1 Kunantaj Alma, Amulekpa Zeezromta ch’inyachejta rikuspa, Amulek payta tukuchejta llullayninkunamanta, pantachiyninkunamantapis Almaqa rikuspa, juchachasqa kayninta reparakojtin, kharkatitejta rikuspataj, payqa siminta kicharispa payman parlayta qallarerqa. Payqa Amulekpa nisqasnin cheqa kasqankuta willarqa, chaymanta astawanraj willarqa, jinapis Amulekpa nisqasninmanta astawanraj sut’incharqa escriturasta.

2 Chay muyuynimpi runas Alma Zeezromman parlajta uyarerqanku. Imaraykuchus chaypi ashkha runas karqanku, kay jinamanta parlarqataj:

3 Kunan Zeezrom, llullakuyniykipi, atoj jina kayniykipitaj jap’isqa kasqaykita rikunki, imaraykuchus mana runasllamanchu llullakunki, astawampis Diosman llullakunki. Qhaway, tukuy yuyayniykita yachan, rikunkitaj Espiritunnejta yuyayniykita yachasqaykuta.

4 Munayniykej pakaypi kasqanta yachasqaykuta rikullankitaj, supaypa pakaypi ruwasqasnin jina. Runasaman llullakuy, paykunata pantachiytaj ñoqaykoj contraykupi kanankupaj, ñoqaykuta qharqonawaykupajtaj —

5 Kunantaj kayta ruwayta munarqa enemigoyki, qampitaj atiyninta llank’acherqa. Imatachus niyki, chay tukuymampis nillanitaj, chayta yuyarinaykita munayman.

6 Kayqa enemigoj tojllan kasqanta niykichis. Kaywantaj kay llajtata jap’iyta munarqa pay kasuchikunampaj. Cadenasninwan mayt’usunaykichispaj, chay jinamanta wiñay tukukuyman aysasunaykihcispaj, presochay atiyninman jina.

7 Alma chayta parlasqantawan, Zeezrom astawanraj kharkatitirerqa, ña Diospa atiyninmanta astawan yachasqanrayku. Chay jinataj Alma, Amulekwan paymanta yachasqankuta yacharqa, paypa yuyayninta, sonqompa munaynintawan yachasqankurayku. Chayta yacharqankutaj sut’inchay espirituman jina atiy paykunaman qosqa kasqanrayku chaykunasta yachanankupaj.

8 Chantá astawan Diospa reinonmanta yachanampaj, Zeezrom paykunata sumajta tapuyta qallarerqa. Almaman nerqataj: ¿Ima ninayantaj kay imatachus Amulek nerqa wañusqaspa kawsarimunankumanta, tukuy wañuymanta kawsarimunanku, allin runas, sajra runaspis, Diospa ñawpaqenman pusasqas kanankupaj, ruwasqasninkuman jina juzgasqas kanankupaj?

9 Chantaqa Alma kaykunasmanta payman willayta qallarerqa, nispa: Diospa pakasqa imasninmanta yachay ashkha runasman qosqa. Chaywampis sinchi kamachiyniyoj kanku runaspa wawasninkuman qosqanman jinalla nisqanta qonankupaj, paykunaj kasusqankuman jina, allinta ruwasqankuman jinataj.

10 Chayrayku pichus sonqonta rumiyachin, payqa nisqampa sullk’a partenta jap’enqa. Pichus mana sonqonta rumiyachejrí, payqa nisqampa kuraj partenta jap’in, Diospa pakasqa imasninmanta yachanankama, hasta q’alitumanta chaykunata yachanankamapis.

11 Pikunatajchus sonqosninkuta rumiyachinku, paykunaman nisqampa sullk’a parten qosqa mana ni imata pakasqa imasninmanta yachanankukama. Chantám supayqa paykunata presochan, paypa munayninman jinataj tukuchiyninkuman pusasqas kanku. Kunanqa, kayqa ukhu pachaj cadenasnimpa ninayanan.

12 Amulektaj sut’inta willanña wañuymanta. Kay wañoj kawsaymanta mana wañoj kawsayman jatarichiymantapis willallantaj. Jinapis Diospa juzgana tiyananman pusaymantapis, ruwasqasninchisman jina juzgasqas kananchispaj, chaymantapis sut’inta willan.

13 Chantá, sichus sonqonchis rumiyachisqa, arí, nisqampa contrampi sonqonchista rumiyachinchis, mana chay nisqan ñoqanchispi tarisqa kanankama chayqa, kawsayninchis ancha millay, imaraykuchus chaymanta juchachasqas kasunchis.

