Nguu a Klaumerang er a Rubak me a Telungalek er Kau

Rodam, alta eng locha diak a lmuut el ngarbab lungil tekoi el denguu er a Rubak er sel medengei el kmo Ngii a oumera er kid el mo klikiid el oba priestood e ungil bechiil el chad e chedam.

A dodengelii a kmo: a ngeuil a klaumerang er a Rubak el ngii a klengeltengat el mei er kid a okiu a blak el reng er kid. A klaumerang a klengeltengat el ultuil er a otireklel a llechul a Dios. A nguu a klaumerang er a Rubak a mei lokiu a otirekled er a telbiil el de riruul er a de metecholb me a chedaol el templo. Sel dotirakl a telbiled el mora Rubak, e a klaumerang er Ngii er kid a merael mo klou.

Ng meral soak a chuodel me a beches el chedaol llechukl el ousbech er a tekoi el “melemalt a rengul” sel losaod er a kedung el chad.¹ Melemalt malechub a diak el melemalt a uchetemel a teletelel a chad. A chad el “melemalt a rengul” a chad el sebeched loumerang er ngii—e le a klaumerang a mukdubech er a llemalt.

Sel de chad el melemalt a belkul a kmo a uldesuem, ma omerellem, a klikiid e melemalt er a rokui el teletelel a klengar er kau, ra buai me a blim. Ngokiu a ikel bek el tekoi el dudasu e meruul, eng sebeched el kilungii a klaumerang ra Dios er kid malechub e kede kekeringii. Tial osisechakl a locha kmal desang el bleketakl el ulecholt er a miltutk el chedaol el ngercheled el bechiil el chad me a chedam.

Sel de bechiil e de chedam, e kede mla ngmai a chedaol ngerachel er a re profet er chelechal taem, chad ra ues ma ocholt el ngara babier el “Telunglek: Chais el mora Beluulechad.” Tial babier a olsisechakl er kid el kmo (1) “a rechedam a bdelul a telungalek loba beltikelreng me a llemalt ,” (2) a rechedam e ngerchelir el smiik e kudmokl aikel lousbech er a klechad,”ma (3) chedam a ngerchelir el omekerreu er a telungalek er tir.²

Alsekum meke de mo nguu a klaumerang er a Dios, eng kired el mo kudmokl aikal edei el chedaol el ngercheled el mo er a telungalek er kid lokiu a soal a Rubak. El uaikel beldukl el ngara chais el mora telungalek, a soal a Rubak a mo oltaut a ikal ngerachel lobengkel a bechid “el losisiu a deruchelled.”³ Tia denguu er ngak, eng diak doruul a ngii di el meklou a ultutelel el tekoi el kirel a ikal kldei el ngerachel e lak a kltalreng lobengkel a bechid.

Sel kot el bakes er tial bo doruul er ngii el mo nguu a klaumerang er a Rubak a mo oumerang er Ngii. A profet el Nephi a olechotel tial blekeradel er sera loluluuch: “Rubak, a kumerang er kau, e oumera er kau el mo cherechar. Ng diak bo kumerang er a di chad.”⁴ A Nephi a meral mla er a rengul el meruul a soal a Rubak. A lmuut el bebil er sera ledu el kmo ngii a mo “remuul a ikel tekoi el Rubak a mla choderchii,” a Nephi a dimlak el mesim er a telbilel el mo mengedmokl a urerel, el ulecholt er tial tekoi: “Me sel sekum a Rubak a kiei, me kid me kede kiei, eng diak de bo er a demad er a chereomel dil mereko de kedmokl aikel Rubak a uleldurch er kid el mo meruul.”⁵

Le uchul a Nephi el mle kot loumerang ra Dios, a Dios a mle klou loumerang er a Nephi. A Rubak a ulemekngeltengat er ngii er a Chedaol Reng el ngilsouir ra klengar er ngii, ma telungalek er ngii, ma rechedal. Le uchul a Nephi el ulemtebechel loba beltikelreng ma llemalt e milngedmokl e omekerreu er a telungaek er ngii ma rechad ra beluu, ng milluches, “Aki mle kiei el ngara deureng.”⁶

Ng mle soak el melai er a kuk uldesuel a redil el kirel tial tekoi, me a kulengit er a reteru el ngelekek el redil lolngeseu er ngak. A kulengit er tir mel beskak a tang malechub eng eru el tekoi el kirel a osengir er a klaumerang el ual klou a ultutelel er a chebechiil me a klengar er a telungalek. Aikakid a uldesuel a Lara Harris me a Christina Hansen.

