Invaetem Kraes blong Raetem Stori blong Yu

Bae mi stat wetem sam kwestin we oli blong luklukbak long yumiwan.

• ?Wanem kaen stori nao yu yu stap raetem abaot laef blong yuwan?

• ?Rod ia we yu stap tokbaot long stori blong yu i stret?

• ?Stori blong yu i finis long ples we i stat long hem, we hem i long hom blong yu long heven?

• ?I gat wan man we yu stap folem eksampol blong hem long stori blong yu?—?mo man ia i Sevya Jisas Kraes?

Mi testifae se Sevya “Hem i stap long stat i go kasem en blong stamba blong bilif blong yumi.”¹ ?Bae yu invaetem Hem blong stap long stat i go kasem en blong stori blong yu?

Hem i save stat, long stat finis kasem en. Hem i Krieta blong heven mo wol ia. Hem i wantem yumi blong gobak long Hem mo Papa long Heven blong yumi long heven. Hem i givim evri samting blong Hem long yumi mo i wantem yumi blong kasem sakses.

?Wanem nao, yu ting se i stap holemtaet yumi blong givim stori blong yumi i go long Hem?

Maet pikja ia bae i helpem lukluk blong yuwan.

Wan gudfala loya we i stap difendem wan kes, i save se long taem blong kwestinim witnes, hem i no mas askem wan kwestin we hemwan i no save ansa. Blong askem wan kwestin we hem i no save ansa, hem i invaetem witnes blong talem long yu—mo jaj mo juri—wan samting we yu yu no save yet. Bae yu save kasem wan ansa we bae i sapraesem yu mo i go agensem stori we yu bin rere long hem blong kes blong yu.

Nomata se fulap taem i no waes blong wan loya we i stap difendem wan kes, blong askem wan witnes wan kwestin we yu no save ansa, oposit blong hem i tru abaot yumi. Yumi save askem ol kwestin abaot Papa blong yumi long Heven we i lavem yumi,long nem blong Sevya blong yumi we i gat sore, mo witnes we i stap ansarem ol kwestin blong yumi hem i Tabu Spirit, we oltaem i testifae long trutok.² From se Tabu spirit i wok wan oltaem wetem Papa long Heven mo Jisas Kraes, yumi save dipen fulwan long ol samting we Tabu Spirit i stap soem long yumi. Be afta, ?from wanem yumi no stap wantem blong askem kaen help olsem we i kam long heven, we Tabu Spirit i soemaot trutok long yumi? ?From wanem yumi stap jusum blong no askem wan kwestin we yumi no save ansa, we witnes ia i no wan gud fren nomo be, oltaem bae hem i talem trutok?

Maet hem i from yumi no gat fet blong akseptem ansa we bae yumi kasem. Maet hem i from man o woman insaed long yumi we i folem fasin blong wol, i no wantem blong givim ol samting fulwan long Lod mo trastem Hem fulwan. Maet, hemia hem i from wanem yumi jusum blong folem stori ia we yumi bin raetem blong yumiwan, wan stori we yumi mekem gat kamfot mo Masta Raeta i no jenisim stori blong yumi. Yumi no wantem askem wan kwestin mo kasem wan ansa we i no go gud insaed long stori we yumi stap raetem blong yumiwan.

Blong talem stret, sam long yumi bae oli putum ol tes we oli smutum yumi i go insaed long stori blong yumi. ?Be yumi no laekem ol naesfala en blong wan stori we yumi ridim taem mein man blong stori i winim ol hadtaem blong hem? Ol tes oli ol impoten pat blong plan blong stori, we i mekem ol fevret stori blong yumi i intresting, i mekem yumi no luk taem i pas, i leftemap fet, mo i gat valiu blong yumi talemaot. Ol naesfala hadtaem we oli raetem i go insaed long stori blong yumi i wanem we i mekem yumi kam kolosap moa long Sevya mo i smutum yumi, blong kam mo olsem Hem.

