၂ နီဖိုင်း ၁၃

အခန်းကြီး ၁၃

ယုဒပြည်နှင့် ယေရုရှလင်မြို့သည် သူတို့၏မနာခံမှုအတွက် အပြစ်ဒဏ်ပေးခံရကြလိမ့်မည်—ကိုယ်တော်ရှင်သည် သူ၏လူမျိုးတို့အတွက် အမှုတို့ကို စောင့်တော်မူပြီး၊ တရားစီရင်တော်မူ၏—ဇိအုန်သတို့သမီးတို့သည် မိမိတို့၏လောကီတဏှာကြောင့်၊ ကျိန်ခြင်းနှင့် စိတ်ဆင်းရဲကိုယ်ဆင်းရဲဖြစ်ခြင်းတို့ကို ခံစားရကြ၏—ဟေရှာယအခန်းကြီး ၃ နှင့် နှိုင်းယှဉ်ပါ။ ဘီစီ ၅၅၉–၅၄၅ ခန့်။

၁ အကြောင်းမူကား၊ ရှုလော့၊ ကိုယ်တော်ရှင်၊ ကောင်းကင်ဗိုလ်ခြေကိုယ်တော်ရှင်သည် မုန့်အထောက်အပင့်ရှိသမျှနှင့် ရေအထောက်အပင့်ရှိသမျှမှစ၍၊ အစာရေစာအထောက်အပင့်ကို ယေရုရှလင်မြို့နှင့်ယုဒပြည်မှ ဖယ်ရှားတော်မူ၏—

၂ အားကြီးသောသူ၊ စစ်တိုက်သောသူ၊ တရားသူကြီး၊ ပရောဖက်၊ ပညာတတ်၊ အသက်ကြီးသူ၊

၃ ငါးဆယ်စုတပ်မှူး၊ ဂုဏ်သရေရှိသူ၊ တိုင်ပင်ဖက်၊ လက်သတ္တိရှိသောသူ၊ နှုတ်သတ္တိရှိသောသူတို့ကို ပယ်ရှားတော်မူ၏။

၄ ငါသည် သူငယ်တို့ကို ထိုသူတို့အဖို့ မင်းသားများဖြစ်စေ၍၊ ကလေးငယ်တို့သည် သူတို့ကို အုပ်စိုးကြလိမ့်မည်။

၅ လူတို့သည် တစ်ယောက်ကိုတစ်ယောက်၊ ကိုယ်နှင့်စပ်ဆိုင်သောသူတစ်ယောက်ကိုတစ်ယောက် ညှဉ်းပန်းနှိပ်စက်ကြလိမ့်မည်။ သူငယ်သည် အသက်ကြီးသူကို ကိုယ်တိုင်မာနကြီးစွာ ဆန့်ကျင်၍လည်းကောင်း၊ လူယုတ်သည် ဂုဏ်သရေရှိသူကို ဆန့်ကျင်၍လည်းကောင်း ပြုမူကြလိမ့်မည်။

၆ လူသည် ပေါက်ဘော်ချင်း ညီအစ်ကိုကို ကိုင်ဆွဲ၍ သင်၌ အဝတ်ရှိသေး၏။ သင်သည် အကျွန်ုပ်တို့အပေါ်၌ အုပ်စိုးသူဖြစ်ပါစေ။ ဤပြိုပျက်ရာကိုလည်း သင်၏လက်အောက်သို့ မကျရောက်ပါစေနှင့်ဟု ဆိုလျှင်—

၇ သူကလည်း၊ ငါသည် ပြုပြင်နိုင်သောသူမဟုတ်။ ငါ့အိမ်၌ မုန့်လည်းမရှိ၊ အဝတ်လည်းမရှိ။ ငါ့ကို လူတို့အပေါ်မှာ အုပ်စိုးသူအဖြစ် မပြုပါနှင့်ဟု ဆို၍၊ ထိုကာလ၌ အတည့်အလင်းပြောဆိုလိမ့်မည်။

၈ အကြောင်းမူကား၊ သူတို့၏စကားများနှင့် သူတို့၏အကျင့်များသည် ကိုယ်တော်ရှင်၏ ဘုန်းတော်မျက်စိတို့ကို ဆန့်ကျင်ဘက်ပြုကြခြင်းငှာ၊ သူ၏အလိုတော်နှင့်မညီဘဲ ရှိကြလေသောကြောင့်၊ ယေရုရှလင်မြို့ပြိုလဲ၍၊ ယုဒပြည်လည်းကျရှုံး၏။

၉ သူတို့မျက်နှာထားသည် သူတို့တစ်ဖက်၌ သက်သေခံ၏။ သောဒုံမြို့သားကဲ့သို့ပင်ဖြစ်စေကြောင်း၊ မိမိတို့၏အပြစ်ကို ထင်ရှားစွာပြ၍၊ သူတို့သည် ထိုအရာကို မဝှက်နိုင်ကြ။ သူတို့၏ဝိညာဉ်များ၌ အမင်္ဂလာရှိကြ၏။ အကြောင်းမူကား၊ မကောင်းသောအရာကို မိမိတို့ကိုယ်၌ ဆပ်ပေးကြပြီ။

၁၀ ဖြောင့်မတ်သောသူတို့သည် ကောင်းသောအကျိုးခံရကြ၏ဟု ထိုသူတို့ကို ပြောလော့။ အကြောင်းမူကား၊ သူတို့သည် မိမိတို့အကျင့်များ၏အသီးကို စားရလိမ့်မည်။

