Te ’e’ā o te hō’ē tamāhine i te hiero

E rave rahi matahiti, ’ua ha’apa’o maita’i te hō’ē tamāhine ’āpī nō Vanuatu, ’o Marsela Tokalolo te i’oa, i te parau a’o a tōna metua tāne : « E fa’aea piri noa i te ’Evanelia a Iesu Mesia ’e e ha’afaufa’a i te ha’api’ira’a ».

Nō te faufa’a rahi o te ha’api’ira’a nō tōna metua tāne, ’ua ’āfa’i atu ’oia ia Marsela i te fare ha’api’ira’a i Fītī i te 12ra’a o tōna matahiti, ma te fa’atusia i te moni ’e ma te vaiiho i tāna tamāhine ’ia reva. I muri a’e i te fāri’ira’a i tāna parau tū’ite nō te ha’api’ira’a tuarua, ’e i muri iho i te fa’aotira’a i te fāito 13 i Fītī, ’ua ho’i atu Marsela i Vanuatu.

I Fītī, ’ua ’ite Marsela i te māramarama pae vārua i roto i tōna mau ’orometua, e rave rahi o rātou e parau tū’ite nō BYU-Hawaii.

I muri a’e i te tāvinira’a ’ei misiōnare nā te ’Ēkālesia i Firipino, nō tōna hina’aro e haere i BYU-Hawaii, ’ua fa’aitoito ’oia i tāna ’ohipa ’e ’ua fa’atusia nō tāna ha’api’ira’a, mai tā tōna metua tāne i a’o iāna.

’Ua arata’i Mariella Kaun, melo nō te ’Ēkālesia nō Vanuatu, ia Marsela i te ha’aputura’a i te moni nō tāna ha’api’ira’a. E tunu ’e e ho’o Marsela i te mau pai mei’a, te mau pai tirīmu ’e te Laplap, e mā’a nō te fenua Vanuatu.

Tē parau ra Marsela : « ’Ua ineine te mau melo [nō Te ’Ēkālesia a Iesu Mesia i te Feiā Mo’a i te mau Mahana Hope’a nei] ’e tō’u mau hoa i te turu iā’u, ma te ’ite ē e tauturu te reira iā’u ’ia haere i te ha’api’ira’a ».

’Ua tae’ahia ia Marsela tāna mau fā. ’Ua roa’a tāna parau tū’ite nō BYU-Hawaii, ’ua fārerei i tāna tāne ’e ’ua fa’aipoipohia i roto i te hiero nō Laie (Vaihī, Marite).

« Te fare o te Fatu ’o te [hō’ē] fare mo’a ïa », ’ua parau ’oia. « Tē ’āpe’e nei te Atua ia tātou i te roara’a o tō tātou tere i te orara’a nei ».

Tē patuhia ra te hō’ē hiero i Port Vila i Vanuatu.

Nō ni’a i te hiero ’āpī, tē parau ra Marsela : « Iā’u nei, e pāhonora’a teie i te pure. E fa’a’itera’a ē tē ha’ape’ape’a mau nei te Atua nō tāna mau tamari’i. E riro hope roa te hiero ’ei māramarama i roto i tō mātou nūna’a ».