Le Atua le Tama

O le Tama o o tatou agaga, e alofa atoatoa ia i tatou taitoatasi

O le tusi o Faaaliga o loo faaalia ai le Atua o loo nofo i luga o se nofoalii o se tupu (tagai Faaaliga 3:21; 4:2, 10; 5:1). Ae e mafai foi ona tatou mafaufau ia te Ia i se auala patino. I le avea ai ma o tatou Tama Faalelagi alofa, e popole moni lava o Ia ia i tatou: o o tatou lagona, o tatou aafiaga, o tatou faamoemoega, ma a tatou moemitiga. Na tusia e uso o le Korama a Aposetolo e Toasefululua, “E taua tele faalagiga uma o le faaaloalo ma le mamalu ma le faamemelo ua tuuina atu i le [Atua], ua Ia poloaiina i tatou e talanoa atu ia te Ia o se Tama.”¹

O Ai le Tama Faalelagi?

O le Atua le Tama o Ia o le Atua Silisiliese tatou te talitonu i ai, tatou te tapuai i ai, ma tatou te tatalo i ai. O Ia o le mataisau o le fuafuaga o le faaolataga ma le faaeaga. O le Atua o le Tama o o tatou agaga ma e alofa ia i tatou. O Lana galuega ma Lona mamalu o le “ia aumaia le tino ola pea ma le ola faavavau o le tagata” (Mose 1:39). E atoatoa o Ia, e ona le mana uma, ma e silafia mea uma. O Ia “ua i ai se tino o aano ma ivi e mafai ona paʼi i ai e pei o le tagata” (Mataupu Faavae ma Feagaiga 130:22).

Vaaiga aoao i autu: Atua le Tama

O taiala fesootai mo le suesueina o le talalelei: Aiga Atua, Fanau a le Atua, Muai Olaga, Tapuai i le Atua le Tama, Ola e Faavavau

Vaega 1

E Mafai Ona Tatou Iloa le Atua

I le po o le puapuagatia o le Faaola i Ketesemane, na tatalo ai Iesu Keriso i le Tama Faalelagi: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea” (Ioane 17:3). Ona e alofa le Atua ia i tatou, ua Ia valaaulia ai i tatou ia iloa o Ia ina ia mafai ai ona tatou maua le ola e faavavau. O le tele o lo tatou aoao pe faape’i le Tama Faalelagi, o le tele foi lena o lo tatou mananao ia avea faapei o Ia.

Mea e mafaufau i ai

O a ni mea ua e iloa e uiga i le Tama Faalelagi? E mafai ona e suesue i nisi po o mau uma nei, ma vaavaai mo mea na faaalia e uiga ia te Ia:
Na fetalai mai le Alii o Iesu Keriso, “O a’u nei le ala, ma le upu moni, ma le ola: e le alu atu lava se tasi i le Tama, pe a le ui mai ia te a’u” (Ioane 14:6), ma le, “Sau Mulimuli mai ia te A’u” (Mataio 19:21). O a mea o aoao mai e nei fuaitau o le a fesoasoani ia te oe i au taumafaiga ia iloa le Atua le Tama?

Gaoioiga mo le aoao faatasi ma isi

E oo lava i tamaiti laiti e mafai ona masani i le Atua le Tama ma lagonaina se vavalalata ma Ia. E mafai ona outou usuina pese e pei o le “O le Atua lo’u Tama” (Viiga, nu. 184) “Ua Ou Mautinoa o Soifua Lo’u Tama” (Viiga, nu. 185), po o le “Aoao Mai ia Ou Ui i le Malamalama” (Viiga, nu. 187). Ona talanoaina lea o mea ua latou aoaoina e uiga i le Tama Faalelagi mai nei pese.

Aoao atili

Ioane 14:6–9; Mataupu Faavae ma Feagaiga 88:37–38
“O le Atua le Tama Faavavau,” Aoaoga a Peresitene o le Ekalesia: Iosefa Samita (2007), 37–44.
Jeffrey R. Holland, “O Le Silisiliese o le Atua,” Liahona, Nov. 2003, 70-73

Vaega 2

O i Tatou Uma o Atalii ma Afafine Faaleagaga o le Atua

Ata

o se alii o loo tu i luga o le mauga ma tilotilo atu i le goto o le la

E ui lava o loo i ai le eseesega tele i totonu o le aiga o tagata, e tasi le upumoni lotogatasi o le, o i tatou uma o fanau a se Tama Faalelagi alofa (tagai Eperu 12:9). “O tagata soifua uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine faapelepele o ni matua faalelagi, ma e i ai se natura paia” (“O Le Aiga: O Se Folafolaga i le Lalolagi,” Potutusi o le Talalelei).

