O Le Mana Faamalolo o le Faamagaloga

Ata

O’u uso e ma tuafafine ma uo, ou te tula’i atu i o outou luma ma le lototatalo ma le agaga maualalo. Ou te fia tautala atu e uiga i le mana faamalolo o le faamagaloga.

I mauga matagofie o Penisilevania o loo i ai se vaega faamaoni o tagata Kerisiano e ola i se olaga faatauvaa e leai ni taavale, eletise, po o ni masini faaonaponei. Latou te galulue malosi ma ola i ni olaga e le gaoiā, toafilemu e ese lava mai le lalolagi. O le tele o a latou mea e ‘ai e aumai ia latou lava faatoaga. E suisui fafine ma lalaga o latou lavalava, e tauagafau lava foi ma taugofie. Ua faaigoaina i latou o tagata Amiso [Amish].

Sa i ai se ave loli susu e 32 tausaga le matua sa nonofo ma lona aiga i le nuu o Nickel Mines [Penisilevania]. E le o se tagata Amiso, ae o le itu na te uia e la’u mai ai le susu e ala ai ona tele faatoaga a le au Amiso e oo atu i ai, lea e faaigoa ai o ia o le tilivasusu gugu. I le masina o Oketopa talu ai, sa faafuasei ai ona pogisa lona mafaufau ola. I lona mafaufau mafatia, sa ia tuua’ia le Atua ona o le maliu o lana ulumatua ma nisi mea e leai se faamaoniga. Sa matele atu o ia i le A’oga a Amiso e aunoa ma se mafuaaga tatau, faatuua tamaiti ma le au matutua, ae saisai teineiti e toa 10. Sa ia tafanaina teineiti, ma maliliu ai le toalima ae manunua le isi toalima. Ona pule ai lea o ia i lona ola.

O lenei sauaga mata’utia na tulai mai ai le mafatia o tagata Amiso, ae leai se ita. Sa tiga ae e le’i i ai se inoino. Sa vave lo latou faamagalo atu. Sa amata ona latou tutu faatasi e aapa atu i le aiga mafatia o le tagata tiliva susu. A o faapotopoto le aiga o le alii tiliva susu i lona fale ina ua mavae le aso na tafanaina [ai teineiti], sa sau se tuaoi Amiso, ma faauouo le tama o lē ua maliu, ma faapea atu, “O le a matou faamagalo ia te outou.”¹ Sa asiasi atu taitai o Amiso i le toalua o le alii tiliva susu ma lana fanau e faaoo atu i ai la latou faamaisega, o la latou faamagaloga, o la latou fesoasoani, ma lo latou alofa. Pe tusa o le afa o ē sa faavauvau i le falelauasiga o le alii tiliva susu, o tagata Amiso. Ina ua mae’a, sa valaaulia e le au Amiso le aiga o le alii tiliva susu ina ia auai atu i sauniga o le falelauasiga o teineiti sa fasiotia. Sa i ai se filemu ofoofogia i tagata Amiso a o lagolagoina i latou e lo latou faatuatua i le taimi o lenei faalavelave matautia.

Sa i ai se tasi o tagatanuu na ia otootoina ma le mamana le taunuuga o lenei faalavelave ina ua fai mai, “E tasi le gagana sa matou tautatala ai, sa le na o le Igilisi foi, ae o se gagana o le alofa, o se gagana a le nuu, [ma] o se gagana o le auauna atu. Ioe, ma se gagana o le faamagalo atu.“² Sa masaa mai ma le ofoofogia lo latou faatuatua i aoaoga a le Alii i le Lauga i luga o le Mauga: “Ia outou agalelei atu i e ua inoino mai ia te outou, ia outou tatalo foi mo e ua tuua’ifua mai ma faasaua mai ia te outou.”³

Sa faamatuu atu e le aiga o le alii tiliva susu lea sa fasiotia teineiti e toalima, le faamatalaga lenei i tagata lautele:

“Mo a matou uo Amiso, tuaoi, ma le alaalafaga:

