Ang Panumpa ug Pakigsaad sa Priesthood

Nagtinguha ako sa pagtawag sa inyong atensyon ngadto sa panumpa ug pakigsaad sa Melchizedek Priesthood. Nagtuo ako nga kon kita adunay tataw nga pagsabut sa pakigsaad nga atong gihimo kon kita modawat og mga katungdanan sa priesthood, ug sa saad nga ihatag sa Ginoo kon atong palamboon ang atong mga calling, niana kita adunay dakong tinguha sa pagbuhat sa tanang mga butang nga kinahanglan natong buhaton sa pag-angkon og kinabuhing dayon.

Mosulti ko og dugang nga ang tanang may kalabutan niining labaw nga priesthood gitakda ug gituyo sa pag-andam kanato sa pag-angkon og kinabuhing dayon diha sa gingharian sa Dios.

Diha sa pagpadayag kabahin sa priesthood, nga gihatag ngadto kang Joseph Smith niadtong Septyembre 1832, ang Ginoo nag-ingon nga ang Melchizedek Priesthood mahangturon; nga kini nagdumala sa ebanghelyo, makita diha sa tinuod nga simbahan sa tanang mga henerasyon, ug naghupot sa mga yawe sa kahibalo kabahin sa Dios. Nag-ingon siya nga kini nakapabalaan sa katawhan sa Ginoo, makakita sa nawong sa Dios, ug masulod ngadto sa kapahulayan sa Ginoo, “diin nga kapahulayan mao ang kahingpitan sa iyang himaya.” (Tan-awa sa D&P 84:17–24.)

Dayon, nagsulti kabahin sa Aaronic ug Melchizedeek nga mga priesthood, ang Ginoo nag-ingon: “Kay kinsa kadto nga matinud-anon ngadto sa pagbaton niining duha ka mga pagkapari diin Ako nga gipamulong, ug sa pagpalambo sa ilang balaan nga tawag, pagabalaanon pinaagi sa Espiritu ngadto sa pagbag-o sa ilang mga lawas

“Sila mahimo nga anak nga mga lalaki ni Moises ug ni Aaron ug ang binhi ni Abraham, ug sa simbahan ug gingharian, ug ang pinili sa Dios.

“Ug usab silang tanan kinsa modawat niini nga pagkapari modawat kanako, miingon ang Ginoo;

“Kay siya nga modawat sa akong mga sulugoon modawat kanako;

“Ug siya nga modawat kanako modawat sa akong Amahan;

“Ug siya nga modawat sa akong Amahan makadawat sa gingharian sa akong Amahan; busa ang tanan nga iya sa akong Amahan ihatag ngadto kaniya.

“Ug kini sumala sa panumpa ug pakigsaad nga nahisakop ngadto sa pagkapari.

“Busa, kadtong tanan kinsa modawat sa pagkapari, makadawat niini nga panumpa ug pakigsaad sa akong Amahan, diin siya dili makalapas, ni mahimo kini nga mausab.”

Ang silot sa paglapas sa pakigsaad ug sa hingpit mobiya gikan niini ihatag dayon, kauban niini nga sugo: “… pagbantay mahitungod sa inyong mga kaugalingon, sa paghatag og makugihon nga pagsunod sa mga pulong sa kinabuhi nga dayon.

“Kay kamo mabuhi pinaagi sa matag pulong nga mogula gikan sa ba-ba sa Dios.” (D&P 84:33–44.)⁶

Kaninyo kinsa naghupot sa Aaronic Priesthood wala pa makadawat niining panumpa ug pakigsaad nga iya sa Labaw nga Priesthood, apan kamo adunay dakong gahum ug awtoridad nga gihatag kaninyo gikan sa Ginoo. Ang Aaronic Priesthood usa ka pagpangandam nga priesthood nga nagtudlo ug nagbansay kanato nga mahimong takus niining dagkong mga panalangin nga moabut sa kadugayan.

Kon kamo matinud-anong moserbisyo isip usa ka deacon, teacher, ug priest, kamo makaangkon sa kasinatian ug makabaton sa mga abilidad ug mga kapasidad nga makahimo kaninyo sa pagdawat sa Melchizedek Priesthood ug sa pagpalambo sa inyong calling diha niini.⁷

Ingon nga tanan kanato nahibalo, ang usa ka pakigsaad maoy usa ka kontrata ug panagsabut tali sa dili mominus sa duha ka partido. Sa mga pakigsaad sa ebanghelyo, ang mga partido mao ang Ginoo sa langit ug ang mga tawo sa yuta. Ang mga tawo miuyon sa pagsunod sa mga sugo ug ang Ginoo misaad sa pagganti kanila sumala niana. Ang ebanghelyo mismo mao ang bag-o ug walay katapusang pakigsaad ug milangkob sa tanang mga pakigsabut, mga saad ug mga ganti nga gitanyag sa Ginoo ngadto sa iyang katawhan.

