¶ 1 BEA nae toki ha‘u kiate au ae niihi i he kau mātua o Isileli, o nau nofo mai i hoku ao.

2 Bea nae hoko mai kiate au ae folofola a Jihova, o behe,

3 Foha oe tagata, kuo fokotuu e he kau tagata ni ho nau gaahi tamabua i ho nau loto, bea ai moe tūkiaaga oe nau hia i ho nau ao: oku gali koa ke fakafehui ha mea kiate au ekinautolu?

4 Koia ke ke lea kiate kinautolu, bea ke behe kiate kinautolu, Oku behe e Jihova koe Otua; Koe tagata kotoabe oe fale o Isileli aia oku fokotuu tamabua i hono loto, mo ne ai ae tūkiaaga o ene hia i hono, ao, bea oku ha‘u ki he balofita, Ko au ko Jihova, teu tali ia, o fakatatau moe toko lahi o ene gaahi tamabua;

5 Koeuhi keu moua ae fale o Isileli i ho nau loto onautolu be, koeuhi kuo nau mavahe kotoabe meiate au, koe mea i he e nau gaahi tamabua.

¶ 6 Koia ke ke lea ki he fale o Isileli, Oku behe e Jihova koe Otua; Fakatomala bea tafoki mei hoo mou gaahi tamabua; bea tafoki ho mou mata mei hoo mou gaahi fakalielia kotoabe.

7 He koia kotoabe i he fale o Isileli, be koe muli oku aunofo i Isileli, aia oku mavahe eia ia meiate au, o ne fokotuu ene gaahi tamabua i hono loto, o ne ai ae tūkiaaga o ene hia i hono ao, bea oku ha‘u ki he balofita ke fakafehui kiate ia koeuhi ko au; Ko au ko Jihova teu tali ia e au be.

8 Bea teu fakahagatonu hoku mata ki he tagata koia, bea teu gaohi ia koe fakailoga moe lea fakatātā, bea teu motuhi ia mei he lotolotoga o hoku kakai; bea te mou ilo ko Jihova au.

9 Bea kabau e kākā‘i ae balofita oka lea aki eia ha mea, ko au ia ko Jihova oku fakahalaia ia, bea teu mafao atu kiate ia a hoku nima, bea fakaauha ia mei he lotolotoga o hoku kakai ko Isileli.

10 Bea te nau fua ae tautea oe nau agahala: e tatau be ae tautea oe balofita moe tautea oia oku kumi kiate ia;

11 Koeuhi ke oua naa toe alu hehe ae fale o Isileli meiate au, bea oua naa toe fakalielia ia i he e nau gaahi agahala; ka nau hoko ko hoku kakai, beau hoko au ko ho nau Otua: oku behe e Jihova koe Otua.

¶ 12 Nae toe hoko kiate au ae folofola a Jihova, o behe,

13 Foha oe tagata, oka agahala ae fonua kiate au i he ene fai kovi lahi, teu toki mafao atu ai hoku nima, bea e maumau ae falalaaga oe ma oku i ai, bea teu tuku ia ke hogea, bea motuhi mei ai ae tagata moe manu:

14 Ka ne i ai ae kau tagata ni e toko tolu, a Noa, mo Taniela, mo Jobe, oku behe e Jihova koe Otua, e fakamoui ho nau laumalie be onautolu i he e nau maonioni.

¶ 15 Kabau teu tuku ae faga manu fekai ke alu fano i he fonua, bea nau maumau‘i ia, koeuhi ke hoko ia o lala, bea e ikai alu i ai ha tagata telia ae gaahi manu fekai:

16 Oku behe e Jihova koe Otua, ka ne i ai ae kau tagata koia e toko tolu, o hage oku ou moui, e ikai te nau fakamoui ho nau foha be ha ofefine; gata be iate kinautolu e fakamoui, ka e auha ae fonua.

¶ 17 Bea kabau teu omi ae heleta ke hoko ki he fonua, beau behe, Heleta aji atu ki he fonua; kau motuhi mei ai ae tagata bea moe manu:

18 Oku behe e Jihova koe Otua, ka ne i ai ae kau tagata koia e toko tolu, e ikai te nau fakamoui ha foha be ha ofefine, ka ko kinautolu be e moui iate kinautolu.

¶ 19 Bea kabau teu tuku ae mahaki fakaauha ki he fonua, beau liligi hoku houhau ki ai i he toto, ke motuhi mei ai ae tagata bea moe manu:

20 Neogo oku ha ai a Noa, mo Taniela, mo Jobe, hage oku ou moui, oku behe e Jihova koe Otua, e ikai te nau fakamoui ha foha be ha ofefine; gata i ho nau laumalie be onautolu e hao i he e nau maonioni.

21 He oku behe e Jihova koe Otua; kae fefe nai o kau ka tuku atu fakataha ae fakamalaia e fa ki Jelusalema, ae heleta, moe hoge, moe faga manu fekai, bea moe mahaki fakaauha, ke motuhi mei ai ae tagata moe manu?

¶ 22 Kae vakai, e fakatoe ha niihi i ai ke fakahaofi, ae gaahi foha moe gaahi ofefine: vakai te nau omi kitua kiate kimoutolu, bea te mou mamata ki ho nau hala moe nau faiaga; bea te mou fiemalie mei he kovi aia kuou omi ki Jelusalema, io, i he mea kotoabe kuou fakahoko ki ai.

23 Bea te nau fakafiemalie‘i akimoutolu oka mou ka mamata ki ho nau hala moe nau faiaga: bea te mou ilo oku ikai teu fai noabe ha mea i he mea kotoabe aia kuou fai ki ai, oku behe e Jihova koe Otua.