“Hono ‘Ikai Lelei mo Faka‘ofo‘ofa … ke Nofo Fakataha ‘i he Uouangataha”

“ ‘Oku [tau] ongo‘i fiefia ke fe‘iloaki mo e Kāingalotú ‘i ha toe Konifelenisi Lahi ‘e taha [‘Okatopa 1840]. … ‘Oku kei loto vēkeveke, vilitaki, mo longomo‘ui ai pē ‘a e Kāingalotú ‘i he ngāue ma‘ongo‘onga ‘o e ngaahi ‘aho faka‘osí; pea ‘oku ‘omi ‘e he [me‘á ni] kiate kitautolu ha fiefia mo ha fakafiemālie, mo ne fakalotolahi‘i lahi kitautolu ‘i he lolotonga ‘o ‘etau fekuki mo e ngaahi faingata‘a ‘oku ‘i hotau halá.

“Fakatauange ke fakahaa‘i ma‘u pē ‘e he kau tangatá ‘a e fa‘ahinga loto ko iá, mo hiki hake homau ngaahi nimá, pea kuo pau ke mau laka atu ki mu‘a; ‘e teka atu ‘a e ngāue ‘a e ‘Eikí, ‘e fokotu‘u hake ‘a e Temipale ‘o e ‘Eikí, ‘e fakalotolahi‘i ‘a e Kaumātu‘a ‘o ‘Isilelí, langa hake mo Saione, ‘o hoko ko e vīkiviki‘anga, fiefia‘anga, pea mo e lāngilangi‘ia ‘anga ‘o e māmaní kotoa; pea ‘e fetāliaki mei he tafungofunga ki he tafungofunga, pea mei he mo‘unga ki he mo‘unga, pea mei he motu ki he motu, pea mei he konitinēniti ki he konitinēniti, ‘a e hiva ‘o e fakahīkihiki, mo e nāunau, mo e fakalāngilangi, pea mo e ngeia ‘o Ia ‘oku nofo ‘i he taloní, pea ki he Lamí ‘o ta‘e ngata pea ta‘e ngata, pea ‘e hoko ‘a e ngaahi pule‘anga ‘o māmaní ko e pule‘anga ‘o hotau ‘Otuá mo Hono Kalaisí [vakai, Fakahā 11:15].

“ ‘Oku tau fiefia mo‘oni ke ‘ilo ‘oku ‘i ai ha fa‘ahinga laumālie uouangataha pehē ‘oku ‘i he siasí fakakātoa, ‘i heni pea ‘i mulí na, ‘i he konitinēnití ni, pea pehē foki ki he ‘otu motu ‘o e tahí; he ‘i he tefito‘i mo‘oni ko ‘ení, pea mo hono fakatahataha‘i ‘o ‘etau ngāué, te tau lava ai ke fakahoko lelei ‘a e ngaahi taumu‘a ‘a hotau ‘Otuá.”⁷

“ ‘Oku vave ‘aupito e ‘alu hake ‘a e [Temipale Nāvuú]; ‘oku fakaongosia lahi ‘a e nima kotoa pē ke lava hono langá, pea ‘oku fakalakalaka lelei ‘a e ngaahi me‘a kotoa pē, pea ‘i he fa‘ahita‘u fakatōlau ka hokó, ‘oku tau ‘amanaki ke mamata ki ha lava ‘a e falé. … Na‘e fa‘a ‘i ai ha toko nimangofulu na‘a nau tā maka ‘i he lolotonga ‘o e fa‘ahita‘u momokó, pea ‘i he taimi tatau pē na‘e ‘i ai mo ha tokolahi kehe na‘a nau femo‘uekinia ‘i hono toho maí, pea ‘i ha toe ngaahi ngāue kehe pē foki. …

