Mwaakan Karaoan ae Raoiroi

Tariu ao mwaaneu aika kam tangiraki, I tangiri ngkami. I I kakatonga n reken te tai ni maroro ma ngke n te bong aei. I tataro n te bong koraki bwa kam na kamanoaki man ana kariiri te tia kakaitara ao ni karekea te korakora ni waaki nako rinanon kangaanga ake kam kaitarai.

Tabeua kataakira bon karawawata are bon tii ngaira ae ti kona n noori. Tabeua a kona n noraki irouia aomata. Te buaka ngkai i Eurobe mainiku bon teuana mai buakon baikai. I a tia n roko n te aba ae Ukraine ao Ruutia n taai aika a mwaiti. E bane nanou n aaba aikai, aomatana, ao aia taetae. I tang man tataro ibukiia aomata ake a rootaki n te itabaraara aei. Ngkai te Ekaretia ti kataia ni karaoa ara kabanea ni konaa ni buokiia aomata ake a rootaki ao ake a kataia ni kamanoi maiuia. Ti kaoia aomata nako bwa a na teimatoa n aki mamatam ao n tataro ibukiia aomata ake a rootaki nanoia n te buaka aei. Te buaka bon te iowawa ae kakamaaku ao ni kabane te Uea Iesu Kristo e tei ibukina ao ana anga reirei.

Akea ara kona ni kairii aaba ke aia mwakuri aomata ke aia mwakuri kaain ara utu. Ma ti kona n taua aroni maiura. Au kakaewenako te bong aio, tariu ao mwaneu aika a tangiraki, bwa kam na katoka te unraa are mena n nanom, ni mwengam, ao ni maium. Tauni ni kabane bwaai ao anua n iowawa nakoia aomata—n aron te kiunun, te wiimaai, te kairiribai nakon temanna ae e a tia n iowawa nakoimi. E tua nakoira te Uea bwa ti anga tabara are teuana,¹ ti na tangiria ara kairiribai, ao ti na tataro ibukiia naake a kabonganaira.²

E bon kammaraki kaakan te un are ti namakinna ni kakoaua. E taraa ni kangaanga kabwaraan aia bure aomata ake aia mwakuri aika aki riai a kammaraki nakoia ake akea aia aia kairua. Ma e ngae n anne, e reireira te Tia Kamaiu bwa ti na “kabwarai aia bure aomata nako.”³

Ngaira taan iriira Uean te Rau. E bati kainnanoana ngkai, ti kainnanoa te rau are bon tii mai i Rouna. Ti na kanga ni kantaninga te rau bwa e na mena n te aonnaba ngkana ti aki ukoukora te rau ma te inanoi inanon maiura? Tariu ao mwaneu, I ataia bwa e aki bebete au kakaewenako nakoimi. Ma taan iriira Iesu Kristo, a riai ni katea te banna ae tamaroa nakoia aomata. I buti ngkami bwa kam na kabanea ami kona ni katoki unraa aika a onoti ake a mena i nanomi ao ni maiumi.

N na kaota kakawakin karaoan nanon au kakaewenako aei man taekinan te iango are I noria n te takakaro ae te bwatiketiboro.

N te takakaro aei, e bibitaki te tiim ae taua mooa n ana bwi. Eng, nimaua te teekan imwain boon te tai n te moan itera, e rin ana booro te tia takakaro ae teniua bwiina. Ngke ti teuana te teekan nikiran te tai, e reke te booro iroun toana ao e rin raoi ana booro ngke e tang te bira! Ngaia are ngke a nako n aia tabo ni katauraoi ao aua rakan aia bwi ao e korakora te unga n nano. Ibukina bwa a kateimatoa tamaroan aia takakaro n te kauoua n itera ngaia are a tokanikai.

Te unga n nano bon te iango ae korakora. Ti a tia ni bane n rinanon aikai n te aro teuana ma teuana—n aron te katoto, te kaa are tabe ni butimwaaka ke te aki boraoi n iango are bitaki nakon te kauntaeka.

Ngkanne e kangai au titiraki, “Tera ae kona ni karika marurungin tamneira? Ti a tia n nori banna aika tamaroa ao aika buakaka. Ti kinaia taan iriira Iesu Kristo ake a rairaki ao man matoatoa aia onimaki. Ma ti kinaia naba kaain te ekaretia ake a bwaka. E kona n tio nako moa ao nako buki.

E bati kainnanoan mwakuri aika tamaroa ni kaitara kekeraken korakoran buren te aonaaba ma kanikina aika a bubuaka. Mwakuri aika a tamaroa a buokira inanon te maaku ao te tabeaianga are reke man te butinaoraki, tunami, rebwetauan te warekeno, ao te buaka. Korakoran te maiu n tamnei e kona ni kaitarai ana buaka Tatan aika a aki toki ao ni urua ana mwakuri ni kouta nako aan maiura ae raoiroi.

