O Le Mana o le Afioga

O’u uso pele, o se vaaiga matagofie le vaavaai atu i lenei tino o le autaitai perisitua ma le iloa o le faitau afe o le Au Paia o loo outou tautuaina, ma le tele o le tuuto ma le faamaoni ua avea faatasi ai outou ma sui! E leai se isi lava faalapotopotoga i soo se mea o le lalolagi e fono faatasi mo lea faamoemoega amiotonu e tasi e pei ona faia e lenei faalapotopotoga, pe o i ai foi se isi faalapotopotoga—faaupufai, faalelotu, pe faavaegaau—o umia le mana o loo outou umiaina i le afiafi nei.

O loo tatou ola i se vaitaimi o luitau faigata tele. Ua tatou ola i lena taimi lea na fetalai ai le Alii e faapea, “O le a aveesea ai le filemu mai le lalolagi, ma o le a maua ai e le tiapolo le mana i luga o lana lava pulega.” (MF&F 1:35.) Ua tatou ola i lena aso lea na muai vaaia e Ioane le Talifaaaliga ina “ua ita foi le tarako i le fafine, ona alu atu ai lea o ia e tau le taua ma i latou ua totoe o lana fanau, o e ua tausi i poloaiga a le Atua, ma ua taofi le mau ia Iesu Keriso.” (Faaaliga 12:17.) O le tarako o Satani; o le fafine ua faatusa i le Ekalesia a Iesu Keriso. Ua sii mai e Satani le taua e faasaga i tagata o le Ekalesia o e o i ai molimau ma o loo taumafai e tausi poloaiga. Ma e ui o le toatele o o tatou tagata o loo tumau pea le faamaoni ma le malolosi, ae o nisi ua faavaivai. O nisi ua pauu. O nisi ua taunuu ai le valoaga a Ioane e faapea, o nisi o le Au Paia o le a faatoilaloina i le taua ma Satani. (Tagai Faaaliga 13:7.)

Na vaai foi le perofeta o Liae i o tatou aso i lana faalepo maoae faafaaaliga e uiga i le laau o le ola. Sa ia vaaia e toatele tagata o le a faatauasoina ma fesesetai ai i totonu o ao pogisa, lea ua faatusaina i faaosoosoga a le tiapolo. (Tagai 1 Ni. 12:17.) Sa ia vaaia nisi o pauu ese “i ala faasaina,” o isi na malelemo i vaitafe eleelea, ae o isi lava na feseseai i “auala ese.” (1 Ni. 8:28, 32.) Pe a tatou faitau i le salalau atu o le mala o fualaau faasaina, pe faitau foi i lologa faatiapolo o ponokalafi ma le ola le mama, pe i ai ea se isi o i tatou e masalosalo o ala faasaina nei ma vaitafe eleelea nei na faamatalaina e Liae?

E le o i latou uma na vaai i ai Liae i lo latou faafanoga o ni tagata o le lalolagi. O nisi na o mai i le laau ma aai i le fua. I se isi faaupuga, o nisi o tagata o le Ekalesia i aso nei o isi ia o tagata na vaai i ai Liae na leiloloa.

Na vaai foi le Aposetolo o Paulo i o tatou aso. Sa ia faamatalaina o se taimi o le a faateteleina ai mea e pei o upuleaga, le faamaoni, faalealofa, alofa pepelo, faamaualuga, ma le saili viiga. (Tagai 2 Timoteo 3:1–7.) Sa lapatai mai foi o ia o “tagata amioleaga ma e taupelopelo e alualu pea lava lo latou leaga, o loo faasese atu, ua faaseseina foi i latou.” (2 Tim. 3:13.)

O valoaga le lelei faapena mai perofeta anamua o le a avea ma pogai o le mata’u tele ma le lotovaivai pe ana fai e le ofoina mai e na lava foi perofeta, i le taimi lava lena, le tali. I a latou fautuaga musuia e mafai ai ona tatou maua le tali i faafitauli faaleagaga o o tatou vaitaimi.

