Kapitulo 20

Gugma ug Pagpakabana alang sa Tanang mga Anak sa Atong Amahan

“Sa akong pagtuo kon ang tanang mga tawo nakahibalo ug nakasabut kinsa sila, ug nakahibalo sa balaang tinubdan sila nagagikan, … makabaton sila og pagbati sa pagkamabination ug pagkaparyente sa usag usa nga makapausab sa ilang tanang pamaagi sa pagpuyo ug magdala og kalinaw sa kalibutan.”

Gikan sa Kinabuhi ni Joseph Fielding Smith

Si Joseph Fielding Smith Jr. ug John J. Stewart nakaobserbar, “Anaa kini sa ginagmayng gihunahuna nga mga butang sa kinabuhi nga makita og klaro ang tinuod nga Joseph Fielding Smith.” Dayon mipakigbahin sila og tulo ka ehemplo sa “ginagmayng gihunahuna nga mga butang” nga iyang nahimo:

“Usa ka adlaw sa komperensya sa simbahan sa Mormon Tabernacle sa Temple Square usa ka 12 anyos nga batang lalaki, nalipay nga nakaanha sa unang higayon, miabut og sayo aron makakuha og lingkuranan duol sa atubangan. … Sa hapit na magsugod ang miting, ug ang tanang lingkuranan nalingkuran na, usa ka usher mihangyo sa batang lalaki sa pagbakante sa iyang lingkuranan aron ang naulahi og abut nga Senador sa Estados Unidos makalingkod. Looy nga mituman ang bata, ug mibarug sa agianan, nahigawad, naulaw, nga naghilak.” Si Presidente Joseph Fielding Smith “nakamatikod sa batan-on ug misinyas niya sa pagduol [sa atubangan]. Sa dihang gisultihan siya sa batan-on unsay nahitabo miingon siya, ‘Walay katungod kadto nga usher sa iyang gibuhat nimo. Apan diri, lingkod tupad nako,’ ug iya siyang gipatupad kaniya, taliwala sa mga apostoles sa Simbahan.

“Usa ka adlaw niana samtang nag-interbyu siya og batan-ong mga lalaki nga magmisyon og duha ka tuig alang sa Simbahan, [siya] nakamatikod og batan-on nga mag-uuma nga moadto sa silangang Canada. ‘Anak, bugnaw didto. Aduna ka bay coat?’ ‘Wala sir, wala koy coat. Iyang gidala ang batan-on tabok sa dalan ngadto sa tindahan ug gipalitan og coat.

“Sa adlaw nga siya gipaluyohan sa komperensya isip presidente sa Simbahan usa ka gamay nga batang babaye miliot-liot sa mga tawo human sa miting ug mikab-ot sa iyang kamot. Natandog kaayo siya sa gihimo nga siya mipungko ug mikugos sa bata sa iyang mga bukton. Iyang nahibaloan nga ang iyang pangalan mao si Venus Hobbs, … hapit na mag-kwatro anyos. Sa iyang adlawng natawhan si Venus nakadawat og surprisa nga tawag sa telepono: Si Joseph Fielding Smith ug ang iyang asawa nanawag og long distance aron mokanta og ‘Happy Birthday’ ngadto niya.”¹

Kining mga buhat sa kaayo dili panagsa lang apan kabahin sa sumbanan sa tibuok kinabuhi. Si Presidente Smith mao “ang tawo nga may dakong kalumo ug kapuangod. Ang iyang kinabuhi mao ang paghatag kanunay og tabang ngadto sa timawa, kahupayan sa naguol, tambag sa naglibug ug nagpakitag ehemplo nga ang gugma nga putli mao ‘ang tiunay nga gugma ni Kristo.’ [Moroni 7:47.]”²

Mga Pagtulun-an ni Joseph Fielding Smith

Uban sa kahibalo nga ang Dios mao ang Amahan sa tanang katawhan, atong gitinguha ang paghigugma ug pagpanalangin sa uban.

