Kapitulo 24

Ang Buhat sa mga Babaye nga Santos sa Ulahing mga Adlaw: “Dili Hinakog nga Debosyon ngadto Niining Mahimayaong Kawsa”

“Walay kinutuban sa kaayo nga mabuhat sa atong mga sister.”

Gikan sa Kinabuhi ni Joseph Fielding Smith

Diha sa usa ka kinatibuk-ang miting sa Relief Society niadtong Oktubre 2, 1963, si Presidente Joseph Fielding Smith miingon, “Kita, ang mga Kaigsoonan sa Simbahan, nagpasidungog ug nagtahud sa atong buotan nga mga sister alang sa ilang dili hinakog nga paghalad ngadto niini nga mahimayaong kawsa.”¹

Sa paghimo niini nga pamahayag, misulti si Presidente Smith gikan sa katuigan nga kasinatian. Nakagahin siya sa pagserbisyo sa tibuok kinabuhi kauban ang matinud-anong mga babaye nga mga Santos sa Ulahing mga Adlaw. Kini nga serbisyo misugod sa katapusan sa mga 1880, sa diha nga siya mga 10 anyos ang panuigon. Niana nga panahon, ang mga babaye nga mga Santos sa Ulahing mga Adlaw giawhag sa pagbaton og edukasyon sa medisina ug pag-amuma sa panglawas. Ang iyang inahan, si Julina L. Smith, misunod niini nga tambag ug nakadawat og pagbansay sa pagserbisyo isip usa ka mananabang. Kanunay siyang pukawon sa iyang inahan sa tungang gabii aron makamaneho siya sa ilang karwahe nga gibitad og kabayo ngadto sa usa ka panimalay diin ang usa ka masuso hapit na matawo. Nagserbisyo uban sa iyang inahan niini nga paagi, ang batan-ong Joseph Fielding Smith nakakita og ehemplo sa kalig-on ug kapuangod sa kababayen-an sa Simbahan.² Si Sister Smith sa kadugayan miserbisyo isip magtatambag sa kinatibuk-ang kapangulohan sa Relief Society.

Si Presidente Smith may dakong pagtahud alang sa Relief Society, nga siya miingon “usa ka importanting bahin sa gingharian sa Dios dinhi sa kalibutan.”³ Ang iyang ikaduhang asawa, si Ethel, miserbisyo isip miyembro sa kinatibuk-ang Relief Society board sulod sa 21 ka tuig. Si Sister Amy Brown Lyman, kinsa miserbisyo uban ni Ethel diha sa board ug sa kadugayan miserbisyo isip kinatibuk-ang presidente sa Relief Society, miingon: “Si Sister Smith maoy usa sa labing utokan nga mga babaye nga sukad akong nailhan. Akong gihunahuna nga siya ang labing nindot nga manunulat ug tigpamulong [diha] sa board.”⁴ Niini nga calling, mitambong si Ethel og mga komperensya sa stake paghatag og mga instruksyon alang sa mga sister sa Relief Society. Siya ug si Presidente Smith nagkuyog sa pipila ka mga buluhaton sa Simbahan, ug silang duha kasagaran namulong og dungan diha sa kongregasyon sa pagtudlo sa mga miyembro.⁵

Human namatay si Ethel, giminyoan ni Presidente Smith si Jessie Evans. Si Jessie mikuyog kaniya hapit matag higayon nga siya mibiyahe sa pagtudlo sa mga Santos. Nindot kaayo siyang mokanta, ug si Presidente Smith kanunay nga gusto siyang pakantahon diha sa mga miting nga ilang gitambungan. Si Elder Francis M. Gibbons, kinsa miserbisyo isip secretary ngadto sa Unang Kapangulohan, misulat: “Sa bisan kanus-a nga panahon si Joseph Fielding maoy magdumala, gusto niya nga si Jessie mopasundayag sa walay laing katarungan kondili nga siya dili gayud pul-an sa pagpaminaw niya nga mokanta. Lapas pa niana, hinoon, ang iyang maayong pagkabansay nga contralto nga tingog, ang pagkanta og sagrado nga mga himno, midugang og espesyal nga pagbati nga espirituhanon sa mga miting, nagdasig sa mga tigpaminaw ug nagtuboy sa iyang kaugalingong mga kapasidad sa pagpamulong. Sa kadugayan, pinaagi sa makanunayon ug kinomedyang pag-aghat sa iyang asawa, si Joseph panagsa moapil ni Jessie sa duet, nagbagay sa iyang nindot nga baritone nga tingog sa tingog ngadto ni Jessie. Niini nga mga okasyon, kasagaran silang magtupad og lingkod sa bangko sa piano samtang si Jessie mitugtug, giigo-igo ang iyang sagad, tibuok nga tingog aron dili mawagtang ang pagkanta sa iyang bana.”⁶

