Juda

Lix teepal laj Juda ke’wan xnimaleb’ xwankil chirix naq ke’wulak Kanahan. Chi junpak’al a’an kiwan lix teepal laj Efrain. Laj Moises kirosob’tesi lix teepal laj Juda (Deut. 33:7). Chirix lix awa’b’ejil laj Salomon, lix teepal laj Juda ke’ok choq’ awa’b’ejihom re Juda.

Sa’ lix awa’b’ejil laj Roboam, lix awa’b’ejihom laj Salomon kijache’ ru sa’ wiib’ chi awa’b’ejihom, rik’in naq wankeb’ chixsowenkil rib’ lix teepal laj Efrain rik’in lix teepal laj Juda. Sa’ li jun awa’b’ejihom sa’ xtz’e li saq’e, malaj li awa’b’ejihom re Juda, kiwan lix teepal laj Juda ut li jun raqal q’axal nim re xteepal laj Benjamin. Jerusalen kiwan choq’ jolomil tenamit. K’a’jo’ wi’chik naq kiwan chi tiik chixpaab’ankil li Jehova chiru li awa’b’ejihom sa’ xnim li saq’e. Juda moko wan ta sa’ xb’eheb’ laj pleetinel li neke’chal chaq sa’ xnim li saq’e ut sa’ releb’aal li saq’e, ut li awa’b’ejil kikana sa’ ruq’eb’ lix junkab’al laj David toj reetal li preexil sa’ Babilonia. Li awa’b’ejihom re Juda kiwan chi xaqxo 135 chihab’ chik chirix lix t’anik li awa’b’ejihom re Israel, us ta a’an nim wi’chik ut k’iheb’ wi’chik li wankeb’ chi sa’.

Lix yaalalil a’in, a’an li Santil Hu jo’ tz’iib’anb’il esil re lix junkab’al laj Juda (Esek. 37:15–19). Sa’ roso’jikeb’ li kutan, naq te’ch’utub’amanq li jar teep re lix junkab’al laj Israel, te’ch’utub’amanq ajwi’ li loq’laj esil ke’xtz’iib’a chaq. Eb’ li loq’laj hu a’in neke’xxaqab’ xwankil chirib’ileb’ rib’, ut sa’ junajil neke’xye xyaalal naq li Jesus a’an li Kristo, li Dios re Israel ut li Dios re chixjunil li ruchich’och’ (JJS, Gen. 50:24–36 [apendice]; 2 Ne. 3; 29).