A Rubak Omtebechel er a Ikelesia er Ngii

Betik ra renguk el rodam e loba priesthood ra Dios, e lechal kesus eng soak el melekoi el kirel a klebokel el rael el Rubak sel lomtebechel ra Ikelesia er Ngii ra beluulechad. Kom di medengei a ikel suobel. Nglunguchek me a Chedaol Reng bol beketakl leko er kemiu.

Kot, a Jesus Kristo a btelul a Ikelesia er tial beluulechad.

Ongerung, Ngii e a omtebechel ra Ikelesia er Ngii er chelechal taem el mengedecheduch ra re mla mokedong el profet, lokiu a chedaol ocholt.

Ongedei, Ngii a uldars ocholt el mora re profet ra uodel el taem, e direke uaisei, e melmolem el mong.

Ongeuang, Ngii a uldars ocholt el mo er tirkel ngara cheungel omengederede el profet er Ngii.

Ngokiu a ikal suobel, e kede mesa el kmo a omengederdelel a Ikelesia er Ngii a ngeuuil a klou e klebechel el klaumerang ra rokui el mesiou er Ngii er tial beluulechad.

Tiakid, ng ngeiuul a klaumerang el moumerang el kmo a milkiis el Rubak a blerk osengel meliuekl ra ikel medekdubech er a Rengedel. Ngoeak a klaumerang el moumerang leng Ngii e a omekedong ra re mechitechut el chad elmo mesiou a deruchal e lolterkokl. Ngoeak a klaumerang el moumerang leng Ngii a ungil medengelterir a rechad lomekedong er tir, a duch er tir ma klisichir, e diak el eleuid sel lolutk.

A ika sebechel lou mededenger el mildung el tekoi el mora rebebil—a omdasu el lokodongir a mle eluid ma kuk tirkel lomdasu ra lodengterir el diak el sebechir el ngara ikal deruchal el mlo kedong el mesiou ra rengedel a Rubak. Me kungelechell a ikal leru el delbechel me msmall el mengetiit el merkmo a mesa el moungil sel lesa a Rubak. A mongetiit e kousbech el bai, bo modongei el kmo ke ngarngii a klisichem el ngmai ocholt e ouedikel er ngii e blekebek a medam.

Ngoeak a klaumerang el ngmai e ouedikel ra ocholt. E oeak a lmuut el mesisiich el klaumerang el moumerang el kmo a Rubak a omekedong ra re mechitechut el chad elmo mekrael er kau. A moktek er chelechal kesus a mebii a klaumerang er kau ma Dios el bekrolau ra omesiungem elmo re Ngii. A orechudel, a urungulek el mebii a klaumerang er kau el Rubak lomekrael ra re mechitechut el chad el Ngii a ulemekedong er tir elmo mesiungui

Ke locha momdasu, el kot, a uai tial klaumerang a diak e lorechudel el toketekii a Ikelesia ra Rubak ma rengedel. Engdi, kemo mesang—el diak el iior ra ngerchelem ra priesthood, a le blol profet ra Rubak malechub eng beches el loba Aaronic Priesthood—sel klaumerang a usbechal.

Domuchel el kmo a klaumerang ngera moktek el kirel a teachers quorum president. Ng klou a belkul er ngii mel loumerang el Rubak a milkidongii, el medengei a ikel elitecchetul ma klisichel. Ng kirel ngarngii a klaumerang er ngii el ngikel chad e luldersii okedong a ngiluu a ocholt e lokiu a Reng er a Dios. A re keldemel ma rechedal a chelchad e le ngarngii a ousbech ra osisiu el klaumerang e loltirakl er ngii e uldelomel a rengrir.

Tial luldellomel el reng a kilsang ra kekerei el buik el dengchokl er bita ra deacons quorum presidency ra tutau ra tara Sandei. Ng mlo beches el melchesir. Tial chelchad ra re ngeasek a dilak el kausisechakl. Te milsaod a betok el rolel e te kutmeklii a ongtil a bishop el nguu a mechitechut el buik el lmuut el mera ikelesia. Uriul loluluuch el chadecheduch, e te milsa ngerchelel ngkal melchesir mel bora blil ngikal buik el direkak el ngara miting el siotai er ngii.

Ngkal melchesir a diak e lodengelii ngikal buik, engdi ng medengelii a tara chad er a blil el mechitechut e ngkel imong a diak el chad ra ikelesia. Ngkal melchesir a bekikl engdi diak el medakt. Ng medengei el profet ra Dios a ulengit ra oba priesthood me losiik ra ririid el sib. E ngii a rirengesii ra nglunguchir a re meredelel. Ng rirengesterir el kongei ra ngklel ngkel buik e ngii.