I lana miti, na vaai ai Liae i se ai uamea lea na ui atu i le ao pogisa. Na ia vaaia ai, a pipiimau tagata i lena ai uamea, e mafai ona latou aloese mai vaitafe eleelea, ui ese mai ala faasaina, taofia mai le fesesetai solo i auala ese ia e tau atu i le faafanoga. Mulimuli ane, na faamalamalama manino mai e lona atalii o Nifae le faatusa o le ai uamea. Ina ua fesili Lamana ma Lemuelu, “O le a le uiga o le ai uamea?” Na tali atu Nifae, “O le afioga lea a le Atua; ma [matau le folafolaga lenei] ai se e faalogo i le afioga a le Atua, ma pipiimau i ai, e lē fano lava i latou; pe mafai foi e faaosoosoga ma ufanafana mu a le fili ona faatoilaloina i latou i le faatauasoina, e taitai ese atu ai i latou i le faafanoga.” (1 Ni.15:23–24; faaopoopo le faatusilima.) O le a le gata ina taitaiina i tatou e le afioga a le Atua i le fua e sili ona manaomia i lo isi fua uma, ae e mafai foi ona tatou maua i le afioga a le Atua ma ala mai ai, le mana e tetee atu ai i faaosoosoga, ma le mana e faatoilalo ai galuega a Satani ma ana au.

E tutusa lava le savali a Paulo ma Liae. Ina ua uma ona faaali mai le matautia o le amioleaga o taimi lumanai—taimi lumanai ia te ia, ae o le taimi nei ia i tatou!—sa ia faapea atu ai ia Timoteo: “A o oe ia e tumau i mea ua aoaoina ai oe. …

“Talu foi ina o e tamaitiiti ua e iloa Tusi Paia, e mafaia ona faapoto ai ia te oe e iu ai i le ola.” (2 Timoteo 3:14–15; faaopoopo le faatusilima.)

O’u uso pele, o se tali lenei i le luitau tele o o tatou taimi. O le afioga a le Atua, e pei ona mauaina i totonu o tusitusiga paia, i upu a perofeta soifua, ma i faaaliga patino faaletagata lava ia, o loo i ai le mana e faamalosia ai le Au Paia ma faaauupegaina ai i latou i le Agaga ina ia mafai ai ona latou tetee atu i le tiapolo, taofimau i mea lelei, ma maua ai le olioli i lenei olaga.²

Ia i a te outou o taitai perisitua matou te faapea atu, tagai i le fautuaga faaperofeta a Liae ma Paulo ma isi e pei o i laua. I lena fautuaga o le a e maua ai le tali i luitau o loo outou feagai ai i le tausiaina o a outou lafu ia saogalemu mai “luko feai” o loo siomia ai i latou. (Tagai Mataio 7:15; Galuega 20:29.) Ua matou iloa o loo outou popole tele foi mo tagata o a outou uarota ma siteki, ma faaalu ni taimi ma taumafaiga tele mo i latou. E tele naua mea ua matou talosagaina mai ia te outou o e ua filifilia mo tulaga faaletaitai. Ua matou tuuina atu le tele o avega i o outou tauau. Ua talosagaina outou e faagaoioi polokalama a le Ekalesia, faatalanoa ma fefautuaai ma le au paia, tagai pe o taulimaina lelei tulaga tautupe a siteki ma uarota, pulea galuega faatino o le uelefea, fausia fale, ma auai i le anoano o isi gaoioiga e alu ai le taimi.

E ui e leai se tasi o na gaoioiga e mafai ona faatuatuanai ma faataatia ese, ae e le o mea ia e aupito sili ona taua e mafai ona e faia mo i latou o loo e auauna atu i ai. I tausaga e le’i leva atu, ua fautuaina faafia ai i tatou e i ai gaoioiga faapitoa e aumai ai taui faaleagaga e sili atu nai lo o isi. I le amataga o le 1970, na ta’u atu ai e Peresitene Harold B. Lee i sui risone:

“Ua matou talitonu o loo fia aai o tatou au paia i le talalelei, mama a’ia’i, faatasi ai ma le anoano o ona upumoni ma malamalamaaga. … O loo i ai i latou o e e foliga mai ua galo ia i latou o auupega e sili ona malolosi ua tuuina mai e le Alii ia i tatou e faasagatau atu ai i mea leaga uma, o Ana lava folafolaga, o aoaoga faavae manino ma faigofie o le faaolataga e pei ona maua i tusitusiga paia.” (In Regional Representatives’ Seminar, 1 Oct. 1970, p. 6.)

Ata

An African family seated in front of a sofa in their living room. They are reading the scriptures. Taken in Ghana, West Africa.