Ug busa kon dawaton nato ang Melchizedek Priesthood ato kining buhaton pinaagi sa pakigsaad. Kita ligdong nga nagsaad sa pagdawat sa priesthood, sa pagpalambo sa atong mga calling diha niini, ug sa pagpuyo pinaagi sa matag pulong nga mogula gikan sa ba-ba sa Dios. Ang Ginoo sa iyang bahin nagsaad kanato nga kon kita mosunod sa pakigsaad, atong madawat ang tanan nga ang Amahan aduna, nga mao ang kinabuhing dayon. May usa ba kanato nga makahunahuna og mas dako o mas mahimayaong pakigsabut kay sa niini?

Usahay sayon kaayo natong sultihon ang pagpalambo sa atong priesthood, apan unsay gipamulong sa mga pagpadayag mao ang pagpalambo sa atong mga calling sa priesthood, isip mga elder, mga seventy, mga high priest, mga patriyarka, ug mga apostoles.

Ang priesthood nga gihuptan sa usa ka lalaki mao ang gahum ug awtoridad sa Dios nga gihatag ngadto sa usa ka lalaki dinhi sa kalibutan sa pagbuhat sa tanang mga butang alang sa kaluwasan sa katawhan. Ang mga katungdanan o mga calling sa priesthood mga buluhaton sa pagpangalagad aron sa pagbuhat og linain nga gipabuhat nga serbisyo diha sa priesthood. Ug ang paagi sa pagpalambo niini nga mga calling mao ang pagbuhat sa buluhaton nga gitakda nga pagabuhaton niadtong kinsa naghupot sa maong piho nga katungdanan.

Dili igsapayan unsa nga katungdanan ang atong gihuptan basta kita matinuoron ug matinud-anon sa atong mga obligasyon. Ang usa ka katungdanan dili mas labaw kay sa uban, hinoon alang sa pang-administratiba nga mga katarungan ang usa ka naghupot sa priesthood mahimong tawagon sa pagdumala ug paggiya sa mga buluhaton sa uban.

Ang akong amahan, si Presidente Joseph F. Smith, miingon: “Walay katungdanan gikan niini nga priesthood nga ingon o mahimong mas labaw pa kay sa priesthood mismo. Nagagikan sa priesthood ang awtoridad ug gahum niana nga katungdanan. Walay katungdanan nga naghatag og awtoridad ngadto sa priesthood. Walay katungdanan nga nagdugang og gahum sa priesthood. Apan ang tanan nga mga katungdanan diha sa Simbahan nagkuha sa ilang gahum, hiyas, ug awtoridad, gikan sa priesthood.”

Gitawag kita sa pagpalambo sa atong mga calling diha sa priesthood ug sa paghimo sa mga buhat nga kauban sa katungdanan nga atong nadawat. Ug busa ang Ginoo miingon, diha sa pagpadayag kabahin sa priesthood: “Busa himoa nga ang matag tawo mobarug sa iyang kaugalingon nga buhatan, ug maghago sa iyang kaugalingon nga balaang tawag; … nga ang paagi nga mahimo nga hingpit.” (D&P 84:109–10.)

Kini mao ang usa sa labing dako nga mga tumong nga kita nagtrabaho diha sa programa sa priesthood sa Simbahan, sa pagbaton og mga elder nga mohimo sa buhat sa mga elder, mga seventy nga mohimo sa buhat sa mga seventy, mga high priest nga mohimo sa buhat sa mga high priest, ug uban pa, aron ang tanang naghupot sa priesthood mahimong mopalambo sa ilang kaugalingong mga calling ug moani sa talagsaong mga panalangin nga gisaad tungod niana nga paagi.⁸

Kita mga sinugo ni Ginoong Jesukristo. Ang atong sugo mao ang pagrepresentar kaniya. Kita gisugo sa pagsangyaw sa iyang ebanghelyo, sa pagpahigayon sa mga ordinansa sa kaluwasan, sa pagpanalangin sa katawhan, sa pagpang-ayo sa masakiton ug tingali sa paghimo og mga milagro, sa paghimo unsay iyang himoon kon siya sa personal ania —ug tanan niini tungod kay kita naghupot sa balaang priesthood.