“E fia faailoa atu e lo matou aiga ia te outou uma taitoatasi, ua matua lofituina lava i matou i le faamagaloga, alofa tunoa, ma le alofa mutimutivale ua outou aumaia mo i matou. O lo outou alolofa mo lo matou aiga ua fesoasoani e aumaia ai le faamalologa o loo matou matua manaomia lava. O tatalo, fugalaau, faamanuia, ma meaalofa sa outou foai mai ua tuia ai lava o matou loto i se auala e le mafai ona faamatala i ni upu. Ua lilofia lo matou aiga, o lo matou alalafaga, i lo outou agalelei, ma ua suia ai lo matou lalolagi, ma o lea matou te matua faafetai atu ai lava.

“Faamolemole, ia outou silafia ua matua momomo lava o matou loto i mea uma ua tutupu. Ua tutumu i matou i le faanoanoa mo o matou tuaoi Amiso uma, ia ua matou alolofa lava i ai ma o le a alolofa pea lava i ai. Matou te iloa o le a tele aso e mafatia ai aiga uma ua maliliu a latou fanau pele, ma o lea ia tatou tumau ai pea ona tuu atu lo tatou faamoemoe ma le faatuatuaga i le Atua o faamafanafanaga uma, a o tatou taufai saili e toe atiina ae o tatou olaga.”⁴

Ua mafai faapefea e tagata uma o Amiso ona faaalia lea lagona o le faamagaloga? Ona o lo latou faatuatua i le Atua ma le talitonu i Lana afioga, lea ua avea ma vaega o o latou tagata i totonu. Ua latou vaai ifo ia i latou lava o ni soo o Keriso, ma mananao e mulimuli i Lana faataitaiga.

Ina ua logo i lenei faalavelave matautia, e toatele tagata sa auina atu ni tupe i tagata o Amiso e totogi ai le tausiga faasoifua maloloina o teineiti na ola, faapea foi tupe faaalu mo le falelauasiga o le toalima na maliliu. Na avea ma se isi faatinoga atili o lo latou uiga faasoo, sa tonu ai i tagata Amiso e faasoa atu se vaega o le tupe i le toalua o le alii tiliva susu ma lana fanau e toatolu aua ua aafia fua foi i latou i lenei faalavelave matautia.

O le faamagalo atu e le o se mea e vave pea lava pea ona tupu e pei ona i ai i le au Amiso. A oo ina sauaina pe fasiotia fanau e lē sala, o le toatele lava o i tatou e le mafaufau muamua i se faamagaloga. O la tatou tali masani lava o le ita. Atonu foi tatou te lagona ua tonu lava ona “taui masui” i soo se tasi na afua ai ona faamanu’alia i tatou po o tatou aiga.

Na tuuina mai e Dr. Sidney Simon, o se taitai iloga i le faatauaina o uiga taua, se faauigaga maoae o le faamagaloga pe a faaaoga i sootaga faaletagata soifua:

“O le faamagalo atu o le faasaolotoina lea ma le faaaogaina lelei o le malosi lea sa alu i mea e faafatu’ulu i le mafaufau, teuloto o le ita, ma le fafagaina o manu’a e le’i pepe. O le toe mauaina mai lea o le malosi tatou te masani ai ma le toe faatuina o o tatou mana e le faatuaoia ina ia malamalama ai ma talia isi tagata ma i tatou lava.”⁵

O le toatele lava o i tatou e manaomia le taimi tatou te galulue ai i tiga ma mea ua toesea. E mafai ona tatou maua mafuaaga uma lava e tolopo ai le faamagalo atu. O se tasi o nei mafuaaga, o le faatalitali mo i latou na faia le mea sese ina ia salamo muamua ae tatou te le faamagaloina i latou. Ae o lena faatuai e mafua ai ona tatou le maua le filemu ma le fiafia lea e mafai ona tatou maua. O le valea o le saga mafaufau pea i mea tiga ua leva ona pasi, e le maua ai so tatou fiafia.

O nisi e faafatu’ulu ai lava i mafaufau i le olaga atoa, e le o iloa o le faamagalo atu ma le lototoa o i latou sa sese mai ia i tatou, o se tulaga lelei atoatoa ma o se togafitiga aoga.