Isip Presidente sa Simbahan, si Joseph Fielding Smith kanunay nga mitrabaho uban ni Sister Belle S. Spafford, ang kinatibuk-ang presidente sa Relief Society. Si Sister Stafford wala madugay misulti sa iyang kasinatian sa pagtrabaho uban kaniya: “Si Presidente Joseph Fielding Smith, usa ka tawo nga malumo ug dako og gugma sa katawhan, gipanghimatuod sa tanang panahon og lawom nga pagsabut sa buhat sa kababayen-an sa Simbahan, ug iya kining gisulti ngadto sa kapangulohan sa Relief Society sa makadaghang higayon ug sa daghang mga paagi, nagdugang sa among pagsabut ug nagtudlo sa among mga dalan.”⁷

Mga Pagtulun-an ni Joseph Fielding Smith

Ang mga kasulatan nag-asoy kabahin sa matinud-anong kababayen-an kinsa adunay mga responsibilidad diha sa Simbahan sa Ginoo.

Atong mabasa diha sa Perlas nga Labing Bililhon nga human sa mga sangputanan nga nahitabo ni Adan ug ni Eva tungod sa pagkapukan, gisangyaw ni Eva ang kasaysayan. Kini mubo apan sa talagsaong paagi puno og kahulugan ug kini ingon sa mosunod:

“… Kon dili pa unta sa atong kalapasan kita dili unta makaangkon og binhi, ug dili gayud masayud sa maayo ug sa dautan, ug sa kalipay sa atong katubsanan, ug sa kinabuhi nga dayon nga gihatag sa Dios ngadto sa tanan nga masulundon.” [Moises 5:11.]

“Ug si Adan ug si Eva mihimaya sa ngalan sa Dios, ug sila mihimo sa tanan nga mga butang nga mahibaloan ngadto sa ilang anak nga mga lalaki ug sa ilang anak nga mga babaye.” [Moises 5:12; mga italics gidugang.]

Atong makat-unan gikan niini nga si Eva ingon man si Adan midawat og pagpadayag ug sugo aron sa pagtudlo sa ilang mga anak sa mga pamaagi sa kinabuhing dayon.⁸

Atong mabasa nga sa [unang] mga adlaw sa Israel ang kababayen-an mga aktibo ug dihay mga katungdanan nga pagabuhaton [tan-awa sa Exodo 15:20; Mga Maghuhukom 4–5].⁹

Diha sa Bag-ong Tugon atong mabasa ang daghan kaayong matinud-anong kababayen-an kinsa nangita ug nanghatag og tambag. Kadaghanan niini misunod sa atong Ginoo ug nangalagad ngadto kaniya [tan-awa sa Lucas 8:1–3, 10:38–42].¹⁰

Sa tibuok kasaysayan sa Simbahan, ang kababayen-an naghimo og importanting tahas diha sa buhat sa Ginoo sa ulahing mga adlaw.

Sa ulahing mga adlaw, ang mga sister sa Relief Society nagbuhat og importante nga mga tahas diha sa gipahiuli nga Simbahan ni Jesukristo.

Sa ika-17 nga adlaw sa Marso, 1842, si Propeta Joseph Smith nakigkita sa pipila ka mga sister sa Simbahan sa Nauvoo ug giorganisar sila ngadto sa usa ka kapunongan nga gihatagan og ngalan nga “Ang Babaye nga Relief Society sa Nauvoo.” … Nga kini nga organisasyon sa walay pagduda, nahimo pinaagi sa pagpadayag. Kini nga kamatuoran kadaghan na nga gipakita sa tibuok katuigan ug karon ang bili niini kadaghan na nga napamatud-an.¹¹