A kot, a Lara: “A tara klou a ultutelel tekoi sel kudengei el kmo a sils er a bechik, a lolilt a tekoi lolecholt a omenguul me a beltikereng el bedul ngak. Sel ki moumerang er a tang lokiu tial teletael, eng budech a blimam, meng sebechemam el dmak lomekeroul er a telungalek er kemam.”

Chelechang uldesuel a Christina: “A oumerang er a ta ra chad a osisiu ngii me a klaumera er kid er a chad. Sel lak tial oumerang me a klaumerang, eng ngarngii a dakt me a oumededenger. A denguu er ngak, a tara kot el klou a klengeltengat el knguu sel kumerang er a bechik a budech—ng budech er a uldeusek el medengei el kmo ngii a meral mo meruul a ikel kdilung. A klaumerang a meskid a budech, beltikelreng, e sebechel a beltikereng el mukeroul.”

A Lara ma Christiana a dimlak el ues a ikel liluches a tang. Ng kora kmal soak e leng mle chad me ngii e omes a klengeltengat ra budech er a blirir el ngii a morngii alsekum eng sebechir el oumerang er a becherir. El uaikel mla mocholt el okesiu er a rengelekek, ea llechul a klaumerang a ngarngii a klou a le relii er a omekdubech er a blai el chemau a Kristo.

Ak dirrek el mle dmeu a renguk el kiei er a blai el chemau a Kristo er sera kurael me klou el demak a milngull er a priesthood er ngii meng ngiluu a klaumerang er a telungalek er ngii lokiu a “melemalt el reng.”⁷ Msall e kuuchais er ak siliseb er ngii er ak ngeasek el ochotii a klemengetel a taem el chedam el ungil medengelii e oltirakl er tial llechul a klemerang el telketokel lobengkel a llemalt el ngarngii a relii er a delengcheklel.

Se er ak sal kekerel buik, ea demak a milkdebechii a kombalii el meruul a di ngii loureor el mesil. Tial kombalii a luchesii, mebii, e toketek aikal dingii loureor el mesil el liueklii a beluulechad.

Se er ak ngalek er a skuul, ea demak a mle soal a bok meduk el oureor. Ng dirrek el mle soal a bok meduch er tial kombalii er a uchelel el mora rsel. A mle kot el urerek a mle mengedmokl er er tial basio e mengesbereber. Ak dirk dobedebekii sel techall el mlo mengesbereber a benzio el betok el taem er ak ngara skuul.

Sera kbora ngarbab el skuul, e ak mle ngoriakl el mo merutech a ureor. Ak mle omuchel el mesuub el menguiu a blueprint e orrurt a meruul a mesil. Uriul er ak tobed er a ngarbab el skuul, e ak mlo er a daingak e mochu missionary. Sera bo krei el merko el missionary, e ak liluut el mo er tial ureor. A kuluusbech a udoud el mo cheral a skulek er tial merael mei el rak.

Tara klebesei er a dirk blok merek el ngara mission, e ak mle oureor er a factory e a demak a ulemekedong er ngak el mora obis e uleker er ngak alsekum meng soak lobengkel loureor el mora Los Angeles. Tia ketengel el demak a oleker er ngak lobengkel loureor el mora tara basio. Ng ka bai mocha mechikak me ak mora buai lomtechei er tial kombalii.

Uchei er a ki morael, eng uluuchais er ngak a bebil er a tekoi el kirel ngika el sebechel mo beches el okiak er kemam. A kot, e tial kombalii a kedelal leng ngara betok el beluu. Ongerung, e tomekbeches a mesil er tir er a betok el beluu lolab a beches el klekedall. Ongedei, ea kombalii er kemam a dirkak a tang mel loureror el kirir. A sel mong me ngulebongel, ng kel kot el ngarbab el chad ra obis loungerachel lomechar a klekedall a ulemekedong er a miting el mo omes a cheral a beches el klekedall. Tial miting a meskemam a ua bol beches e klou a belkul el techall el mera kombalii er kemam.

