Papatisoga ma le Meaalofa o le Agaga Paia

E i ai mataupu faavae patino ua faatutuina e le Atua, ua faapea ona malamalama i ai ma usitaia, o le a maua ai e tagata le malamalama faaleagaga, meaalofa, ma faamanuiaga. I uluai taimi o le lalolagi, e faapea foi ona po o aposetolo, na mafai ai e tagata ona maua mana faaleagaga ma avanoa eseese e ala i le mauaina o se malamalamaaga, ma le faamaoni e usiusitai i tulafono patino ua faatutuina e le Alii. E pei o se faataitaiga, o Apelu, se tasi o atalii o Atamu, o le mauaina o faamatalaga e faapea o le osiaina o taulaga o se faatulagaga na faavaeina e le Atua, e ala mai ai le mauaina e tagata o faamanuiaga, na ia alu atu loa ma galue, mulimuli i le faatonuga, faatino le osigataulaga, lea na ia mauaina ai asiasiga mamalu mai le Silisili Ese [tagai Kenese 4:4 Eperu 11:4].

O le mea lea, ina ua leaga tagata i le vaitaimi a’o lumanai le lolo tele, ma ua oo mai le taimi e oo mai ai le faafanoga i luga ia te i latou, na faaali mai e le Alii se auala e mafai ai e le au amiotonu ona sosola ese, na faapena ai, o i latou uma na malamalama ma mulimuli i le faatulagaga, na mautinoa lo latou mauaina o le faamanuiaga na folafolaina [tagai Kenese 6–8].

O Iosua, a o le’i mauaina Ieriko, na tatau ona faataunuuina tulaga patino na faataatitia e le Atua. O tulaga na i ai, ina ua mulimulitaia faalelei, e tusa ma le poloaiga, na vave ona latou maua le aai o Ieriko. [Tagai Iosua 6.]

O se tasi faataitaiga: o le mataupu ia Naamanu, le taitaiau a Asuria;—na foliga mai, ina ua maua i le lepela ma ina ua faalogo e uiga ia Elisaia, le perofeta, na ia talosaga atu ia te ia ina ia aveesea le mai leaga. O le perofeta, i le mauaina e ia o le Agaga Paia, lea na te [silafiaina] le Finagalo o le Atua, na faailoa atu ia te ia, a taele faafitu i le vai o Ioritana, o le a toe faafoisia lona malosi. I le taimi muamua, na manatu Naamanu o lenei gaoioiga ua faatauvaa tele ma sa le fiafia ai, ma manatu na te le taliaina—le faataunuuina o se mea faapena. Peitai ane, i le mavae ai ona toe mafaufau lelei, ma faamaulaloina o ia lava, ma alu atu ai ma usitaia tulafono; ma faauta! na vave ona oo mai le faamanuiaga. [Tagai i le 2 Tupu 5:1–14.] …

Ina ua toe faailoa mai le Talalelei i lenei tisipenisione, na toe mauaina meaalofa ma faamanuiaga e ala i mataupu faavae faapena; o lena tulaga, e ala i le usiusitai i tulafono patino ua faatutuina. O loo faamanino mai pea e le Alii gaoioiga patino, ma folafola atu ia i latou uma o e o le a faia na mea, avanoa patino tulaga ese; ma o le taimi lava e faatinoina ai na gaoioiga—usitaia tulaga uma—ona mautinoa lea o faamanuiaga ua folafolaina mai, o le a faataunuuina lava.³

E i ai nisi ua manatu faivavale faapea, i le tisipenisione o le Talalelei, e le’i mauaina meaalofa ma faamanuiaga e ala i vaaiga faaletino, po o galuega faaletino, ae ala i le na o le faatuatua ma le salamo, e ala i galuega faalemafaufau, e tutoatasi lava mai le faaletino. Peitai, e ala i le tuu eseina o tu ma aga masani, talitonuga faataulaitu, ma talitonuga o tagata, o le a tatou vaai atu ai i le afioga a le Atua, lea o le a tatou maua ai o galuega faaletino, po o sauniga faaletino, i le tisipenisione o le Talalelei, sa le i mavavaeseina ma galuega faaleagaga, faatasi ma le faatuatua ma le salamo. O le faamaoniga o lenei mea, ou te faailoa atu ai le lafoga lenei:—

