sa kalinaw ug walay pagkasayop nga mga paagi.

Tungod sa walay kinutoban nga Pag-ula ni Jesukristo, ang plano sa Langitnong Amahan usa ka hingpit nga plano! Ang pagsabot sa katalagsaon sa plano sa Dios mokuha sa walay kaseguroan sa wala pagkahibalo sa katuyoan sa atong kinabuhi ug sa ka walay kaseguroan gikan sa atong umaabot. Kini makatugot sa matag usa nato sa pagpili sa unsang paagi kita magpuyo dinhi sa yuta ug asa kita magpuyo sa kahangtoran. Ang walay basehanan nga pagtuo nga kita kinahanglan nga “[mo]kaon, [mo]inom, ug [mag]lipay, kay ugma kita mamatay; ug kini maayo alang kanato”⁶ mao ang usa binuang nga mga bakak sa uniberso.

Aniay nindot nga mga balita sa plano sa Dios: ang mga butang gayod nga makapahimo sa inyong mortal nga kinabuhi nga labing maayo nga kini mahimo mao gayod ang samang mga butang nga makapahimo sa inyong kinabuhi hangtod sa kahangtoran nga labing maayo nga kini mahimo! Karon, sa pagtabang kaninyo nga makaangkon sa buhong nga mga panalangin nga giandam sa Langitnong Amahan kaninyo, ako modapit kaninyo sa pagbansay sa “paghunahuna og celestial!”⁷ Ang paghunahuna og celestial nagpasabot nga espirituwal nga maghunahuna. Kita nakat-on gikan sa propeta sa Basahon ni Mormon nga si Jacob nga ang “pagka-espirituhanon sa hunahuna mao ang kinabuhing dayon.”⁸

Ang pagka-mortal mao ang usa ka master nga klase sa pagkat-on sa pagpili sa mga butang nga adunay dakong bili. Daghan kaayong tawo nagpakabuhi ingon og kining kinabuhia mao ang tanan. Apan, ang inyong mga pagpili karon motino og tulo ka butang: asa kamo magpuyo hangtod sa kahangtoran, ang matang sa lawas nga kamo mabanhaw, ug kadtong inyong ikauban sa pagpuyo sa kahangtoran. Mao nga, paghunahuna og celestial.

Sa akong unang pakigpulong isip Presidente sa Simbahan, Ako miawhag kaninyo nga mosugod nga maghunahuna sa sangpotanan. Kini nagpasabot sa paghimo sa celestial nga gingharian nga inyong mahangtorong tumong ug dayon mabinantayong mokonsiderar asa kamo ibutang sa sunod kinabuhi sa inyong matag desisyon samtang ania sa yuta.⁹

Ang Ginoo klaro nga mitudlo nga ang mga lalaki ug mga babaye lamang kinsa naselyo isip bana ug asawa diha sa templo, ug kinsa mituman sa ilang mga pakigsaad, ang magkauban sa tibuok kahangtoran. Siya miingon: “Ang tanan nga mga pakigsaad, mga kasabotan, mga kauyonan, mga katungdanan, mga panumpa, mga binuhatan, mga kabanay, mga pagkakauban, o mga paglaom, nga wala nahimo ug nasulod ngadto ug nabugkos pinaagi sa Espiritu Santo sa saad … adunay kataposan kon ang mga tawo patay na.”¹⁰

Sa ingon, kon kita dili malaamong mopili nga mopuyo sa telestial nga mga balaod karon, kita nagpili nga mabanhaw sa telestial nga lawas. Kita nagpili nga dili mopuyo uban sa atong mga pamilya sa kahangtoran.

Mao nga, minahal kong kaigsoonan, unsaon ug asa ug uban ni kinsa kamo gusto nga magpuyo sa kahangtoran? Kamo may kahigayonan sa pagpili.¹¹

Kon kamo mohimo og mga pagpili, ako modapit kaninyo sa pagtan-aw sa taas nga panglantaw—usa ka mahangtoron nga panglantaw. Unaha si Jesukristo, tungod kay ang inyong kinabuhing dayon nagdepende sa inyong hugot nga pagtuo diha Kaniya ug sa Iyang Pag-ula.¹² Nagdepende usab kini sa inyong pagkamasulondon sa Iyang mga balaod. Ang pagkamasulundon naglig-on sa agianan alang sa usa ka malipayon nga kinabuhi alang kaninyo karon ug sa halangdon, mahangtoron nga ganti ugma.

Kon kamo mag-atubang og problema, paghunahuna og celestial! Kon gisulayan sa tentasyon, paghunahuna og celestial! Kon ang kinabuhi o mga minahal mopahugno kaninyo, paghunahuna og celestial! Kon adunay namatay nga “dili pa panahon,” paghunahuna og celestial. Kon adunay usa ka tawo nga nag-antos sa makapahugno nga sakit, paghunahuna og celestial. Kon ang mga pagpamugos sa kinabuhi nag-abot diha kaninyo, paghunahuna og celestial! Samtang kamo magpaayo gikan sa usa ka aksidente o kadaot sama sa akong gibuhat karon, paghunahuna og celestial!