E finagalo le Atua i Ana fanau taitoatasi ia maua le olioli tumau i lenei olaga ma maua faamanuiaga o le ola faatasi ma Ia i le faavavau atoa.

Mea e mafaufau i ai

Ua ofoina mai e le Atua faamanuiaga folafolaina i e faamaoni ia e le oo i ai lo tatou tomai e malamalama ai (tagai 1 Korinito 2:9–10). Ua Ia faasoa mai le tele o faamatalaga e uiga i nei faamanuiaga i tusitusiga paia. E mafai ona e suesueina le Mataupu Faavae ma Feagaiga 76:50–70 ma vaavaai mo nisi o faamanuiaga o loo faatalitali mai mo i latou o e mulimuli i le Atua.
Mafaufau e matamata i le “Tama Faalelalolagi, Le Tama Faalelagi” (3:59). E mafai faapefea e a tatou matafaioi faaleaiga i le lalolagi ona tuuina mai ia i tatou se vaaiga itiiti o le mea e finagalo le Atua ia avea ai i tatou?

Gaoioiga mo le aoao faatasi ma isi

Suesue le Kenese 1:26–27. O a ni mea e tutusa ai i tatou ma le Atua? Aisea e aoga ai le iloa e le gata o i tatou o fanau agaga a le Atua ae faapea foi o o tatou tino faaletino na foafoaina i Lona faatusa?

Vaega 3

E Mafai ona E Faamalosia Lou Sootaga ma le Tama Faalelagi

Ata

tamaitai o loo tatalo

E masani lava, pe a tatou mananao ia lagona le latalata atili atu i tagata o le aiga po o uo, tatou te faia ni mea ma i latou e pei o le talanoa, faaalu faatasi le taimi, ma malamalama atili ia i latou. E finagalo le Tama Faalelagi ia tatou latalata atu ia te Ia—ma e finagalo o Ia ia latalata mai ia i tatou. O Lana valaaulia ia i tatou e faapea: “Faalatalata mai ia te au ma o le a Ou faalatalata atu ai ia te outou” (Mataupu Faavae ma Feagaiga 88:63). Vaai faalemafaufau i le uiga o le Tagata e sili ona mamana i le atulaulau e manao e fesootai mai ia i tatou ma faalatalata mai ia i tatou.

O le manatuaina o lo tatou olaga i le muai olaga faatasi ma le Atua ua taofia mai ia i tatou. Sa tautino mai Peresitene Ezra Taft Benson e faapea, “e leai se mea o le a sili atu ona faateia ai i tatou pe a tatou ui atu i le isi itu o le veli, nai lo le iloaina o lo tatou iloa lelei o lo tatou Tama ma lo tatou masani lelei i Ona fofoga.”²

Mea e mafaufau i ai

E tele auala e mafai ai ona tatou amata ma faamalosia lo tatou sootaga ma le Tama Faalelagi. E mafai ona e faataitaia nisi o manatu o loo aoaoina i nei fuaitau o mau:

Gaoioiga mo le aoao faatasi ma isi

Mafaufau e fai atu i isi e sue se mea se tasi i totonu o le potu e faatusa i se mea e mafai ona faamalosia ai lo tatou sootaga ma le Tama Faalelagi. Fai atu ia i latou e faasoa mai mea sa latou mauaina ma le mea e faatusa i ai. Ia talanoaina faatasi se mea e mafai ona outou galulue uma i ai o le a e latalata atili atu ai i le Atua.

Aoao atili

1 Nifae 2:16
Dale G. Renlund, “Ina Ia Mafai Ona Ou Aumai o Tagata Uma ia te Au,” Liahona, Me 2016, 39–42
Neill F. Marriott, “Tumau i le Atua ma Faaleleia le Va,” Liahona, Nov. 2017, 11-12