Na fetalai le Faaola, “Se a ea le mea e taua ai a’u e outou, Le Alii e, le Alii e, ae tou te le faia mea ou te fai atu ai?” [Luka 6:46.] Na ia toe faapea mai, “Ai se faalogo i a’u upu nei, ma faia e ia, ou te faatusaina o ia i le tagata poto, ua na faia lona fale i luga o le papa.” [Tagai i le Mataio 7:24.] Ma lea, “O lē faatuatua ma papatisoina, e faaolaina ia.” [Mareko 16:16.] E faapena foi, na ia fetalai, “Afai e le fanau se tasi i le vai ma le Agaga, e le mafai ona sao o ia i le malo o le Atua.” [Ioane 3:5.] O nei fetalaiga a lo tatou Faaola, e manaomia ai tagata ina ia faatino galuega faaletino, ia e alagatatau mo le mauaina o lo latou faaolataga.

I le aso o le Penetekoso, na fai atu ai Peteru i le motu o tagata na siomia o ia, “Ina salamo ia, ma ia taitasi ma papatisoina mo le faamagaloina o agasala, ona outou maua lea o le meaalofa a le Agaga Paia.” [Tagai Galuega 2:38.] I lenei faamatalaga faaperofeta, ua tatou aoao ai sa tatau i tagata ona faatinoina se galuega faaletino, papatisoga i le vai, ina ia latou maua ai le faamagaloga o agasala, ma mulimuli ai maua le meaalofa a le Agaga Paia. Peitai, a o le’i faatasi atu mo le galuega faaletino, e ao ona faatino le galuega i totonu—o le faatuatua lea ma le salamo. O le faatuatua ma le salamo e muamua atu i le papatisoga, ma o le papatisoga e muamua atu i le faamagaloga o agasala ma le mauaina o le Agaga Paia. …

E i ai nisi ua manatu e sese le faaaofia ai o le papatisoga i mataupu faavae taua ua faauuina e le Atua, lea e ao ona faataunuuina mo le faamagaloga o agasala. I le tali atu i ai, matou te faapea atu o le Faaola ma aposetolo na faapea ona latou faia; ma, tatou te lagonaina le tatau ona mulimuli i la latou faataitaiga. … O le Papatisoga … e aveesea ai o tatou agaga mai le agasala ma mea leaga, e ala i le faatuatua i le togiola sili. …

Ua faaali manino mai o galuega faaletino e ao ona faataunuuina, faatasi ai ma le faatuatua ma le salamo, ina ia maua ai avanoa o le Talalelei.⁴ [Tagai fautuaga 2 i le itulau 61.]

O le papatisoga i le vai, o se vaega o le Talalelei a Keriso, o le mafuaaga lea ua tatou iloa ai o auauna a le Atua i uluai taimi, na matua patino lava lo latou auai atu i lona faatinoga. …

O le a tatou faaaluina nei sina taimi e faasaga atu ai ma le malosi, ia maua se vaaiga tonu o le faiga na faatinoina ai le papatisoga. Ua matua faamaonia lava e na o le tasi le ala, po o le faiga na faatinoina ai lenei sauniga, ma o lena faiga na faamalamalamaina i aposetolo ma faapea ona latou tausisia ma le lotomau i a latou pulega uma. Ina ia mafai ona tatou mauaina se manatu tonu i lenei mataupu, e manaomia le liliu atu i tulaga na faatinoina ai le papatisoga.