Samtang kamo motutok sa paghunahuna og celestial, paabota nga makasugat og oposisyon.¹³ Mga dekada na ang nakalabay, usa ka propesyonal nga kauban misaway nako sa “sobrang paghunahuna mahitungod sa templo” ngari nako, ug labaw sa usa ka superbisor misilot kanako tungod sa akong pagtuo. Ako nakombinser, hinuon, nga ang paghunahuna og celestial nakapalambo sa akong panarbaho.

Samtang kamo maghunahuna og celestial, ang inyong kasingkasing hinayhinay nga mausab. Kamo ganahan nga mas mag-ampo sa kanunay ug mas sinsero. Palihog ayaw itugot nga ang inyong mga pag-ampo mahisama sa usa ka lista sa pamaliton. Ang panglantaw sa Ginoo molabaw sa inyong mortal nga kaalam. Ang Iyang tubag sa inyong mga pag-ampo makasorprisa ninyo ug motabang ninyo sa paghunahuna og celestial.

Hunahunaa ang tubag sa Ginoo ngadto ni Joseph Smith sa dihang nangayo siya og kahupayan didto sa bilanggoan sa Liberty. Ang Ginoo mitudlo sa Propeta nga ang walay kaluoy nga pagtagad kaniya mohatag kaniya og kasinatian ug alang sa iyang kaayohan.¹⁴ “Kon ikaw molahutay pag-ayo,” ang Ginoo misaad, “ang Dios mobayaw kanimo sa kahitas-an.”¹⁵ Ang Ginoo nagtudlo ni Joseph sa paghunahuna og celestial ug sa pag-aninaw og usa ka mahangtorong ganti kay sa motutok sa hilabihan nga mga kalisod sa panahon. Ang atong mga pag-ampo—ug kinahanglan nga mao—ang buhi nga mga panaghisgot uban sa atong Langitnong Amahan.

Samtang kamo maghunahuna og celestial, inyong makaplagan ang inyong kaugalingon nga naglikay sa bisan unsa nga mosakmit sa inyong kabubut-on. Ang bisan unsa nga adiksyon—dula, sugal, utang, drugas, alkohol, kasuko, pornograpiya, sekso, o bisan pagkaon—makapasilo sa Dios. Ngano? Tungod kay ang inyong obsesyon mahimo ninyong dios. Kamo nagtan-aw ngadto niini imbis ngadto Kaniya alang sa kahupayan. Kon kamo nakigbisog og adiksyon, tinguhaa ang espirituwal ug propesyonal nga tabang nga inyong gikinahanglan. Palihog ayaw tugoti ang obsesyon nga mohikaw ninyo sa inyong kagawasan sa pagsunod sa talagsaong plano sa Dios.

Ang paghunahuna og celestial motabang usab ninyo sa pagsunod sa balaod sa kaputli. Pipila ra ka butang ang mas daling makakomplikar sa inyong kinabuhi kaysa pagsupak niining balaan nga balaod. Alang niadtong kinsa nakahimo og mga pakigsaad uban sa Dios, ang pagka-imoral mao ang usa ka labing dako nga mga paagi nga mawala ang inyong pagpamatuod.

Daghan sa labing walay puas nga mga tentasyon sa kaaway naglakip sa mga pagsupak sa moral nga kaputli. Ang gahom sa paglalang og kinabuhi mao ang usa ka pribilihiyo sa pagkadios nga gitugot sa Langitnong Amahan nga buhaton sa Iyang mortal nga mga anak. Sa ingon, ang Dios mihimo og klaro nga mga lagda sa paggamit niining buhi, balaan nga gahom. Ang pisikal nga kasuod alang lamang sa usa ka lalaki ug usa ka babaye kinsa naminyo ngadto sa usag usa.

Kadaghan sa kalibotan dili motuo niini, apan ang opinyon sa publiko dili maoy basihanan sa kamatuoran. Ang Ginoo mipahayag nga walay dili putli nga tawo ang makaabot sa celestial nga gingharian. Mao nga kon kamo mohimo og mga desisyon kabahin sa moralidad, palihog paghunahuna og celestial. Ug kon kamo dili putli, ako mohangyo kaninyo sa paghinulsol. Duol ngadto ni Kristo ug dawata ang Iyang saad sa kompleto nga pagpasaylo samtang kamo hingpit nga maghinulsol sa inyong mga sala.¹⁶