“Lolotonga e femo‘uekina ‘a e kakaí ‘i he‘enau feinga ke fakahoko ‘enau taki taha ngāue faka‘ahó, mo ngāue‘i ‘a e vahe hongofulu ‘e taha ‘o honau taimí, ‘oku ‘i ai mo ha ni‘ihi na‘e ‘ikai ke nau fu‘u loto‘aki hono ‘omi ‘o ‘enau vahehongofulú pea mo e ngaahi koloa fakatapuí ki he taumu‘a tatau ko ‘ení. Talu mei hono fokotu‘u ‘o e Siasí ni mo e te‘eki ai ke tau mamata ‘i hano fakahaa‘i pehē ‘a e loto fie talangofua ki he [ngaahi fiema‘u] ‘a Sihová, ha holi lahi ange ke fai ‘a e finangalo ‘o e ‘Otuá, faka‘aonga‘i ha vilitaki ‘oku lahi angé, pe fakahoko ha ngaahi feilaulau lahi ange ‘i ha toe taimi, he kuo ‘osi folofola ‘a e ‘Eikí, ‘Tuku ke langa ‘a e temipalé ‘aki ‘a e vahehongofulu ‘a hoku kakaí.’ [Vakai T&F 97:10–11.] INa‘e hangē na‘e ‘i he kakai lalahí pea mo e kau talavoú ma‘u ai pē, ‘i he kakai tangatá pea mo e kakai fefiné, ‘i he fānau tangatá mo e fānau fefiné, pea na‘a mo kinautolu ko e sola na‘e ‘ikai ke kau ‘i he Siasí, ‘a e laumālie ‘o e fa‘a ngāué, fa‘a foakí mo e talangofuá, ‘o nau fā‘ūtaha ‘i ha anga fie tokoni ta‘e ‘amanekina ‘i hono fakahoko ‘o e ngāue ma‘ongo‘ongá ni; pea na‘a mo e uitoú, neongo ‘ene masivá na‘e ‘ikai ke lava ‘o ta‘ofi ‘i ha ngaahi me‘a lahi mei he‘ene foaki mai ‘ene kihi‘i pa‘anga ‘e uá.

“ ‘Oku mau ongo‘i ‘i he taimí ni ke fakahoko atu ki he taha kotoa, ki he kakai lalahí pea mo e kakai kei talavoú, ‘o fakatou tatau pē ‘i he Siasí pea mo tu‘a, ‘a ‘emau fakamālō ta‘e tūkua ki he‘enau fie tokoni ta‘e fakakouna‘í, ‘i he‘enau anga‘ofa, faivelenga, pea mo ‘enau talangofua, kuo fakahaa‘i tonu ‘i he me‘á ni. ‘O ‘ikai koe‘uhí ko ha‘amau ma‘u ai ha pa‘anga fakafo‘ituitui, ka ko e taimi ‘oku hā ai mei he hou‘eiki tangatá, ‘o hangē ‘i he me‘a ko ‘ení, ‘a e uouangataha ‘i he taumu‘á mo e palaní, pea taki taha tuku mai kotoa honau uma ki he ngāué, ‘oku mole atu leva ‘etau ta‘e manongá, ‘etau ongosiá, ‘etau hela‘iá pea mo ‘etau loto hoha‘á, he kuo fakama‘ama‘a‘i ‘etau kavengá mo ma‘ama‘a [vakai, Mātiu 11:30].”⁸

“Ko ‘eni, te u toe lea faka‘osi ‘aki ‘eni ki he taha kotoa, ‘o hangē ko e tangata Saame ‘o e kuonga mu‘á, ‘Vakai ki hono lelei pea mo hono fakafiemālie ‘o e nofo fakataha ‘a e kāingá ‘i he fe‘ofo‘ofaní. ‘Oku tatau ia mo e lolo mahu‘inga ki he ‘ulú, ‘a ia na‘e tafe hifo ki he halakava, ‘io ko e halakava ‘o ‘Ēloné, pea ‘alu hifo ki he kapa ‘o hono ngaahi kofú, ‘oku hangē ko e hahau ‘o Heamoní, pea hangē ko e hahau na‘e tō ki he ngaahi mo‘unga ‘o Saioné; he na‘e fekau ‘i ai ‘e [he ‘Eikí] ‘a e monū‘iá, ‘io, ko e mo‘ui ta‘engatá!’ Ko e uouangatahá ko e mālohi. [Vakai, Saame 133:1–3.]”⁹

