Lalolagi o Agaga

O le lalolagi o agaga pe a mavae le oti o se nofoaga e nonofo ai agaga o i latou ua maliliu ae lei oo i le Toetutu. O le lalolagi o agaga e i ai le parataiso, e nonofo ai e amiotonu, ma le falepuipui o agaga, mo i latou na amioleaga ao nonofo i le lalolagi.

Na aoao mai Peresitene Polika Iaga o le lalolagi o agaga o loo i le lalolagi, e siomia ai i tatou (tagai Aoaoga a Peresitene o le Ekalesia: Polika Iaga [1997], 279).

O agaga e tutusa lava o latou foliga mai e pei o le tino faaletino, ae ua sili atu ona atoatoa le tino faaleagaga (tagai i le Eteru 3:16). E o ese atu agaga mai le lalolagi ma o latou uiga tuuto po o uiga faatuiese i mea o le amiotonu (tagai i le Alema 34:34). Ua i ai ia i latou tuinanau ma manaoga sa i ai i latou a o ola i le lalolagi. O agaga uma, o ni tagata matutua. Sa tagata matutua agaga uma a o lei fananau mai i le lalolagi, ma o ni tagata matutua foi pe a mavae le oti, e tusa pe feoti a o pepe pe o ni tamaiti foi (tagai Aoaoga a Peresitene o le Ekalesia: Iosefa F. Samita [1998], 131--32).

Na aoao mai le perofeta o Alema i le Tusi a Mamona e uiga i vaega po o tulaga e lua i le lalolagi o agaga.

Parataiso. E tusa ai ma upu a le perofeta o Alema, e malolo agaga o e amiotonu mai tiga ma faanoanoaga uma o le lalolagi. E ui i lea, latou te galulue e faia le galuega a le Alii. Sa vaai Peresitene Iosefa F. Samita i se faaaliga e faapea, na mavae loa le faasatauroga o Iesu Keriso, sa afio atu o Ia i e amiotonu i le lalolagi o agaga. Sa Ia tofia avefeau, ma tuu atu ia i latou le mana ma le pule, ma poloaiina i latou e “aveina atu le malamalama o le talalelei ia i latou sa i ai i le pogisa, e oo atu i agaga uma o tagata” (Mataupu Faavae ma Feagaiga 138:30).

Ua faatuina le Ekalesia i le lalolagi o agaga, ma ua faaauau ai iina ia tiutetauave o i latou e umia le perisitua (tagai i le Mataupu Faavae ma Feagaiga 138:30). Sa aoao mai Peresitene Uilifoti Uitilafi: “Ua i ai le Perisitua lava e tasi i le isi itu o le veli. … O Aposetolo, Fitugafulu, ma Toeaina taitasi, ma isi, o e na maliliu i le faatuatua, o le taimi lava e ulu atu ai i le tasi itu o le veli, e ulu atu ai i le galuega o le talaiga” (Deseret News, Ian. 25, 1882, 818).

E taua foi sootaga faaleaiga. Sa vaai Peresitene Jedediah M. Grant, o se fesoasoani ia Polika Iaga, i le lalolagi o agaga ma faamatala atu ia Heber C. Kimball le faatulagaga o loo i ai iina:

“Sa fai mai o ia, o tagata sa ia vaai i ai iina sa faatulagaina i ni aiga. … Na ia faapea mai, ‘Ina ua ou vaai atu i aiga, e i ai nisi sa le atoatoa, … aua sa ou vaai i aiga sa le faatagaina e nonofo faatasi, aua sa latou le faamamaluina o latou valaauga iinei’” (Deseret News, Tes. 10, 1856, 316–17).

Falepuipui o Agaga Sa ta’ua e le Aposetolo o Peteru le lalolagi o agaga ina ua mavae le oti o se falepuipui, ma o le falepuipui lea mo nisi (tagai 1 Peteru 3:18–20). I le falepuipui o agaga o loo i ai agaga o e latou te lei mauaina le talalelei a Iesu Keriso. O nei agaga o loo i ai le saolotoga ma e mafai ona tosina atu i le lelei po o le leaga foi. E mafai e agaga ona alualu i luma mai le tasi tulaga i le isi tulaga, pe a latou aoaoina mataupu o le talalelei ma ola ai. E mafai e agaga o loo i le parataiso ona aoao agaga o loo i le falepuipui (tagai i le Mataupu Faavae ma Feagaiga 138). Afai latou te talia le talalelei ma sauniga ua faia mo i latou i malumalu, e mafai ona saunia i latou lava e tuua le falepuipui o agaga ma o atu e nonofo i le parataiso.

O loo i ai foi i le falepuipui o agaga i latou na teena le talalelei ina ua mavae ona talai atu ia te i latou i le lalolagi po o le falepuipui o agaga. O agaga nei e mafatia i se tulaga ua ta’ua o seoli. Ua latou aveese i latou lava mai le alofa mutimutivale o Iesu Keriso, Le na fetalai mai, “Aua faauta, o a’u le Atua na puapuagatia i nei mea mo tagata uma, ina ia latou le puapuagatia pe afai latou te salamo; ae peitai, afai latou te le salamo, e ao ina latou tiga e pei o a’u; o le tiga lea na faagateteina ai a’u lava, o le Atua, le Silisiliese i mea uma, ona o le tiga, ma na maligi ai le toto mai pu laiti uma lava o le tino, ma na tiga le tino atoa ma le agaga” (Mataupu Faavae ma Feagaiga 19:16–18). A uma ona latou mafatia mo a latou agasala, ona faatagaina ai lea o i latou, e ala mai le Togiola a Iesu Keriso, e nonofo i le tikeri o le mamalu sili ona maualalo, o le malo telesitila lea.

Tusifaamaumau Ou Lagona Uunai