A kulmes er ngii el merael ra rael el mora blil ngikal mechitechut el buik. Ng merael el mekekokil eldi ngii ma le kirel a kengaol. E a lobiteklang eng ngii me ngikal buik, e lungil a klikm er ngii. Ngdiak kudengei el kmong mle medengei, engdi ng mlong loba klaumerang el meruul a urrelel a Rubak. Seikid el klaumerang a mildalem ra rengul e meloseb ra rekil elmo misionarii, e chedam, e meredel ra re ngeasek el chad, e bishop.

Ka mei e desodii a uai tial klaumerang el ngara ututelel mora bishop. A bishop a bebil ra taem eng mokedong el mesiou ra rechad e lungil medengelii. A rechedal a Ward a ngarngii a lodengelii er ngii ra elitechetul ma reng el mesisiich e lobengkel, e te medengei el bebil ra rechad er tial ward a sebechir el mlo kedong—le te locha ungil a skulir, ulsemuuch, ungil mengedecheduch, malechub e tungil chad.

Tirkang a kirir elmo medengei ra okedong el mesiou a ngerchelel a bishop a mlei el mlara Rubak, lokiu ocholt. A lak a klaumerang er tir, e a bishop el mlo kedong ra Dios a mo meringel el ngmai ocholt elmo ngosuterir. Ngii a mmo diak el sebechel mo ungil a lak a kloumerang er a chad er ikelesia el mesiou er ngii.

E ungil, leng ngarngii a tara rael. Momdasu ra mesiungel a Rubak ra King Benjamin, el iltekelterir a rechedal el mouchul. A rengrir a rechedal a mildemedem e lokiu a klaumerang er tir el kmo ngii a mlo kedong ra Dios, diak el yor er a klechitechetul e a tekingel a mlara Dios. Ke medengei el rechad a dilu el kmo: “Oi, toumerang a bekl el tekoi el King Benjamin a milekoi er tir; … me tungil medengeia el uaisei e klemerang, leng sel Reng ra Rubak, lolab a Klisiich, me tem la bult, malechub eng rengrir, meng diak el sorir el meruul a mekngit, engdi te sorir melmol el meruul a ungil tekoi” (Mosiah 5:2).

A meredel el soal el meleketk er a urellel a Rubak, e a rechad e loumerang el kmo ngii a mlo kedong ra Dios a kirel mesisiich ersel losengir ra ikel elitechetul ma ngesengesel ra klechad. Ke medengei el milkerang a King Benjamin ra losaod er a deruchelel el mengederedel:

“Ng milsubed er tir el kmo ngii a dimlak el lolach er tir me loltirakl er ngii, me bol medakt er ngii, malechub e lomdasu el kmo ngodech er a rechad.

“Meng melekoi er tir el kmo ngdi uai tir, lochau a bekl el secherel a bedenged ma uldesuel; engdi ng milngilt er a rechad, e milchedaol ra demal, e mo cheuarm ra imal a Rubak me bo longederedel el king ra rechad; ng dilu el kmo ng selbechakl e lulmecheliu er ngii e loeak a mesisiich el klisichel a Rubak, elmo mesiou ra rechad loba mui el klisichel,uldesuel, ma reng el Rubak a milsang” (Mosiah 2:10–11).

A mengeteklem ra Ikelesia ra Rubak a momes er ngii eng kora mechitechut e hutsu malechub esel momes eng locha mesisiich e ulkerael. A klemerang a bekl el meredel a uldekial a ikal teletael ma lmuut el bebil. A mo ngosuterir a re mesiungel a Rubak el mokedong elmo mengetakl er kid a sel dolasem e lomes er tir el uai e a Rubak sera le Ngii a ulemekedong er tir.

A Rubak a mesterir a re mesiungel el lungil. Ngii a mes a klisichir ma ngar mederir el taem. E Ngii a medengei el kmo a ikal blekerdelir a sebechel mengodech. Ngii a dirrek el medengei el mekerang a le mengodech e lokiu a teletael lokiu ra rechad el longetakl er tir.

Ke locha mla soiiseb er a blekeradel el mlo mesisiich le te rechad el kau a mlo kedong elmo mesiou er tir. A tara taem e ak mlo kedong el bishop ra re ngeasek e mesobil chad. A kul mdedenger el locha moktek ra Rubak a kirel a ikel mo mengodech a bo kulngeseu er Ngii el sumekchelterir malechub eng ngikel lomelodech el Ngii a medengei el tir a remuul el kirek.

Ngmo tmurek ra diak betebengar, e ngoumesind er tirkal ngeasek el chad ersel ward a omilkingir a ua de dul km oak mlo kedong ra Dios el kmal di kirir. Te milles a elitechetuk engdi tulmes el ngelakl er ngii.