14 Kikin nisqasninchistaj juchachawasun, arí, tukuy ruwasqasninchispis juchachawasun. Manataj mana ch’ichiyoj kasunchischu. yuyayninchiskunapis juchachallawasuntaj. Kay millay kawsayninchisraykutaj mana Diosta qhawayta atisunchu. Jinapis, ñoqanchisman qaqasta, orqostawan urmanankupaj kamachiyta atisunman, ñawpaqenmanta pakakunanchispaj chayqa, kusiyniyoj jina kasunman.

15 Chaywampis, chay mana kanmanchu. Paypa ñawpaqenman k’anchaynimpi, atiynimpi, kallpampi, jatun kaynimpi, kamachiynimpi ima sayakoj, tukuy juiciosnin cheqa kasqankuta willajtaj jamunanchis tiyan, wiñaypaj p’enqakunanchispaj. Jinapis cheqa kasqanta tukuy ruwanasnimpi, runaspa wawasninkuwan khuyayniyoj kasqanta, sapa paypa sutimpi creejta, pichus Diosman kutirikunampaj allin ruwaykunasta rikuchin, payta salvanampaj atiyniyoj kasqantawan willananchis kanqa.

16 Kunantaj, wañuypa jamunanta, iskay kaj wañuy, mayqenchus espiritumanta wañuy, chaypa jamunanta willayki. Chaypachataj pichus juchasnimpi kay kawsaymanta wañun, payqa espiritumantapis wañupullanqataj. Arí, allin kajkunamanta wañupullanqataj.

17 Chaypachataj ñak’ariyninku nina, azufre qhocha jina, mayqempa lawrayninchus wiñaypaj k’ajan. Chaypachataj wiñay tukuchiyman aysasqas kanqanku, Satanaspa presochay atiyninman jina, payqa paykunata presochan munayninman jina.

18 Chantataj, niyki, paykuna mana juchamanta kacharichiyniyoj jina kanqanku, Diospa justicianman jina mana kacharichisqas kayta atisqankurayku. Manataj wañuyta atinkuchu, manaña ismuy kasqanrayku.

19 Jinataj alma kay nisqasninta parlasqantawan, runas astawanraj t’ukorqanku.

20 Chaywampis uj Antionah sutiyoj karqa, pichus jatun pusjninku karqa. Payqa chimpaykuspa, nerqa: ¿Imatataj ninkirí? ¿Runaqa wañuymanta jatarikunmanchu, wañoj kawsaymanta mana wañoj kawsayman tijrasqa kanampaj, mana wañuyta atinampaj, chayta?

21 Chay escritura, mayqenchus willan Diospa querubinta, nina espadatawan Eden huertaj inti llojsiy ladumpi churasqanmanta, ñawpaj tatasninchis mana chayman yaykunankupaj, kawsaymanta sach’aj poqoyninta mikhunankupaj, wiñaypaj kawsanankupaj, ¿Ima ninayantaj chay escritura?

22 Kunan Alma payman nerqa: Chayta ch’uyachayta ña munasharqani. Ña Diospa nisqanman jina, Adan jark’asqa poqoyta mikhusqanrayku, pay urmasqanta rikunchisña. Chay jinapis urmasqannejta, tukuy runas chinkasqa, urmasqa runasman tukusqankuta rikullanchistaj.

23 Kunantaj, niykichis, chaypacha Adan kawsaymanta sach’aj poqoyninta mikhuyta atinman karqa chayqa, mana wañuy kanmanchu karqa, nisqataj ni imapaj kanmanchu karqa, Diosta llullachaspa, imaraykuchus payta nerqa: Mikhunki chayqa, cheqamanta wañunki.

24 Wañuy runasman jamojta rikullanchistaj, arí, wañuy mayqenmantachus Amulek willarqa, mayqentajchus kay kawsaymanta wañuy. Chaywampis p’unchaykuna qosqa kanku runa Diosman kutirikunampaj. Chayrayku kay kawsayqa kasukojchus manachus rikuchikunapaj kawsayman tukorqa, Diosta taripanapaj wakichikunanchispaj p’unchaykunamampis, jinapis, chay wañusqaspa kawsarimunankumanta wiñay kawsaypaj wakichikunanchispaj.

25 Kunantaj, manachus juchamanta kacharichiy kanman karqa, mayqenchus wakichisqa karqa kay pachaj qallariyninmantapacha chayqa, mana wañuymanta kawsarimuy kanmanchu karqa. Chaywampis juchamanta kacharichiy ruwana wakichisqa karqa wañusqasta kawsarichimunampaj, chaytaj willasqaña.