Ua faapea mai e uiga ia Ioane [le Papatiso] na ia papatiso i Ainona, aua e tele ai vai [tagai Ioane 3:23]; ma afai la o le faatulutulu le auala sa faaaogaina, e faigata ona tatou manatu o le a ia alu i Ainona, aua sa tele vai i lena nofoaga, aua na o sina vai itiiti lava, atonu e mafai ona faatulutuluina uma ai Iutaia, lea atonu e faigofie ona maua, nai lo le tau alu i se malaga i Ainona. Ua tauina mai foi ia i tatou, na papatiso o ia i Ioritana, ma, ina ua mavae ona faatino o le sauniga i lo tatou Faaola, ona ia maliu a’e ai lea nai le vai, ua faamatala manino ai o ia sa i lalo i le vai, ina ia mafai ona faatinoina tonu le sauniga [tagai Mataio 3:16]. E faapena foi, o loo talanoa e uiga i le Eunuka, na o ifo faatasi ma Filipo i le vai, ona o a’e lea nai le vai [tagai Galuega 8:26–38]; o le mea lea, e ao lava ona faailoa e soo se tasi e faia soo se tautinoga e uiga i le moni ma le ogatasi o le faatulutulu o sina vai itiiti i luga o le muaulu, faapea ua lava lea mo le faataunuuina o le faamoemoega, ona le tatau lea i na tagata ona o ifo i le vai ina ia faatino ai le sauniga. O Paulo, i le tusi atu ai i le Au Paia, ua tuuina mai ai mo i tatou se molimau manino e lagolago ai le faatofuina. … Ua tusia e lena aposetolo e faapea, o le Au Paia ua tatanu faatasi ma Keriso e ala i le papatisoga [tagai Roma 6:4; Kolose 2:12].

E matua manino lava, e le mafai ona faapea na tanumia i latou i le papatisoga, e aunoa ma le matua lilofia, po o le ufitia i le vai. E le mafai ona faapea ua tanumia se mea faitino, pe afai o i ai sina vaega o le tino o aliali pea i luga, e faapena foi, e le mafai ona faapea ua tanumia se tagata i le vai o le papatisoga, vagana ua tuuina atoa lona tagata i lalo o le vai. O lenei faamalamalamaga a le aposetolo e uiga i le faiga o le papatisoga, e matagofie lona fesootai ma lena na tuuina mai e lo tatou Faaola, a le toe fanau oe i le vai, ma isi. O le fanau mai i se mea, e faailoa ai sa i totonu o lena mea; ma ua alu a’e, pe ua sau mai lena nofoaga, ina ia fanau i le vai, e ao foi ona faailoa ai na tuuina i le manava o le vai ma toe aumai ai nai le vai.

Ou te faatuatua ua lava mea ua uma ona tautalagia e faatalitonu ai mafaufau tatau ma lē manatu itutasi taitasi e faapea, o le faatofu, o le faiga lena na faatinoina ai le sauniga o le papatisoga i uluai aso o le faa-Kerisiano, ina ua talaiina atu le Talalelei i lona tulaga manino ma atoatoa, o le mea lea, o le a ou faaiuina ai a’u lafoga e uiga i lenei mataupu.

Ua tatou a’oa’o mai le [mataupu] e 6 o le Eperu e faapea o le faaeega o lima ua lisiina faatasi ma mataupu faavae o le Talalelei. Ua iloa e tagata uma o lenei sauniga, faatasi ma le papatisoga mo le faamagaloga o agasala, ua le amanaiaina i aso nei e lotu Kerisiano; o le mea lea, e toaitiiti ua talanoa mai e uiga i lenei mataupu, ma ou te faamoemoe o le a faapea ona aogā. E i ai taimi eseese, na faae’e ai aao o Keriso i luga o e mamai ma faamaloloina i latou, ma i Lana poloaiga i aposetolo, mataupu mulimuli o le tusi a Mareko, na ia faapea atu ai, e mulimuli atu nei faailoga ia te i latou o e talitonu; e faae’e atu foi o latou lima i luga o e mama’i, ona faamaloloina ai lea o i latou, ma isi. Na faae’e lima o Anania i luga o Saulo, ma vave ona toe pupula ona mata ina ua maea ona faatinoina lenei sauniga [tagai Galuega 9:17–18]. O Paulo, ina ua afatia i le motu o Melita, na ia faae’e ona lima i luga o le tama o Popilio, le kovana o le motu, ma faamaloloina o ia mai le mai vevela [tagai Galuega 28:8]. O nei faamatalaga itiiti, ua faaali manino ai o le faaeega o lima ua atofa mai e le Atua e avea ma [auala] e maua ai faamanuiaga faalelagi.

