Obengkel a Dios, e Sumechokl a Telemall
Kristo a ngarngii a klisichel el ngoikid el mo ngara mui el beltik el reng lobengkel a Chedam me a ta me a tang.
Kid a kired el melemolm el mo er ngii a dmolech el klaumodengei me a blekongesenges el mo er a Chedam er a Babeluades. A deleuill er kid lobengkel a diak a ulebengelel. Kid a betik er a rengul Rengelkel, e tiang a diak el bol ngodech. Kede mekerang a deluut el mo mesisiich er sel Ongtil el mei er Ngii me bol sebeched el mo ngara deureng er a klengeltengat el Ngii a soal lodars er kid er chelechal klengar me sel merael mei el klengar?
A Rubak a millekoi er a rechad er a Israel er a ngaramong e dirrek el melekoi er kid el kmo, “Oi, ak mla oubeltik el reng er kemiu loba diak a ulebengelel beltik el reng: loba blekokeuii el mengesuseu er kemiu.”1 A Chedam a melekoi el kmo, Ngii a melekoi er kid el kmo, “Be mobengkek, me ngak kubengkem; e morael lobengkek.”2 Kede oumerang er Ngii el sebeched el mo Obengkel e merael Lobengkel?
Kede ngara tial beluulechad el mesuub e mukeroul, e sel kot el klou a belkul el omesubed me a ulekeruled a mei lokiu a deleuill er kid me a Chedam er a Babeluades me a Jesus Kristo. Ngokiu tial deleuill er kid me a Tir e ngii a mei a klemedengei, beltik el reng, klisiich, me a klou el techall el mo mesiou er a rebebil.
“Ngercheled el suub aikel rokui el Dios a mla ocholt el kirel.”3 Ng kired el mo medengei el kmo a Dios el Chedam a ulderechii a Ngelekel Sechal, er a Jesus Kristo, el mebii a beluulechad el kirel a ulekeruled, e dirrek el Chedam er a Babeluades a uldersii a Ngelekel Sechal el mo tongetengii a klengar ngii el kirel osebeled er a diak a ulebengelel klengar, me a dirrek el klisichel a priesthood er a Chedam me a meral Ikelesia er a Ngelekel lobengkel aikel chedaol ruoll er a chelsel a mloluut el ngii a klengeltengat el mei er kid. Ko melchesuar a delchel a beltik el reng er a chelsel aikal teletael el kirel a deureng me a ulekeruled? Ng kired el mo medengelii a uldesuel a Chedam el kirel osebeled e kired el mo olngesenges a llach me a chedaol ruoll er a ebangkelio el uchul e kede mo nguu a diak a ulebengelel klengar e mo uaia Dios.4 Tiaikid a merang e diak el ngemed el deureng el Chedam er a Babeluades a meskid. E diak a lmuut el tara merang me a diak a ulebengelel deureng.
A ringeled a sebechel kursid el mo cheroid er a rolel a deureng. Ng sebeched el metom er sel deleuill er kid me a Dios alsekum a ongarm a mo mengesang er kid e bai diak rellid el mo outubaruach e doluluuch.
Tiakid el beot el belkul a tekoi a rullid el mo sumechokl aikel meklou a belkul tekoi:
A bebil er a tekoi a meklou a belkul; e a bebil a diak.
Ng kesai el tekoi a diak el ngemed, e betok er ngii a di mo nguemed.5
Rodos, ngera sel kot el klou a belkul mei er kau? Ngera ikel diak el ngemed el tekoi? Sel klou a belkul el mo er a Chedam a kmo bo dosuub er Ngii, bo doba ngariou el reng, e bo dolngesenges er Ngii lokiu aikel duubech er a klengar kid er tial beluulechad. Ngii a soal a dengodech a chechelingaol reng er kid el mo omesiou, me a dekted bo el klaumerang. Aikaikid el diak el ngemed el teletael a sebechel kmal mo meringel el skeng el mei er kid.
Ng chelechal taem, el betok a olngesonges er kid, e a Chedam olengit er kid el mo oubeltik el reng, le ng ua le sal merengelang dosiik er a beltik el reng, e mo mesiou le ng merngela dosiou, e mo ousubes le ng kmal meringel a dousubes. Kede mekerang? Kede mekerang e rulii? Kede odersid el bedul a Chedam er a Babeluades lolengit a ngeso, el ngara ngklel a Ngelekel Sechal, e meruul a tekoi er sel Teletelel e bai diak di el kid el ta el meruul e di el kid loba sel soad.
