Mataupu 2

Tatalo E Le Aunoa

“Ou te uunaia tagata uma ma le faamaualalo … ina ia fesootai vavalalata ma lo tatou Tama o i le lagi e ala i le tatalo.”

Mai le Soifuaga o Ezra Taft Benson

“I lo’u olaga atoa, o le fautuaga ia faalagolago i le tatalo, sa faatauaina toetoe lava sili atu i lo se isi lava fautuaga na ou mauaina,” o le saunoaga lea a Peresitene Ezra Taft Benson. “Na avea ma se vaega taua o lo’u tagata, o se taula, o se puna tumau o le malosi, ma o le faavae o lo’u malamalama i mea faalelagi.

“‘Ia manatua po o a lava mea e te faia po o fea lava e te i ai, e le tuua lava na o oe’ o le fautuaga masani lea a lo’u tamā ia te a’u a o o’u laitiiti. ‘E latalata mai i taimi uma lo tatou Tama Faalelagi. E mafai ona e aapa atu ma maua mai Lana fesoasoani e ala i le tatalo.’ Ua ou iloa le moni o lenei fautuaga. Faafetai i le Atua i le mafai ona tatou aapa atu ma maua lena mana le mavaaia, aua a leai lea mana e leai se tagata e mafai ona faia le mea sili na te mafaia.”¹

Sa mulimuli Peresitene Benson i lenei fautuaga i vaega uma o lona soifuaga. Ina ua tofia o ia e tautua o se failautusi a le Iunaite Setete mo vaega tau faatoaga, sa ia filifilia ma le “agaga tatalo ma le faaeteete” se vaega o tamalii latou te galulue faatasi, ma “sa ole atu i le Atua e tuuina mai ia te [ia] se agaga o le iloatino.”² I le latou fonotaga muamua, sa ia fesili atu ai “pe i ai se tasi e tetee i le amataina o a latou fonotaga i le tatalo. E leai se tasi na faatautee. Ma o iina na amata ai se faiga masani lea sa [ia] faaauauina mo tausaga e valu. Sa ia tofia tagata taitoatasi o le aufaigaluega e faia le tatalo amata.”³ Sa oo ina talisapaia e ana paaga lenei faiga masani, e ui ina sa latou le masani ai i le taimi muamua. Sa ta’ua mulimuli ane e se tasi o le aufaigaluega e faapea, o nisi o ia alii sa le’i tatalo leotetele lava talu mai o laiti. “Sa matou tautoai ma tau mafaufau ni upu,” o lana tala lea. “Ae sa le’i faaalia lava e le Pule [Peresitene Benson] na ia matauina. Ma ina ua mavae ni nai taumafaiga faataitai sa oo ina to’a lelei tagata uma. Pe na aogā? Ia, ou te fai atu, a e amataina se fonotaga i lena ala, e le taula’i atu ma le faamaualuga tagata i na o o latou lava manatu faaalia. E vave lava ona outou maua le maliliega e tasi i le mea e tatau ona fai i soo se tulaga.”⁴

Sa faamanuiaina foi le usoga a Peresitene Benson i le Au Peresitene Sili ma le Korama a Aposetolo e Toasefululua mai lona natura o le agaga tatalo. Na saunoa Peresitene Gordon B. Hinckley, o lē sa auauna atu o se Fesoasoani Muamua ia Peresitene Benson i le Au Peresitene Sili, e faapea:

“Sa ou tootuli faatasi ma ia ma faalogo o tatalo o ia.

“Sa musuia i taimi uma ana tatalo. Na toetoe lava o [ana] tatalo uma na matele lava i le faailoaina atu o le faafetai. Sa itiiti ni mea sa ia talosagaina. Sa ia faailoa atu le loto faafetai mo mea e tele.

