1 Kunantaj Mosiahj leyninman jina sapa juzgaj, jinapis juzganankupaj churasqa runas, pagota reciberqanku. Pagonkuta reciberqankutaj ñawpaqenkuman pusasqa runasta juzganankupaj tiemponkuman jinalla.

2 Kunantaj, runa waj runamanta manu, manataj manunta paganmanchu chayqa, runa manuyoj runamanta juzgajman willanman. Chantá juzgaj atiyninwan ruwanman, yanapaj runasta kamachispa manuyoj runata pusamunankuta ñawpaqenman. Chantá juzgajqa runata juzganman leyman jina, runaj contrampi willasqasman jinataj. Chay jinamanta runa manunta paganman karqa, mana chayrí kapuyninkunata qhechusqa kanman karqa, jinapis chay runaqa runa masisninmanta wijch’usqa kanman karqa suwa jina, engañaj jinataj.

3 Jazgajtaj pagonta reciberqa tiemponta qosqanman jina. Reciberqa uj qorimanta senineta uj p’unchaymanta, mana chayrí qolqemanta uj senumta reciberqa, mayqenchus qorimanta uj seninewan ninakun. Chay karqa qosqa leyman jina.

4 Kaykunataj qorimanta, qolqemantawan phisusninkoj sutisninku, valesqankuman jina. Nefitakuna kaykunata suticharqanku, imaraykuchus paykunaj phisusninku jerusalempi judiospamanta waj jina karqanku. Manataj medirqankuchu judios jina. Paykuna yupayninkuta mediyninkutawan tijrarqanku, llajtaj, sapa miraypi, kayninman jina yuyayninman jinataj, juzgajkunaj kamachiyninkupi kanankukama, pikunatachus rey Mosiah ajllarqa.

5 Kunantaj, phisusninku kay jina karqanku — qorimanta senine, qorimanta seon, qorimanta shum, qorimanta limnahwan.

6 Qolqemanta senum, qolqemanta amnor, qolqemanta ezrom, qolqemanta ontiwan.

7 Qolqemanta senum ninakorqa qorimanta seninewan, jinapis ninakorqa uj cebada mediywan, tukuy laya grano mediywantaj.

8 Uj qorimanta seon iskay senineswan ninakorqa.

9 Uj qorimanta shumtaj iskay seonkunawan ninakorqa.

10 Uj qorimanta limnahtaj tukuyninkuwan tantachisqas ninakorqa.

11 Uj qolqemanta amnortaj iskay senumkunawan ninakorqa.

12 Uj qolqemanta ezrom tawa senumkunawan ninakorqa.

13 Uj ontitaj tukuyninkuwan tantachisqas ninakorqa.

14 Pisi valorniyoj phisusninku kay jinalla karqanku —

15 Uj senum ninakun iskay shiblonkunawan; chayrayku, uj cebadamanta mediy iskay shiblonkunawan ninakun.

16 Uj shiblon iskay shiblumkunawan ninakun.

17 Uj shiblumtaj iskay shiblumkunawan ninakun.

18 Kay jinamanta yuparqanku phisusninkuta.

19 Uj qorimanta antiontaj kinsa shiblonkunawan ninakun.

20 Kunantaj, pagonkuta receiberqanku ruwayninkuman jina, chayrayku sapa munayninkoqa qhapajchakuy karqa. Chayrayku llajtata tratanakucherqanku, tukuy imaymana t’ojpiyta ruwacherqanku, sajra ruwaykunata ruwachillarqankutaj astawan juzganankupaj, asqan qolqeta jap’inankupaj paykunaman pusqasqa runasta juzgasqankuman jina. Chayraykutaj llajtata Almaj, Amulekpawan contrankupi kayta munacherqanku.

21 Kay Zeezromtaj Amulekta tapuyta qallarerqa, nispa: ¿Wakin tapuykunasta kutichiwankimanchu, mayqentachus tapusqayki? Zeezromqa supaypa ruwayninkunata sumajta ruwayta yacharqa, allin kajkunata tukuchinampaj. Chayrayku amulekman kayta nerqa: ¿Tapususqaykunata kutichiwankimanchu?

22 Amulektaj payta nerqa: Arí, Señorpa Espiritunman jina kajtenqa, mayqenchus ñoqapi kashan, chayman jina kajtenqa kutichisqayki. Imaraykuchus mana ni imata Señorpa Espiritumpa contrampi nisajchu. Zeezromtaj payman nerqa: Qhawariy, kayqa sojta qolqemanta ontis. Tukuy imamanta Sumaj Kajta negajtiykeqa, kayta qosqayki.

23 Chantá amulek nerqa: O ukhu pachaj wawan, ¿Imaraykutaj tentawankiri? ¿Manachu allin ruwajkuna mana kay laya juchasman urmasqankuta yachanki?

24 ¿Manachu creenki Dios kasqanta? Niyki, Mana. Diospa kasqanta yachankipuni, chaywampis chay qolqeykita astawan munakunki paymanta.

25 Kunantaj Diospa ñawpaqempi llullakuwanki. Niwarqanki — Qhawariy kay sojta ontista, mayqenkunachus sumaj valesqa kanku, kaykunata qosqayki — chayta niwaspataj sonqoykipi chaykunamanta q’ewakorqanki. Jinataj, tukuchinawaykipaj cheqa kawsaj Diosta neganayta munarqanku, chayllata. Kunantaj qhaway, imaraykuchus kay jatun sajra ruwanata ruwasqaykirayku t’inkayoj kanki.

