1 Kunan wawáy, kaytawan nillaykimantaj; imaraykuchus wañusqaspa kawsarimuyninkumanta yuyayniykipi phutiyniyoj kasqaykita rikuni.

2 Qhaway, niyki, mana kawsarimuy kanchu — jiná, niyman, chay ninayan, kay wañoj cuerpoqa mana wañoj cuerpoman mana tukunchu, jinapis kay ismoj mana isomojwan mana p’achallikunchu — Cristoj jamuynin pasanankama.

3 Payqa wañusqasta kawsarichin, chaywampis wawáy, manaraj chayta ruwanchu. Kunantaj uj pakasqa imata sut’inchasqayki; chaywampis ashkha waqaychasqa pakasqa imas kan, mana ni pipis yachanampaj, Dioslla chaykunasta yachan. Jiná ujta, imatachus Diosmanta sumajta mañakorqani yachanaypaj, chayta qhawachiyki — chaytaj kawsarimuymanta.

4 Señalasqa tiempo kan tukuy runas wañuymanta kawsarimunankupaj. Mayk’ajchus kay tiempo jamunanta mana pipis yachanchu; chaywampis Dioslla yachan señalasqa tiempomanta.

5 Kunantaj, uj tiempollapichus, iskay tiempopichus, chayrí kinsa kaj tiempopichus runas wañuymanta kawsarimunkuman, chayta mana yachanichu, manataj importanchu. Dios tukuy kaykunasta yachan. Ñoqapajtaj allin kashan kayta yachanaypaj — tukuy runas wañuymanta kawsarimunankupaj tiempo kan.

6 Jiná lugar kanan tiyan wañuy pachamanta kawsarimuy pachakama.

7 Kunantaj tapuyman, ¿Imataj pasan runaspa espiritusninkuwan kay wañuy pachamanta señalasqa kawsarimuy pachakama?

8 Ashkha señalasqa tiempos runas jatarinankupaj kanchus, manachus, chay mana importanchu; imaraykuchus tukuy runas mana ujllapichu wañunku, kaypis mana importachu; Diospajqa uj p’unchay jinalla kashan, runasllapajtaj tiempo yupasqa.

9 Chayrayku, señalasqa tiempo kan runas wañuymanta kawsarimunankupaj. Wañuy pachamanta kawsarimuy pachakama t’aqakuy kallantaj. Kunantaj, kay t’aqaymanta, imachus pasan runaspa espiritusninkuwan, chayta yachanaypaj sumajta Diosmanta mañakorqani; kaymantataj yachaniña.

10 Kawsarimunankupaj tiempo jamojtin, Dios tukuy runasman señalasqa tiemposmanta yachasqanta yachanqanku.

11 Kunan, espiritoj kawsaynin wañuyninmanta kawsarimuyninkama, chaymanta parlaspa — Niwarqa uj angel, tukuy runaspa espiritusninku, kay cuerpomanta llojsispaña, arí, tukuy runaspa espiritusninku, allin kajtinkupis sajra kajtinkupis, paykuna ruwaj Diosninkuman pusasqas kanku, chayta angel yachachiwarqa.

12 Jinataj allin ruwajkunaj espiritusninku kusiy kawsayman pusasqas kanku, chaypa sutin paraiso, samarikunapaj lugar, sonqo tiyaywan lugar, chaypitaj tukuy rabiamanta, tukuy trabajomanta, phutiymanta ima samarikonqaku.

13 Jinataj sajra ruwajkunaj espiritusninku, arí, pikunachus sajra kanku, mana ni uj chhikan Señorpa Espirituyoj kasqankurayku, allin ruwanasmanta sajra ruwanasta ajllasqankurayku. Chayrayku supaypa espiritun paykunaman yaykorqa, paykunapitaj wasichakorqa — paykunataj jawa laqha pachaman wijch’usqas kanqanku; maypichus manchay waqay, qhapariy, kiru k’arukuytaj kanqa sajras kasqankurayku, supaypa munasqanman jinataj pusasqas kanqanku.