“Sa faafetai o ia i le Alii mo le ola, mo aiga, mo le talalelei, mo le faatuatua, mo le susulu o le la ma le timu, le anoanoa’i o mea o le natura, ma lagona masani o tagata e alolofa ai [ma sailia] le saolotoga. Sa ia faafetai i le Alii mo uo ma paaga. Sa ia faailoa atu le alofa mo le Faaola ma le loto faafetai mo Lana taulaga togiola. Sa faafetai o ia i le Alii mo le avanoa e auauna atu ai i tagata.”⁵

Sa faavaeina e Peresitene Benson ma lona faletua o Flora, se aiga na tatalo uma tagata, [tatalo] taitoatasi ma [tatalo] faatasi. Sa matau e lo la atalii o Mark: “A tootuli Tama e tatalo, sa le’i topelauina ana upu. Sa anoa ana upu. Sa manino lelei lava, na talanoa o ia ma lo tatou Tama o i le lagi.”⁶ Sa aoao e Peresitene ma Tuafafine Benson le la fanau ia tatalo mo le taitaiga ma le malosi faaletagata lava ia ma ia tatalo foi mo le tasi ma le isi. Sa matauina i se tasi taimi e se tasi o uo a le aiga le faatosinaga o na aoaoga ina ua ia auai atu faatasi ma le auaiga o Benson i se sauniga o le konafesi aoao. Sa ia tusia:

“I se aso o Aperila … , na ou iloa ai se tasi o puna o le malosiaga o se tasi o le Au Pulega Aoao.

“Sa matou saofafai faatasi ma alo e toaono a Elder Ezra Taft Benson, o se tasi o i latou sa ma potu faatasi i le kolisi. Sa faateleina lo’u naunau ina ua tulai Peresitene [Tavita O.] MaKei ma faasilasila mai le failauga na sosoo ai. Sa ou tilotilo atu ma le faaaloalo a o savali mai Elder Benson, o lē ou te le’i feiloai lava i ai, e agai atu i le masini faaleotele leo. O ia o se tamalii tino maualuga, e sili atu ma le ono futu le umi. O ia … o se tamalii sa lauiloa faavaomalo o le Failautusi a le Iunaite Setete o Mea Tau Faatoaga ma o se molimau faapitoa o le Alii, o se tamalii na foliga mai e toafilemu ma mautinoa, o lē sa saunoa atu i ni aofia i le lalolagi atoa. Sa faafuasei ona tago mai se lima i lo’u ogalima. Sa punou mai se teineitiiti laitiiti ia te a’u ma musumusu mai ma le naunautai, ‘Tatalo mo Tama.’

“Na fai si o’u te’i, sa ou faapea, ‘O le feau lenei sa musumusu faasolo mai i le [matou] laina, ma e tatau ona ou pasi atua i le isi. Pe ou te fai atu “Tatalo mo Elder Benson”? Pe ou te fai i ai, “E tatau ona e faia se tatalo mo lou tama”?’ O le lagonaina o le manaoga vave e faatino, sa ou punou atu ai ma musumusu atu, ‘Tatalo mo Tama.’

“Sa ou vaaia lena musumusu a o tuufaasolo atu i le atulaina na saofai ai Sister Benson, ma lona ao ua punou ifo. …

“A o mavae atu tausaga, na oo mai ma mou atu ia konafesi aoao, ma o taimi taitasi na tulai ai Peresitene Benson e saunoa, sa ou mafaufau lava, ‘ua aufaatasi nei lana fanau, o e o loo taape solo i le konetineta, i le tatalo mo lo latou tamā.’”⁷

“Afai o le a tatou alualu i luma i le paia—faateleina le alofagia e le Atua—e leai se mea e mafai ona suia le tulaga o le tatalo.”

Aoaoga a Ezra Taft Benson

Ua aoao mai Iesu Keriso e tatau ona tatou tatalo e le aunoa.

I le taimi o Lana auaunaga i le lalolagi, na aoao mai ai e Iesu ia i tatou se mamanu mo tatalo:

“O lenei ia faapea outou ona tatalo: Lo matou Tamā e, o i le lagi, ia paia lou suafa.

“Ia oo mai Lou malo. Ia faia lou finagalo i le lalolagi e pei ona faia i le lagi.

“Ia e foai mai ia te i matou i le aso nei a matou mea e ai e tatau mo le aso.

“Ia e faamagalo ia te i matou i a matou agasala, e pei o i matou foi ona matou faamagaloina atu i e ua agaleaga mai ia te i matou.

“Aua foi e te taitaiina i matou i le tofotofoga, a ia e laveai ia i matou ai le leaga: Aua e ou le malo, ma le mana, atoa ma le viiga, e faavavau lava. Amene.” (Mataio 6:9–13.)

Sa Ia toe aoao mai, “ina ia tatalo soo e tatau ai, a e aua le faavaivai.” Luka 18:1.)