Samtang kamo maghunahuna og celestial, inyong tan-awon ang mga pagsulay ug oposisyon pinaagi sa bag-o nga kahayag. Kon adunay usa nga inyong gihigugma moataki sa kamatuoran, paghunahuna og celestial, ug ayaw iangin ang inyong pagpamatuod. Si Apostol Pablo nanagna nga “sa umaabot nga panahon may mga tawo nga mamiya sa ilang pagtuo, maoy ilang sundon ang mga limbongang espiritu ug ang mga pagtulon-an sa mga yawa.”¹⁷

Wala nay kataposan ang pagpanglimbong sa kaaway. Palihog pangandam. Ayaw gayod pangayog tambag niadtong kinsa wala motuo. Pangita og giya gikan sa mga tingog nga inyong kasaligan—gikan sa mga propeta, mga manalagna, ug mga tigpadayag, ug gikan sa mga pag-aghat sa Espiritu Santo, kinsa “mopakita nganha kaninyo sa tanan nga mga butang nga kinahanglan ninyong buhaton.”¹⁸ Palihog paghimo og espirituwal nga buhat aron madugangan ang inyong kapasidad sa pagdawat og personal nga pagpadayag.¹⁹

Samtang maghunahuna kamo og celestial, ang inyong hugot nga pagtuo molambo. Sa dihang usa pa ko ka batan-ong intern, ang akong suweldo mga $15 kada bulan. Usa ka gabii, ang akong asawa nga si Dantzel nangutana kon ako nagbayad ba og ikapulo nianang gamay nga suhol. Ako wala magbayad. Dali kong naghinulsol ug nagsugod sa pagbayad og dugang $1.50 sa binulan nga ikapulo.

Ang Simbahan nahimong lahi ba tungod kay among gidugangan ang among ikapulo? Sa tinuod wala. Apan, ang pagkahimong hingpit nga tigbayad sa ikapulo nakapausab nako. Mao kadto nga ako nakakat-on nga ang pagbayad og ikapulo mahitungod ang tanan sa hugot nga pagtuo, dili sa kwarta. Isip usa ka hingpit nga tigbayad sa ikapulo, ang mga tamboanan sa langit nagsugod sa pag-abli ngari kanako. Akong gipahinungod ang daghang misunod nga propesyonal nga mga oportunidad sa among matinud-anong pagbayad sa mga ikapulo.²⁰

Ang pagbayad sa ikapulo nagkinahanglan og hugot nga pagtuo, ug kini usab naglig-on sa hugot nga pagtuo diha sa Dios ug sa Iyang Pinalanggang Anak.

Ang pagpili nga magpuyo og mahiyason nga kinabuhi sa usa ka kalibotan nga nagpasulabi mahitungod sa sekswal ug politikal makapalig-on sa hugot nga pagtuo.

Ang paggahin og dugang panahon sa templo makapalig-on sa hugot nga pagtuo. Ug ang inyong pagserbisyo ug pagsimba diha sa templo motabang ninyo sa paghunahuna og celestial. Ang templo maoy usa ka dapit sa pagpadayag. Didto gipakita ninyo unsaon sa pag-uswag ngadto sa celestial nga kinabuhi. Didto kamo mas mapaduol ngadto sa Manluluwas ug hatagan og mas dakong akses sa Iyang gahom. Didto giyahan kamo sa pagsulbad sa mga problema sa inyong kinabuhi, bisan sa inyong labing makahasol nga mga problema.

Ang mga ordinansa ug mga pakigsaad sa templo adunay mahangtoron nga kahulogan. Kita magpadayon sa pagtukod og dugang nga mga templo aron sa paghimo niining sagrado nga mga posibilidad nga mahimong tinuod sa matag usa sa inyong kinabuhi. Karon, ako mapasalamaton nga mopahibalo sa among mga plano sa pagtukod og bag-o nga templo sa matag usa niining mosunod nga 20 ka dapit:

• Savai’i, Samoa

• Cancún, Mexico

• Piura, Peru

• Huancayo, Peru

• Viña del Mar, Chile

• Goiânia, Brazil

• João Pessoa, Brazil

• Calabar, Nigeria

• Cape Coast, Ghana

• Luanda, Angola

• Mbuji-Mayi, Democratic Republic of the Congo

• Laoag, Philippines

• Osaka, Japan

• Kahului, Maui, Hawaii

• Fairbanks, Alaska

• Vancouver, Washington

• Colorado Springs, Colorado

• Tulsa, Oklahoma

• Roanoke, Virginia

• Ulaanbaatar, Mongolia

Ang Ginoo naggiya kanato sa pagtukod niini nga mga templo aron sa pagtabang nato sa paghunahuna og celestial. Ang Dios buhi. Si Jesus mao ang Kristo. Ang Iyang Simbahan gipahiuli aron sa pagpanalangin sa tanang mga anak sa Dios. Ako sa ingon mopamatuod pinaagi sa sagradong ngalan ni Jesukristo, amen.