E ui lava o le faamalologa o ma’i na fesootai ma le faatinoina o lenei sauniga, peitai, pe a tatou suesueina atili le mataupu, tatou te iloa ai, e i ai lava se faamanuiaga sili atu sa fesootai ma lenei sauniga. Ua ta’uina mai ia i tatou, e uiga i le aai o Samaria, na papatisoina ai alii ma tamaitai e Filipo, lea na mafua ai le olioli sili ia i latou na papatisoina. Atonu na latou olioli ona o le mauaina o le faamagaloga o agasala, e ala i le faatuatua, salamo, ma le papatisoga, atoa ai ma le mauaina o sina vaega o le Agaga Paia o le Atua, lea e mulimuli ia i latou, ina ua maea ona maua o le tali o se lotofuatiaifo lelei e ala i le faamagaloga o a latou agasala. E ala i lenei vaega o le Agaga Paia, lea na latou mauaina, na amata ai ona latou vaai atu i le malo o le Atua. Aua o le a toe manatuaina le tautino mai e le Faaola, e leai se tasi e vaai i le malo o le Atua, vagana ua toe fanaufouina o ia, ma [i le] fuaiupu o loo mulimuli ai, na ia fetalai ai, e le mafai ona ulufale atu o ia i ai, vagana ua fanau faalua; muamua i le vai, ona sosoo ai lea ma le Agaga [tagai Ioane 3:3–5].

O lenei, o na tagata i Samaria na fanauina i le vai—ua uma ona latou mauaina le uluai fanau mai, o le mea lea, na i ai i latou i se tulaga o le vaai i le malo o le Atua, i le mafaufau i ai ma le mata o le faatuatua i ona faamanuiaga eseese, ma mamalu; peitai ona e le i toe fanauina faalua i latou, o lena mea, o le Agaga, latou te le i ulufale atu ai i le malo o le Atua—latou te le i ulufale atu i le mauaina o avanoa o le Talalelei, i lo latou atoatoa. Ina ua faalogo aposetolo i Ierusalema i le manuia o taumafaiga a Filipo, na latou auina loa Peteru ma Ioane i Samaria, na latou faae’e o latou lima i luga o ulu o e na papatisoina, ona latou maua lea o le Agaga Paia. [Tagai Galuega 8:5–8, 12, 14–17.]⁵ [Tagai fautuaga 3 i le itulau 61.]

Vagana ua faatinoina [sauniga] e se tasi ua auina moni mai le Atua, o le a le mafai ona mulimuli mai na lava faamanuiaga. O aposetolo ma fitugafulu na faauuina e Iesu Keriso e faatinoina sauniga o le Talalelei, lea o le a fiafia ai e ala mai i meaalofa ma faamanuiaga o lalolagi e faavavau. O le mea lea, na fetalai ai Keriso i aposetolo, O i latou uma lava tou te faamagaloina a latou agasala, e faamagaloina ia ia i latou; o i latou uma lava tou te tuu pea i ai a latou agasala, e tuu pea lava ia [tagai Ioane 20:23]: o le uiga o lena mea, o soo se tasi o le a sau ma le lotomaualalo, salamo faamaoni i ana agasala, ma maua le papatisoga mai i aposetolo, e tatau ona maua le faamagaloga o ana agasala e ala i le toto togiola o Iesu Keriso, ma e ala i le faaeega o lima, o le a maua ai le Agaga Paia; ae o e e faafitia le mauaina o lenei faatulagaga o mea mai aposetolo, o le a tumau pea a latou agasala i o latou luga. … O lenei mana ma le pule o le faatinoga o le Talalelei, na faaeeina atu i isi e aposetolo; ina ia le na o aposetolo latou te umiaina lenei tofiga taua. … O lenei, seiloga e maua se tasi ua umiaina se tofiga faapei o lenei, se tasi ua i ai le pule e papatiso ai ma faae’e atu lima, e leai se tasi i lalo o soo se matafaioi e mauaina na sauniga, pe na te faamoemoe atu mo faamanuiaga, vagana ua faatinoina ma le tatau ai.