Sa akong pagtuo kon ang tanang mga tawo nakahibalo ug nakasabut kinsa sila, ug nakahibalo sa balaang tinubdan sila nagagikan, ug sa walay katapusan nga potensyal nga kabahin sa ilang panulundon, makabaton sila og pagbati sa pagkamabination ug pagkaparyente sa usag usa nga makapausab sa ilang tanang pamaagi sa pagpuyo ug magdala og kalinaw sa kalibutan.

Nagtuo kita sa kaligdong ug kabalaan sa gigikanan sa tawo. Ang atong pagtuo nagagikan sa kamatuoran nga ang Dios mao ang atong Amahan, ug nga kita iyang mga anak, ug nga ang tanang tawo mga igsoon sa samang mahangturong pamilya.

Isip sakop sa iyang pamilya, nagpuyo kita uban niya sa wala pa ipahimutang ang pundasyon niini nga kalibutan, ug siya miorden ug miestablisar sa plano sa kaluwasan diin kita nakaangkon sa pribilehiyo sa paglambo ug pag-uswag samtang kita maningkamot sa pagbuhat.

Ang Dios nga atong gisimba mao ang nahimaya nga Binuhat nga aduna sa tanang gahum ug kahingpitan, ug iyang gilalang ang tawo sa iyang kaugalingong hitsura ug panagway, nga dunay mga kinaiya ug mga hiyas nga anaa kaniya.

Ug mao nga ang atong pagtuo sa kaligdong ug kapalaran sa tawo usa ka importante nga bahin sa atong teyolohiya ug atong paagi sa pagpakabuhi. Mao kini ang gibasehan sa pagtulun-an sa atong Ginoo nga “ang una ug importante nga sugo” mao ang: “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan”; ug ang ikaduha nga importante nga sugo mao ang: “Higugmaaa ang imong silingan sama sa imong kaugalingon.” (Tan-awa sa Mat. 22:37–39.)

Tungod kay ang Dios mao ang atong Amahan, duna kitay natural nga tinguha sa paghigugma ug pagserbisyo kaniya ug magpakatakus nga sakop sa iyang pamilya. Atong gibati ang obligasyon sa pagbuhat unsay iyang gusto nga atong buhaton, sa pagsunod sa iyang mga sugo ug sa pagpuyo nga nagtuman sa mga sumbanan sa iyang ebanghelyo—kining tanan importante nga mga bahin sa tinuod nga pagsimba.

Ug tungod kay ang tanang mga tawo atong mga igsoon, kita adunay tinguha sa paghigugma ug pagpanalangin ug pagpakigdait kanila—ug kini usab atong dawaton isip importante nga bahin sa tinuod nga pagsimba.

Sa ingon, ang tanan nga atong gibuhat sa Simbahan nagsentro sa balaan nga balaod nga kita kinahanglang mahigugma ug mosimba sa Dios ug moserbisyo sa atong isigka-tawo.

Maong dili ikatingala, nga isip usa ka simbahan ug isip katawhan duna kitay lawom ug kanunay nga pagpakabana alang sa kaayohan sa tanang mga anak sa atong Amahan. Atong gitinguha ang ilang temporal ug espirituhanong kaayohan uban sa atoa. Nag-ampo kita alang nila sama sa atong kaugalingon, ug maningkamot kita sa pagpuyo aron nga sila, makakita sa atong maayong mga binuhatan, magiyahan sa paghimaya sa atong Amahan nga tua sa langit. [Tan-awa sa Mateo 5:16.]³

“Apan si Pedro miingon kaniya, Ako walay salapi o bulawan, apan sa ania kanako hatagan ko ikaw; Sa ngalan ni Jesukristo nga Nazaretnon paglakaw” (Mga Buhat 3:6).

Samtang kita mahigugma ug mosuporta sa usag usa sa Simbahan, mahimo kitang gahum sa kalibutan alang sa maayo.

