40 feiā mo’a—40 ha’amaita’ira’a—E ’ere i te tano nei !

E aura’a taipe te nūmera 40 nō te mau Hebera tahito. I roto i te mau pāpa’ira’a mo’a, ’ua fa’ahitihia te reira e 146 taime, ’e e nehenehe e hi’ohia mai te ‘hō’ē tau roa’. ’Ei hi’ora’a, ’ua ora Mose e 40 matahiti i ’Aiphiti, i muri iho e 40 matahiti i roto i te mētēpara i te fa’aorara’a ’oia i tōna mau ta’ata i te fa’atītīra’a. ’Ua ha’apae te Fa’aora e 40 mahana i muri a’e i te fa’ahemara’ahia ’oia e te diabolo, ’e tē vai atu ra. Nō te feiā mo’a nō te mau motu Kūki ’airāni, e rave rahi tei tīa’i maoro mau nō te fāri’i i tō rātou ha’amaita’ira’a patereāreha—’e i te ’āva’e ’Ēperēra 2023, e 40 melo tei fāri’i i tō rātou ha’amaita’ira’a. E rave rahi temeio tei ’ite-pāpū-hia i te reira hepetoma ta’a ’ē.

I te matahiti i ma’iri a’enei, i tō te feiā fa’atere nō te misiōni nō Auckland i Niutirani ’ōpuara’a e haere i te mau motu ātea nō Kūki ’airāni, nō te ’āmuira’a ono ’āva’e a te mata’eina’a, ’ua ani manihini rātou i te patereāreha nō te titi nō Harbour Auckland i Niutirani, ia Steve Stebbings, ’ia ’āmui mai ia rātou ’ei rāve’a nō te mau melo ’ia fāri’i i tō rātou ha’amaita’ira’a patereāreha.

’Ua tae te patereāreha Stebbings ’e tāna vahine ’o Kathy, ’o tōna ato’a ho’i pāpa’i parau, i terā fenua nā roto i te vero rahi. E vero e fa’atarapape i te mana’o ’ia hāhaere nā rapae’au… ’Aita roa ïa. Ma te ’oa’oa, ’ua vaiiho e piti taure’are’a misiōnare i tō rāua pere’o’o i te patereāreha Stebbings ’e i te tuahine Stebbings, nō rāua i te reira motu. E ’oa’oa rahi tō te mau misiōnare ’ia fa’a’ohipa i tō rāua pere’o’o tāta’ahi nō te hepetoma.

’Ua tae mai te feiā mo’a i roto i teie ua rahi… ma te ’ā’au māuruuru ’e te ’ana’anatae nō teie ’ohipa. ’Ua haere mai rātou nō te fa’aro’o ’e nō te putapū i te here o tō rātou Metua i te ao ra ’e o tāna Tamaiti ’o Iesu Mesia. ’Ua haere mai rātou nō te ’apo rahi mai nō ni’a i tō rātou fāito pūai ’e te mau ha’amaita’ira’a ’o tā te Fatu i fa’aherehere nō rātou tāta’itahi. ’Ua tāmau noa te ta’ata i te haere mai—e mea pūai te Vārua ’e ’ua ’ite ora ’o Stebbings mā i terā ’oa’oa marū ’o tē tae mai nā roto i te tāvinira’a i te Fatu.

’Ua mātau te patereāreha Stebbings i te hōro’a e maha a’e ha’amaita’ira’a i te hepetoma ; ’ua mana’o ’oia e uiui ’e e ha’amaita’i 15 ē tae atu i te 20 ta’ata, ’ua maere rahi atu ā ’oia e 40 melo, mai te 12 matahiti ē tae atu i te 74 matahiti, tei haere mai nā te mau motu i rāpae’au ia Raroto’a, nō te fāri’i i tō rātou ha’amaita’ira’a.

’Ua parau te tuahine Stebbings ē, po’ipo’i roa rāua i te ’ohipa, i te mau po’ipo’i ato’a, ’e ’ua fa’oti i te maorora’a pō—’e noa atu tō rāua rohirohi, ’ua turu ’e ’ua ha’apūai te Fatu ia rāua nō te rave fa’a’oti i te ’ohipa tā rāua i rave.

’Ua ha’amata teie ’ohipa i te ’āva’e Fepuare 2023, i te taera’a Elder Doneal White ’e te tuahine Claudia White i te mau motu Kūki ’airāni nō tāvini i te hō’ē misiōni, ’aita e patereāreha nō te titi i reira. I te hō’ē ha’api’ira’a séminaire i te po’ipo’i roa, ’ua fa’aro’o rāua ē, ’ua parau 14 pīahi i tō rātou ’orometua ē ’aita rātou i fāri’i i tō rātou ha’amaita’ira’a patereāreha. ’Ua ha’amata iho ra te huira i te ’ōhu, ’e ’aita i maoro i muri mai ’ua fa’ati’ahia te patereāreha Stebbings ’ia haere i te mau motu Kūki ’airāni nō te hōro’a i te mau ha’amaita’ira’a i hina’arohia.

Tē parau ra Elder ’e te tuahine White ē, ’ua pure rāua nō Stebbings ma i reira—i te mau motu Kūki ’airāni, ’e tano roa te taime—e ’āmuira’a mata’eina’a i taua taime ra ’e e taime fa’afa’aeara’a ha’api’ira’a—hau atu e tū’aro tu’era’a pōpō nā te feiā ’āpī nō te fenua i te hepetoma i muri iho, tei ’āfa’i mai e piti pupu melo nō te tata’ura’a—’e e nehenehe rātou e fāri’i i tō rātou ha’amaita’ira’a.

Tē parau ra te patereāreha Stebbings ē, e hōro’ahia te mau ha’amaita’ira’a patereāreha i te mau melo ti’a mā o te ’Ēkālesia ’e tei roto te mau parau a’o a te Atua nō te ta’ata iho. « ’Ua riro teie ha’amaita’ira’a mai te hō’ē tāreta arati’a ’o tē tauturu i te arata’i atu i te ta’ata i te roara’a o tōna orara’a », ’ua parau ’oia.

« ’Ei patereāreha, ’aita tā’u e ha’amaita’ira’a nō te hōro’a », te nā ’ō ra Stebbings tāne. « ’Ia tu’u ana’e au i tō’u nā rima i ni’a i te upo’o o te ta’ata, e fāri’i au nōna i te fa’aurura’a ’e te heheura’a nā roto i te mana o te Vārua Maita’i, ’o tōna atu ra ïa ha’amaita’ira’a ».

« ’Aita e ti’a i teie mau ha’amaita’ira’a ’ia tūfetu-maita’i-hia ’e ’ia ha’amo’ehia, ’aita ato’a e ti’a ’ia tu’uhia i roto i te vaira’a hōho’a ’aore rā ’ia ha’apararehia », ’ua parau Stebbings. « ’Ia tai’ohia te reira e ti’a ai, ’ia pe’ehia ’e ’ia herehia, ’e e ’āpe’e atu te reira i te ta’ata i roto i tōna mau pō pōiri mau ’e e arata’i iāna nā roto i te mau tuha’a ato’a o te orara’a. »