E bati kakamwakuri aika a kona ni karekei unga n nano n tamnei aika a tamaroa. Te ongeaba, te tangira, te nanorinano, te ibuobuoki, ao te kakaitau⁴ bon tabeua anua man aika bati.

N te bong aei I tangiria n anga nimaua kawai ike ti kona iai ni kateimatoa karaoan ae raoiroi.

Te moan: Toua kawain te berita ao tai kitanna.

Tabebong n nako, I mii bwa I kaitibo ma aomata aika a uanao. E bati aia titiraki nakoiu, teuana te titiraki ae okioki bwa tera kawain te berita ao bukin tera e rangi ni kakaawaki.

Inanon miiu, I kabwarabwara bwa ti rinnako ni kawain te berita n te bwabetito ao karaoan ara berita ae tabu ma te Atua.⁵ Ni katoa tai are ti kana te toa, ti berita kaua ni katokaa iaora aran te Tia Kamaiu, n aki toki n ururingnga, ma ni kawakin Ana tua nako.⁶ Ibukin aei, E berita te Atua bwa n taainako e na memena Tamneina iroura.

Imwin anne ti karaoi naba berita aika tabu n te tembora, ike ti karekei iai berita aika rietata riki. Otenanti ao berita aika a tabu a anganira te korakora ae tabu. Kawain te berita bon tii ngaia te kawai nakon te karietataaki ao te maiu ae akea tokina.

Inanon miiu, e titiraki te aine bwa tera aron te aomata ae e a tia n urui ana berita aika tabu n okirikaaki nakon te kawai anne. Kaekan ana titiraki, e uotai nakon au kauoua n iango:

Karekea kakukurein te rairannano n te bong koraki.

Kakaawakira te rairannano? E reirei Aramwa bwa “a na akea te bwai are ti na tataekinna ma ti ngkana e kaineti ma te rairannano ao onimakinan te Uea.”⁷ E kainnanoaki te rairannano mairoun te aomata ae e ataa te raoiroi ma te buakaka ngkana e tangira te mimitong ae akea tokina.⁸ Akea ae e okoro arona. N te kaotioti nakon te Burabeti Iotebwa Timiti, e boaia taan kairiiri ngkoa n te Ekaretia te Uea ibukin aki reiakinan te euangkerio nakoia natiia.⁹ Te rairannano boni kingin te rikirake. Te onimaki ae itiaki bon ngaia ae buokiira ni kawain te berita.

Taiaoka tai maaku ke n tataona am rairannano. E kukurei Tatan ngkana kam rawawata. Motika roona. Kanakoa ana taurekereke man maium! Waaki ngkai ni karekea te kimwareirei are e reke man katokan anua n aomata.¹⁰ E tangirira te Tia Kamaiu n taainako riki ngkana ti rairi nanora. E berita bwa “ane a na nako maunga, ao a na uotaki nako tabuki … ma e na aki nako au atataiaomata mai roum.”¹¹

Ngkana ko namakinna bwa ko aki kona ni manga okira kawakin te berita ao akea te kawai n oki rikaki, akea koauan iango akanne.¹² Reitaki ma am bitiobi ke am beretitenti n te mwaanga. Bon ana tia tei te uea ao e na buokiko ni karekea te kimwareirei man karaoan te rairannano.

Eng, te kauring: Okiran kawain te berita e aki nanonaki bwa e nang akea am kaangaanga. E matoa te kawai ao n tabetai ai aron tamwarakean te maunga ae rietaata.¹³ E ngae n anne, te rikirake aei, e karaokai bwa e na kataira ma n reiakinira, katamaroaira, ao ni buokira ni kaitiaki nanora. Bon tii ngaia te kawai ni karekea te karietataki. Temanna te burabeti¹⁴ e taekina “te kakabwaia ma te aro ni kukurei irouia ake a kaawakin ana tua te Atua. Bwa taraia, a kakabwaiaki ni bwaai ni kabane, n te maiu n rabwata ao n tamnei; ao ngkana a teimatoa ni kakaonimaki ni karokoa te toki ao a na butimwaeaki nako karawa … [ao] a na maeka ma te Atua n te aro ni kukurei ae aki totoki.”¹⁵

Karaoan ae raoiroi, ae raonaki ma te rairannano n te bong koraki bon ngaia ae kakorakora tamneira.

Au kateniua n iango: Reiakina rongorongon te Atua ma Ana mwakuri.