Na fetalai o Ia, “Ia outou mataala ma tatalo, ina ne’i oo mai le faaosoosoga ia te outou.” (Mataio 26:41.)

I le tisipenisione lenei ua Ia apoapoa’i mai ai, “Ia tatalo e le aunoa ne’i maua e le leaga e toatasi lena le mana i totonu o outou, ma aveese outou i fafo mai lo outou tulaga.” (MF&F 93:49.)

Na folafola atu e le Faaola ia Iosefa Samita, “Ma ua leai se mea e faatausuai ai le tagata i le Atua, pe ua leai ni isi e faamumu faasaga i ai lona toasa, tau lava o i latou o e latou te lē tautinoina lona aao i mea uma, ma lē usiusitai i ana poloaiga.” (MF&F 59:21.)

Ua tatou maua lenei faatonuga mai lo tatou Alii toetu a o auauna atu o Ia i tagata sa Nifae i le Itulagi i Sisifo: “E ao ina outou mataala ma tatalo e le aunoa, ne’i faaosoosoina outou e le tiapolo, ma taitai ese atu ai outou faatagataotaua e ia. …

“E ao ina outou mataala ma tatalo e le aunoa ne’i outou ulu atu i faaosoosoga; ona ua manao Satani ia te outou, ina ia lūlū e ia outou e pei o saito.

“O lea e tatau ai ona outou tatalo atu pea i le Tama i lo’u igoa;

“Ma o soo se mea tou te ole atu ai i le Tamā i lou igoa, e sao, ma talitonu o le a outou maua, faauta, o le a tuuina mai lava ia te outou.” (3 Ni.18:15, 18–20.)⁸

Afai o le a tatou alualu i luma i le paia—faateleina le alofagia e le Atua—e leai se mea e mafai ona suia le tulaga o le tatalo. O lea la ou te uunaia ai outou e tatalo—tatalo i aso uma—tatalo faalilo—o se tulaga aupito taua lea i o outou olaga. Aua ne’i i ai se aso e te’a atu e aunoa ma le tatalo. O le faalatalata atu i le Silisili Ese ua avea ma se puna o le malosiaga, musumusuga, ma le malamalama i alii ma tamaitai e ala i le talafaasolopito o le lalolagi, o e ua mamanuina taunuuga o tagata taitoatasi ma malo mo le manuia.⁹

O aiga e tatalo faatasi e faamanuiaina i sootaga malolosi atu o le alofa ma le filemu o le lagi.

Ua faailoa mai e le Alii, o le tiutetauave a matua o le aoao lea o a latou fanau e tatalo [tagai MF&F 68:28]. O le uiga o lenei mea e le faapea e na o tatalo faalilo lava. Ou te mautinoa o lona uiga o le aoao atu i faataitaiga e ala i tatalo faaleaiga. Tatou te manaomiaina le faatosinaga faapaiaina lea e oo mai i le tuuto i totonu o le aiga—tatalo o se aiga.¹⁰

E manaomia ona tatou tootutuli o ni aiga i tatalo faaleaiga, i le po ma le taeao. E le lava le tau na ona faaopoopo o ni nai upu i le faamanuiaina o meaai, lea ua avea o se masani i nisi o vaega. E ao ona tatou o ifo i o tatou tulivae i le tatalo ma le loto faafetai.¹¹

O le tatalo na avea ma o loo avea pea ma taula mo le malosiaga ma o se puna o le taitaiga i a tatou gaoioiga faaleaiga. Ou te manatua lo’u tootuli ai i tafatafa o le moega o le ma fanau laiti, e fesoasoani atu ia i latou i tatalo a o laiti i latou, ma mulimuli ane vaaia ai le fesoasoani atu o uso ma tuafafine matutua atu i le vaega laiti. Sa fai a matou tatalo faaleaiga i po ma taeao uma lava, faatasi ma le tuuina atu o le avanoa i le fanau e taitai ai, ma faia ni tatalo faapitoa e faafetaia’ia ai ni faafitauli patino. Mo se faataitaiga, sa ta’ua i tatalo faaleaiga ia fanau e i ai ni tofiga [o le Ekalesia]. … Sa matou talosagaina le fesoasoani ina ua feagai se tasi o le fanau ma se suega faigata i le aoga maualuga. Sa faapitoa foi le ta’ua o nisi o tagata o le aiga [o e na] o ese [mai le aiga]. … O le ta’uaina faapitoa o nei atugaluga patino i a matou tatalo faaleaiga sa tuuina atu ai le talitonuga, faamautinoaga, ma le malosi i tagata o le aiga na feagai ma ni faafitauli ma ni tofiga faigata.¹²

“Tatou te manaomia le faatosinaga faapaiaina lea e oo mai i le … tatalo o se aiga.”

