Koe Tohi ae Balofita ko Isikieli
Vahe 1
1 Koe kuoga oe kikite a Isikieli i Kiba. 4 Ko ene mamata ki he Jelubimi e toko fa, 15 moe teka e fa, 26 moe nāunāu oe Otua.
¶ 1 KOENI, i he ene hoko ki hono tolugofulu oe ta‘u, mo hono fa oe mahina, bea i hono nima oe aho oe mahina o eku i he kakai bobula i he vee vaitafe o Kiba, nae fakaava ae gaahi lagi bea naaku mamata ki he gaahi mea ha mai mei he Otua.
2 I hono nima oe aho oe mahina i hono nima ta‘u oe fakabobula‘i ae tu‘i ko Jihoiakimi.
3 Nae hoko totonu mai ae folofola a Jihova kia Isikieli koe taulaeiki, koe foha o Bosi, i he fonua, oe kau Kalitia, i he botu vaitafe ko Kiba; bea nae iate ia ae nima o Jihova i ai.
4 Bea naaku jio, bea vakai, nae ha‘u ae ahiohio mei he tokelau koe fuu ao lahi, moe afi nae femamioaki, bea nae takatakai ia e he māma, bea kikila mai mei hono botu i loto o hage koe amiba, mei he loto afi.
5 Bea nae ha‘u foki mei he loto mea ae tatau oe mea moui e fa. Bea koe aga eni oe nau ha mai. Naa nau mata tatau moe tagata.
6 Bea naa nau taki taha ae mata e fa, bea nau taki taha ae kabakau e fa.
7 Bea ko ho nau va‘e koe va‘e totonu: bea tatau a ho nau aofiva‘e moe aofiva‘e oe uhiki‘i bulu: bea nae ulo o hage koe ulo oe balasa kuo fakagigila.
8 Bea naa nau nima o hage koe tagata i ho nau lalo kabakau i ho nau botu e fa; bea nae i ho nau botu e fa ae mata moe kabakau.
9 Nae feuutaki ho nau kabakau; bea nae ikai fetafokiaki e nau alu; ka nae taki taha alu fakahagatonu atu.
10 Bea koe mea ki ho nau mata, nae ma‘u e he toko fa ni ae mata oe tagata, moe mata oe laione ki he toomatau: bea ma‘u e he toko fa ni ae mata oe bulu ki he toohema, bea ma‘u foki e he toko fa ni ae mata oe ikale.
11 Nae behe ae aga o ho nau mata: bea nae mafola ho nau kabakau ki oluga; nae taki taha hono kabakau e ua nae febikitaki, bea koe ua nae ufiufi aki ho nau jino.
12 Bea nae taki taha alu fakahagatonu atu be: koia ne alu ki ai ae laumalie, koia ia naa nau alu ki ai, bea nae ikai te nau tafoki i he e nau alu.
13 Bea koe tatau oe mea moui e fa, nae hage koe ulo ae fefie i he afi, bea koe ulo ae tuuga māma nae alu hake ia mo alu hifo i he haohaoga oe gaahi mea moui; bea nae ulo lahi ae afi bea aji mai ae uhila mei he afi.
14 Bea nae lele mo toe foki mai ae gaahi mea moui o hage koe ulo oe uhila.
15 Bea koeni, lolotoga eku jio ki he gaahi mea moui, vakai, koe teka e taha nae tuu ki he kelekele i he tafaaki oe gaahi mea moui, bea mo hono mata e fa.
16 Bea koe aga oe gaahi teka mo hono gaohi nae hage koe lanu oe belili: bea nae tatau ae mea ni e fa: bea nae ha mai hono gaohi nae hage kuo ai ae teka e taha i he loto teka e taha.
17 I he e nau alu naa nau alu i ho nau tafaaki e fa: bea nae ikai ke tafoki i he e nau alu.
18 Bea ko ho nau gaahi mea takai nae fakaulia koe mea i hono maoluga lahi; bea nae bito a ho nau mea takai i he mata o takatakai i he mea ni e fa.
19 I he ene alu ae gaahi mea moui, nae alu ai be moe gaahi teka; bea ka hiki hake ae gaahi mea moui mei he kelekele, nae hiki ai be moe gaahi teka.
20 Koe botu kotoabe nae alu ki ai ae laumalie, naa nau alu ai, koia ia e alu ki ai ho nau laumalie; bea nae hiki hake o fakahagatonu mai ae gaahi teka kiate kinautolu: he koe laumalie oe mea moui nae i he gaahi teka.
21 I he ene alu ena, nae alu eni; bea i he ene tuu mau ena, nae tuu eni; bea i he ene hiki hake ena mei he kelekele, nae hiki hake ai ae gaahi teka o fakahagatonu mai kiate kinautolu: he nae i he gaahi teka ae laumalie oe mea moui.
22 Bea nae tatau hono fakamalumalu mei oluga i he gaahi mea moui, moe lanu oe kalisitala fakamanavahe, oku mafola atu ki oluga i ho nau ulu.
23 Bea nae mafola totonu hake i lalo i hono fakamalumalu a ho nau kabakau, bea ne febikitaki ia: nae taki taha ho nau kabakau e ua nae ufiufi aki ho nau jino i he tafaaki ko eni, bea moe ua nae ufiufi aki mei hena.
24 Bea i he e nau alu naaku fanogo ki he logoaa o ho nau kabakau, nae hage koe uulu oe gaahi vai lahi, hage koe le‘o oe mafimafi, moe ogo mai ae lea, moe logoaa o ha fuu toko lahi: bea i he e nau tuu naa nau fāū ho nau kabakau.
25 Bea i he e nau tuu mo fāū ho nau kabakau nae ogo mai ae le‘o mei he lagi, ki oluga i ho nau ulu.
¶ 26 Bea nae ha mai ae tatau oe nofoa fakatu‘i mei oluga i he botu lagi nae feagai hifo mo ho nau ulu, bea nae hage ia koe maka koe safaia, bea ha mai mei he tatau oe nofoa fakatu‘i ae mata o hage koe ha mai o ha tagata mei oluga i ai.
27 Bea naaku mamata nae lanu tatau ia moe amiba, bea hage koe afi oku takatakai i loto i ai mei he ha mai o hono kogaloto o fai ki oluga, bea mei he ha mai o hono kogaloto o fai ki lalo naaku mamata nae hage koe afi bea nae ulo takatakai i ai.
28 O hage koe umata oku i he ao i he aho oe uha, nae behe ae ulo takatakai i ai. Koe ha mai eni ae tatau oe nāunāu o Jihova. Bea i he eku mamata ki ai, naaku tomabee ki hoku mata, bea naaku fanogo ki he le‘o o ha taha nae lea mai.