“Kon nahigugma kamo kanako, inyong pagatumanon ang akong mga sugo.” [Juan 14:15.]

Kini nga mga pulong gipamulong sa Ginoo ngadto sa iyang mga disipulo apan pipila ka oras sa wala pa ang iyang kamatayon, samtang iyang gipundok sila aron mangaon sa pagpalabay [passover], ug mihatag nila sa katapusan nga instruksyon sa dili pa siya mag-antus sa mga sala sa kalibutan. Niana nga okasyon, ug sa wala pa mahimo kini nga pakigpulong, iyang gipasabut ang mao nga hilisgutan, sa dihang siya miingon:

“Mga anak, ako ania uban pa kaninyo sulod sa hamubong panahon. Kamo mangita kanako; ug sama sa akong pag-ingon sa mga Judeo, ako magaingon usab kaninyo karon, ‘Asa ako padulong, niini dili kamo makaadto.’ Ako magahatag kaninyog bag-ong sugo, Nga kinahanglan maghigugmaay kamo ang usa sa usa; maingon nga Ako nahigugma kaninyo, kinahanglan maghigugmaay usab kamo ang usa sa usa.” [Juan 13:33–34.] …

… Dili lang kita mga higala; mga igsoon kita, mga anak sa Dios, kinsa migawas, sa giingon na nako, gikan sa kalibutan aron mosulod ngadto sa mga pakigsaad, sa pag-obserbar sa iyang mga balaod ug sa pagbarug sa tanang butang nga gihatag kanato pinaagi sa inspirasyon. Kita gimandoan sa paghigugmaay sa usag usa. “Usa ka bag-o nga sugo,” ang Ginoo miingon, ug gani sama sa ubang mga sugo sama kini ka dugay sa kahangturan. Walay panahon nga wala kini nga sugo ug dili importante sa kaluwasan, ug gani kanunay kini nga bag-o. Dili gayud kini mahimong karaan, tungod kay kini tinuod.⁴

Nagtuo ako nga kini atong sagrado nga katungdanan sa paghigugma sa usag usa, sa pagtuo sa usag usa, sa pagbaton og pagtuo sa usag usa, nga atong katungdanan sa pagpasaylo sa mga kasaypanan ug sa mga kapakyasan sa usag usa, ug dili kini padak-on sa atong kaugalingon ni atubangan sa mga tawo sa kalibutan. Kinahanglang walay pagpangita og sayop, walay pagpanglibak, walay pagsulti og dautan, batok sa usag usa, diha sa Simbahan ni Jesukristo sa mga Santos sa Ulahing mga Adlaw. Kinahanglang magmatinud-anon kita sa usag usa ug sa kada baruganan sa atong relihiyon ug dili masina sa usag usa. Kinahanglang dili kita maselos, ni masuko sa usag usa, ug kinahanglang dili kita mobati sa atong mga kasingkasing nga kita dili mopasaylo sa kalapasan sa usag usa. Kinahanglang walay pagbati diha sa mga kasingkasing sa mga anak sa Dios nga dili mopasaylo batok ni bisan kinsa, bisan kinsa pa siya …

… Kinahanglang dili kita maghambin og bati nga mga pagbati sa usag usa, apan magbaton og pagbati sa pagpasaylo ug inigsoon nga paghigugma, sa usag usa. Hinumduman nato ang iyang kaugalingong indibidwal nga kasaypanan ug kahuyang ug maningkamot sa pagkorihir niini. Wala pa kita moabut sa kahimtang sa kahingpitan, lisud kining mahitabo niini nga kinabuhi, ug gani, pinaagi sa tabang sa Espiritu Santo, posible nga kita magbarug nga magkahiusa ug magbuntog sa atong mga sala ug kasaypanan. Kon buhaton nato kini, magtahud sa tanang mga sugo sa Ginoo, mahimo kitang gahum sa kalibutan alang sa maayo; atong pildihon ug buntugon ang tanang dautan, ang tanang oposisyon sa kamatuoran, ug ipahinabo ang pagkamatarung sa ibabaw sa kalibutan. Kay ang Ebanghelyo masabwag ug ang katawhan sa kalibutan mobati sa impluwensya nga ipagawas gikan sa katawhan sa Zion, ug sila mas maghinulsol sa ilang mga sala ug modawat sa kamatuoran.⁵

Atong ipadayag ang atong gugma sa atong isigka-tawo pinaagi sa pagserbisyo nila.