E mouese atu feeseeseaiga ma mea na le fiafia ai o le aso, a o faalatalata faatasi atu aiga i le nofoalii o le lagi. E faateleina le lotogatasi. E toe faamalolosia sootaga o le alofa ma le lagona mafanafana ma faapena ona ulufale mai ai le filemu o le lagi.

O aiga faapena, o loo faia ai tatalo faalilo i le po ma le taeao e tagata o le aiga. O faafitauli faaletagata lava ia ma faaleaiga e taulimaina ma le mautinoa i le ma’ea ai o le talosagaina o le fesoasoani a le lagi. O tagata talavou e auai i faigalotu faapena a se aiga, ua faasaolotoina o latou loto mai faamoemoega o le tiapolo pe a latou malaga ese atu i se afiafi o tafaoga. O nei [tagata talavou] o le a avea ma faatosinaga o le puipuiga i le vaega pe a tulai mai ni faaosoosoga faatosina. O matua o e siomiaina a latou fanau i faatosinaga mamā o le tuuto i aso uma, ua latou faia se saofaga i le puipuiga o le … aiga.¹³

E mafai ona tatou faaleleia atili a tatou fesootaiga ma lo tatou Tama Faalelagi.

O auala nei e lima e faaleleia atili ai a tatou fesootaiga ma lo tatou Tama Faalelagi:

1. E tatau ona tatou tatalo soo. E tatau ona tuua na o i tatou lava ma lo tatou Tama Faalelagi ia le itiiti ifo i le faalua pe faatolu taimi i aso taitasi—“taeao, aoauli, ma le afiafi,” e pei ona ta’u mai e mau. (Alema 34:21.) Ma le isi, ua ta’u mai ia i tatou ia tatalo e le aunoa. (Tagai 2 Ni. 32:9; MF&F 88:126.) O le uiga o lenei mea, e tatau ona tutumu o tatou loto, ma sasaa atu i le tatalo faifaipea i lo tatou Tama Faalelagi. Tagai Alema 34:27.)

2. E tatau ona tatou sailia se nofoaga talafeagai e mafai ona tatou mafaufau loloto ai ma tatalo. Ua apoapoaiina i tatou e ao ona faia lenei mea i “totonu o o [tatou] afeafe, ma o [tatou] nofoaga lilo, ma i o [tatou] togavao.” (Alema 34:26.) O lona uiga, e tatau ona saoloto mai le faalavelaveina, i le mealilo. (Tagai i le 3 Ni. 13:5–6.)

3. E tatau ona tatou saunia i tatou lava mo le tatalo. Afai tatou te le lagonaina le fia tatalo, ona tatau lea ona tatou tatalo seia oo ina tatou lagonaina le fia tatalo. E tatau ona tatou lotomaualalo. (Tagai MF&F 112:10.) E tatau ona tatou tatalo mo le faamagaloga ma le alofa mutimutivale. (Tagai Alema 34:17–18.) E tatau ona tatou faamagalo atu i soo se tasi o i ai ni o tatou lagona le lelei. (Tagai Mareko 11:25.) Ae ua lapatai mai tusitusiga paia, o le a ma’uma’u a tatou tatalo pe afai tatou te “liliu ese e ua le tagolima, ma e ua le lavalavā, ma lē asiasi atu i e ua mamai ma puapuagatia, ma [lē] tufatufa atu a [tatou] mea.” Alema 34:28.)