Sa tinuod ang Simbahan ni Jesukristo dili unta hingpit nga matukod kon wala pa kining nindot kaayo nga organisasyon matukod. … Kini nga pagpahiuli dili unta mahingpit kon wala ang Relief Society diin ang mga sister makatuman og balaanong gitakda nga serbisyo nga importante kaayo sa kaayohan sa Simbahan.¹²

Ang “Babaye nga Relief Society sa Nauvoo” giorganisar ni Propeta Joseph Smith nga gitabangan ni Elder John Taylor. Gipadayag sa Ginoo nga ang kababayen-an sa Simbahan kinahanglan nga i-organisar ngadto sa usa ka kapunongan, kay adunay importanting buhat alang kanila nga pagabuhaton sa pagtabang sa “pagdala ug pagtukod sa kahimoan sa Zion.” [D&P 6:6.] Kini nga buhat sa mga sister una sa tanan alang sa kaayohan, pag-awhag, ug pagpalambo sa kababayen-an sa Simbahan nga sila unta maandam sa tanang mga butang alang sa usa ka dapit didto sa celestial nga gingharian. Ang responsibilidad gihatag usab ngadto kanila sa pagtabang sa buhat sa kalooy ug kahupayan gikan sa kalisud ug pag-antus sa kabus, sa masakiton, ug sa nagkalisud diha sa tibuok Simbahan. Sa mga katuigang nanglabay sukad niana nga pag-organisar, ang mga sister niini nga kapunongan matinud-anon sa ilang calling ug nagpalambo sa mga kaugalingon sa ilang pagkamatinud-anon diha niana nga buhat. Walay buluhaton nga gipabuhat nga nahimong lisud kaayo; walay responsibilidad nga gipasagdan, ug pinaagi sa ilang mga pangalagad liboan ang napanalanginan.¹³

Ang Relief Society … nagtubo nga nahimong gahum sa Simbahan. Sa hingpit gikinahanglan gayud—nagsulti kita niini isip usa ka kaabag, nga nagpasabut og tabang, apan ang Relief Society labaw pa niana. Gikinahanglan kini.¹⁴

Buot kong modayeg sa mga sister niining mahinungdanon nga organisasyon alang sa ilang integridad ug pagkamatinud-anon nga gipakita kanunay sukad sa kapanahonan sa Nauvoo.¹⁵

Ang Ginoo nahimuot sa inyong mga buhat. Kamo, pinaagi sa inyong serbisyo, nakatabang sa pagtukod ug paglig-on sa gingharian sa Dios. Ingon niana ka gikinahanglan ang buhat sa Relief Society sa Simbahan—makaingon ba ko?—sama sa mga korum sa Priesthood. Karon ang uban mobati nga ako nagpahayag niini og gamay nga kaisug, apan ang akong kaugalingong paghukom mao nga ang buhat nga inyong gihimo, among buotan nga mga sister, angay kaayo ug sama lamang kaimportante sa pagtukod niini nga gingharian, paglig-on niini, pagpadako niini, pagpahiluna og pundasyon nga kitang tanan mahimong mohupot, ingon man usab sa kalalakin-an kinsa naghupot sa Priesthood sa Dios. Dili kami magkauyon kon wala kamo.¹⁶

[Ang mga sister sa Relief Society] mga sakop sa labing dako nga organisasyon sa kababayen-an sa kalibutan, usa ka organisasyon nga mahinungdanong bahin sa gingharian sa Dios dinhi sa kalibutan ug diin gitakda gayud ug gidumala nga kini nagtabang sa matinud-anong mga miyembro niini aron makabaton og kinabuhing dayon sa gingharian sa atong Amahan. …

Ang Relief Society gitukod pinaagi sa espiritu sa inspirasyon, ug gigiyahan niana nga espiritu [sukad niadto], ug mituhop ngadto sa mga kasingkasing sa dili maihap nga buotan natong mga sister kadto nga mga tinguha alang sa pagkamatarung nga makapahimuot sa Ginoo. ¹⁷

Ang Relief Society mao “ang labing dako nga organisasyon sa kababayen-an sa kalibutan, usa ka organisasyon nga mahinungdanong bahin sa gingharian sa Dios dinhi sa kalibutan.”

Ang mga sister sa Relief Society nagtabang sa pag-amuma sa temporal ug espirituhanong kaayohan sa mga anak sa Dios.