A uriul er a kibo a ra Los Angeles, e ngak me a demak a mlora ngarbab el hotel el mlora miting. Sel kot el ngara ulecherangel a mle kiram el mesaod e omes er a llecheklel me a telengtengil tial ureor. A mle ongerung el kimosaod er ngii a komakai el mo teletelel a ureor, uldimukl oleiull aikal klalo me a sils el mo olekerd. Sel mong meng ulebongel a mlo omes er a cheral, el mo uangerang me a mo telelelel. Tiakid sel kora mlo ngodech.

Ngkal chedal a komablii a silodii el mer kemam el kmo a ki muldersii el char a kmal ngariou er a ikel rokui el mlodars. Ng, mlo ngodech, e ouchais er kemam er sel mle ongerung el ngariou el char. Nguleker er kemam el kmo ng sebechemam el lemuut el nguu tial kimuldersii e kudmeklii el muut el nguu el mei. Ng dilu el kmo a mo beches el cheral a kirel di telkib el ngariou er sel ongerung el ngariou. Ng uluchais el kmo tial beches el char a ki bo momii el tebodech a mo blingelel a tang. Ng millekoi el kmo tia moungil er a rokui el chad. Ng moungil ra kombalii er kemam e le ng mo sebecham losiseb a betok ludoud sel dongaisisiu er a mle kot el char. Ea kombalii er tir a dirrek el moungil e le te dirk mo oureor lobengkel a choba kot el ngariou el char el kombalii. E dirrek, el moungil er ngii leng monguu a blingelel e leng kildmeklii tial kma lungil tekoi.

Seikid eng milskemam a post office box er ngii el sebecham lodurokl a ududel. A uriul er a ikal rokui, e ngulemes er a demak e uleker, “Me tiang mo uaisei?” Ng mlo mechas a renguk, e le a demak a mlo dechor, e orkedii a chimal, e kmu er ngii el kmo ng mo ouchais er ngii ruriul.

A uriul er a ki mtobed er a miting, e a ki ngilasek er a mlai, e a demak a ulemes er ngak e oker, “Kabong, ngera momdasu e ng kired el rulii?”

Me a kulenger el kmo a kumdasu eng diak el kiram el kongei er tial tekoi.

Me a demak a uleker, “Ng diak mkora omdasu el kmo ngarngii a ngercheled el mora rokui el loureor lobengked er a urered el kirel lungil?”

Sera kumdasu er tial keril ruchei er a kunger, e ngulenger er a ker er ngii. Ng dilu el kmo, “Morrenges, e Rick, sel tal omechetakl malechub e ke oudur a llemalt, eng kmal meringel er kau a lmuut er a uchelel. Ke le bo muruul er ngii, mal di tang meng kmal diak.”

Ma uchul e ak kuuchais er tial tekoi a belkul a kmo ng dirkak a tang me kubes aikel demak a ulsisecheklak er ngak er tial kot el ureram el mora tara beluu. A kuuchais er tial tekoi lolecholt er a klemengetel a taem el dongetikaik sel de chedam. Ke locha sebechem el mesa sel klaumerang er ngak er a demak e leng sel llemalt el ngara rengul. Ng dirrek el ultirakl aikal tekoi er a kuk di klengar er ngii lobengkel a delak, rengelekel, me a tirkel rokui el mlo medengelii.

Rodam, tia nglunguchek er chelechal kesus el kid el rokui a mo kot el mesang a klaumerang er kid er a Rubak, el uaikel lullecholt a Nephi, e okor ngokiu a llemalt er a rengud e kede uker er a klaumerang er a Rubak, me a dirrek el klaumerang er a rebechid me a rengeleked. Sel bodungil medengelii e doltirakl er tial llach er a oumerang el teleketek lobengkel a llemalt, e kede mo oltirakl er a chedaol telbiled. Ke er dirrek el moungil el omtebechel er a telungalek er kid loba beltikelreng me a kldung, e omesterir a lousbech ra klengar, e omekerreu er a telungalek er kid er a mekngit er tial beluulechad. Aikal klemerang ak sioning el ngara ngklel a Jesus Kristo, amen.