Levi

Laj Jakob kirosob’tesi laj Levi ut eb’ li ralal xk’ajol (Gen. 49:5–7, 28). Eb’ li ralal xk’ajol laj Levi ke’k’anjelak sa’eb’ li santil muheb’aal re Israel (Num. 1:47–54). Laj Aaron a’an aj Levita, ut eb’ li ralal xk’ajol laj Aaron a’aneb’ laj tij (Exo. 6:16–20; 28:1–4; 29). Eb’ laj Levita ke’xtenq’aheb’ laj tij, eb’ li ralal laj Aaron (Num. 3:5–10; 1 Rey. 8:4). Wan naq ke’k’anjelak jo’ aj wajb’ (1 Kro. 15:16; Neh. 11:22); ke’xkamsiheb’ li mayejanb’il xul (2 Kro. 29:34; Esd. 6:20); ut ke’tenq’an sa’ li santil ochoch (Neh. 11:16). Eb’ laj Levita ke’wan chi q’axtesinb’il choq’ re lix k’anjel li Qaawa’, re xb’aanunkil li k’ojob’anb’il k’anjel choq’ reheb’ li ralal xk’ajol laj Israel. Eb’ laj Levita ke’wan chi q’axtesinb’il ruuchileb’ li ralal xk’ajol laj Israel (Num. 8:11–22); chi jo’kan ke’ok choq’ reechanihom li Dios, k’eeb’ileb’ re a’an ruuchileb’ li xb’een alalb’ej (Num. 8:16). Ink’a’ ke’wan chi osob’tesinb’il; ke’ch’aje’ b’an choq’ re li ropiiseb’ (Num. 8:7–16). Maajun ch’och’ ke’xk’ul choq’ reechanihomeb’ aran Kanahan (Num. 18:23–24), a’ut ke’xk’ul li lajetqil (Num. 18:21), waqxaqib’ roxk’aal (48) chi tenamit (Num. 35:6), ut kik’eeman reheb’ xk’ulb’al li lemoox reheb’ li tenamit sa’eb’ li ninq’e (Deut. 12:18–19; 14:27–29).