Ang Ginoo pinaagi sa iyang kaalam mitawag sa mga sister nga mahimong mga kaabag sa Priesthood. Tungod sa ilang kalooy, kalumo sa kasingkasing, ug kamabination, ang Ginoo nagtan-aw diha sa [kababayen-an] ug mihatag kanila sa mga katungdanan ug responsibilidad nga mahimong mga tigpangalagad sa mga nanginahanglan ug sa nagkalisud. Gitudlo niya ang dalan nga angay nilang subayon, ug siya mihatag kanila niining importante nga organisasyon diin sila adunay awtoridad sa pagserbisyo ubos sa mga pagdumala sa mga bishop sa ward ug sa pakig-uyon sa mga bishop sa ward, magtan-aw sa espirituhanon ug temporal nga kinahanglanon sa atong katawhan.

Ug ang Ginoo makatawag sa atong mga sister sa pag-adto sa mga panimalay aron sa paghupay sa nanginahanglan, sa pagbulig ug pagtabang sa nagkalisud, sa pagluhod ug pag-ampo uban kanila, ug ang Ginoo mamati sa mga pag-ampo sa mga sister kon kini gihalad sa kinasingkasing alang sa masakiton, ingon man nga siya maminaw sa mga pag-ampo sa mga elder sa Simbahan.¹⁸

Ang katuyoan ug katungdanan sa Relief Society daghan. … Ang akong amahan, si Presidente Joseph F. Smith [miingon:] “Kini usa ka organisasyon nga gi-establisar ni Propeta Joseph Smith. Busa kini, ang labing karaan nga kaabag nga organisasyon sa Simbahan, ug kini importante kaayo. Dili lamang kini moatiman sa mga panginahanglanon sa kabus, sa masakiton ug sa mga timawa, apan kabahin sa katungdanan niini—ug ang mas dakong bahin, usab—mao ang pag-amuma sa espirituhanong kaayohan ug kaluwasan sa mga inahan ug sa anak nga mga babaye sa Zion; sa pagsiguro nga walay usa nga napasagdan, apan ang tanan nabantayan batok sa kadaut, kalamidad, sa mga gahum sa kangitngit, ug sa mga dautan nga naghulga kanila sa kalibutan. Katungdanan kini sa mga Relief Society sa pag-amuma sa espirituhanong kaayohan sa ilang mga kaugalingon ug sa tanang sakop nga mga babaye sa Simbahan.”¹⁹

Kini katungdanan sa Relief Society, dili lamang sa pag-amuma niadtong kinsa mga sakop sa Relief Society, apan ang ilang buhat kinahanglan nga mapakita lapas pa niadto nga mga utlanan. Bisan asa kon ang tawo anaa sa kasamok, nagkinahanglan og tabang, anaa sa kalisdanan, masakiton o nagkalisud, kita motawag sa Relief Society. … Sila makahimo og importante ug maayo kaayong buhat pinaagi sa pag-awhag sa nahisalaag, pagtabang kanila, pagdala kanila balik ngadto sa pagkaaktibo, pagtabang kanila sa pagbuntog sa ilang mga kahuyang o mga sala ug mga kakulangan, ug pagdala kanila ngadto sa pagsabut sa kamatuoran. Walay kinutuban sa kaayo nga mabuhat sa atong mga sister.

… Wala ako mahibalo unsay mabuhat sa atong mga presidente sa stake, mga bishop sa ward kon sila wala niining buotan nga mga sister sa Relief Society kinsa masaligan, kinsa ilang masugo, sa daghang higayon, sa pagdumala og mga sitwasyon nga hilabihan ka lisud, kana lisud alang sa atong kalalakin-an, apan diin ang atong mga sister mahimong mobuhat sa labing maayong kaayohan sa dako kaayong bintaha. Kini usa ka nindot kaayo nga butang kon ang tanang miyembro sa Simbahan hingpit. Kon kana mao ang sitwasyon kitang tanan diyutay og responsibilidad, ang kalalakin-an ug kababayen-an, apan kana nga panahon wala pa moabut. Kita adunay mga miyembro diha sa atong mga sister kinsa nagkinahanglan og pag-awhag, gamay nga espirituhanon ingon man sa temporal nga tabang ug walay usa nga makabuhat niini og mas maayo kay sa atong mga sister kinsa sakop niining dako ug maayo kaayong organisasyon.