… O le pule e faatinoina ai sauniga o le Talalelei [na] leiloa mo le tele o seneturi. … O le ekalesia na faatuina e aposetolo na faifai malie le pau ese atu, salalau atu i le pogisa, ma leiloa lana pule, le perisitua, ma o ese mai le faatulagaga a le Atua, na leiloa ai foi ana meaalofa ma alofa tunoa; na solia tulafono ma suia sauniga o le Talalelei; suia le faatofu i le faatulutulu, ma le amanaiaina le faaeega o lima; inoino i valoaga ma lē talitonu i faailoga. …

O Ioane, i ana Faaaliga, ina ua vaaia ma talanoa i le salalau solo o le ekalesia i le pouliuli, … ua talanoa mai ai, i le [mataupu 14, fuaiupu 6], e uiga i le toefuataiina o le Talalelei. “Na a’u iloa foi le tasi agelu ua lele i le taulotoaiga o le lagi, ua ia te ia le talalelei e faavavau e folafola atu i e nonofo i le lalolagi;” o lona uiga ua faamaonia o lena valoaga o le a faataunuuina i se taimi a o lumanai le afio mai faalua o lo tatou Faaola.

… Ou te tuuina atu nei le molimau, i le faamautinoaga silisili ona maualuga e ala i faaaliga mai le Atua, e faapea o lenei valoaga ua uma ona faataunuuina, na asiasi mai se agelu mai le Atua i le tagata i nei aso mulimuli ma toefuatai mea ua leva ona leiloloa, e o’o lava i le perisitua,—o ki o le malo,—le atoatoaga o le Talalelei e faavavau.⁶ [Tagai fautuaga 4 i le itulau 62.]

O lenei la le faatulagaga o le Talalelei sa i ai i aso o aposetolo, talitonuga ia Iesu Keriso, salamo, papatisoga e ala i le faatofuina mo le faamagaloga o agasala, ma le faae’e atu o lima mo le mauaina o le Agaga Paia. Ina ua malamalama ma usitaia lenei faatulagaga, o le mana, meaalofa, faamanuiaga, o le a vave ona mulimuli mai avanoa mamalu; ma i augatupulaga ma vaitaimi taitasi, pe a faataunuuina ma usitaia ma le tatau ai i lo latou tulaga ma faatulagaga tatau, o ia lava faamanuiaga e tasi o le a mautinoa lo latou mulimuli mai; ae a le amanaiaina, pe atoatoa pe na o se vaega, a le o le leai o na faamanuiaga uma, pe o se faatamaiaga tele o na mea uma.