I se savali a le Au Peresitene Sili i le 1976, na saunoa ai Peresitene [Spencer W. Kimball] e faapea:

“Ou te talitonu e i ai lava se taimi i o tatou olaga e tatau ai ia i tatou taitoatasi ona iloa tusitusiga paia mo i tatou lava—ae le na o le iloa i se taimi se tasi, a ia toe saga saili pea ia iloa ma saga iloa. …

“E le o manatu māmā le Alii ia i tatou pe a ia tuuina mai nei mea ia i tatou, aua ‘o lē ua foaiina atu i ai o mea e tele, e sueina atu foi ia te ia o mea e tele.’ (Luka 12:48.) O le mauaina o nei mea o lona uiga o le tiutetauave lea mo i latou. E tatau ona tatou suesue i tusitusiga paia e tusa ai ma le poloaiga a le Alii (tagai 3 Ni. 23:1–5); ma e tatau ona tatou faatagaina [poloaiga] e puleaina o tatou olaga.” (Liahona, Sete. 1976, i. 1–2.)

Ia Aperila 1982, na saunoa atu ai Elder Bruce R. McConkie i sui lisone e uiga i le faamuamua e tatau ona faia e tusitusiga paia i a tatou galuega. Na ia saunoa: “Ua tatou aafia tele i polokalama ma fuainumera ma tā’iga, i fale, fanua ma mamone, ma i le ausiaina o sini o le a faamamafaina ai le tulaga silisili o a tatou galuega, ua faapea ona tatou ‘tuuesea ai mea e sili atu ona taua o le tulafono.’ … E tusa lava po o le a le talenia o alii i mataupu faalepulega; po o le a foi le susua o a latou upu e faaali ai o latou manatu; po o le a foi lo latou aoaoina i mea o le lalolagi—o le a latou le mauaina ia musumusuga matagofie a le Agaga lea semanu latou te maua vagana ai ua latou totogia le tau o le suesue, mafaufau loloto ma le tatalo e uiga i mau.” (In Regional Representatives’ Seminar, 2 Apr. 1982, pp. 1–2.)

O le aso lava foi lea e tasi na saunoa atu ai, Elder Boyd K. Packer i peresitene o siteki ma sui lisone. Na saunoa o ia: “E taua tele fale ma paketi, lipoti ma polokalama ma faiga faavae. Ae, a tuu na o i latou, latou te le tauaveina lena tausiga taua faaleagaga ma o le a le ausia ai mea ua tuuina mai e le Alii ia i tatou e fai. … O mea tonu, o mea na e i ai le tausiga faaleagaga moni, e totonugalemu i tusitusiga paia.” (In Meeting with Stake Presidents and Regional Representatives, 2 Apr. 1982, pp. 1–2.)

E faaopoopo atu lo’u leo i nei usoga atamamai ma le musuia, ma fai atu ia te outou, o se tasi o mea aupito sili ona taua e mafai ona outou faia o ni taitai perisitua, o le faatofu lea o outou lava i tusitusiga paia. Suesue i ai ma le filiga. Taumamafa fiafia i afioga a Keriso. Aoao le aoaoga faavae. Ia malamalama lelei i mataupu faavae o loo maua i totonu. E i ai nai isi taumafaiga o le a aumaia ai ni taui e sili atu mo o outou valaauga. E i ai nai nisi auala e maua ai musumusuga sili atu a o e auauna atu.

Ae o lena lava foi mea na o ia, e ui lava i lona taua tele, ae e le lava lea. E tatau foi ona e faatulagaina au taumafaiga ma au gaoioiga ina ia faaosofia ai suesuega anoa o tusitusiga paia e tagata o le Ekalesia. E masani ona tatou faaaluina se taumafaiga tele ia siitia ai tulaga o gaoioiga i a tatou siteki. Tatou te galulue ma le filiga e siitia le pasene o i latou e auai i sauniga faamanatuga. Tatou te galulue ina ia maua se pasene maualuga atu o o tatou alii talavou e faamisiona. Tatou te taumafai ia faateleina le aofai o i latou e faaipoipo i le malumalu. O nei mea uma o ni taumafaiga tauaogaina ma e taua i le tuputupu a’e o le malo. Ae a faatofuina e le aunoa ma le le faavaivai e tagata taitoatasi ma aiga i latou lava i tusitusiga paia, o isi la vaega nei o gaoioiga o le a otometi lava ona tutupu. O le a faateleina molimau. O le a faamalolosia tautinoga. O le a faamausaliina aiga. O le a tafe mai faaaliga faaletagata lava ia.³

Na saunoa le Perofeta o Iosefa Samita, “o le Tusi a Mamona o le tusi aupito sili ona sa’o i soo se isi lava tusi i luga o le lalolagi, o le maa’au’au foi lea o la tatou tapuaiga, e sili foi ona latalata atili atu ai le tagata i le Atua i lona ola ai i ona mataupu, nai lo se isi lava tusi.” (Tusi a Mamona, Faatomuaga, faaopoopo le faatusilima.) Pe le o le mea ea lena tatou te mananao i ai mo tagata o o tatou uarota ma siteki? Pe tatou te le o mananao ea ia latou latalata atili atu i le Atua? Ia uunai la i latou i soo se auala lava e mafai ai ina ia faatofu i latou lava i lenei molimau ofoofogia o aso e gata ai e uiga ia Keriso.