Niini nga buhat ang mga sister mahimong mohatag sa ilang pag-abag sa pag-awhag ug pagtabang sa nahisalaag, walay pagtagad, sa yamhangan, sama lamang nga ang mga kalalakin-an sa Priesthood gitawag sa pagbuhat alang sa nahisalaag, yamhangan, ug walay pagtagad diha sa mga kalalakin-an. Kinahanglan kitang tanan mobuhat sa pagpahinabo sa pagkamatarung ug maninguha sa pagpabalik sa pagkaaktibo niadtong kinsa napalayo ug wala magtagad sa mga katungdanan sa Simbahan.²⁰

Gikan sa yano [niini] nga sinugdanan ubos sa labing malisud nga mga kondisyon, sa dihang ang miyembro sa Simbahan diyutay pa, among nakita ang Kapunongan nga nagtubo. … Ang maayo nga nahimo sa pag-amuma sa kabus, pag-amuma sa masakiton ug sa nagkalisud, ug kadtong kinsa anaa sa pisikal, mental, o espirituhanong panginahanglan, dili gayud mahibaloan. … Ang tanan niini nahimo pinaagi sa diwa sa gugma pinasubay sa tinuod nga diwa sa ebanghelyo ni Jesukristo.²¹

Gilauman sa Ginoo ang mga kababayen-an sa pagpangita sa kahayag ug kamatuoran nga sila unta mahatagan og katungod ngadto sa celestial nga himaya.

Ang ebanghelyo dako usab og kahulugan ngadto sa atong mga sister sama ngadto sa mga kalalakin-an. Sila may dako usab nga kabalaka niini sama sa mga kalalakin-an. Ug sa diha nga ang Ginoo miingon ngadto ni Propeta Joseph Smith, “Siksika kini nga mga sugo kay sila mga tinuod ug matinud-anon, ug ang mga panagna ug mga saad nga anaa kanila ang tanan matuman,” [D&P 1:37] siya wala maghatag og kinutuban niana nga sugo ngadto sa mga miyembro nga lalaki sa Simbahan. … Kini sama usab kaimportante nga ang atong mga sister makasabut sa Plano sa Kaluwasan sama sa mga kalalakin-an. Kini sama usab ka kinahanglanon nga sila magsunod sa mga sugo. Walay babaye nga maluwas diha sa gingharian sa Dios nga walay bunyag alang sa kapasayloan sa mga sala ug sa pagpandong sa mga kamot alang sa gasa sa Espiritu Santo. …

… Sa diha nga ang Ginoo miingon nga walay tawo nga maluwas diha sa pagkawalay alamag [tan-awa sa D&P 131:6], ako nagtuo nga nagpasabut usab siya sa kababayen-an sama sa kalalakin-an, ug ako nagtuo nga ang kababayen-an sa simbahan may obligasyon sa pagtuon sa mga kasulatan.²²

Ang Ginoo nagkinahanglan sa kababayen-an, ingon man sa kalalakin-an sa Simbahan, nga sila mahibalo sa iyang balaang kabubut-on ug adunay malungtarong pagpamatuod diha sa ilang mga kasingkasing sa pinadayag nga kamatuoran kalabut sa kaluwasan diha sa gingharian sa Dios. Ang Ginoo wala magpadayag sa Basahon ni Mormon alang sa kaayohan niadtong kinsa naghupot sa Priesthood lamang, apan alang sa tanang kalag kinsa nangita sa kamatuoran, lalaki ug babaye.²³

“Ang Ginoo nagkinahanglan sa kababayen-an … sa Simbahan, nga sila mahibalo sa iyang balaang kabubut-on ug adunay malungtarong pagpamatuod diha sa ilang mga kasingkasing.”

Gilauman sa Ginoo nga ang mga sister makabaton og pagpamatuod sa kamatuoran nga makasabut sa mga doktrina sa Simbahan sama sa iyang gilauman niadtong kinsa naghupot sa Priesthood. Kon kita makaangkon og kahimayaan, nga atong gipanghinaut nga mabatunan, kini kinahanglan nga atong andamon ang atong mga kaugalingon pinaagi sa kahibalo, hugot nga pagtuo, pag-ampo. Ug sa diha nga ang Ginoo miingon, “Unaha ninyo pagpangita ang gingharian ug pagkamatarung gikan sa Dios,” [Mateo 6:33; 3 Nephi 13:33] wala siya magsulti ngadto sa pundok sa kalalakin-an lamang, kini nagsagol nga kongregasyon.²⁴

