Potutusi
Faamanatuga

“Faamanatuga,” Autu ma Fesili (2023)

Ata
O Iesu Keriso o loo faatautaia le faamanatuga ma Ona soo

Taiala mo le Suesueina o le Talalelei

Faamanatuga

O se sauniga paia e faalatalata atili atu ai i tatou ia Iesu Keriso

O le a le uiga o le faamanatuga ia te oe? O le auai i lenei sauniga paia i vaiaso taitasi e mafai ona avea ma se faatumutumuga faaleagaga i lou olaga pe a e saili ia malamalama i lona uiga. I se taimi puupuu a o lei oo i Lona Faasatauroga, sa faapotopoto ai e Iesu Ona soo mo se talisuaga e faamanatu ai le Paseka. Sa Ia silafia o le a faamutaina Lona soifua faaletino ma o le a Ia tuua Ona soo. Na Ia manao ia i latou ia manatua Ana aoaoga. I lena nofoaga, sa avatu ai e Iesu le areto ma le uaina i Ona soo, ma faamalamalama atu ai e tatau ona latou aai ma feinu i le faamanatuina o Lona tino ma le toto.

O au taumafaiga e suesue le uiga ma le faamoemoega o le faamanatuga e mafai ona fesoasoani ia te oe e lagona ai le lotofaafetai loloto mo mea uma ua Ia faia mo oe.

O le a le Faamanatuga?

O le faamanatuga o se sauniga o le perisitua lea e tagofia ai e tagata o le Ekalesia le falaoa ma le vai i vaiaso taitasi e faamanatu ai le taulaga togiola a Iesu Keriso. O le falaoa ua tofitofi o se faamanatu o Lona tino ma Lona tiga faaletino. O le vai e faatusa i le toto o Iesu, na faamaligiina i le tiga matuia. Pe a tatou aai ma feinu ma le agavaa i le faamanatuga, tatou te faafouina a tatou feagaiga ma le Alii, tatou te faatumauina se faamagaloga o a tatou agasala, ma tatou toe tautino atu i tatou lava e mulimuli ia Iesu Keriso.

Vaaiga aoao i autu: Faamanatuga

O taiala fesootai mo le suesueina o le talalelei: Iesu Keriso, Galuega Faaletino a Iesu Keriso, Togiola a Iesu Keriso, Feagaiga ma Sauniga, Aso Sapati

Vaega 1

O le Faamanatuga e Fesoasoani E te Manatua ai Iesu Keriso

Ata
tagata o le faapotopotoga o loo mauaina le fata o le faamanatuga

O le aso na sosoo ma le aso na Ia fafagaina faavavega ai le 5,000, sa talai atu ai Iesu ma aoao atu faapea “ai se ai i lo’u tino, ma inu i lo’u toto, ua ia te ia le ola e faavavau; ou te faatuina foi o ia i le aso gataaga” (Ioane 6:54). I lena taimi, o nei upu atonu na fenumiai ai Ona soo. Peitai, o lo latou uiga sa faamanino mulimuli ane ina ua faailoa atu e le Alii le faamanatuga i Ona soo i le taimi o le Tausamaaga Mulimuli.

I le avea ai ma se sui O Le Ekalesia a Iesu Keriso o le Au Paia o Aso e Gata Ai, ua ia te oe le avanoa e auai ai i vaiaso taitasi i le sauniga o le faamanatuga. O le taumafa i le areto ma le vai e fesoasoani e te manatua ai le tino ma le toto o Iesu Keriso, lea na Ia foai fua mai mo fanau uma a le Atua.

Mea e mafaufau i ai

  • Faitau tala faatusi paia e uiga ia Iesu Keriso o loo folasia atu ai le sauniga o le faamanatuga i Ona soo i Ierusalema (tagai Mataio 26:26–28; Mareko 14:22–24; Luka 22:19–20) ma i sa Nifae (tagai i le 3 Nifae 18:1–11). O a mea ua e aoao mai nei fuaitau e uiga i le faamanatuga? E ono fesoasoani foi le faitau o tala o loo maua i le Faaliliuga a Iosefa Samita, Mataio 26:22, 24–25 (i le faaopoopoga i le Tusi Paia) ma le Faaliliuga a Iosefa Samita, Mareko 14:20–25 (i le faaopoopoga i le Tusi Paia).

