O faaaliga o aso e gata ai o loo tautala ai i le seoli i ni uiga se lua. Muamua, o se nofoaga lea lē tūmau i le lalolagi o agaga mo i latou o e na lē usiusitai i le olaga faaletino. O lenei uiga, e i ai le iuga o le seoli. O iinā o le a aoaoina ai agaga i le talalelei, i se taimi foi pe a uma ona latou salamo, o le a toetutu mai i latou i se tulaga o le mamalu ua agavaa ai i latou. O i latou o e e lē salamo, ae lē avea i latou o ni atalii o le malaia, o le a nonofo ai pea i latou i seoli i taimi o le Meleniuma. A mavae le afe tausaga o le tīgā, o le a toetutū mai i latou i se mamalu telesitila (MF&F 76:81–86; 88:100–101).
O lona lua, o le nofoaga tumau lea o e lē faaolaina i le togiola a Iesu Keriso. O le uiga lenei, e tumau ai le seoli. O le nofoaga lea o i latou o e ua maua o “tumau pea i le eleelea” (MF&F 88:35, 102). O le nofoaga lenei e nonofo ai e faavavau Satani, ma ana agelu, ma atalii o le malaia—o i latou ia na faafitia le Atalii ina ua uma ona faaali atu o ia e le Tamā ia te i latou (MF&F 76:43–46).
Ua taʼua e tusitusiga paia le seoli i nisi taimi o se nofoaga i fafo i le pogisa.