Ang atong Manluluwas mianhi sa kalibutan aron sa pagtudlo nato sa paghigugmaay sa usag usa, ug samtang kanang importante nga leksyon gipakita pinaagi sa iyang hilabihan nga pag-antus ug kamatayon aron kita mabuhi, dili ba nato ipadayag ang atong gugma alang sa atong isigka-tawo pinaagi sa pagserbisyo kanila? …

Ang serbisyo kinahanglang ihatag ngadto sa uban. Kinahanglan nga kita motabang sa walay swerte, niadtong wala makadungog sa kamatuoran ug anaa sa espirituhanong kangitngit, sa timawa, sa dinaog-daog. Pakyas ba kamo? Atong hinumduman ang mga pulong sa magbabalak, nga si Will L. Thompson. … Ang balak nagsugod niining paagiha:

“Nakabuhat ba ako og bisan unsang maayo karon?
Nakatabang ba ako sa usa nga nagkinahanglan?
Nakapalipay ba ako sa masulub-on,
Ug milipay sa uban?
Kon wala, napakyas gyud ako.” [Hymns, nu. 223.]6                        

Kon motabang kita sa uban, atong gipakita ang atong gugma kanila.

Ang atong misyon alang sa tibuok kalibutan—alang sa kalinaw, ug paglaum, ug kalipay, ug temporal ug mahangturong kaluwasan sa tanang mga anak sa Amahan. … Uban sa akong tanang gahum sa pagdasig ako moawhag niini nga katawhan sa pagpadayon sa pagtabang ug pagpanalangin sa mga kinabuhi sa tanang mga anak sa atong Amahan bisan asa.⁷

Kinahanglan kitang mopasalamat ug mohigugma sa katawhan.

Sa bata pa ako, kami dunay kabayo nga ginganlan og Junie. Usa siya ka intelehente kaayo nga hayop nga sukad akong nakita. Ingon og tawo siya sa iyang abilidad. Dili nako siya matrangkahan sa kamalig tungod kay pirme niyang tangtangon ang higot sa pultahan sa iyang kwadra. Akong gibutang ang higot nga naghigot sa katunga sa pultahan sa kwadra ngadto sa ibabaw sa poste, apan alsahon ra kini niya sa iyang ilong ug ngipon. Dayon mogawas siya ngadto sa nataran.

Adunay gibutang nga gripo diha sa nataran nga gamiton sa pagbutang og tubig sa imnanan sa among mga hayop. Ablihan kini ni Junie sa iyang ngipon ug dayon biyaan nga mag-agas ang tubig. Kasab-an ko sa akong papa tungod kay dili nako mahipos kana nga kabayo sa kamalig. Dili man siya mopalayo; paagason lang niya ang tubig ug dayon maglakaw-lakaw sa nataran o sa tanaman. Sa tungang gabii, makadungog ko nga nag-agas ang tubig ug mobangon ko ug pagngon kini ug trangkahan pag-usab si Junie.

Ang akong papa miingon nga ang kabayo mas kamao pa kay kanako. Usa ka adlaw niana nakahukom siya nga siya ang motrangka ni Junie aron dili na siya makagawas. Iyang gikuha ang higot nga sa kasagaran ihigot sa ibabaw sa poste ug gibakus kini libot sa poste ug ubos sa puthaw, ug dayon miingon siya, “Karon atong tan-awon kon makagawas pa ba ka karon!” Ang akong papa ug ako mibiya sa kwadra ug milakaw balik sa balay; ug sa wala pa kami makaabut, si Junie diha na sa among kiliran. Dayon milakaw siya ug mipaagas pag-usab sa tubig.