Na‘e faitohi ‘a e Palōfitá ‘i Tīsema ‘o e 1840 ki he kau mēmipa ‘o e Kōlomu ‘o e Toko Hongofulu Mā Uá mo ha kau taki lakanga fakataula‘eiki kehe na‘e ngāue fakafaifekau ‘i Pilitānia Lahi, ‘o pehē: “ ‘Oku mātu‘aki … fakafiemālie ki he‘eku fakakaukaú, ‘i he femahino‘aki lelei ‘i homou vaá, pea mo e talangofua fiefia ‘a e Kāingalotú ki he fale‘í, mo [faifeinga] fakataha ‘i he ngāue ko ‘eni ‘o e ‘ofá, pea mo hono tu‘uaki atu ‘o e mo‘oní mo e mā‘oni‘oní. Ko e me‘a ‘eni ‘oku totonu ke ‘i he Siasi ‘o Sīsū Kalaisí; he ko e uouangatahá ko ha mālohinga. ‘Vakai ki hono lelei pea mo hono fakafiemālie ‘o e nofo fakataha ‘a e kāingá ‘i he fe‘ofo‘ofa ní!’ [Saame 133:1.] Tuku ke tanumaki ma‘u ai pē ‘e he Kāingalotu ‘o e Fungani Mā‘olungá ‘a e tefito‘i mo‘oni ko ‘ení, pea kuo pau ke hoko mai ‘a e ngaahi tāpuaki nāunau‘ia tahá, ‘o ‘ikai kiate kinautolu fakafo‘ituitui pē, ka ki he Siasí fakakātoa—‘e tauhi ai ‘a e maau ‘o e siasí, faka‘apa‘apa‘i hono kau ma‘u lakangá, pea fai ‘i he fie talangofua mo e fiefia ki hono ngaahi fiema‘ú. …

“Tuku ke manatu‘i ‘e he Kāingalotú ko e ngaahi me‘a lalahí ‘oku makatu‘unga ia ‘i he‘enau ngaahi feinga fakafo‘ituituí, pea ‘oku ui kinautolu ke nau hoko ko e kaungāngāue fakataha mo kitautolu pea mo e Laumālie Mā‘oni‘oní ‘i hono fakahoko ‘o e ngāue ma‘ongo‘onga ‘o e ngaahi ‘aho faka‘osí; pea ‘i he fakakaukau ki hono lahí, ‘oku tatau pē ia mo e ngaahi tāpuaki pea mo e ngaahi nāunau ‘o e ngāue ‘o e ‘aho faka‘osí, tuku ke ‘oua na‘a ngata pē ‘i hono tanu hifo ‘o e siokita kotoa pē, kae faka‘auha faka‘aufuli; pea tuku ‘a e ‘ofa ki he ‘Otuá mo e tangatá ke tu‘u ma‘u, pea pule ‘i he ‘atamai kotoa pē, koe‘uhí ke tatau honau lotó mo ‘Īnoke ‘o e kuonga mu‘á, ‘o mahino ki ai ‘a e me‘a kotoa pē, ‘o e lolotongá, kuo hilí pea mo e kaha‘ú, pea ‘ikai tōmui ‘i ha foaki, ‘o tatali ki he hā‘ele mai ‘a e ‘Eiki ko Sīsū Kalaisí [vakai, 1 Kolinitō 1:7].

“Ko e ngāue ‘oku tau femo‘uekina fakataha aí ‘oku ‘ikai hano tatau. Ko e ngaahi fili kuo pau ke tau fehangahangai mo iá ‘oku olopoto mo taukei ‘i he filio‘í; ‘oku taau ai mo kitautolu ke tau tokanga ke fakatahataha‘i hotau iví, pea ‘oku totonu ke ‘i hotau lotolotongá ‘a e ongo ‘oku lelei tahá; pea ‘i he tokoni ‘a e Māfimafí, te tau toki laka atu mei he ikuna ki he ikuna, pea mei ha feingatau ‘e taha ki ha feingatau ‘e taha; ‘e ta‘ofi ‘a ‘etau ngaahi holi ‘oku koví, mole atu mo ‘etau meheká; he ‘ikai ma‘u ha potu ‘i hotau lotó mo‘ó e tāufehi‘á; ‘e pulia mo e ngaahi vaivaí, pea te tau tu‘u kuo tali ‘e he langí, pea mo ‘ilo‘i ko e ngaahi foha kitautolu ‘o e ‘Otuá.