26 Zeezromtaj payta nerqa: ¿Ninkichu cheqa kawsaj Dios kasqanta?

27 Amulektaj nerqa: Arí, cheqa kawsaj Dios kan.

28 Chantá, Zeezrom nerqa: ¿Kanchu uj Diosmanta astawan?

29 Paytaj kuticherqa, Mana, nispa.

30 Chantá, watejmanta Zeezrom payta nerqa: Imaynatataj kaykunata yachankiri?

31 Nerqataj: Uj angel kaykunata yachachiwarqa.

32 Zeezromtaj watejmanta nerqa: ¿Pitaj jamonqa? ¿Diospa Wawanchu?

33 Payta nerqataj, Arí.

34 Watejmantataj Zeezrom nerqa: ¿juchasninkupi llajtanta salvanqachu? Amulek kuticherqa, payta nerqataj: Niyki, mana, imaraykuchus mana nisqanta negayta atinchu.

35 Chantataj Zeezrom runasman nerqa: Kaykunata yuyariychis, payqa uj Dioslla kasqanta nin. Chaywampis Diospa Wawan jamunantapis nillantaj, manataj llajtanta salvanqachu — payqa Diosta kamachinampaj atiyniyoj jinalla.

36 Chantá, watejmanta Amulek payta nerqa; Qhawariy, llullakunki, llajtanta juchasninkupi mana salvananta nisqayrayku, Diosta kamachinaypaj atiyniyoj kasqayta niwarqanki.

37 Watejmantataj niyki, payqa llajtanta juchasninkupi mana salvayta atinchu. Imaraykuchus nisqanta mana negayta atinichu, nillantaj mana ni ima ch’ichi kaj janaj pachaj reinonta chayaqempaj jap’iyta atisqanta. Chayrayku, mana chayaqeykipajchu janaj pachaj reinon chayqa, ¿Imaynatataj salvakuyta atiwajrí? Chayrayku juchasniykipi mana salvakuyta atinkichu.

38 Chantataj watejmanta Zeezrom payta nerqa; ¿Diospa Wawanqa kikin Wiñay Tatachu?

39 Amulektaj payta nerqa: Arí, payqa janaj pachaj, kay pachajpawan, tukuy paykunapi kajkunajpawan Wiñay Tatan. Payqa qallariy, tukukuytaj, ñawpaj kaj, qhepa kajtaj.

40 Payqa jamonqataj kay pachaman llajtanta kacharichej. Sutimpi creejkunaj juchasninkuta apanqa. Paykunataj wiñay kawsayniyoj kajkuna kanku, paykunallapajtaj salvacion.

41 Chayrayku sajra runas kikillan kanku, manapis kanmanchu ni ima kacharichiy jinalla. Jinapis paykunapaj wañuypa waskhasnin paskarasqas kanku, chaylla. Imaraykuchus tukuyninchis wañusqasmanta kawsarimusunchis, Diospa ñawpaqempi sayarisuntaj, Diostaj ruwasqasninchisman jina juzgawasunchis, chay p’unchay chayamushanña.

42 Kunantaj kay kawsaymanta wañuy kan. Cristoj wañuynintaj kay kawsaymanta wañuypa waskhasninta paskaran, tukuy runas kay kawsaymanta wañuymanta jatarinankupaj.

43 Cabal kayninkuman espiritu cuerpowan tantachisqas kanqanku; chaki-maki kikin moqosninkuwan cabal kayninkuman, imaynatachus kunan kashanchis, chay jina mosojyachisqas kanqanku. Diospa ñawpaqenmantaj pusasqas kasunchis, yachaspa imaynatachus kunitampis yachanchis, tukuy juchasninchismanta may tukuyta yuyarisunchis.

44 Kunantaj, kay mosojyachiy tukuyman jamonqa, machu kajman jovenman ima, preso kajman libre kajman ima, qhariman warmiman ima, sajra ruwajman allin ruwajman ima. Jinapis mana ni uj chujchallapis chinkasqachu kanqa umasninkumanta. Tukuy cabal kayninman, imaynachus kunitan kanku, cuerpoyoj kayninkumampis, chayman mosojyachisqas kanqanku. Cristoj, Wawa, Dios Tataj, Santo Espiritojwan, pikunachus uj Wiñay Dios kanku, paykunaj juzgana tiyanankuman pusasqas, tumpasqastaj kanqanku, allin ruwaj kajtinkupis, sajra ruwaj kajtinkupis.

45 Kunantaj, wañoj cuerpoj wañuyninmanta, wañoj cuerpoj kawsarinanmantawan parlarqaykichisña. Niykichis kay wañoj cuerpo wiñaypaj kawsaj cuerpoman tukunanta. Chay ninayan wañuymanta, ñawpaj wañuymantapis kawsayman, manaña wañuyta atinankupaj. Espiritusninku cuerposninkuwan tantakonqanku, manaña t’aqasqas kanankupaj. Chay jinamanta kay tantakoyqa espiritumanta kajman, wiñay kawsayniyojmanwan tukun, manaña ismojta rikunampaj.

46 Kunantaj, amulekqa kay nisqasta nisqantawan, runas anchata t’ukorqanku, Zeezromtaj kharkatitirerqa. Chay jinatataj Amulekpa nisqasnin tukukorqanku, jinapis kayqa tukuy, imatachus escribini.