၂ နီဖိုင်း ၇

အခန်းကြီး ၇

ယာကုပ်သည် ဟေရှာယအနာဂတ္တိကျမ်းကို ဆက်၍ဖတ်၏။ ဟေရှာယသည် မေရှိယအကြောင်းကို ဟောပြော၏—မေရှိယသည် လူတတ်တို့၏နှုတ်သတ္တိကို ရရှိလိမ့်မည်—သူသည် ရိုက်သောသူတို့အား မိမိကျောကို ပေးတော်မူလိမ့်မည်—သူသည် မရှုံးနိမ့်ရ—ဟေရှာယအခန်းကြီး ၅၀ နှင့် နှိုင်းယှဉ်ပါ။ ဘီစီ ၅၅၉–၅၄၅ ခန့်။

၁ ထိုမှတစ်ပါး၊ ကိုယ်တော်ရှင်မိန့်တော်မူသည်ကား၊ ငါသည် သင့်ကိုကွာ၍၊ ကာလအစဉ်အဆက် စွန့်ပစ်လေပြီလော။ အကြောင်းမူကား၊ ကိုယ်တော်ရှင်မိန့်တော်မူသည်မှာ၊ သင်တို့အမိ၏ဖြတ်စာသည် အဘယ်မှာရှိသနည်း။ အဘယ်သူ့ထံသို့ သင့်ကို ငါကွာပေး၍၊ သို့မဟုတ်၊ အဘယ်မည်သော ငါ၏အကြွေးရှင်ထံ၌ သင့်ကို ငါရောင်းသနည်း။ ထိုမှတစ်ပါး၊ အဘယ်သူထံ၌ သင့်ကို ငါရောင်းသနည်း။ ရှုလော့၊ သင်တို့၏ဒုစရိုက်များအတွက် သင်တို့သည် ကိုယ်ကိုရောင်း၍၊ သင်တို့၏လွန်ကျူးခြင်းများအတွက် သင်တို့၏အမိသည် အကွာခံရလေပြီ။

၂ သို့ဖြစ်၍၊ ငါလာသောအခါ အဘယ်သူမျှမရှိ။ ထိုမှတစ်ပါး၊ ငါခေါ်သောအခါ ထူးသောသူ တစ်ယောက်မျှမရှိလေပြီ။ အို ဣသရေလအမျိုးသားတို့၊ ငါ၏လက်သည် မရွေးနှုတ်နိုင်အောင်ပင် တိုလေသလော။ သို့မဟုတ်၊ ငါ့၌ ကယ်လွှတ်ရန် တန်ခိုးမရှိသလော။ ရှုလော့၊ ငါ၏ဆုံးမခြင်းဖြင့်၊ ပင်လယ်ရေကို ခန်းခြောက်စေ၏။ ငါသည် သူတို့၏မြစ်များကို တောရိုင်းဖြစ်စေ၍၊ ရေများခန်းခြောက်သောကြောင့်၊ ၎င်းတို့၏ငါးများကိုနံ စေ၏၊ ငါးတို့သည်လည်း ရေငတ်၍သေကြ၏။

၃ ငါသည် ကောင်းကင်ကို နက်မှောင်ခြင်းဖြင့် ဝတ်ဆင်၍ လျှော်တေအဝတ်ကို ၎င်း၏ခြုံထည် ဖြစ်စေ၏။

၄ အို ဣသရေလအမျိုးသားတို့၊ သင်တို့အား သင့်တော်သောအချိန်၌ အဘယ်သို့ ငါစကားပြောရမည်ကို သိရစေကြောင်း၊ ကိုယ်တော်ရှင်ဘုရားသခင်က စာတတ်၏နှုတ်သတ္တိကို ငါ့အား ပေးတော်မူပြီ။ သင်တို့ မောပန်းကြသောအခါ၊ သူသည် နံနက်အစဉ်အတိုင်း နှိုးတော်မူ၏။ စာတတ်ကဲ့သို့ ကြားနာစေမည့်အကြောင်း၊ ငါ့နားကို သူနှိုးတော်မူ၏။

၅ ကိုယ်တော်ရှင်ဘုရားသခင်သည် ငါ့နားကို ဖွင့်တော်မူ၍၊ ငါသည် ပုန်ကန်ခြင်းမရှိ။ နောက်သို့လည်း လှည့်၍မသွား။

၆ ရိုက်သောသူတို့အား၊ ငါ့ကျောကိုလည်းကောင်း၊ ဆံပင်ကို နှုတ်သောသူတို့အား၊ ငါ့ပါးကိုလည်းကောင်း ငါအပ်၏။ အရှက်ခွဲခြင်းနှင့် တံတွေးထွေးခြင်းမှ ငါ့မျက်နှာကို ငါမလွှဲ။

၇ အကြောင်းမူကား၊ ကိုယ်တော်ရှင်ဘုရားသခင်သည် ငါ့ကို စောင့်မတော်မူလိမ့်မည်။ ထို့ကြောင့်၊ ငါမရှုံးနိမ့်ရ။ ထို့ကြောင့်၊ ငါသည် မျက်နှာကို မီးကျောက်ကဲ့သို့ ထားလျက်၊ ရှက်ကြောက်ခြင်းသို့ မရောက်ရကြောင်းကို သိ၏။

၈ ထို့အတူ၊ ကိုယ်တော်ရှင်သည် အနီး၌ရှိ၍၊ ငါ့ကို အပြစ်ကင်းစေတော်မူ၏။ အဘယ်သူသည် ငါနှင့်ရန်တွေ့မည်နည်း။ ငါတို့ အတူတကွ ရင်ဆိုင်ကြကုန်အံ့။ အဘယ်သူသည် ငါ၏ရန်သူဖြစ်သနည်း။ ထိုသူကို ငါ့အနီးသို့ ချဉ်းကပ်ပါစေ၊ ငါ့နှုတ်တော်၏ခွန်အားဖြင့် သူ့ကို ဒဏ်ခတ်မည်။

၉ အကြောင်းမူကား၊ ကိုယ်တော်ရှင်ဘုရားသခင်သည် ငါ့ကို စောင့်မတော်မူမည်။ ငါ့ကိုအပြစ်တင်သည့် ခပ်သိမ်းသောသူတို့သည်၊ ရှုလော့၊ ခပ်သိမ်းသောသူတို့သည် အဝတ်တန်ဆာကဲ့သို့ ဟောင်းနွမ်းခြင်းသို့ ရောက်ကြလိမ့်မည်၊ ပိုးတို့က သူတို့ကို ကိုက်စားလိမ့်မည်။

၁၀ သင်တို့၌၊ ကိုယ်တော်ရှင်ကို ကြောက်ရွံ့သောသူ၊ သူ့ကျွန်၏အသံကို နာခံသောသူ၊ မှောင်မိုက်၌လျှောက်၍၊ အလင်းမရှိသောသူကား၊ အဘယ်သူနည်း။

၁၁ ရှုလော့၊ မီးကိုညှိ၍၊ မိမိတို့ကိုယ်ကို မီးပွားများနှင့် ဝန်းရံစေသည့် ခပ်သိမ်းသောသင်တို့၊ သင်တို့မီး၏အလင်းသို့လည်းကောင်း၊ သင်တို့ညှိသောမီးပွားများသို့လည်းကောင်း၊ လိုက်ကြလော့။ ဤအရာသည်ကား၊ ငါ့လက်တော်မှရမည့်—သင်တို့ဝမ်းနည်း၍ လဲလျောင်းရမည့်အဖြစ်ပေတည်း။