Ang matag babaye nga gibunyagan ngadto sa Simbahan gipandungan sa mga kamot sa mga elder ang iyang ulo alang sa gasa sa Espiritu Santo nga unta siya adunay paggiya niana nga Espiritu sa tanang kamatuoran. Kini pagbuot sa Ginoo nga walay usa nga walay balaang paggiya nga mopadayag ngadto kanila sa kamatuoran ug makahimo kanila sa pag-ila sa kahayag gikan sa kangitngit ug, sa ingon, malig-on ug mahatagan sa gahum sa pagbatok sa tanang sayop nga mga doktrina, mga teyoriya, ug mga hunahuna nga nagdagsang sa kalibutan karon.²⁵

Ang atong mga sister may katungod usab og inspirasyon sa Balaang Espiritu alang sa ilang mga panginahanglan sama sa kalalakin-an, sa tanan. Sila may katungod sa pagpanagna kalabut sa mga butang nga importante alang kanila nga mahibaloan. … Kon sila mag-ampo kinahanglan silang mag-ampo nga matinguhaon, magpaabut og tubag sa ilang mga pag-ampo. Ang Ginoo mamati kanila, kon sila matinguhaon, matinuoron, sama usab nga siya mamati sa mga kalalakin-an.²⁶

Ang Ginoo nagsaad ngadto sa tanan, mga lalaki ug mga babaye, sa gasa sa Espiritu Santo sa kondisyon sa pagkamatinud-anon, pagkamapainubsanon, ug tinuod nga paghinulsol. Sila gikinahanglan nga magtuon ug mahibalo sa mga kamatuoran sa ebanghelyo ug sa pag-andam sa ilang mga kaugalingon pinaagi sa pagtuon, hugot nga pagtuo, ug pagkamasulundon sa tanang mga sugo sa pagsiksik alang sa kahayag ug kamatuoran nga sila mahimong mahatagan og katungod sa celestial nga himaya.²⁷

Pinaagi sa priesthood, ang Dios nagtanyag ngadto sa Iyang anak nga mga babaye sa tanang espirituhanong gasa ug panalangin nga maangkon sa Iyang anak nga mga lalaki.

Ako nagtuo nga kitang tanan nahibalo nga ang mga panalangin sa priesthood dili kutob sa kalalakin-an lamang. Kini nga mga panalangin gibu-bu usab … diha sa tanang matinud-anong kababayen-an sa Simbahan. Kining buotan nga mga sister makaandam sa ilang mga kaugalingon, pinaagi sa pagsunod sa mga sugo ug sa pagserbisyo diha sa Simbahan, alang sa mga panalangin sa balay sa Ginoo. Ang Ginoo nagtanyag ngadto sa iyang anak nga mga babaye sa tanang espirituhanong gasa ug panalangin nga maangkon sa iyang anak nga mga lalaki, kay diha sa Ginoo ang babaye dili gawas sa lalaki, ni ang lalaki gawas sa babaye [tan-awa sa 1 Mga Taga-Corinto 11:11].²⁸

Kitang tanan nahibalo nga ang Ginoo misulti ni Abraham nga siya mahimong amahan sa daghan nga mga nasud ug nga ang iyang kaliwatan ingon sa mga bitoon sa langit ug ingon sa balas nga atua sa baybayon sa dagat nga daghan, apan unsay dili nato kalimtan mao nga ang sama nga mga saad gihimo ngadto ni Sara.

“Ug ang Dios miingon kang Abraham: Mahitungod kang Sarai nga imong asawa, dili mo siya pagahinganlan nga Sarai, kondili si Sara na ang iyang ngalan. Ug siya pagapanalanginan ko, ug pagahatagan ko usab ikaw og anak nga lalaki gikan kaniya: oo, siya pagapanalanginan ko, ug siya mahimo nga inahan sa mga nasud, mga hari sa mga kalungsuran magagikan kaniya.” [Genesis 17:15–16.]²⁹

Ang Ginoo, nagsulti kabahin sa priesthood ug sa gahum sa priesthood, ug sa mga ordinansa sa Simbahan nga atong nadawat pinaagi sa priesthood, miingon: “Ug kining labaw nga pagkapari nangalagad sa ebanghelyo ug naghupot sa yawe sa mga misteryo sa gingharian, gani ang yawe sa kahibalo sa Dios.”