O le faamagaloga e agatonu mai lava e pei o le au Amiso, pe a tatou faatuatua i le Atua ma faalagolago i Lana upu. O lena ituaiga o faatuatua “e mafai ai ona tatou tatalia mea e aupito sili ona leaga o le olaga. E mafai ai foi e tagata ona faalautele atu la latou vaai nai lo i latou lava. O le mea e aupito i sili ona taua, e mafai ai e i latou ona faamagalo atu.”⁶

O i tatou uma lava na mafatia i ni nai manu’a mai aafiaga e foliga mai e leai se uiga. E le mafai ona tatou malamalama pe faamatalaina foi. Atonu o le a tatou le iloaina lava pe aisea e tutupu ai nisi o mea i lenei olaga. O mafuaaga o nisi o o tatou puapuaga e na o le Alii lava na te silafia. Peitai, ona ua tupu o lea e tatau ai ona onosaia. Na saunoa mai Peresitene Howard W. Hunter “E silafia e le Atua mea tatou te le iloa ma e silasila foi i mea tatou le vaaia.”⁷

Sa tuuina mai e Peresitene Polika Iaga lenei mafaufauga loloto e faapea o nisi o o tatou puapuaga e i ai se faamoemoega ina ua ia saunoa: “O faigata uma e oo mai i tagata soifua o le a faataga ona oo mai i nisi, e saunia ai i latou e olioli i le afioaga o le Alii… . Soo se tofotofoga ma mea na outou oo i ai ma outou pasi mai ai e moomia lea mo lo outou faaolataga.”⁸

Afai e mafai ona tatou maua le faamagaloga i o tatou loto mo i latou o e sa faatiga ma faamanu’alia i tatou, o le a siitia lo tatou lagona tauleleia faapea foi le olaga sololelei. Ua faaalia e ni suesuega talu ai nei e faapea, o tagata ua aoaoina ina ia loto faamagalo e “faaitiitia lo latou ita, e tele atu lo latou faamoemoe, e faaitiitia le faanoanoa, e faaitiitia foi le atuatuvale ma faaitiitia le popole,” lea e tau atu i le olaga e sili atu ona sologa lelei i le tino.⁹ O se tasi o nei suesuega na faaiu faapea “o le faamagalo atu … o se meaalofa e tuusaoloto ai, [lea] e mafai e tagata ona tuuina ifo ia i latou lava.”¹⁰

Ua apoapoai mai le Alii ia i tatou i o tatou aso, “E tatau ona outou faamagalo atu le tasi i le tasi,” ona ia faia ai lea o se mea e tatau ai ina ua Ia fetalai, “O a’u le Alii, e faamagalo atu i e ou te loto ia faamagaloina, a o outou e ao ina outou faamagaloina atu i tagata uma.”¹¹

Sa mauaina e se tuafafine sa mafatia ina ua tete’a ma le toalua, se fautuaga lelei mai lona epikopo: “Ia tuu i lou loto se avanoa mo le faamagaloga, ma afai e oo mai, ia e faaulufale maia.”¹² O le au Amiso, sa i ai lava iina aua “o le faamagaloga o se vaega ‘loloto’ lea o la [latou] tapuaiga.”¹³ O la latou faataitaiga o le faamagaloga, o se vaaiga maoae lea o le alofa faaKerisiano.

O iinei i le Aai o Sate Leki i le 1895, sa fasiotia matuia ai ma le le migao ia Epikopo Steven Christensen i se pomu na fuafua e faamuta ai lona ola, ae leai sona sese. O ia o se atalii o Mac ma Joan Christensen, ma o ia o le toalua o Terri ma o se tamā e toafa le fanau. O le faatagaga a ona matua, ua ou faasoa atu ai mea sa latou aoaoina mai i lena aafiaga. Ina ua mavae lea faiga matautia, sa femulimulita’i solo le au fai talafou i tagata o le aiga o le au Christensen. I se tasi taimi, o lenei faalavelave o le au faasalalalau na ita ai se tasi o le aiga ma oo ai ina vavao o ia e le tama o Steven. Ona mafaufau ai lea o Mac, “O le a faaumatia lo’u aiga e lenei mea pe afai matou te le faamagaloina. O le a le uma lava le lotomatau’a ma le inoino pe afai matou te le aveesea mai o matou tagata.” Sa oo mai le faamalologa ma le filemu a o faamamaina e le aiga o latou loto mai le ita, ma sa mafai ai ona faamagalo atu i le tagata na fasiotia lo latou atalii.