Teuana te kakaewenako ae ti kaitara ni bong aikai bon te rabakau n nora ana koaua te Atua ao ana kewe Tatan. Aei bukina ngkai e kauringira te Uea bwa ti na “tataro n taai nako, … bwa [ti] aonga n tokanikai i aon Tatan, ao … n aki reke ni baia ana toro Tatan ake a boutokaa ana mwakuri.”¹⁶

Mote bon te banna ae tamaroa n ataakin okoron te Atua ao Tatan. Ngke e roko Tatan ni kataa Moote, e kina te mwamwanaki ibukina bwa e a bon tibwa tia ni maroro ma te Atua. E waekoa n ataia Mote bwa bon Tatan aei, ao e kanakoa nako akuna.¹⁷ Ma e aki bwarannano Tatan, ma Mote e wetea te Atua ibukin karekean buokana. E reke irouna te korakora ao e kanakoa teuare buakaka eng, ni kangai, “Nako akuu, Tatan, bwa bon tii te Atua ae I toro i Rouna.”¹⁸

Ti riai n ira te banna aei. Kanakoa ana taurekereke Tatan mani maiumi! Taiaoka tai iria nako “marawan te nanokawaki ma te maraia ae aki totoki.”¹⁹

N te tai ae waekoa, te koaua ae aki kamwarakeaki n “ana taeka te Uea”²⁰ e na bobukitau. Ngaia are, e teretere katokan ana mwakuri Tatan: Bon neboan te Uea ao kamatebwaian Ana euangkerio. I buti ngkami bwa kam na karimoaa te Atua inanon maiumi. Anganna ami tai ae bati. Ngkana kam karaoa aei, kam na nora keeraken marurungin tamneimi.

Iango nambwa 4: Ukori ao kantaningai kakai.

E berita Moronaai nakoira bwa “te Atua e tuai n toki arona are Atuan te kakai.”²¹ Ni kabane koroboki aika tabu a kaota tauraoin te Uea ni buokia aomata ake a onimakinna.²² E bwena Taari ibukin Mote, e buoka Nibwaai ni karekei bwaatua buraati, ao e kaoka Ana Ekaretia rinanon te Burabeti Iotebwa Timiti. E bane te tai ae bati imwain rikin kakai aikai ao tabo bon tiaki aei ae a bubuti aomata mairoun te Uea.

N aron naba aei, e na kakabwaiako te Uea ngkoe ma kakai ngkana kam kakoaua, “ao akea te nanokokoraki.”²³ Karaoa ae raoiroi n ukori kakai. Butia te Atua ma nanom ni koaua bwa ko na karekea te aekaki n onimaki aei. I berita nakoimi bwa kam na kakoaua ibon iroumi bwa Iesu Kristo e “angangania akana nimamate te kona; ao E kabatiai korakoraia akana aki konamaki.”²⁴ Iai bwaai aika a na kakorakora maium n tamnei ao ni buokiko ni kamwaingi maunga ake a taona maium.

Iango nambwa 5: Katoka te unraa inanon maium.

I taekina kaua au kakaewenako bwa kam na katoka te unraa man maium. Karekea te nanorinano, te ninikoria, ao te korakora are kainnanoaki ni kabwarai buure ao n bubuti kabwaraan ara bure. E a tia ni berita te Uea bwa “ngkana [ti] kabwarai aia bure aomata,Tama[ra] are i karawa, e na kabwarai naba [ara] bure.”²⁵

Uoua te wiki mangkai ao ti na bukamarua te Itita. Imarenan te tai aei ao te Itita, I kaoi ngkami bwa kam na katoka te unraa inanon maiumi are e karawawatai ngkami. Iai riki te mwakuri ae kona ni kaota ara kakaitau nakon Iesu Kristo ibukin Ana Kamaiu? Ngkana e matoa kabwaraan aia bure aomata, karekea korakoram mairoun Iesu Kristo. Ngkana kam karaoa aei, I berita nakoimi bwa kam na karekea te rau ao kakorakoran tamneimi.

Ngke e mate te Tia Kamaiu ibukin buren te aonaaba, E kauka te kawai nakoia taan iriiria bwa a na karekea Ana kamaiu, korakorana, ao mwaakana. Bwaintangira n te tamnei aikai a kona n reke irouia naake a ongo i Rouna ao n iriria.

Tariu ao mwaneu aika a tangiraki, ma nanou ni kabanea, I kaumaki ngkami bwa kam na toua kawain te berita ao n tiku iai. Karekea te kimwareirei man te rairannano n te bong koraki. Reiakina rongorongon te Atua ma Ana mwakuri. Ukori ao kantaningai kakai. Uaiakina katokan te unraa inanon maiumi.

Inanon karaoan baikai, I berita nakoimi bwa kam na karekea te korakora ni waaki nako ni kawain te berita ma te ungannano ae korakora, e ngae ngke iai kaewenakoami. Ao I berita bwa e na reke iroumi te korakora ni kaitarai kariiri, karekea riki te rau n te iango, kainaomataki man te maaku, ao te boonano ae korakora inanon ami utu.

E maiu te Atua! Iesu bon te Kristo! E maiu! E tangirira ao e na buokiira. Aio au koaua n aran te Tia Kabooira ae tabu, Iesu Kristo, amen.