4. O a tatou tatalo e tatau ona ‘anoa ma faatatau i le tulaga o i ai i le taimi lena. E tatau ona tatou aloese mai le faaaogaina o faaupuga lava e tasi i tatalo taitasi. O le a le fiafia foi soo se tasi o i tatou pe afai e faaaoga mai e se uo ia upu lava e tasi ia i tatou i aso taitasi, faia talanoaga e pei o se galuega, ma e tau le manofo i le tuai ona faauma ae se’i ki le televise ma faagalo i tatou. …

O a mea e tatau ona tatou tatalo atu ai? E tatau ona tatou tatalo atu mo a tatou galuega, ia tetee atu i le malosi o o tatou fili ma le tiapolo, mo lo tatou manuia ma le manuia o i latou o siomiaina i tatou. E tatau ona tatou filifili ma le Alii e tusa ai ma a tatou faaiuga ma gaoioiga uma. (Tagai Alema 37:36–37.) E tatau ona lava lo tatou loto faafetai e avatu ai le faafetai mo mea uma ua tatou maua. (Tagai MF&F 59:21.) E tatau ona tatou faailoa atu Lona aao i mea uma. O le le lotofaafetai o se tasi lea o a tatou agasala tele.

Ua folafola mai e le Alii i faaaliga o aso nei: “Ma o ia o lē e taliaina mea uma ma le faafetai o le a faamamaluina; ma o mea o le lalolagi lenei o le a faaopoopoina ia te ia, i le sautuaselau lava, ioe, e sili atu.” (MF&F 78:19.)

E tatau ona tatou ole atu mo mea tatou te manaomia, ma ia faaeteete ia tatou le ole atu mo mea o le a leaga mo i tatou. (Tagai Iakopo 4:3.) E tatau ona tatou ole atu mo le malosi e faatoilalo ai o tatou faafitauli. (Tagai Alema 31:31– 33.) E tatau ona tatou tatalo mo musumusuga ma le soifua manuia o le Peresitene o le Ekalesia, le Pulega Aoao, peresitene o le tatou siteki, lo tatou epikopo, lo tatou peresitene o le korama, o tatou faiaoga o aiga, tagata o aiga, ma o tatou taitai faalemalo. E mafai ona fai atu nisi fautuaga, ae faatasi ai ma le fesoasoani a le Agaga Paia, o le a tatou iloa ai mea e tatau ona tatou tatalo atu ai. (Tagai Roma 8:26–27.)

5. A ma’ea ona tuuina atu se talosaga e ala i le tatalo, ua i ai ia i tatou se tiutetauave ina ia fesoasoani i lona faamatuuina mai. E tatau ona tatou faalogo. Atonu a o tatou tootutuli ai, e finagalo le Alii e fautua mai ia i tatou.¹⁴

O loo silafia e le Atua i tatou ma ua saunia e tali mai i a tatou tatalo pe a tatou tuu atu lo tatou faatuatuaga ia te Ia ma fai le mea sa’o.

O loo i ai le mana i le tatalo. E mafaia mea uma e ala i le tatalo. O le tatalo na ala ai ona matala mai le lagi i lenei tisipenisione. O le tatalo a se tama e sefulufa tausaga le matua, i le Togavao Paia, na tatalaina ai se tisipenisione fou o le talalelei, ma aumaia ai se faaaliga o le Tama ma le Alo, a o la faaali mai o ni tagata faalelagi faamamaluina i luma o le taulealea o Iosefa [tagai Iosefa Samita—Talafaasolopito 1:11–17].¹⁵

O la’u molimau, o’u uso e ma tuafafine ma uo, e faafofoga ma tali mai le Atua i tatalo. Ou te le’i masalosalo lava i lena mea moni. Mai lo’u laitiiti, i tulivae o lo’u tina lea na ou uluai aoao ai e tatalo; i le avea ai ma se tama talavou a’o ou talavou; i le avea ai ma se faifeautalai i atunuu ese; i le avea ai ma se tamā; i le avea ai o se taitai o le Ekalesia; i le avea ai ma se sui o le malo, sa ou iloa e aunoa ma se fesiligia, e mafai e alii ma tamaitai ona aapa atu i le lotomaualalo ma le tatalo ma pa’i atu i lena Mana Lemavaaia; ia taliina mai tatalo. E le tuua toatasi na o le tagata, a le o lena, e le manaomia ona tu na o ia. O le tatalo o le a matala ai faitotoa; o le tatalo o le a aveesea ai papupuni; o le tatalo o le a faamāmāina ai mea faigata; o le tatalo o le a tuuina atu ai le toafilemu o le loto ma le faamafanafanaga i taimi o le popolevale ma le atuatuvale ma faigata. Faafetai i le Atua mo le tatalo.¹⁶