26 Kunantaj, ñawpaj tatasninchis kawsaymanta sach’aj poqoyninta mikhunkuman karqa chayqa, wiñaypaj muchuyniyoj, mana wakichikuy kawsayniyojtaj kankuman karqa. Chay jinataj juchamanta kacharichiy ruwana jark’asqa kanman karqa, Diospa nisqantaj mana valorniyojchu kanman karqa.

27 Chaywampis mana chay jinachu karqa. Astawanqa runasman wañuy qosqa. Chantá, wañuytawan juzganaman jamunanku tiyan, mayqen juzganamantachus parlaykuña, mayqenchus tukukuy.

28 Dios kaykunata runasman qoytawan, runa yachanampaj qosqasninmanta allin kasqanta rikorqa.

29 Chayrayku angelesta paykunawan parlajta kachamorqa, paykunataj Diospa k’anchayninta runasman qhawacherqanku.

30 Chaymantapacha paykuna sutinta wajyayta qallarerqanku. Chayrayku Dios runaswan parlarerqa, paykunata juchamanta kacharichiy ruwananmanta yachacherqataj, mayqen kacharichiychus kay pachaj qallariyninmantapacha wakichisqa karqa. Kayta paykunaman yachacherqataj feninkuman jina, juchasninkumanta kutirikusqankuman jina, allinta ruwasqankuman jinataj.

31 Chayrayku Dios runasman kamachisqasta qorqa, ñawpajta runas ñawpaj kamachisqasta, kay kawsaymanta imastapis, p’akisqankutawan, Dioskuna jinaman chayaspa, rejsispa allin kajkunata sajra kajkunamanta, chay jinaman tukusqankutawan. Chayrayku paykuna kikinkuta churarqanku ruwanankupaj kawsayninkuman jina, jinapis churasqas karqanku munayninkuman jina, paykunata gustasqankuman jinataj ruwanankupaj, sajra ruwanasta ruwanankupaj, chayrí allin ruwanasta ruwanankupaj.

32 Chayrayku Dios paykunata juchamanta kacharichiy ruwanamanta yachachiytawan, kamachisqasta paykunaman qorqa, mana sajra ruwanasta ruwanankupaj. Chaypa jasut’iynintaj iskay kaj wañuy karqa, mayqen wañuychus allin kajkunamanta t’aqakuy, imaraykuchus chay jinapaj juchamanta kacharichiy ruwana mana atiyniyojchu, Diospa sumaj, k’acha kayninman jina mana cheqa kajkunata thuniyta atisqankurayku.

33 Cahywampis Dios runasta wajyarqa, Wawampa sutimpi, (kayqa churasqa juchamanta kacharichiy ruwanaman jina), nispa: juchasniykichismanta kutirikunkichis, manataj sonqosniykichista rumiyachinkichischu chayqa, qankunawan khuyayniyoj kasaj Sapan Wawaynejta.

34 Chayrayku pikunachus juchasninkumanta kutirinku, manataj sonqosninkuta rumiyachinkuchu, paykunaqa khuyayniyta jap’enqanku Span Wawaynejta, juchasnin pampachasqas kanankupaj. Paykunataj samakuyniyman yaykonqanku.

35 Pitajchus sonqonta rumiyachinman, sajra ruwaykunata ruwanmantaj, phiñakuspa jurani mana samakuyniyman yaykunanta.

36 Kunantaj, hermanosníy, niykichis, sonqosniykichista rumiyachinkichis chayqa, mana Señorpa samakuyninman yaykunkichischu. Chayrayku sajra ruwayniykichisqa payta phiñachinku qankunaman phiñakuyninta apachimunampaj ñawpaj phiñachiypi jina. Arí, nisqanman jina qhepa phiñachiypi, ñawpaj phiñachiypi jina, wiñaypaj tukuchisqas kanaykichispaj, chayrayku nisqanman jina qhepa kaj wañuyman, ñawpaj kaj wañuymampis.

37 Kunantaj, hermanosníy, kaykunata yachaspa, cheqataj kanku, Diosman kutirikuna, amataj sonqonchista rumiyachinachu, mana Señor Diosta phiñachinanchispaj ñoqanchisman phiñakuyninta apachimunawanchiskama kay ñoqanchisman qosqaña iskay kaj kamachisqasnimpi, astawanqa Diospa samarikuyninman yaykuna, mayqen samarikuychus nisqanman jina wakichisqa.