Maʻá e Kau Takí—Tokoniʻi e Kau Faiakó ke Lavameʻa

ʻOku fakahoko ʻa e ngaahi fakataha alēlea fakafaiakó, ʻi he lolotonga ʻo e taimi kalasi miniti ʻe 50 he Sāpaté.

• ʻE lava ke kau atu e kau faiako ʻo e Lakanga Fakataulaʻeikí, Fineʻofá mo e Kau Finemuí ʻi he Sāpate ʻuluakí pe Sāpate tolú, ʻo fakatatau mo e fakahinohino ʻa e kau taki fakalotofonuá.

• ʻE lava ke kau atu e kau faiako Lautohi Faka-Sāpaté ʻi he Sāpate uá pe Sāpate faá, ʻo fakatatau mo e fakahinohino ʻa e kau taki fakalotofonuá.

• ʻE lava ke kau atu e kau faiako Palaimelí ʻi ha faʻahinga Sāpate pē, ʻo fakatatau mo e fakahinohino ʻa e kau palesitenisī Palaimeli mo e Lautohi Faka-Sāpate ʻi he uōtí. Kapau ʻe fie maʻu, ʻe lava ke fakataha mavahevahe ʻa e kau faiako Palaimelí ia mei he kau faiako kehé ke nau talatalaifale fekauʻaki mo e ngaahi fiemaʻu makehe ki hono akoʻi ʻo e fānaú. ʻE lava ke fakahoko ʻeni lolotonga e taimi hiva miniti ʻe 20, kimuʻa pe hili e ngaahi fakataha angamaheni ʻo e Sāpaté, pe ʻi ha ʻaho kehe ʻo e uiké. ʻE lava ke fakahoko ha fakataha alēlea ʻo tuʻo taha pe lahi ange lolotonga e kuatá, maʻá e kau faiako Palaimelí ke ʻoua naʻa nau mavahe kotoa he taimi tatau, kae liʻaki e ngaahi kalasi Palaimelí ʻi he uike tatau. Fakatokangaʻi ange:Kapau ʻe fie maʻu, ʻe vahe ʻe he kau palesitenisī ʻo e Palaimelí ha kau faiako fakataimi, fakatahaʻi e ngaahi kalasí pe fai ha fokotuʻutuʻu kehe kae lava e kau faiako Palaimelí ʻo ʻalu ki he fakataha alēlea ʻa e kau faiakó.)

• ʻE lava ke fakahoko ʻa e fakataha alēlea fakafaiakó maʻá e mātuʻá ʻi ha faʻahinga Sāpate pē, ʻo fakatatau mo e tuʻutuʻuni ʻa e fakataha alēlea fakauōtí.

ʻOku totonu ke kau ki ai e tokotaha kotoa pē ʻokú ne akoʻi ha kōlomu pe kalasi ʻi he uōtí, fakataha mo ha taha ʻi he kau taki ʻo e lakanga fakataulaʻeikí pe houalotú ʻokú ne tokangaʻi e kau faiako ko iá. Kapau ʻe fie maʻu, ʻe lava ke vahevahe e niʻihi ʻoku kau ki aí ke fakakulupu ʻo fakatatau mo e fiemaʻu ʻa e niʻihi ʻoku nau akoʻí. Hangē ko ʻení, mahalo naʻa ʻaonga ange ki he kau faiako ʻo e toʻu tupú pe fānaú ke nau fakataha mavahe ʻi ha taimi ʻe niʻihi ke aleaʻi ha ngaahi meʻa ʻoku fekauʻaki tonu pē ia mo hono akoʻi ʻo e toʻu tupú pe fānaú.

Ki he ngaahi fakataha alēlea ʻa e kau faiakó maʻá e mātuʻá, ʻe fakapapauʻi ʻe he fakataha alēlea ʻo e uōtí pe te nau fakaafeʻi ha mātuʻa pau pe fakaʻatā ki he taha kotoa ʻoku fie kau maí.