Ak miltebengar er a kldidiul a renguk er a longedecheduch a President Ezra Taft Benson el kirel mengikiid er a chelsel a reng.6 A kulemes er ngak el uaia kchollumel. Ng mekera sebechek el choridii a kldidai el reng er a renguk? A bo kurrimel el mo oba ngariou el reng e bo kubeltik el reng el mo er a rebebil a diak el meral ngara renguk e diak a belkul, e diak loureor. A kngtid me a keldidai el reng a muchel—a mekngit er a delongeled—me sel beltik el reng, er a Chedam er a Babeluades el kired.
Ng di tal Tngakireng er a Osobel a kmikidid a kngtid e tmingt a chemars er a delongeled.
Ng soad el mo iliuekl er a beltik el reng me a otireklel er a Demad er a Babeluades, me kede nguu sel Soal el mo kot e oba ngariou el reng e olengit me a Kristo bo lokeek a rengud er a klungiaol. A kot e ng locha dersesei el mei, e ng di sel dosiik, e dolengit, e doltirakl, e ng mo klou el mei. Tiaikid el ngar el ralm a mo mekekid, me kede mo olsesiseb er a beltik el reng er Ngii, me ng sebeched el kuk merous er ngii el mo er a rebebil el tir a ngara chederreng el kirel omekungil, urungulir, e sorir teloi er kid. Sel bol klikiid a chelsel a rengud, e a deleuill er kid a mo omuchel el mo ungil.
Ng kired el mo mechei aikel kuk di soal a rengud el meruul e dmedesii a basio el kirel a diak a ulebengelel klemerang er a Dios. A Osobel, el ngii a mengedecheduch lomtechei er a Chedam, a olengit er kid el mo, “kmeed er ngii me ngii bol keed er kid.”7 A bo dekeed er a Chedam a sebechel belkul a kmo kede mesuub a klemerang el Kirel el ngara chedaol llechukl, oltirakl a tekingir a reprofet, e melasm el mo mui el medengelii a moktek er Ngii.
Kede medengei el kmo a Kristo a ngarngii a klisichel el ngoikid el mo ngara mui el beltik el reng lobengkel a Chedam me a ta me a tang? Ngii, lokiu a klisichel Chedaol reng, a sebechel meskid a dousbech el klemedengei el kirel a deleuill.
A sensei er a Primary a ulechais er ngak er a mesisiich el teletael el dilubech er a chelsel a klas er ngii er a re teruich me a ta rekrir el sechal. A tara tir, el kuleker ngii el Jimmy, a dimlak el soal teloi er a rechad er a chelsel a klas. A tal Sandei, e ngika el sensei a ulemelchesiu el mecherei a suobel e ouchais el kmo ngera uchul me ng betik a rengul er a Jimmy. Ng millekoi el uase ng mereng a saul e kmal oumera er ngika el ngeasek el buik. E sola ngika el sensei a mocha melekoi er a rebek el chad me te ouchais er a kmo ngerang el sorir er ngika el buik. Tirkal ngalek er tial klas, er a loudersta er tir, louchais er a Jimmy el kmo ngera uchul me ng kmal tokubets, e ng mocha tellatel e longelang. Ngika el sensei me tial klas a tilngetii a chemars er a rengul a Jimmy. Beot lolchotel a beltik el reng, el meral mocholt, a mesterir a rebebi a urungulir me sel mekreos el klechad er tir. Tia kumekedong er ngii el kmo “melingt a chemars er a deleuill.”
A klengar kid er sel uchei el beluulechad a locha meral uchul a sked er a klemerang, e diak el ngemed el beltik el reng er tial beluulechad. Kid a ruul el chedaol lomerk er a beltik el reng, e ousbech er a beltik el reng, e sel kmal dmolech el beltik el reng a mei sel kaukledm kid me a Dios. A Babier er a Mormon a siotai er kid el mo “tang lobengkel a [Dios] lokiu a tngakireng er a Kristo.”8
A Isaiah a millekoi el kirir tirkel blak a rengrir loltirakl er a llach er a olsengerenger el uchul a ungil deleuill er a remerael mei el telcheroll er tir. Tir a tirkel Isaiah, yaksok el kmo, “te mo lmuut el mekedecherur a mla mechoit el basio.”9 Osisiu el teletael, a Osobel a sumecheklii, a ungil deleuill, er kid lobengkel a Chedam er a Babeluades. Ngii, lokiu a tngakireng er ngii, a mekengii a rael el kired me bo doba beltik el reng me a klisichel a Dios, e a kede “tmingt a chemars” er a klengar kid. A domekungil a mekngit el reng er a delongeled e ng kired el lultuil er a beltik el reng er a Chedam, lobengkel a diak el bechechelingaol reng me a diak el medakt el blekeradel.
