“Ko e Taumuʻa ʻo e Faiako ʻi he Founga ʻa e Fakamoʻuí,” Ko e Faiako ʻi he Founga ʻa e Fakamoʻuí: Maʻa Kinautolu Kotoa ʻOku Faiako ʻi he ʻApí pea ʻi he Siasí (2022)
“Ko e Taumuʻa ʻo e Faiako ʻi he Founga ʻa e Fakamoʻuí,” Ko e Faiako ʻi he Founga ʻa e Fakamoʻuí
Ko e Taumuʻa ʻo e Faiako ʻi he Founga ʻa e Fakamoʻuí
ʻE lava ke tokoni e ngaahi tefitoʻi moʻoni ʻoku akoʻi ʻi he maʻuʻanga tokoni ko ʻení ke fakahoko ʻe he faiako kotoa pē ʻo e ongoongoleleí ʻa e akoʻí ʻi he founga ʻa e Fakamoʻuí. ʻOku kau ki ai ʻa e mātuʻá, kau tangata mo e kau fafine ngāue fakaetauhí, kau faifekaú, kau faiako seminelí mo e ʻinisititiutí, pea mo ha taha pē ʻoku ʻoange ʻe hono uiuiʻi faka-Siasí ha faingamālie ke nau faiako.
Te ke lava ʻo ako ʻa e maʻuʻanga tokoni ko ʻení ʻiate koe pē pe fakaʻaongaʻi ia ke tataki ʻaki e fealēleaʻaki mo e niʻihi kehé fekauʻaki mo e founga ke hoko ai ko ha faiako lelei angé. Hangē ko ʻení, ʻe lava ke fakaʻaongaʻi ʻa e maʻuʻanga tokoni ko ʻení ʻi he efiafi ʻi ʻapí, ngaahi fakataha fakapalesitenisií, fakataha alēlea fakauooti pe fakasiteikí, ngaahi fakataha ako ʻa e seminelí mo e ʻinisititiutí, pea mo e ngaahi fakataha alēlea ʻa e kau faiakó (vakai, “Maʻá e Kau Takí—Tokoniʻi e Kau Faiakó ke Lavameʻá”).
Anga Hono Fokotuʻutuʻu ʻo e Maʻuʻanga Tokoni Ko ʻEní
ʻOku fakamamafaʻi ʻe he konga 1 ʻa e mahuʻinga ʻo e tukutaha e tokangá kia Sīsū Kalaisí ʻi he taimi kotoa pē ʻoku tau akoʻi ai ʻa e ngaahi tefitoʻi moʻoni ʻo ʻEne ongoongoleleí. ʻOku fakamatalaʻi ʻe he konga ko ʻení ʻa e meʻa ʻoku tau akoʻí.
ʻOku fakamamafaʻi ʻe he konga 2 ʻa e ngaahi tefitoʻi moʻoni ʻo e faiako hangē ko Kalaisí. ʻOku fakamatalaʻi ʻe he konga ko ʻení ʻa e founga ʻoku tau faiako aí.
ʻOku ʻomi ʻe he Konga 3 ha ngaahi fokotuʻu ʻaonga ke tokoni ki he kau faiakó ke nau fakaʻaongaʻi ʻa e ngaahi tefitoʻi moʻoni ʻo e faiako faka-Kalaisí.
Vakaiʻi Fakalūkufua ʻo e Faiako ʻo Hangē ko Kalaisí
ʻOku ʻoatu ʻe he ngaahi saati ko ʻení ha vakai fakalūkufua ki he ngaahi tefitoʻi moʻoni ʻoku akoʻi ʻi he maʻuʻanga tokoni ko ʻení.