ʻOku tokangaʻi e fakataha alēlea ʻa e kau faiakó ʻe he fakataha alēlea fakauōtí, pea tokoni ki ai e kau palesitenisī ʻo e Lautohi Faka-Sāpaté. ʻOku nau fealēleaʻaki fakataha fekauʻaki mo e ngaahi fiemaʻu ʻa e kau faiakó mo e kau akó ʻo makatuʻunga ʻi he meʻa kuo nau fakatokangaʻi ʻi he ngaahi kalasí mo e ngaahi fakatahá. ʻOku nau ngāue fakataha ke fakapapauʻi pe ko e fē ʻa e ngaahi tefitoʻi moʻoni mo e founga ngāue mei he Faiako ʻi he Founga ʻa e Fakamoʻuí te nau feau lelei taha e ngaahi fiemaʻu kuo nau ʻiló.

Ko e angamahení, ʻoku tataki ʻe he palesiteni ʻo e Lautohi Faka-Sāpaté ʻa e ngaahi fakataha alēlea fakafaiakó. Ka ʻe lava pē ke vahe ki ha kau mēmipa kehe ʻo e uotí ke tataki ʻa e ngaahi ngaahi fakatahá. ʻOku toe fakamālohia ʻe he kau palesitenisī ʻo e kōlomú mo e houalotú mo ʻenau kau faiakó ʻa e ngaahi tefitoʻi moʻoni mo e ngaahi founga ngāue naʻe aleaʻi ʻi he fakatahá.

ʻOku totonu ke muimui ʻa e fakataha alēlea ʻa e kau faiakó ʻi he foungá ni:

• Feʻinasiʻaki mo fealēleaʻaki fakataha. Fakaafeʻi e kau faiakó ke nau vahevahe ha ngaahi meʻa ne hoko ʻi heʻenau faiakó, fai ha ngaahi fehuʻi fekauʻaki mo e taimi faiakó pea vahevahe ha ngaahi fakakaukau ki ha ngaahi faingataʻa ʻe ala hoko. ʻE lava ke fakakau he konga ko ʻeni ʻo e fakatahá hano toe fakamanatu e ngaahi tefitoʻi moʻoni ne aleaʻi ʻi he ngaahi fakataha kimuʻá.

• Ako fakataha. Fakaafeʻi e kau faiakó ke nau aleaʻi ha taha ʻo e ngaahi tefitoʻi moʻoni ʻoku ʻoatu ʻi he maʻuʻanga tokoni ko ʻení: tukutaha e tokangá kia Sīsū Kalaisi, ʻofa ʻiate kinautolu ʻokú ke akoʻí, faiako ʻaki e Laumālié, akoʻi e tokāteliné, pea fakaafeʻi e ako fakamātoató. ʻE lava ke akoʻi e ngaahi tefitoʻi moʻoni ko ʻení ʻi ha faʻahinga fakahokohoko pē, tukukehe kapau ʻe toki tuʻutuʻuni ʻe he fakataha alēlea fakauōtí ia ha meʻa kehe, pea ʻe lava ʻe he niʻihi ʻoku kau atu ki he fakatahá ʻo fili e tefitoʻi moʻoni hoko ke aleaʻí. Te ke lava ʻo akoʻi ha fokotuʻutuʻu ʻe taha ʻo laka hake ʻi ha fakataha ʻe taha, kapau ʻe fie maʻu.

• Palani pea Fakaafe. Tokoniʻi e kau faiakó ke nau palani e founga te nau fakaʻaongaʻi ai e tefitoʻi moʻoni kuo nau aleaʻí. Kapau ʻe feʻunga, te mou lava foki ʻo akoako fakataha ha pōtoʻi ngāue kuo mou aleaʻi. Fakaafeʻi kinautolu ke lekooti mo ngāue ki ha faʻahinga ongo ʻoku nau maʻu ki he founga hono fakahoko ʻo ha tefitoʻi moʻoni ʻi heʻenau faiakó—kau ai ʻenau feinga ke faiako ʻi honau ngaahi ʻapí. Fakalotolahiʻi kinautolu ke nau kamata ako leva ki he tefitoʻi moʻoni hoko ke aleaʻí.

ʻOku totonu ke hanga ʻe he fakataha alēlea ʻa e kau faiakó ʻo faʻifaʻitaki e ngaahi tefitoʻi moʻoni ʻoku aleaʻí ki he lahi taha te nau lavá.