A tal kmal dirk kdebedebekii el kesus e a tal chedak me a ngak a mlo kaumondai el kirel a tekoi er a balatiks. Ng kmal mle mereched loltuub e oumondai a tekingek, e di beches el kmo ak cheleuid er a delongelir a rechedal a telungalek. A kulmelchesiu el kebelung e diak a ngera el kudengei—e ak locha meral mle uasiei. Sel kesus er a bocha kululuuch, e a kuluchais er a Chedam er a Babeluades el kirel ngika el mekngit el chedal a telungalek! Ak di millemolem el mengedecheduch. Ak locha mlo stob loumondai el telkib e a Chedaol Reng a mlo er ngii a techellel mengedecheduch er ngak, le ng ko er a, mlo mechas a renguk er a di ble le ngak el dmu el kmo, “Ng locha kirek el mo oubeltik el reng el mo er ngii.” Mo betik a renguk er ngii? Ak millemolem el meluluuch, el melekoi el kmo, “Ak mekerang e mo betik a renguk er ngii? A kumdasou e ng diak el soak el chad. Ng kmal oberaod e telemall a renguk. Ng diak el sebechek.”
E meral, tekoi le ngokiu a ngeso er a Chedaol Reng, e ng mlo er ngii a beches el uldasou er a uldesuek er a kdu el kmo, “E Kau a betik a rengum er ngii, e Chedam er a Babeluades. Ng Sebechem el meskak a telkib er a beltkil a Rengum el kirel—me bol sebechek el mo betik a renguk er ngii?” A medecherecher el renguk a mlo medemdemk, e ak mocha mesa sel klou, el ultutelel ngika el chad me a klungiolel. A Isaiah meluches el kmo, “A Rubak a tmingt a chemars er a delongelir a rechedal, e omekungil a telemall er a rengrir.”10
Cherengel a taem e sel mle chemars er a delongelam a dikeang. Me a le mlak el kengei er tial mla mengodech el renguk, e ng di ak silubii el kmo a Chedam er a Babeluades a mo ngosukid loubeltik el reng el mo er tirkel, domdasou e ng diak el soad tir alsekum e kede olengit a ngeso er Ngii. A Tngakireng er a Osobel a tungelel a beltik el reng er a Chedam er a Babeluades. Ng kired el melilt el mo obang tial beltik el reng me luchul e bo demui er a bliochel el beltik el reng el mo er a rokui el chad.
Sel dodersii a rengud el mo er a Chedam me a Ngalek, e ng sebeched el ngodechii tial beluulechad el de ngarngii—luldimukl alsekum a teletael el iliuekl er kid a diak el mengodech. Ng sebeched el merael mo kmeed er a Chedam er a Babeluades e melchesuar a kengei er Ngii er a blak el reng er kid el mo meral oltirakl er a Kristo. A ultebenged, klisiched, me a klaumera er kid a mo chachisois.
A Mormon a subedid el mo ngara nglunguuch loba klisichel a rengud el kirel tial beltik el reng e seikid e kid a mo nguu er ngike el ngii a uchul—el Chedam er a Babeluades.11 Seikid el kid a mo sebeched el tmingt a chemars er a deleuill er kid er tial beluulechad.
A diak a telkelel beltik el reng er a Chedam a modars el me er kid, el ngoikid el muut el mo er a klebkellel me a deureng er Ngii. Ngii a uldersii a Di Chimol Ngelekel Sechal, el Jesus Kristo, el tmingt a chemars er a deleuill er kid me Ngii. Sel muut el mo obengkel a Chedam er a Babeluades a meral moktek er a diak a ulebengelel beltik el reng me a moktek. Ng kired el sumechelii a deleuill er kid me a Ngii er chelechang e suub aikel meral meklou a belkul, e mo oubeltik el reng el uai Ngii, a loubeltik el reng e mukreoul el mo uai Ngii. A kuchais el kirel a ungil deleuill er kid lobengkel a Chedam er a Babeluades me a Osobel a klou a belkul el mo er Tir me a kid el dirrek. El ngara ngklel a Jesus Kristo, amen.