Blong Deved i winim Golaeat, boe ia i mas fesem bigfala tol man ia. Stori blong Deved we bae i moa isi hem i blong gobak mo lukaotem ol sipsip. Be, hem i no mekem hemia, mo hem i luklukbak long eksperiens blong hem we hem i sevem ol smol sipsip long wan laeon mo wan bea. Mo taem hem i stap bildimap hemwan wetem ol bigfala kwaliti ia, hem i kam blong gat fet mo strong paoa long tingting blong letem God i raetem stori blong hem mo talemaot se: “Hae God i stap blokemgud mi, blong ol laeon mo bea oli no spolem mi. Hem i sevem mi plante taem finis, mo bambae hem i blokemgud mi bakegen blong man ya bambae i no spolem mi. !Bambae hem i sevem mi yet ya!”³ Wetem wan hat we i wantem blong letem God i win, wetem wan sora i go long Tabu Spirit, mo wetem wan hat blong wantem letem Sevya i stap long stat kasem en blong stori blong hem, boe ia Deved i winim Golaeat mo sevem ol pipol blong hem.

Naesfala samting abaot prinsipol blong fasin blong jus, i letem yumi blong raetem stori blong yumiwan —Deved i bin save gobak hom nomo, blong lukaotem ol sipsip. !Be Jisas Kraes i stanap rere blong yusum yumi olsem ol tabu tul, ol pensel we oli sapenem gud long han blong Hem, blong raetem wan bigfala pikja! Hem i wantem blong yusum mi wetem sore, mi we mi wan rabis bunbun pensel, olsem wan tul long ol han blong Hem, sapos mi gat fet blong letem Hem, sapos mi letem Hem blong raetem stori blong mi.

Esta i wan naesfala eksampol blong stap letem God i win ova long yumi. Hem i no gohed blong saed wetem wan stori we i sef mo protektem hemwan, be hem i bin praktisim fet mo givim hemwan fulwan i go long Lod. Haman i stap plan blong prapa spolem evri Man Jiu long Pesia. Modekae, wan famli blong Esta, i bin save abaot plan ia mo i raet i go long Esta mo i askem strong blong hem i toktok wetem king long bihaf blong ol pipol blong hem. Esta i talem long Haman se wan we i kam long king we oli no singaotem, bae oli kilim i ded. Be long wan bigfala aksen blong fet, hem i askem Modekae blong karem ol Man Jiu i kam tugeta mo fas from hem. “Mo mi wetem ol gel blong wok blong mi, bambae mifala tu i mekem sem samting,” hem i talem, “nating we i agensem loa, be bambae mi mas go luk king. Mo sapos i min se mi mi mas ded from, be bambae i mas olsem.”⁴

Esta i wantem blong letem Sevya i raetem stori blong hem, nomata we tru long ol ae blong laef long wol ia, en blong hem i save go nogud. Wetem blesing, king i bin akseptem Esta, mo ol Man Jiu long Pesia oli sef.

Yes, i no oltaem oli askem kaen level blong strong paoa long tingting olsem hemia blong Esta long yumi. Be blong stap letem God i win ova long yumi, blong letem Hem i stap long stat kasem en blong stori blong yumi, i nidim yumi blong kipim ol komanmen blong Hem mo ol kavenan we yumi bin mekem. Hem i fasin blong stap kipim ol komanmen mo kavenan blong yumi we bae i openem rod blong komunikesen blong yumi blong kasem revelesen tru long Tabu Spirit. Mo hem i tru long ol samting we Tabu Spirit i stap soem long yumi, we bae i mekem yumi filim han blong Masta we i stap raetem stori blong yumi wetem yumi.