E tatau ona outou fesoasoani ia iloa e le Au Paia o le suesue ma le sailiili i tusitusiga paia e le o se avega ua tuu atu i o latou luga e le Alii, ae o se faamanuiaga ma se avanoa ofoofogia. Ia matau le fetalaiga a le Alii lava Ia na fetalai mai ai e uiga i faamanuiaga o le suesue i Lana afioga. I le perofeta ma le taitai maoae o Iosua, sa Ia fetalai i ai:

“E le te’a i lou gutu le tusi o lenei tulafono; a ia mafaufau i ai i le ao atoa ma le po, ina ia e auauna e fai e tusa ma mea uma na tusia i ai: ona manuia ai lea ia te oe o lou ala, ona e manuia ai lea.” (Iosua 1:8; faaopoopo le faatusilima.)

Sa le’i folafolaina atu e le Alii ia Iosua ni oa ma ni viiga o le lalolagi, ae o le a manuia lona olaga i le amiotonu ma o le a manuia o ia i mea e sili ona taua i le olaga, o lena mea o le sailiga lea ia maua le olioli moni. (Tagai 2 Nifae 2:25.)

O i ai ni tagata o a outou siteki o e ua nutimomoia o latou olaga i le agasala po o faalavelave, o e o loo faanoanoa ma ua leai se faamoemoe? Pe na e momoo ea mo se auala e aapa atu ai e fusifusi i o latou manu’a, faato’amalie o latou loto atuatuvale? Ua ofo mai e le perofeta o Iakopo le mea tonu lava lena i le folafolaga mataina lenei: “Ua latou o mai i luga nei e faalogologo i le afioga malie a le Atua, ioe, le afioga lea e faamalolo ai le agaga ua faamanualia.” (Iakopo 2:8; faaopoopo le faatusilima.)

O aso nei ua tumu le lalolagi i manatu taufaaosooso ma faatosina lea e mafai foi ona taitai atu ai tagata sili ona lelei i mea sese ma le taufaasese. O nisi taimi, o tagata aooga i iunivesite ua tutumu o latou mafaufau i aoaoga a le lalolagi ua amata ai ona latou fesiligia aoaoga faavae o le talalelei. E mafai faapefea e oe o se taitai perisitua ona fesoasoani e faamalosia ou tagata auai ia tetee atu i na ituaiga o aoaoga taufaasese? Na tuuina mai e le Faaola le tali i Lana aoaoga maoae i luga o le Mauga o Olive ina ua Ia folafola mai, “Ma ai se na te teu faaoloa taua a’u upu, o le a le faaseseina.” (IS—Mataio 1:37; faaopoopo le faatusilima.)

Ua tumu tusitusiga paia i folafolaga talitutusa faapena e uiga i le taua o le upu. O i ai ni o outou tagata o e o mananao i se taitaiga ma se taiala i o latou olaga? Ua ta’u mai e le Salamo ia i tatou, “O lau afioga o le sulu lea i o’u vae, ma le malamalama i lo’u ala” (Salamo 119:105), ma ua tautino mai e Nifae o le taumamafa fiafia i afioga a Keriso, “o le a ta’u mai ai ia te outou mea uma e tatau ona outou faia.” (2 Ni. 32:3.)

O i ai ni tagata o lau lafu o e ua pauu atu i le loloto o le agasala ma e manaomia ona toe toso a’e i latou i le lafu? O le folafolaga lea a Helamana mo i latou: “Ioe, ua tatou vaai e mafai e soo se tasi e manao i ai ona piimau i luga i le afioga a le Atua, lea ua vave ma mamana, lea o le a veteina ai le poto leaga ma mailei ma fuafuaga uma a le tiapolo.” (Helamana 3:29.)

