Job

Us ta na’aatinak li hu chirix li rahilal kixk’ul laj Job, ink’a’ naxsume li patz’om k’a’ut naq laj Job (malaj yalaq ani chik) tixk’ul rahilal ut lix sachik lix junkab’al ut li k’a’ru re. Li hu naxch’olob’ naq li rahilal nak’ulman ink’a’ naraj naxye naq aj maak li ani rahob’tesinb’il. Li Qaawa’ naru naroksi li ch’a’ajkilal re xk’eeb’al li na’leb’, re kawresink, ut re tzolok jo’ ajwi’ choq’ tojb’a-maak (Tz. ut S. 122).

Naru xjachb’al ru li hu sa’ kaahib’ jachal. Eb’ li ch’ol 1–2 a’aneb’ xtiklajik li esilal. Sa’eb’ li ch’ol 3–31, wan li raatin laj Job ut eb’ li oxib’ li neke’ochb’eenink re. Sa’eb’ li ch’ol 32–37 wan li raatin laj Elihu, jun chik li rochb’een, li naxjit laj Job chi jalan chik lix na’leb’ahom chiru lix na’leb’ahomeb’ li oxib’ chik. Sa’eb’ li ch’ol 38–42, naraqe’ li hu rik’in xyeeb’al naq lix yu’am laj Job chaab’il chalen chaq sa’ xtiklajik.

Lix hu laj Job naxk’ut naq wi ani junaq tz’aqal xna’leb’ chirix li Dios ut yoo chi wank sa’ xyu’am jo’ chanru us chiru li Dios, k’a’jo’ wi’chik naq taaruuq chixkuyb’al li ch’a’ajkilal li neke’chal sa’ xb’een. Lix paab’aal laj Job nak’utun sa’ li raatin “Us ta nikinixkamsi, a’ut toj tinkanab’ wib’ chiru” (Job 13:15). Laj Job yeeb’il ajwi’ resil sa’ Esekiel 14:14; Santiago 5:11; Tzol’leb’ ut Sumwank 121:10.