E oo lava foi i taimi o tofotofoga ma popolega, e mafai ona faalatalata atu i le Alii, ia lagona lona aafiaga ma lona mana lagolago—e le tuua lava lena tagata na o ia, pe afai o le a faamaulalo o ia lava i luma o le Silisili Ese. Ou te faafetai lava mo lena molimau, mo lena faamautinoaga.¹⁷

Mai aafiaga patino, ua ou iloa ai le aoga tele ma le mana o le tatalo. …

I le 1946 sa tofia ai a’u e Peresitene Siaosi Alapati Samita ou te alu atu i Europa na masofasofa i le taua ma toe faatutu a tatou misiona mai Nouei e tau atu i Aferika i Saute ma ia faatulaga se polokalama mo le tufatufaga o sapalai o le uelefea.

Sa matou faatuina ofisa tutotonu i Lonetona. Ona matou faia ai lea o ni uluai fetuunaiga faatasi ma le militeli sa i ai i le konetineta. O se tasi o tamalii muamua sa ou fia feiloai i ai o le taitai au o le vaegaau a Amerika sa i ai i Europa. Sa faamautu o ia i Frankfurt, Siamani.

Ina ua matou taunuu i Frankfurt, sa ma o atu loa ma la’u soa e su’e se taimi matou te feiloai ai ma le taitai au. Sa faapea mai le alii ofisa e fuafuaina taimi ma avanoa mo fonotaga [a le taitai au], “Alii, o le a leai se avanoa e te lua feiloai ai i le taitai au sili e le itiiti ifo ma le tolu aso. E pisi tele o ia ma ua tumu lana kalena i fuafuaga ua uma ona faatulaga.”

Sa ou fai atu, “E taua tele ona ma feiloai ia te ia, ma e le mafai ona ma faatali i le umi lena. E tatau ona ma i ai i Perelini taeao.”

Sa ia faapea mai, “Faamalie atu.”

Sa ma tuua le fale, ma o atu i le ma taavale, tōese o ma pulou, ma lototasi loa i le tatalo. Sa ma toe foi atu i totonu o le fale ma tau atu ua ese le alii ofisa ua i ai i le tulaga e faatulaga ai fuafuaga. E le’i atoa le sefululima minute ae matou faatasi ma le taitai au sili. Sa ma tatalo ina ia mafai ona ma feiloai ia te ia ma ia musuia o ia, ma le iloaina o sapalai uma mo fesoasoani e foai atu e soo se faalapotopotoga sa manaomia ona tuu atu uma i lima o le militeli mo le tufatufaina. O le ma faamoemoega, e pei ona ma faamatalatala atu i le taitai au, o le tufatufaina lea o a tatou lava sapalai i o tatou lava tagata e ala i a tatou lava faatulagaga, ma ia faia foi ni meaalofa mo le fafagaina o le lautele o tamaiti.

Sa ma faamatala atu le polokalama o le uelefea ma le ala e faagaoioia ai. Mulimuli ane, sa ia fai mai, “Ia, alii, ia amata ona faaputu a outou sapalai; ma e oo atu i le taimi e uma ai ona faaputu, atonu ua sui foi le tulafono.” Sa ma fai atu, “Lau susuga, ua uma ona faaputu a matou sapalai; e faaputu lava i taimi uma. I totonu o le luasefulufa itula mai le taimi ma te lafoina atu ai se uaealesi i le Au Peresitene Sili o le Ekalesia i le Aai o Sate Leki, o le a alu atu ai le solo o taavale ma uta sapalai agai i Siamani. E tele a matou faleteuoloa ua tutumu i oloa autu.”

Ona ia fai mai lea, “Ou te le’i faalogo lava i ni tagata ua i ai se vaaiga mamao faapena.” Sa ootia lona loto e pei ona sa ma tatalo ai. Ae ma te le’i tuua lona ofisa, na ma maua se faatagaga tusitusia e fai ai a tatou lava tufatufaga i o tatou lava tagata e ala atu ia tatou lava faatulagaga.

Na tatalo Elder Ezra Taft Benson ma lana soa mo le taitaiga ao laua tuuina atu fesoasoani mo le toomaga i Europa i le mavae ai o le Taua Lona II a le Lalolagi.