14 Kaytaj sajra runaspa kawsayninku, arí, laqhapi, jiná Diospa phiñakuyninta suyanankupaj millay kawsayniyoj kanku. Jinataj kay kawsayninkupi quedakunku, sumaj runastaj paraisopi quedakunku kawsarimunankukama.

15 Kunantaj, wakin runas kan, pikunachus kay kusiy kawsay, kay muchuy kawsaywan, manaraj kawsarimuy kashajtin, kay lugaresta entiendenku ñawpaj kawsarimuy jina kanampaj. Arí, ñoqapis kawsarimuy nisqa sutichasqanta nillanitaj, espirituta, jiná almata jatarichiy, paykunata kusiyman, chayrí muchuyman kachaytaj, parlasqaman jina.

16 Watejmantataj, ñawpaj kawsarimuy kananta, kawsarimuy mayqenchus tukuy wañusqaña runaspaj, kawsaj runaspaj, manaraj kawsaj runaspajpis, Cristo wañusqasmanta kawsarimunankama chaymanta parlasqaña.

17 Kunantaj, mana kay ñawpaj kawsarimuy, mayqenmantachus kay jinamanta parlanku, kay kawsarimuy mana espirituspa kawsarimuyninku kusiyman, chayrí muchuyman kawsarimuy kananta yuyananchischu tiyan. Mana kayta ninayasqanta creeyta atinkichu.

18 Niyki, Mana; kayqa ninayan espiritu cuerpowan juntuchakuy, Adampa p’unchayninmanta kajkunamanta, Cristoj kawsarimuy p’unchayninmanta kajkunamanta, Cristoj kawsarimuy p’unchaypi kajkunakama.

19 Sichus runas, pikunamantachus parlani, sichus paykunaj espiritusninku cuerposninkuwan ujllapi juntuchasqas kanqanku, sajra runaspata sumaj runaspatapis, chayta mana ninichu; basta tukuyninku kawsarimunankuta ninaypaj; chay ninayan, paykunaj kawsarimuyninku pasan Cristoj kawsarimuynin pasayta wañusqaspata ñawpajta.

20 Kunantaj, wawáy, mana kawsarimuyninku Cristoj kawsarimuynin p’unchaypi kananta ninichu; astawanqa creeyniy jinata chayta nini, allin runaspa espiritusninku cuerposninkuwan juntuchay kananta Cristoj kawsarimuynin p’unchaypi, janaj pachaman wichariynin p’unchaypipis, creeyniy jinatataj chayta nini.

21 Paypa kawsarimuynin p’unchaypichus, chay qhepantachus, chayta mana ninichu. Chaywampis, kayta nini, cuerpoj wañuyninmanta kawsarimuyninkama lugarnin kan, espiritoj kawsaynin kallantaj maypichus kusiypi, chayrí muchuypi kanqa Diosmanta señalasqa tiempokama, maypachachus wañusqas jatarenqanku juntuchasqa kanankupaj, espiritu cuerpowan. Chantá Diospa ñawpaqempi sayarinankupaj pusasqas kanqanku jazgasgas kanankupaj ruwasqasninkuman jina.

22 Arí, kayqa profetaspa nisqasninkuman jina mosojyachiy ruwanata ruwan.

23 Espiritu cuerpoman mosojyachisqa kanqa, cuerpotaj espirituman mosojyachisqa; arí, sapa chaki-maki, moqonwan cuerponman mosojyachisqa kanqa; arí, ni uj umaj chujchallampis chinkasqachu kanqa; jinapis tukuy ima kikin cabal kawsayninman mosojyachisqa kanqa.

24 Kunantaj, wawáy, kayqa mosojyachiy, mayqen mosojyachiymantachus profetas parlarqanku —

25 Chaypachataj, allin ruwajkuna lliphipirenqanku Diospa reinompi.

26 Chaywampis sajra ruwajkunaj wañuyninku millaypuni; imaraykuchus paykuna allin ruwaykunamanta wañunku. Paykuna ch’ichi kanku, manataj ni mayqen ch’ichipis Diospa reinonta chayaqepaj jap’iyta atinmanchu. Paykuna qharqosqas kanku, ruwasqasninkoj poqoyninta mikhuchisqas kanku, ruwasqasninkutaj sajra; k’allku copamantataj ujyanku.