Karon ako miingon, tingali, siya mas makamao pa kay ni bisan kinsa namo. Dili namo kapugngan si Junie sa paggawas gikan sa kwadra. Apan wala kana magpasabut nga siya dautan, tungod kay buotan siya. Dili siya ibaligya o pailisan ni papa, tungod lang niining gamayng sayop kay siya adunay laing daghan nga maayong mga hiyas.

Ang kabayo masaligan sa pagguyod sa among tartanilya sama sa iyang pagkahanas sa paggawas gikan sa kwadra. Ug importante kini kay si Mama usa ka lisensyado nga mananabang. Kon siya tawagon bisan asa sa walog, kasagaran sa tungang gabii, kinahanglan kong mobangon, magdala og suga ngadto sa kamalig, ug ihigot si Junie sa parada.

Mga dyes o onse anyos lang ko nianang higayuna; ug kana nga kabayo buotan apan kusgan sa pagdala nako ug ni Mama ngadto sa walog, bisan unsa pay kahimtang sa panahon. Hinoon, usa ka butang nga wala gayud nako masabti, nganong kadaghanan sa mga masuso matawo man sa gabii ug kadaghanan nila sa tingtugnaw.

Kasagaran maghulat ko ni Mama diha sa parada, ug nindot nga duna kay kuyog nga buotan nga hamtong nga Junie. Kini nga kasinatian uban niini nga kabayo nindot kaayo alang nako, tungod kay sa batan-on pa ko ako nakakat-on sa paghigugma ug pagpasalamat sa iyang pagka siya. Talagsaon siya nga kabayo nga dunay mga duha lang ka bati nga kinaiya. Ang mga tawo susama nianang paagiha. Walay usa nato nga hingpit; apan ang matag usa nato naningkamot nga mahimong hingpit, bisan sama sa atong Amahan sa langit. Kinahanglan kitang mopasalamat ug mohigugma sa katawhan.

Tingali kinahanglan kamong mahinumdom niini kon inyong timbang-timbangon ang inyong mga ginikanan o mga magtutudlo o mga lider sa ward ug stake o mga higala— o mga kaigsoonan. Nagpabilin kini nga leksyon kanako kanunay—sa pagtan-aw sa maayo diha sa katawhan bisan og kita naningkamot sa pagtabang nila sa pagbuntog sa usa o duha ka bati nga mga kinaiya. …

Sayo nakong nakat-unan sa kinabuhi ang paghigugma ug dili paghukom sa uban, naningkamot kanunay sa pagbuntog sa akong kaugalingong mga kasaypanan.⁸

Kon atong higugmaon ang Ginoo sa tibuok natong kasingkasing ug ang atong mga silingan, nahiuyon kita sa tanang sagrado nga balaod.

“Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan.

“Mao kana ang dako ug unang sugo.

“Ug ang ikaduha sulosama ra, nga mao kini, Higugmaa ang imong silingan sama sa imong kaugalingon.

“Niining duha ka mga sugo nagasukad ang tibuok nga kasugoan ug ang mga propeta.” (Mateo 22:37–40.)