Talu ai nei foi sa i ai nisi mala se lua iinei i Iuta, lea e faapupula mai ai le faatuatua ma le mana faamalolo o le faamagaloga. O Gary Ceran, lea na maliliu lona toalua ma le fanau e toalua i le po o le vaeluaga o le Kerisimasi ina ua so’a e se loli le latou taavale, sa vave ona ia faaali atu lana faamagaloga ma lona popolega mo le avetaavale sa masalomia le ‘onā. Ia Fepuari na te’a nei, ina ua soso’a e se taavale le taavale a Epikopo Christopher Williams, sa i ai sana faaiuga e tatau ona fai, ma o le “faamagalo atu lē faatuaoia” lea o le avetaavale lea na mafua ai le faalavelave, ina ia mafai ai ona i ai le faamalologa e aunoa ma le faalavelaveina.¹⁴

O a ni mea e mafai e i tatou uma ona aoao mai i aafiaga e pei o nei? E manaomia ona tatou iloa ma faailoa lagona ita. E manaomia ai le lotomaulalo e faia ai, peitai afai tatou te o ifo i o tatou tulivae ma ole atu i le Tama Faalelagi mo se lagona o le faamagaloga, o le a fesoasoani mai o Ia ia te i tatou. E finagalo le Alii ina ia tatou “faamagalo atu i tagata uma”¹⁵ mo lo tatou lava lelei aua o le “inoino e telegese ai le tuputupu a’e faaleagaga.”¹⁶ Sei iloga ua tatou faamamaina i tatou lava mai le inoino ma le ita ona mafai lea e le Alii ona tuu le mafanafana lelei i o tatou loto, e pei foi ona sa Ia faia i le nuu o le au Amiso, o le au Christensens, o le au Cerans, ma le aiga o Williams.

Ioe, e manaomia ona puipuia tagata mai le faateleina o le solitulafono, aua e le mafai e le alofa ona faoa ai le faamasinoga tonu.¹⁷ Sa matua lelei ona tautalagia e Epikopo Williams lea manatu ina ua ia saunoa mai, “O le faamagaloga o se faapogai o le mana. Peitai e le faamatuu ese mai ai ia i tatou ia taunuuga.”¹⁸ A tula’i mai mala, e le tatau ona tatou tali atu i ai e ala i le saili atu e taui masui, ae ia tau lava ina tuu atu le faamasinoga tonu i lona ala, ona faagalo ai lea. E le faigofie ona faagalo ma faamama o tatou loto mai le faateleina o le ita. Ua uma ona ofoina mai e le Faaola ia i tatou uma se filemu taua e ala i Lana Togiola, peitai ua na o lo tatou naunau e lafoai lagona le lelei o le ita, lotovale, po o le tauimasui e mafai ai ona oo mai. Mo i tatou uma lava o ē faamagalo atu “i e ua agaleaga mai ia te i tatou,”¹⁹ e oo lava ia i latou sa faia ni solitulafono matuia, o le Togiola e aumaia ai se fuataga o le filemu ma le mafanafana.

Ia tatou manatua e ao ina tatou faamagalo atu ina ia faamagaloina ai i tatou. I upu a se tasi o viiga ou te fiafia lava i ai, “Ia fefaamagaloa’i e magalo fo’i ia a’u”²⁰ Faatasi ai ma lo’u agaga ma lo’u loto atoa, ou te talitonu i le mana faamalolo lea e mafai ona oo mai ia i tatou, pe a tatou mulimuli i fautuaga a le Faaola “ia faamagalo atu i tagata uma.”²¹ I le suafa o Iesu Keriso, amene.