E faamalie loto le iloa o loo silafia e le Atua i tatou ma sauni e tali mai pe a tuu atu lo tatou faatuatuaga ia te Ia ma fai le mea sa’o. E leai se avanoa e matata’u ai alii ma tamaitai o e tuu atu lo latou faatuatuaga i le Silisili Ese, o e e le faatuai ona faamaualalo i latou lava i le sailiga o le taitaiga faalelagi e ala i le tatalo. E ui lava ina alia’e mai sauaga, e ui lava ina oo mai mea faalavefau faaleagaga pe faaletino, o le tatalo e mafai ona tatou maua ai le faamautinoaga, aua o le a fetalai mai e le Atua le filemu i le agaga. O lena filemu, lena agaga o le toafilemu, o le faamanuiaga silisili lea o le olaga.

A o avea a’u ma se tama i le Perisitua Arona, sa ou aoaoina ai le tama’i solo lenei e uiga i le tatalo. Ou te manatuaina pea:

Ou te le iloa po o a ni auala,
Ae ou te iloa e tali mai le Atua i talosaga
Ou te iloa ua Ia tautino mai
Ua ou iloa ai o taimi uma e faafofoga mai
Ma o le a tali mai, vave pe tuai
O lea ou te tatalo ma faatalitali filemu ai.
Ou te iloa i le faamanuiaga ou te saili i ai
Pe oo mai i auala tonu ou te mafaufau ai;
Ae tuu atu a’u tatalo ia te Ia lava
O Lona finagalo e poto atu i lo o’u ala,
E mautinoa lava o le a Ia tali mai i a’u talosaga,
Pe tali mai i nisi auala sili atu o faamanuiaga.

… Ou te molimau atu ia te outou, o’u uso e ma tuafafine pele, o loo soifua le Atua. E le o maliu o Ia. … Ou te molimau atu o loo i ai se Atua i le lagi o lē e faafofoga ma tali mai i tatalo. Ou te iloa e moni lea mea. Ou te uunaia outou uma ma le faamaualalo … ia faalatalata atu i lo tatou Tama o i le lagi e ala i le tatalo. E le’i i ai lava se taimi muamua i lenei tisipenisione o le talalelei ua manaomia tele ai le tatalo i lo le taimi nei. Ia tatou faalagolago atu e le aunoa i lo tatou Tama Faalelagi ma taumafai ma le maelega ia faaleleia atili a tatou fesootaiga ma Ia o la’u augani faatauanau lea.¹⁸

Fautuaga mo Suesuega ma le Aoaoina Atu

Fesili

Na saunoa Peresitene Benson e tatau ona “aua ne’i i ai se aso e te’a atu” e aunoa ma le tatalo (vaega 1). Na faapefea ona faamanuiaina oe ona o se taunuuga o tatalo faaletagata lava ia?
I le vaega e 2, sa ta’ua ai e Peresitene Benson nisi o faamanuiaga e oo mai i aiga o e tatalo faatasi e le aunoa. O anafea na e vaaia ai tatalo faaleaiga ua taitai atu i nei faamanuiaga? O a ni mea e mafai ona tatou faia e avea ai tatalo faaleaiga o se mea e faamuamua?
Mafaufau i fautuaga e lima a Peresitene Benson i le vaega e 3. E mafai faapefea e nei fautuaga ona fesoasoani ia i tatou i le “faaleleia atili o a tatou fesootaiga ma lo tatou Tama Faalelagi”? Mafaufau i se mea o le a e faia e mulimuli ai i le fautuaga lenei.
E mafai faapefea ona fesoasoani le saunoaga a Peresitene Benson o loo i le vaega e 4 i se tasi e masalosalo i le mana o le tatalo? O a ni upu o se molimau e mafai ona e faaopoopo atu i le saunoaga a Peresitene Benson?

Mau Fesootai

Iakopo 1:5–6; Enosa 1:1–8; 3 Nifae 14:7–8; MF&F 10:5; 19:38; 88:63

Fesoasoani mo Suesuega

O se mataupu faavae o se upumoni e taiala ai faaiuga ma faatinoga. “A o e faitau, fesili ifo ia te oe lava, ‘O le a le mataupu faavae o le talalelei o loo aoaoina i le fuaitau lenei? E mafai faapefea ona ou faatatauina lenei [mataupu faavae] i lo’u olaga?’” (O Le Aoao Atu, E Leai Se Isi Valaauga E Sili Ai [1999], 67).