“Tuku mu‘a ke mahino kiate kitautolu kuo pau ke ‘oua na‘a tau mo‘ui ma‘atautolu pē, ka ma‘á e ‘Otuá; pea ‘i he‘etau fai iá, ‘e ‘iate kitautolu leva ‘a e ngaahi tāpuaki ma‘ongo‘onga tahá, ‘i he mo‘uí ni pea mo ‘itāniti.”¹⁰

“Te tau pehē ki he Kāingalotu ‘oku omi ki hení [ki Nāvuú], kuo mau fakatoka ‘a e fakava‘e ki hono tānaki ‘o e kakai ‘o e ‘Otuá ‘i he potú ni, pea ‘oku [mau] ‘amanaki ko e taimi ‘e omi ai ‘a e Kāingalotú, te nau mo‘ulaloa ki he fale‘i kuo fokotu‘u ‘e he ‘Otuá. … ‘Oku tau feinga heni ke nono‘o hotau kongalotó, pea teke‘i mei hotau lotolotongá ‘a e kau ngāue ‘o e angahalá; pea ‘oku tau faka‘amu pē ko e taimi ‘e tū‘uta mai ai hotau kāingá mei mulí, te nau tokoni mai ke tau teka‘i atu ‘a e ngāue leleí ni, pea mo fakahoko ‘a e palani ma‘ongo‘onga ko ‘ení, ke ‘langa hake ‘a Saione ‘i he mā‘oni‘oni; pea muimui ki hono fuká;‘ ko e kakai ‘o e ‘Otuá, ‘i he malumalu ‘o ‘Ene fakahinohinó, mo talangofua ki He‘ene fonó, koe‘uhí ke tau fakalakalaka ai ‘i he mā‘oni‘oní pea mo e mo‘oní; pea ‘i he taimi ‘e fakahoko ai ‘a ‘Ene ngaahi taumu‘á, te tau lava ‘o ma‘u ha tofi‘a ‘iate kinautolu kuo fakamā‘oni‘oni‘í.”¹¹

“ ‘Oku tau ma‘u ‘e kitautolu kotoa ha kaungāme‘a, ha‘atau ngaahi fetu‘utaki, fāmili mo hatau kaungā-maheni; pea ‘oku tau fakatokanga‘i ko e mālohi ‘o e anga fakakaungāme‘á … mo e ongo‘i fakatokouá kuó ne fakataha‘i ta‘e toe malava ke veteki kitautolu mei hotau kaungāmaheni ‘ofeina ‘e lauiafe; kuo tau tali ‘a e tui pē taha, ‘a ē ‘na‘e ‘oatu ki mu‘a ki he kāinga mā‘oni‘oní.’ [Sute 1:3.] Kuo tau monū‘ia ke fanongo ki he ongoongolelei ta‘engatá, ‘a ē kuo foaki mai kiate kitautolu ‘e he laumālie ‘o e kikité ‘i he fakaava ‘o e langí, ‘i he foaki ‘o e Laumālie Mā‘oni‘oní, ‘i he tauhi mai ‘a e kau ‘āngeló, pea ‘i he mālohi ‘o e ‘Otuá. … ‘Oku ‘i ai ha ongo‘i fakaekāinga ‘i he sinó kotoa, ‘i he sino ‘o Kalaisí, ‘a ia ‘i hono fakatatau mo e fakamatala ‘a Paulá, ko hono siasí; pea he ‘ikai lava ke kafo ha kupu ‘e taha ‘o e sinó ‘o ta‘e ongo‘i ‘e he toenga ‘o e ngaahi kupú, he ‘oku pehē ‘e Paula, kapau ‘e mamahi ‘a e kupu ‘e tahá, ‘oku mamahi mo ia ‘a e ngaahi kupú kotoa pē; pea ka [fiefia] ‘a e kupu ‘e tahá, ‘oku fiefia mo ia ‘a e kupu kotoa pē [vakai, 1 Kolinitō 12:12–27].”¹²

Na‘e fai ‘e he Palōfita ko Siosefa Sāmitá mo hono ongo tokoni ‘i he Kau Palesitenisī ‘Uluakí ‘i Sānuali ‘o e 1841 ‘a e fakahinohino ko ‘ení ki he Kāingalotu na‘e omi ki Nāvū mei he ngaahi tapa kehekehe ‘o māmaní: “ ‘I hono fakataha‘i ‘etau ngāué, mo uouangataha ‘etau feingá, te tau lava ai ke fakahoko ‘a e ngāue ma‘ongo‘onga ‘o e ngaahi ‘aho faka‘osí …, lolotonga iá, ‘e tu‘unga lelei lahi ange ‘a e ngaahi me‘a fakaetu‘asino mo fakalaumālie ‘oku tau tokanga ki aí, pea kuo pau ke tafe mai ‘a e ngaahi tāpuaki ‘o e langí kiate kitautolu ‘i ha matavai ‘oku ta‘e mata‘ofi; pea ‘i he me‘á ni, ‘oku ‘ikai ke mau tui ‘e lava ke toe fehu‘ia.