၁၁ ဆိုးညစ်သောသူတို့သည် အမင်္ဂလာရှိ၏။ အကြောင်းမူကား၊ သူတို့သည် ပျက်စီးကြလိမ့်မည်။ သူတို့လက်၏ အကျိုးကျေးဇူးသည်လည်း သူတို့အပေါ်သို့ ရောက်လိမ့်မည်။

၁၂ ထို့အတူ၊ ငါ၏လူမျိုးတို့အတွက်၊ သူငယ်တို့သည် ညှဉ်းပန်းနှိပ်စက်သူများဖြစ်ကြ၏။ မိန်းမတို့သည်လည်း သူတို့အပေါ်အုပ်စိုးကြ၏။ အို ငါ၏လူမျိုးတို့၊ သင်တို့အား လမ်းပြသောသူတို့သည် သင်တို့ကို လမ်းလွဲစေကြ၍ သင်တို့ သွားသောလမ်းခရီးကိုလည်းဖျက်ကြ၏။

၁၃ ကိုယ်တော်ရှင်သည် အမှုကို စောင့်ရန် ထတော်မူ၏၊ လူတို့မျိုးတို့ကို တရားစီရင်ရန်လည်း အားထုတ်တော်မူ၏။

၁၄ ကိုယ်တော်ရှင်သည် မိမိလူမျိုးတို့တွင် အသက်ကြီးသူတို့ကိုလည်းကောင်း၊ မင်းသားတို့ကိုလည်းကောင်း စတင်၍တရားစီရင်လိမ့်မည်။ သင်တို့သည် စပျစ်ဥယျာဉ်နှင့် ဆင်းရဲသားတို့ထံမှ လုယူရာဥစ္စာကို သင်တို့အိမ်များ၌ စားပစ်ကြလေပြီ။

၁၅ သင်တို့သည်ကား၊ အဘယ်သို့နည်း။ သင်တို့သည် ငါ၏လူမျိုးတို့ကို နှိပ်စက်ကြပြီ။ ဆင်းရဲသားတို့၏မျက်နှာကို ကြိတ်ကြပြီဟု ကောင်းကင်ဗိုလ်ခြေကိုယ်တော်ရှင်ဘုရားသခင် မိန့်တော်မူလေ၏။

၁၆ တစ်ဖန်၊ ကိုယ်တော်ရှင်မိန့်တော်မူသည်ကား၊ ဇိအုန်သတို့သမီးတို့သည် စိတ်မြင့်၍၊ မိမိလည်ပင်းကို ပြလျက်၊ မျက်စိလော်လည်လျက်၊ မိမိတို့၏ခြေတို့မှ အသံမြည်စေလျက်၊ စိပ်စိပ်လှမ်းသွားတတ်ကြ၏—

၁၇ ထို့ကြောင့်၊ ကိုယ်တော်ရှင်သည် ဇိအုန်သတို့သမီးတို့၏ဦးခေါင်းကို ဝဲနာဖြင့် ဒဏ်ခတ်တော်မူလိမ့်မည်။ ကိုယ်တော်ရှင်သည် သူတို့၏လျှို့ဝှက်အပ်သောအင်္ဂါတို့ကို ဖွင့်ပြတော်မူလိမ့်မည်။

၁၈ ထိုကာလ၌ ကိုယ်တော်ရှင်ဖယ်ရှားတော်မူမည့်အရာများကား၊ သူတို့၏ပြောင်လက်သောအသံမြည်သည့်တန်ဆာများ၊ ဇာဦးထုပ်၊ လခြမ်းရုပ်လည်ဆွဲ၊

၁၉ ဆွဲကြိုး၊ လက်ကောက်၊ လည်ပတ်၊

၂၀ ဦးထုပ်၊ ခြေထောက်၏တန်ဆာများ၊ ခေါင်းပေါင်း၊ နံ့သာဘူး၊ နားသန်သီး၊

၂၁ လက်စွပ်၊ နှာဆွဲ၊

၂၂ လဲလှယ်၍ဝတ်နိုင်သော အဝတ်စုံ၊ တပက်၊ ခေါင်းခြုံ၊ ဆံထိုး၊

၂၃ လွယ်မှန်၊ အတွင်းအင်္ကျီ၊ ဦးရစ်၊ မျက်နှာဖုံးတို့ကို ပယ်ရှင်းတော်မူမည်။

၂၄ ဤသို့အားဖြင့်အချိန်တန်လာလတ္တံ့သောအခါ၊ မွှေးသောအနံ့အရာ၌ ပုပ်စပ်သောအနံ့၊ ခါးစည်းအရာ၌ ခါးကြိုး၊ ကျစ်သောဆံပင်အရာ၌ ခေါင်းတုံးခြင်း၊ ရင်စည်းတန်ဆာအရာ၌ လျှော်တေကြိုး၊ လှသောအဆင်းအရာ၌ သံပူထိုးချက်ရာဖြစ်ရပေမည်။

၂၅ သင်၏လူတို့သည် ဓားဘေးဖြင့်လည်းကောင်း၊ သင်၏သူရဲတို့သည် စစ်တိုက်ခြင်း၌လည်းကောင်း ကျဆုံးကြလိမ့်မည်။

၂၆ သူမ၏တံခါးတို့သည် ငိုကြွေးမြည်တမ်း၍၊ သူမသည် ဆိတ်ညံလျက်၊ မြေမှာ ထိုင်ရလိမ့်မည်။