… Tuguti ako sa pagbasa niana pag-usab: “Ug kining labaw nga pagkapari nangalagad sa ebanghelyo ug naghupot sa yawe sa mga misteryo sa gingharian, gani ang yawe sa kahibalo sa Dios.” Busa, diha sa mga ordinansa niana, ang gahum sa pagka-Diosnon gipakita. Ug kon walay mga ordinansa niana ug ang pagtugot sa priesthood, ang gahum sa pagka-Diosnon dili mapakita ngadto sa mga tawo diha sa unod; kay kon wala kini walay tawo nga makakita sa nawong sa Dios, gani sa Amahan ug mabuhi. [D&P 84:19–22.]

Kon magbasa kita og mga butang sama niini, kinahanglan nga ang matag lalaki taliwala kanato kinsa naghupot sa priesthood maglipay sa paghunahuna nga kita aduna nianang dakong awtoridad nga pinaagi niini kita mahimong makaila sa Dios. Dili lamang ang kalalakin-an nga naghupot sa priesthood ang nahibalo niana nga dakong kamatuoran, apan tungod niana nga priesthood ug sa mga ordinansa niana, ang matag miyembro sa Simbahan, kalalakin-an ug kababayen-an, mahimong makaila sa Dios.³⁰

Mga Sugyot alang sa Pagtuon ug Pagtudlo

Mga Pangutana

Unsa ang atong makat-unan gikan sa mga kasinatian nga gihulagway diha sa “Gikan sa Kinabuhi ni Joseph Fielding Smith”? Unsa nga susamang mga kasinatian kamo aduna?
Namulong si Presidente Smith kabahin sa kababayen-an sa lain-laing yugto kinsa nakatuman og importanting mga responsibilidad diha sa gingharian sa Dios (tan-awa sa seksyon 1). Sa unsa nga mga paagi ninyo nakita ang kababayen-an nga naghatag og kalig-on sa ilang mga pamilya ug sa Simbahan?
Sa unsa nga paagi ninyo nakita nga ang serbisyo sa Relief Society “importante kaayo sa kaayohan sa Simbahan”? (Tan-awa sa seksyon 2.) Sa unsa nga mga paagi nga ang mga sister sa Relief Society ug ang mga naghupot sa priesthood magtambayayong og trabaho sa pagtukod sa gingharian sa Dios?
Sa unsa nga mga paagi nga ang Relief Society nag-atiman sa espirituhanong kaayohan sa mga babaye nga mga Santos sa Ulahing mga Adlaw? Sa unsa nga mga paagi nga ang mga sister sa Relief Society mipakita sa ilang impluwensya lapas pa sa ilang organisasyon? (Alang sa pipila ka mga ehemplo, tan-awa sa seksyon 3.)
Gipasabut og maayo ni Presidente Smith nga ang tanang kababayen-an ug kalalakin-an kinahanglan nga makasabut sa mga doktrina sa ebanghelyo, molig-on sa ilang mga pagpamatuod, ug modawat og pagpadayag (tan-awa sa seksyon 4). Ngano sa inyong hunahuna nga importante alang kanatong tanan sa pagtinguha niini nga mga gasa?
Gitudlo ni Presidente Smith nga ang mga panalangin sa priesthood “gibu-bu usab … diha sa tanang matinud-anong kababayen-an sa Simbahan” (seksyon 5). Ngano nga ang kababayen-an nagkinahanglan sa mga panalangin sa priesthood sa paghimo sa ilang mga responsibilidad diha sa panimalay ug sa Simbahan? Unsa nga mga ehemplo ang inyong nakita sa kababayen-an nga nakadawat og espirituhanong mga gasa?

May Kalabutan nga mga Kasulatan

Mga Buhat 5:12–14; Alma 32:22–23; D&P 46:8–9

Tabang sa Pagtudlo

“Kini kasagarang makatabang sa pagsugod og hunahuna mahitungod sa umaabut nga leksyon human dayon inyong gitudlo ang nag-unang leksyon. Tingali kamo labing makamatikod niadtong inyong gitudloan ug sa ilang mga panginahanglan ug mga interes human dayon kamo nakig-uban kanila” (Pagtudlo, Walay Labaw Ka Mahinungdanon Nga Tawag [1999], 97).