“Ko e ngaahi tāpuaki fakaetu‘asino mo fakalaumālie ma‘ongo‘onga tahá ‘oku tafe ma‘u pē mei he angatonú mo e ngāue fakatahá, kuo te‘eki ai ma‘u ia ‘i he feinga pe ngāue fakafo‘ituituí. ‘Oku fakamo‘oni‘i ‘a e fo‘i mo‘oni ko ‘ení ‘e he hisitōlia ‘o e ngaahi kuonga kotoa ‘o e kuo hilí. …

“ ‘Oku mau fakatauange ‘e mahino ki he Kāingalotú, ‘i he taimi te nau omi ai ki hení, kuo pau ke ‘oua na‘a nau ‘amanaki ‘e ‘i ai ‘a e haohaoá, leleí, melinó, mo e ‘ofá ‘i he me‘a kotoa pē; kapau te nau ma‘u ‘a e fa‘ahinga fakakaukau ko ‘ení, ‘oku ‘ikai ha veiveiua ‘e hala ‘enau ma‘ú, he ‘oku ‘i heni ‘a e kakai, ‘oku ‘ikai ngata pē ‘enau omi mei ha ngaahi siteiti kehekehé, ka mei ha ngaahi pule‘anga kehekehe, pea neongo ‘oku nau ongo‘i ko e konga kinautolu ‘o e ngāue ‘o e mo‘oní, ‘oku ‘i ai e loto tāufehi‘a fakaakó, pea ko hono olá, ‘e fie ma‘u ha taimi lahi ki mu‘a pea toki lava ‘o ikuna‘i ‘a e ngaahi me‘a ko ‘ení. ‘Oku toe ‘i ai mo ha tokolahi ‘oku nau totolo fakapulipuli holo mo feinga ke tūtuu‘i ‘a e moveuveú, fekainakí, mo e fetāufehi‘a‘akí ‘i hotau lotolotongá, pea ‘i he‘enau fai iá, ‘oku hoko mai ai ‘a e koví ki he Kāingalotú. … Ko ia ai, tuku ke fakapapau ‘a kinautolu ‘oku omi ki he feitu‘ú ni, te nau tauhi ‘a e ngaahi fekau ‘a e ‘Otuá, pea ‘ikai lotofo‘i ‘i he ngaahi me‘a kuo mau fakalau atú, pea te nau toki tu‘umālie—‘e fakahoko mai ‘a e poto ‘o e langí kiate kinautolu, pea ‘e faifai pea te nau mamata ko e mata ki he mata, mo fiefia ‘i he ola ‘o e nāunau kuo teuteu ma‘á e kakai mā‘oni‘oní.

“Ko e ngāue lahi ia ‘e fie ma‘u ‘i he tafa‘aki ‘a e Kāingalotú kae lava ‘o fokotu‘u ‘a e Temipale ‘o e ‘Eikí, koe‘uhí ka nau lava ‘o langa ha fale ‘e tali ‘e he Māfimafí, pea fakahaa‘i ai ‘a Hono mālohí mo Hono nāunaú. Ko ia, tuku kiate kinautolu te nau lava ‘o fakahoko loto tau‘atāina ha feilaulau‘i honau taimí, pea mo ‘enau koloá ki he lelei ‘o e pule‘angá, mo ‘enau ‘ofa ki he ngāue ‘o e mo‘oní, ke nau kau fakataha mo kitautolu ‘i he ngāue ma‘ongo‘onga ko ‘eni ‘o e ngaahi ‘aho faka‘osí, mo fevahevahe‘aki ‘i he ngaahi mamahí, koe‘uhí ke nau a‘u ‘o vahevahe ai ‘i he nāunaú mo e ikuná.”¹³