Isip mga tinugyanan sa Ginoo kita ubos sa iyang balaod sa paghimo unsay iyang gustong ipahimo kanato nga dili igsapayan ang personal nga mga pagbati o kalibutanong mga pagdani. Sa atong mga kaugalingon kita walay mensahe sa kaluwasan, walay doktrina nga kinahanglan gayud nga dawaton, walay gahum sa pagbunyag o pag-orden o pagminyo alang sa kahangturan. Ang tanan niini nga mga butang nagagikan sa Ginoo, ug bisan unsay atong himoon nga may kalabutan ngadto niini mao ang resulta sa gitugyan nga awtoridad.⁹

Karon mahimong mosulti ako og pipila ka mga pulong mahitungod sa panumpa nga nag-uban sa pagdawat sa Melchizedek Priesthood.

Ang pagpanumpa mao ang labing ligdong ug hugot nga matang sa pagsulti nga nailhan sa tawhanong pinulongan, ug kini mao ang matang sa pinulongan nga gipili sa Amahan nga gigamit sa mahinungdanon kaayong Mesiyanhon nga pagpanagna mahitungod ni Kristo ug sa priesthood. Kalabut kaniya kini nag-ingon: “Ang Ginoo nanumpa, ug siya dili magabasul, Ikaw mao ang sacerdote nga walay katapusan sunod sa laray ni Melchizedek.” (Sal. 110:4.)

Sa pagpasabut niining Mesiyanhong pagpanagna, si Pablo nag-ingon nga si Jesus adunay “molungtad sa kahangturan nga pagkasacerdote,” ug nga pinaagi niini moabut “ang gahum sa kinabuhi nga walay pagkalaglag.” (Tan-awa sa Heb. 7:24, 16.) Si Joseph Smith miingon nga “ang tanan niadto kinsa giorden ngadto niini nga pagkapari gihimo sama ngadto sa Anak sa Dios, nagpabilin nga usa ka pari sa kanunay,” kana, kon sila matinud-anon ug matinuoron [tan-awa sa Hubad ni Joseph Smith, Mga Hebreohanon 7:3].

Ug busa si Kristo mao ang mahinungdanong sundanan kalabut sa priesthood, ingon man nga siya ang sundanan kalabut sa bunyag ug sa tanang mga butang. Ug busa, gani ang Amahan nanumpa nga ang iyang Anak manunod sa tanan nga mga butang pinaagi sa priesthood, busa siya nanumpa nga tanan kanato kinsa nagpalambo sa atong mga calling diha nianang sama nga priesthood modawat sa tanan nga ang Amahan aduna.

Kini mao ang saad sa kahimayaan nga gitanyag ngadto sa matag lalaki kinsa naghupot sa Melchizedek Priesthood, apan kini usa ka saad nga may kondisyon, usa ka saad nga gikondisyon diha sa atong pagpalambo sa atong mga calling diha sa priesthood ug sa pagpuyo sa matag pulong nga mogula gikan sa ba-ba sa Dios.

Kini tataw kaayo nga wala nay mas mahimayaong mga saad nga aduna o mahimo kay sa niadtong miabut kanato sa dihang atong gidawat ang pribilehiyo ug giangkon ang responsibilidad sa paghupot sa balaang priesthood ug sa pagbarug isip mga sinugo ni Kristo.

Ang Aaronic Priesthood usa ka igpangandam nga priesthood aron kita mahimong sarang sa paghimo sa pakigsaad ug pagdawat sa panumpa nga kauban niining labaw nga priesthood.¹⁰

Walay bisan unsa niining tibuok kalibutan nga importante sa matag usa kanato kay sa pagbutang og una diha sa atong mga kinabuhi sa mga butang kalabut sa gingharian sa Dios, sama sa pagsunod sa mga sugo, sa pagpalambo sa atong mga calling diha sa priesthood, sa pag-adto sa balay sa Ginoo ug tanyagan sa kahingpitan sa mga panalangin sa gingharian sa atong Amahan.¹¹

Imahe

Two Fijian men administering to a young girl lying in a bed.