  • Faitau le Mose 5:4–8. I aso anamua, sa poloaiina ai e le Atua Ana fanau e osi atu taulaga i manu i faatusa, po o faatusa, o le taulaga a Iesu Keriso—o le Tamai Mamoe a le Atua. E faapefea ona avea le faamanatuga i se faamoemoega i aso nei e pei o osigataulaga i taimi o le Feagaiga Tuai? Tagai foi i le Mataupu Faavae ma Feagaiga 59:9–12.)

  • Na ta’u atu e le Alii ia Iosefa Samita e le afaina po o a mea tatou te aai ai pe feinu ai mo le faamanatuga pe afai tatou te manatua le faamoemoega mo le faia o lena mea (tagai Mataupu Faavae ma Feagaiga 27:1–2). Mafaufau pe aisea e le taua ai mea tatou te faaaogaina o ni faatusa o le faamanatuga nai lo mea o loo fesoasoani na faatusa ia i tatou e manatua ai.

Gaoioiga mo le aoao faatasi ma isi

  • Mafaufau e matamata faatasi le vitio “Sacrament” (2:59) po o le “Always Remember Him” (5:27). E mafai ona outou talanoaina pe mafai faapefea e au taumafaiga e manatua Iesu Keriso ma Lana taulaga togiola ona tosina ai ou lagona ma faatinoga. O le a se mea e mafai ona e faia e taulai atili atu ai ia Iesu Keriso i le taimi o le sauniga faamanatuga ma pe a aai ma feinu i le faamanatuga?

Aoao atili

Vaega 2

O Le Saunia ma le Agavaa mo le Faamanatuga e Aumaia ai Faamanuiaga

Ata
fasi falaoa ua vavae ma le tamai ipu vai

E i ai taimi atonu na e iloa ai na o lou saofai i le faamanatuga, ma galo ai ona maua moni ma aafia i lenei sauniga paia e pei ona faamoemoeina ai e le Alii. Ae o au taumafaiga e saunia ma ai ma inu ma le agavaa i le faamanatuga e mafai ona faaagavaaina ai oe mo faamanuiaga tamaoaiga.

Na aoao mai Elder David A. Bednar: “O le sauniga o le faamanatuga o se valaaulia paia ma fai soo ia salamo faamaoni ma ia faafouina faaleagaga. O le faatinoga o le taumamafa i le faamanatuga, na o le faamanatuga lava, e le faamagaloina ai ni agasala. Ae a o tatou saunia ma le mafaufau loloto i ai ma auai i lenei sauniga paia faatasi ma se loto momomo ma se agaga salamo, ona maua lea o le folafolaga o le a mafai ona tatou maua pea le Agaga o le Alii e faatasi ma i tatou. Ma e ala i le mana faapaiaina o le Agaga Paia e fai ma a tatou soa tumau, e mafai ai ona tatou faatumauina pea se faamagaloga o a tatou agasala.”1

Mea e mafaufau i ai

  • Faitau le 1 Korinito 11:23-29. O le a le uiga i se tagata o le “suesue ifo ia te ia lava” pe a ai ma inu i le faamanatuga? Aisea e taua ai le saunia e talia ma le agavaa le faamanatuga?

  • Faalogologo pe faitau upu o se viiga o le faamanatuga, e pei o le “E I ai se Mauga Lanuvao” po o le “I le Lotomaualalo, Faaola e.”2 E mafai faapefea e le mafaufau loloto i le savali o loo maua i se viiga faamanatuga ona faaleleia ai lou lotofaafetai mo le sauniga o le faamanatuga?

Gaoioiga mo le aoao faatasi ma isi

  • Mafaufau e faitau ia tatalo o le faamanatuga, o loo maua i le Mataupu Faavae ma Feagaiga 20:75–79. Valaaulia nisi o lau vaega e vaavaai mo mea tatou te folafola atu pe a tatou aai ma feinu i le faamanatuga a o vaavaai isi mo mea ua folafola mai e le Alii e fai o se taui. E mafai foi ona e tuu atu i le vaega e faitau le Mataupu Faavae ma Feagaiga 20:37 ma talanoaina mea e tutusa ai folafolaga na faia i le taimi o le faamanatuga ma le feagaiga o le papatisoga.

Aoao atili

O Isi Punaoa e uiga i le Faamanatuga