1 Kunantaj, wawáy, kay mosojyachiymanta, imamantachus parlarqanchisña, chay mosojyachiymanta parlasuyta munayman. Wakin runas escriturasta cambianku, kayraykutaj karuman chinkaripunku. Kaymanta yuyayniyki phutiyniyoj kasqanta rikuni. Qhaway, kayta willasqayki.

2 Nishayki, wawáy, Diospa justicianman jina mosojyachiy ruwana kanan tiyan; jiná, tukuy ima cheqa kayninman mosojyachisqa kanan tiyan. Cristoj atiyninman jina, kawsarimuyninman jinataj, runaj espiritun cuerponman juntuchasqa kanampaj, cheqataj chay, jinapis chay jina kashan sapa cuerpoj parten kikillanman juntuchasqa kanampaj.

3 Diospa justicianman jinataj runas ruwasqankuman jina juzgasqas kanqanku; jiná ruwasqankoqa allin kay kawsaypi, sonqosninkoj munayninkuna allin chayqa, qhepa p’unchaypi allinman mosojyachisqas kanqanku.

4 Chayrí ruwasqanku sajra chayqa, paykuna sajrapaj mosojyachisqas kanqanku. Chayrayku, tukuy ima cheqa lugarninman mosojyachisqa kanqa — wañoj kawsay, mana wañoj kawsayman, ismojtaj mana ismojman mosojyachisqa kanqa. Mana tukukuyniyoj kusiyman jatarichisqas Diospa reinonta chayaqenkupaj jap’inankupaj, mana chayqa mana tukukuyniyoj muchuyman jatarichisqas kanqanku supaypa reinonta chayaqenkupaj jap’inankupaj. Uj jap’enqa uj ladupi, waj jap’enqataj waj ladupi.

5 uj kasiyman jatarichisqa kanqa kusikuyta munayninman jina, jiná allinman jatarichisqa kanqa allinta ruwayta munayninman jina; wajtaj sajraman jatarichisqa kanqa sajrata ruwayta munayninman jina; imaraykuchus tukuy p’unchayta sajra ruwayta munan chayqa, chay jinamanta tutayajtinña sajra t’inkanta jap’enqa.

6 Chay jinallatataj kanqa uj kaj makipipis. Juchasmanta kutirin, allin ruwayta munallantaj p’unchayninkuna tukukunankukama chayqa, chay jinamanta allin ruwanasqan t’inkachisqa kanqa.

7 Paykunata Señorqa kacharichin; arí, paykuna qhechusqas kanku, mana tukukuyniyoj laqha tutamanta orqhosqas kanku; chay jinataj sayarikunku, mana chayrí urmarikunku, imaraykuhcus kikinkoj juezesninku kanku, allin ruwaykunata ruwanankupaj, chayrí sajra ruwaykunata ruwanankupaj.

8 Kunanqa Diospa willasqasnin mana cambiakunkuchus; chayrayku ñan wakichisqaña, pichus munan, chaypi puriyta atin, salvasqataj kanqa.

9 Kunantaj, wawáy, chay yachachiykunapi amaña Diosta phiñachinkichu, imapichus kunankama juchallikunki jinapi.

10 Ama juchamanta kusiyman mosojyachisqa kanaykita yuyachu kay mosojyachiymanta nisqarayku. Qhawariy, ñoqa niyki, sajra kay mana ni jayk’ajpis kusiychu karqa.

11 Kunantaj, wawáy, tukuy runas, pikunachus mana Espiritupi kajkuna, niyman, aychata kasunku paykuna, chayraykutaj paykuna sajrapi kanku, sajra ruwaypa waskhasnimpi kashanku. Paykuna mana Diosniyojchu kay pachapi kanku, Diospa contrampitaj purinku; chayrayku, paykuna llin kaypa contrampi kashanku.

12 Kunantaj, qhaway, ¿Mosojyachiy ninayanchu ujta kasqanmanta churay mana kananman, jiná ujta churay kikin contranman?

13 O wawáy, kayqa mana chay jinachu; mosojyachiy ninayan sajrata kutichiy sajrapaj, aycha kajta kutichiy aycha kajpaj, supay kajtataj kutichiy supay kajpaj — jinataj, ninayan allin kajta kutichiy allin kajpaj; allin ruwanata allin ruwanapaj; cheqa kajta cheqa kajpaj; khuyay kajta khuyay kajpaj.

14 Chayrayku, wawáy, hermanosniykita khuyakuy; cheqanta ruway, allin kaywan juzgay, allinta ruwallaypunitaj; kaykunata ruwanki chayqa, t’inkaykita jap’inki; arí, qanman mosojmanta khuyay mosojyachisqa kanqa; justicia mosojyachisqa kasonqa; cheqa kaj juicio mosojyachisqa kasullanqataj, allin ruwanapis mosojyachisqa kasullanqataj.

15 Imata llojsichinki, chay kutipusonqa, mosojyachisqa kallanqataj; chayrayku, mosojyacheyqa astawan llimphisitumanta juchasapata juchachan, paytataj mana ni imapipis mana juchayojpaj rikuchinchu.