Long Epril 2021, profet blong yumi, Presiden Russell M. Nelson, i bin askem yumi blong tingting hevi long wanem yumi save mekem sapos yumi gat moa fet long Jisas Kraes. Wetem moa fet long Jisas Kraes, yumi save askem wan kwestin we yumi no save ansa long hem—askem Papa blong yumi long Heven, long nem blong Jisas Kraes, blong sendem wan tru long Tabu Spirit, we i testifae long trutok. Sapos yumi gat moa fet, bae yumi save askem kwestin ia mo afta, wantem blong akseptem ansa we yumi kasem, nomata sapos hem i no go gud wetem stori we yumi raetem we i isi. Mo blesing ia we oli promesem se bae i kam from aksen blong fet long Jisas Kraes, i fet we i kam antap moa long Hem olsem Hem we i stap long stat kasen blong bilif blong yumi. Presiden Nelson i talemaot se “kasem moa fet taem yu mekem wan samting we i askem moa fet.”⁵

So, wan kapol we tufala i no gat pikinini from tufala i no save gat, i save askem wetem fet sapos tufala i sapos blong adoptem ol pikinini mo wantem blong akseptem ansa, nomata se stori we tufala i bin raetem i blong gat wan merikel blong bonem bebi.

Wan senia kapol i save askem sapos hem i taem blong tufala blong go long wan misin mo gat hat blong wantem go, nomata se stori we tufala i bin raetem blong tufalawan i blong gat moa taem long wok. O maet ansa bae hem i “no yet,” mo bae tufala i lanem long ol japta we i kam afta long stori blong tufala, from wanem oli nidim tufala long hom yet blong wan longfala taem moa.

Wan yangfala man o woman i save askem wetem fet sapos i gat moa valiu blong folem spot o skul o miusik, mo gat wan hat we i wantem blong folem ol kwaet toktok blong Tabu Spirit we i witnes ia we i stret evriwan.

?From wanem yumi wantem Sevya blong stap stat long stat kasem en blong stori blong yumi? From se Hem i save stret hamas paoa yumi gat, mo bae Hem i tekem yumi i go long ol ples we yumi neva tingting long hem yumiwan. Hem i save mekem yumi kam wan Deved o wan Esta. Bae Hem i pusum yumi mo smutum yumi blong kam moa olsem Hem. Ol samting we bae yumi kasem taem yumi mekem aksen wetem moa fet bae i mekem fet blong yumi long Jisas Kraes i kam antap moa.

Ol brata mo sista, samples wan yia i pas, dia profet blong yumi i askem: “?Yu yu wantem letem God i stap win insaed long laef blong yu? … ?Yu yu wantem letem wanem Hem i nidim yu blong mekem i kam faswan long evri nara bigfala tingting we yu yu gat?”⁶ Wetem tingting we i stap daon, mi ademap i go long ol toktok blong profet: “?Bae yu letem God i stap long stat i go kasem en blong stori blong yu?”

Long revelesen, yumi lanem se bae yumi stanap long fored blong God mo kasem jajmen aot long ol buk blong laef, folem ol wok blong yumi.⁷

Bae oli jajem yumi folem buk blong laef blong yumi. Yumi save jusum blong raetem wan stori we i isi blong yumiwan. O, yumi save letem Masta we i stap long stat kasem en blong raetem stori blong yumi wetem yumi, mo letem pat ia we Hem i nidim yumi blong mekem i tekova long ol nara gol blong yumi.

!Letem Kraes i stap, stat long stat kasem en blong stori blong yu!

!Letem Tabu Spirit i stap olsem witnes blong yu!

Raetem wan stori we long hem, yu yu stap long stret rod, wan rod we i lidim yu gobak long hom blong yu long heven blong laef long fes blong God.

Letem ol samting we oli kam agens mo hadtaem we oli pat blong evri gud stori, i kam wan wei we i save tekem yu go moa kolosap long Kraes, mo kam moa olsem Jisas Kraes.

Talem wan stori we long hem, yu luksave se ol heven oli open. Askem ol kwestin we yu no save ol ansa long hem, mo save se God i wantem yu save wanem Hem i wantem blong yu, tru long Tabu Spirit.

Letem stori blong yu i kam wan stori blong fet, semmak olsem hemia blong Man we i Eksampol blong Yu, we i Sevya Jisas Kraes. Long nem blong Jisas Kraes, amen.