Ang mga panalangin sa Ginoo gitanyag ngadto sa mga Santos ug sa kalibutan pinaagi sa mga pagpangalagad niadtong kinsa naghupot sa iyang balaang priesthood, kinsa nagrepresentar kaniya, kinsa sa pagkatinuod iyang mga sulugoon ug mga tinugyanan ug andam sa pagserbisyo kaniya ug sa pagsunod sa iyang mga sugo.¹²

Kini ang akong pag-ampo nga kitang tanan kinsa gitawag sa pagrepresentar sa Ginoo ug sa paghupot sa iyang awtoridad makahinumdom kinsa kita ug molihok sumala niana.

… Akong gipaningkamutan sa tanan nakong mga adlaw sa pagpalambo sa akong calling diha [sa] priesthood ug nanghinaut sa paglahutay ngadto sa katapusan niini nga kinabuhi ug sa pagpahimulos sa pakigdait sa matinud-anong mga santos sa kinabuhi nga moabut.¹³

Ang akong mga pagbati mao ang pagpanalangin niadtong, mga batan-on ug tigulang, kinsa nagpalambo sa ilang mga calling diha sa priesthood, ug sa paghangyo sa Ginoo sa pagbu-bu diha kanila sa maayong mga butang sa iyang Espiritu dinhi niini nga kinabuhi ug ipasalig kanila ang mga katigayunan sa kahangturan sa kinabuhi nga moabut. …

Unsa ka mahimayaong butang nga mahibalo nga ang Ginoo nagtanyag sa matag usa kanato sa kahingpitan sa priesthood, ug nagsaad kanato nga kon kita modawat niini nga priesthood ug mopalambo sa atong mga calling, kita makaangkon og walay katapusan nga panulundon uban kaniya diha sa iyang gingharian!¹⁴

• Gitudlo ni Presidente Smith nga pinaagi sa priesthood, “ang Ginoo nagtanyag ngadto sa iyang anak nga mga babaye sa tanang espirituhanong gasa ug panalangin nga maangkon sa iyang anak nga mga lalaki” (“Gikan sa Kinabuhi ni Joseph Fielding Smith”). Unsa ang inyong mga hunahuna samtang kamo namalandong niini nga pamahayag?

• Miingon si Presidente Smith nga ang mga naghupot sa priesthood adunay mas dako nga tinguha sa pagpaningkamot alang sa kinabuhing dayon kon ilang masabtan ang ilang mga pakigsaad ug ang mga saad sa Ginoo (tan-awa sa seksyon 1). Unsa ka tinuod kini alang sa tanang mga miyembro sa Simbahan?

• Sa unsang paagi nga ang pagpasabut ni Presidente Smith sa pagpalambo sa calling (tan-awa sa seksyon 2) lahi gikan sa uban nga mga paggamit sa pulong pagpalambo? Sa unsa nga paagi kamo napanalanginan pinaagi sa serbisyo sa mga miyembro sa Simbahan kinsa nagpalambo sa ilang mga calling?

• Gitudlo ni Presidente Smith, “si Kristo mao ang mahinungdanong sundanan kalabut sa priesthood” (seksyon 3). Unsay atong mabuhat sa pagsunod sa ehemplo ni Jesukristo diha sa atong pagserbisyo ngadto sa uban?

• Sa seksyon 4, ribyuha ang mga pulong ni Presidente Smith mahitungod sa mga panalangin nga gitanyag diha sa templo. Sa unsang paagi nga ang mga ginikanan makatabang sa ilang mga anak sa pag-andam alang sa mga panalangin sa priesthood nga anaa sa templo?

Mga Hebreohanon 5:4; Alma 13:1–2, 6; D&P 20:38–60; 84:19–22; 107:99–100; Mga Artikulo sa Hugot nga Pagtuo 1:5

“Ang hanas nga magtutudlo dili maghunahuna og, ‘Unsay akong buhaton sa klase karong adlawa?’ apan mangutana, ‘Unsay buhaton sa akong mga estudyante karong adlawa sa klase?’; dili, ‘Unsay akong itudlo sa klase karong adlawa?’ apan hinoon, ‘Unsaon nako pagtabang ang akong mga estudyante sa pagdiskubre unsay ilang kinahanglan nga mahibaloan?’” (Virginia H. Pearce, “The Ordinary Classroom—A Powerful Place for Steady and Continued Growth,” Ensign, Nob. 1992, 12; tan-awa usab sa Pagtudlo, Walay Labaw ka Mahinungdanon nga Tawag [1999], 61).