O le faamanuiaina i le amiotonu, o le mana e aloese ai mai le faaseseina ma teena ai faaosoosoga, taiala i o tatou olaga i aso uma, faamaloloina o le agaga—o nisi nei o folafolaga ua tuuina mai e le Alii ia i latou o e e o atu i Lana afioga. Pe folafola mai ea la e le Alii ae le faataunuuina? E mautinoa lava afai Na te ta’u mai ia i tatou o le a oo mai nei mea ia i tatou pe afai tatou te uumau i Lana afioga, ona maua lea e i tatou o faamanuiaga. Ae afai tatou te le faia, ona le maua lea o faamanuiaga. Peitai, e tusa lava pe o le a lo tatou filiga i nisi itu, ua na o tusitusiga paia lava e maua ai nisi o faamanuiaga mautinoa, ua na o le o mai i le afioga a le Alii ma uumau i ai a o tatou ui atu i puao pogisa e ō atu i le laau o le ola. (“O Le Mana o le Afioga,” Liahona, Iul. 1986, 71).⁴

Ma afai tatou te le ano i le mea ua tuuina mai e le Alii ia i tatou, tatou te ono le toe maua lena lava mana ma faamanuiaga o loo tatou sailia. I se lapataiga mamafa i uluai tagata o le Au Paia, na fetalai mai ai le Alii i le tulaga lenei e uiga i le Tusi a Mamona: “Ma sa faapouliuligia o outou mafaufau i taimi ua mavae ona o le le talitonu, ma ona sa outou manatu māmā i mea ua outou maua—

“O le faafiasili lea ma le le talitonu ua aumai ai le Ekalesia atoa i lalo o le tausalaga.

“Ma o lenei tausalaga ua lupe i luga o le fanauga a Siona, i latou uma lava.

“Ma o le a latou tumau pea i lalo o lenei tausalaga, seia latou salamo ma manatua le feagaiga fou, o le Tusi a Mamona lava lea.” (MF&F 84:54–57.)

E, o’u uso pele, ia aua ne’i o tatou manatu māmā i mea sili ua tatou maua mai le aao o le Alii! O Lana afioga o se tasi lea o meaalofa sili ona taua ua Ia tuuina mai ia i tatou. Ou te uunaia outou ia toe tuuto atu outou lava i se suesuega o tusitusiga paia. Ia faatofu outou lava i aso uma ina ia outou maua le mana o le Agaga e faatasi ma outou i o outou valaauga. Faitau i totonu o o outou aiga ma aoao a outou fanau ia fiafia ma teufatuina. Ona outou saili lea ma le agaga tatalo ma fefautuaai faatasi ma isi, i soo se auala e mafai ai e uunaia ai tagata o le Ekalesia e mulimuli ia outou faataitaiga. Afai tou te faia lena mea, o le a outou iloa, e pei ona sa iloa e Alema e faapea o le afioga “[e] i ai sona uiga mamana tele atu i luga o mafaufau o tagata nai lo le pelu, po o se isi lava mea, ua oo ia te i latou.” (Alema 31:5.)

E pei foi o Alema, ou te fai atu ia te outou, “Ua tatau ona [outou] faataitaia le mana o le afioga a le Atua” (Alema 31:5).⁵

• Mafaufau i le mea na saunoa ai Peresitene Benson o se “tali i le luitau tele o o tatou taimi” (vaega 1). O a ni auala e mafai ai e lenei tali ona fesoasoani ia i tatou e faafetaia’ia ai luitau o loo tatou feagai ai?

• Toe iloilo taunuuga na saunoa ai Peresitene Benson o le a oo mai, “pe a faatofuina e le aunoa ma le le faavaivai e tagata taitoatasi ma aiga i latou lava i tusitusiga paia” (vaega 2). Aisea e te manatu ai o le suesueina o tusitusiga paia e taitai atu ai i ia taunuuga?

• Na saunoa mai Peresitene Benson e faapea, o le suesueina o tusitusiga paia o se faamanuiaga, ae e le o se avega (tagai i le vaega 3). O a ni faamanuiaga ua oo atu ia te oe ma lou aiga e ala i le suesueina o tusitusiga paia? O le a se fautuaga e te ono tuuina atu i se tasi o loo lagonaina o le suesueina o tusitusiga paia o se avega?

• O a nisi o tulaga lamatia o le manatu māmā i le afioga a le Atua? (Tagai i le vaega 4.) O a nisi o mea e mafai ona tatou faia e tuu atu ai i le afioga a le Atua le gauai sili atu?

Galuega 17:11; 2 Timoteo 3:16–17; 1 Nifae 19:23–24; Alema 32:21–43; MF&F 18:33–36; 21:4–6; 68:1–4

“E toatele ua latou iloa o le taimi sili ona lelei e suesue ai o le taeao pe a uma se malologa o le po. … O isi e mananao e suesue i itula toafimalie pe a uma galuega ma popolega o le aso. … Ae atonu o le mea e sili atu le taua nai lo o le itula o le aso, o le faatulaga lea o se taimi masani o le aso mo au suesuega” (Howard W. Hunter, “Faitauina o Tusitusiga Paia,” Liahona, Mat. 1980, 88).