Sa laing pagkasulti, kanang tanan nga gipadayag alang sa kaluwasan sa tawo gikan sa sinugdanan hangtud sa atong panahon, anaa na, apil na, ug kabahin niining duha ka dako nga mga balaod. Kon gihigugma nato ang Ginoo sa tibuok natong kasingkasing, sa tibuok kalag, ug sa tibuok hunahuna, ug ang atong mga silingan sama sa atong kaugalingon, nan wala nay lain pang tinguhaon. Dayon kita nahiuyon sa kinatibuk-an sa sagrado nga balaod. Kon kita andam nga magpuyo nga mauyunon niining duha ka dako nga mga sugo—ug kinahanglan gayud nga atong buhaton aron kita takus nga mopuyo sa presensya sa Dios—nan ang pagkadautan, kasina, ambisyon, kahakog, pagpaagas sa dugo, ug ang tanang matang sa sala mawala gikan sa kalibutan. Dayon moabut ang adlaw sa mahangturong kalinaw ug kalipay. Pagkanindot nianang adlawa! Gitugahan kita sa igong rason nga makahibalo nga kanang kahimtang mao ang labing gitinguha ug i-establisar diha sa mga tawo ang Pagkaamahan sa Dios ug ang hingpit nga panag-inigsoonay sa tawo.

… Makaingon ba kita nga atong gihigugma ang Ginoo sa tibuok kalag? Makaingon ba kita nga kita nagtinguha sa kaayohan sa atong silingan sama sa atong kaugalingon?⁹

Atong higugmaon ang Ginoo kay kini ang pundasyon sa tanang butang. Mao kini ang unang sugo, ug ang ikaduhang sugo, sa paghigugma sa atong mga silingan sama sa atong kaugalingon, sama niini, ug kon ato kanang nahimo atong natuman ang balaod, tungod kay walay butang nga dili mahimo.¹⁰

Mga Sugyot alang sa Pagtuon ug Pagtudlo

Mga Pangutana

Ikonsiderar ang “ginagmayng gihunahuna nga mga butang” nga gibuhat ni Presidente Joseph Fielding Smith alang sa uban (tan-awa sa “Gikan sa Kinabuhi ni Joseph Fielding Smith”). Unsay atong mahimo sa pag-establisar sa susamang mga sumbanan sa pagkamabination sa atong mga kinabuhi?
Sa unsa nga paagi nga ang doktrina sa seksyon 1 makatabang nato nga magmabination ug mahigugmaon niadtong anaa sa atong palibut?
Unsay nakadani ninyo mahitungod sa tambag ni Presidente Smith sa seksyon 2? Ngano sa inyong hunahuna nga kita mahimong “gahum sa kalibutan alang sa maayo” samtang kita magsunod niini nga tambag?
Unsay nahimo ni Jesukristo sa “pagtudlo nato sa paghigugmaay sa usag usa”? (Tan-awa sa seksyon 3.) Sa unsang mga paagi nga atong masunod ang Iyang ehemplo?
Ribyuha ang istorya mahitungod sa kabayo nga si Junie (tan-awa sa seksyon 4). Sa inyong hunahuna nganong importante nga “mopasalamat ug mohigugma sa katawhan”? Unsay atong mahimo sa pagtan-aw sa kaayo sa uban bisan og kita naningkamot sa pagtabang nila nga mabuntog ang bati nga mga kinaiya?
Unsay gipasabut niini nganha kaninyo sa pagsunod sa mga sugo diha sa Mateo 22:37–40? (Alang sa pipila ka ehemplo, tan-awa ang seksyon 5.) Ngano nga kita “nahiuyon sa kinatibuk-an sa sagrado nga balaod” kon kita mosunod niining mga sugo?

May Kalabutan nga mga Kasulatan

Mga Buhat 17:28–29; Mga Taga-Roma 8:16–17; 1 Juan 4:18–21; Mosiah 2:17; 18:8–10; Moroni 7:45–48

Tabang sa Pagtudlo

Ikonsiderar ang pagdapit sa mga partisipante sa pagbasa sa mga subheading sa kapitulo ug sa pagpili og seksyon nga makahuluganon nila o sa ilang pamilya. Dapita sila sa pagtuon sa mga pagtulun-an ni Presidente Smith niana nga seksyon, lakip na ang may kalabutan nga mga pangutana diha sa katapusan sa kapitulo. Dayon hangyoa ang mga sakop sa klase sa pagpakigbahin kon unsa ang ilang nakat-unan.