O Keriso, i Lana poloaiga i aposetolo, na fetalai ai e uiga i ni meaalofa uiga ese o le a mauaina e i latou e usitaia le faatulagaga o mea [tagai Mareko 16:15–18]. O Paulo … ua tuuina mai se tala sili ona atoatoa o meaalofa eseese na i ai i le atoatoaga o le talalelei, ua ia taua le iva o i latou, ma faailoa mai ia i tatou o na mea, o aafiaga po o fua ia o le Agaga Paia [tagai 1 Korinito 12:8–10]. O lenei, o le Agaga Paia, na folafola atu i tagata uma, e o’o lava i le toatele o tagata o le a mafai ona valaauina e le Alii [tagai Galuega 2:37–39]. O lenei meaalofa, e lē fesuisuiai i lona natura ma lona faagaoioiga, ma lē mavavaeeseina e ala i le folafolaga faatasi ma lenei mamanu, po o le faatulagaga o mea, ua avea ai ma tulaga tatau, e o gatasi, ma tusitusiga paia, e tulimatai atu ia lava meaalofa ma faamanuiaga, ma afai o Noa, ina ua maea ona fau le vaa, ona ia maua lea o lona faaolataga faaletino e tusa ma le folafolaga [tagai Mose 7:42–43]; po o Iosua, ina ua maea ona faataamilo i Ieriko e tusa ma le aofai o taimi na ta’ua, na mafai ona alu atu i luga o aupā o Ieriko ua lepetia, ma faatoilaloina ona tagata [tagai Iosua 6:12–20]; po o Isaraelu, ina ua mavae ona osia taulaga faatonuina ona mafai ai lea e pei ona sa folafolaina [ona] maua le faamagaloga o a latou agasala. [tagai Levitiko 4:22–35]; po o Naamanu, ina ua maea ona usitaia le faatonuga mai ia Elisaia, e taele faafitu i le vai o Ioritana, na faatonuina ma maua ai lona faamamaina [tagai 2 Tupu 5:1–14]; po o le mea mulimuli, o le tauaso, ina ua maea ona mulumulu i le taelega o Seloa, afai na ia mauaina le taui folafolaina [tagai Ioane 9:1–7], o lea, ou te faapea atu ai ma le loto atoa ma le tulaga e tasi, o soo se taimi lava e tuueseina ai e se tagata lona manatu faapito, taofi faalelotu, ma aga masani sese, ma mulimuli atu i le faatulagaga atoatoa o le talalelei a Iesu Keriso, ona leai lea o se mea i lalo ifo o lalolagi faaselesitila e faagaoioia faasaga atu i le mauaina ma le taliaina o le meaalofa a le Agaga Paia, ma faamanuiaga uma na fesootai ma le Talalelei i le vaitaimi o aposetolo.

Ina ia maua le lotu o le a faaolaina ai tatou i le afioaga o le Atua, e tatau ona tatou mauaina le Agaga Paia, ma, ina ia mafai ona maua le Agaga Paia, e tatau ona tatou talitonu i le Alii o Iesu, ona salamo lea i a tatou agasala, o lona uiga, o le lafoa’ia lea o na agasala, ona agai lea i luma ma ia faatofuina i le vai mo le faamagaloga o agasala, ona maua lea o le faaeega o lima.⁷

Ina ua tatou mauaina le Talalelei, na tatou osi feagaiga i luma o le Atua, o le a taitaia i tatou, ina ia mafai ona pulea i tatou, ma o le a mulimuli i fautuaga a le Agaga Paia, o le a faapea ona tatou mulimuli i fautuaga a le Agaga Paia lea e aumaia le ola, lea e aumaia le malamalama, lea e aumaia le malamalama i mea a le Atua, lea e fesootai ma le finagalo o le Atua; ma o le a tatou galulue mo le faataunuuina o faamoemoega o le Atua i le faaolataga o le aiga o le tagata, i le faaaogaina e avea ma anavatau o le olaga, “O le Malo o le Atua, pe o le leai o se mea.” O le a le lelei o lo tatou tausiaina o nei feagaiga … ma mulimulitaia faatonuga a le Agaga Paia, o i tatou lava, e ao ona avea ma faamasino. O le tele lava o lo tatou faia o lenei mea, o le tele foi lena o faamanuiaga a le Pule Aoao e o’o mai i o tatou luga, ma o o tatou mafaufau ua faamalamalamaina, o lo tatou malamalama o le a faateleina, ma o le a tatou o atu i luma i le ala o le paia, i le ala o le atoatoa. … Pe afai tatou te le faamaoni, … o lona uiga ua tatou toilalo i lenei taumafaiga lea na tatou punouai ai ina ia maua le ola e faavavau, ina ia maua le poto ma le malamalama ma le atamai paia ia lava e faatoilaloina ai le tai o mea leaga ma faaosoosoga lea ua siomia ai tatou. Ma, afai tatou te mulimulitaia fautuaga a lenei Agaga Paia, tatou te maua le filemu ma le olioli i o tatou agaga, ua tatou faatoilaloina le fili, ua tatou teuina mo i tatou oa e le mafai e mogamoga ma le ele ona faaleagaina, o le a tatou uunai i tatou lava i luma i le ala o le malo selesitila.⁸ [Tagai fautuaga 5 o loo i lalo.]