Ak lotkii a ta el ngeasek el sechal e lulengit a ngeseu e kirel a lolilt ra skulel. Ng mle ketengel ngara skuul er a kmal ungil daingak. Ta el sandei ruriul eng, klitmeklii el me omes er ngak.

Ma le bel siiseb er a obis, e ak kilbetiekl ra lolengit er ngak, “Bishop, ng sebeched el meluluuch ruchei ra de chadecheduch? E sebeched el mo tubeuach? E sebechek el meluluuch?”

Ak kilbetiekl ra ikal longtil. Engdi nglunguchel a blok mechas a renguk er ngii. Meng miluluuch el uai tiang: “Demam ra Babeluades, Kau a medengei el Bishop Eyring a ulengeseu er ngak er tial mlo merek el sandei, e dimlak e loureor. Kulengit me momekrael er ngii me lodengei el ngera bo kuruul.”

Ke locha klik mechur ersel tekoi, engdi ngak a diak. Ng mle medengei el kmo a Rubak ngera soal a bo loruul. Engdi ng milnguul er a obis ra bishop ra Ikelesia ra Rubak e locha soal ak kisa techall el ngoriakl elmo uldellomel el ngmai a ocholt ersel lokedong.

Ngulureor. Ma rechedam elmo dechor e ki bom dengchokl, e a ocholt a mle rengak. Ak silbedii ra kulchesuar er ngii el Rubak a soal a bol rellii. Ng di mle teruich me eiai a rekil, engdi ng mle ultebechel er a reng.

Ngdi mla medengei el diak e lousbech el lomes ra bishop el kirel tial mondai. Engdi ng mla subii el lolterkokl er a mesiungel a Rubak molmuut ra ikel elitechetul. Ng mirael mo stake president. Ngdi mlak e lobes e ulterkeklii sel suobel el kim silubii el terung: alsekum meng ngarngii a klaumerang er kau el Rubak a omtebechel ra Ikelesia er Ngii e lokiu a ocholt elmo er tirkel mechitechut el mesiungel el lomekedong er tir, e a Rubak a mekengii a chesmerel a babeluades elmo re ngii, e Ngii meng rullii lekor kau.

Ngokiu sel teletael, e ak silubii a suobel el kmo sel klaumerang ra rechad el dosiou er tir, a le bebil ra taem e ngobdois ra kuk kid, a otakl ocholt sel dosiou ra Rubak.

Ngarngii a tara ksilubii. Alsekum me ngkel buik a mlo mengetiit er ngak leng dimlak bsang a ungil luldasu ra kot el taem, eng dimlak el luut el mei. Maleuaisei, meng mililt el diak e longetiit er ngak, eng ngiluu sel lulterkeklii a mle soal.

Me re chelechang e a tara suobel ersel blekeradel a mla ngosukak. A klaudengei er ngak, ngii a diak a tal bla louchais ra ngidil chad er a ward el kmong dimlak kulngeseu lungil ra kot el taem. Ulekum meng rirelii sei, eng ngilas a klaumerang ra rebebil ra ward el loumerang a ulekrael el mora bishop.

Ak melasem el diak kungetiit ra mesiungel a Rubak malechub ak mesaod a chemolt el elitecheterir. E dirrek el kulasem e lolsisechakl er seikid lokiu a okesiu el mora rengelekek. A President James E. Faust a uldersii a llach el kulasem el lousbech er ngii ra klengar er ngak. Kudersii lekor kemiu:

“Ng … kired el melkakl e olterkokl ra re mengetekled, leng tir … a ‘mlo kedong e milngilt.’ A rokui el chedal tial Ikelesia a sebechir el ngmai a ngeseu ra bishop malechub eng branch president, stake malechub a mission president, ma President er a Ikelesia ma re keldemel. Ngdiak a tae r tirkal rodam e lulengit mel mokedong. Ngdiak a cherungel. Engdi te mesiungel a Rubak, el mlo kedong er Ngii e lokiu er tirkel sebechir melai a ulekrael. A re mo kedong, moterkokl, e mechedaol a kired el dolterkokl e melkakl er tir.

“… Lak omenguul ra re mengeteklel a ikelesia a mla tomelterir a re betok el cheuarm ra reng elmo mechitechut el remiid. Dolchib osenged ra ngidil de ues el telmall, kengterir, telitur ra rechad el mlo kedong elmo mengederedel el kid, e dolkakl a ikel ngerachel e lolab” (“Called and Chosen,” Liahona, Nov. 2005, 54–55).

Sel llach a omekngeltengat ra re mesiungel a Dios e lokiu a bekl el tekoi.

Sera uchelel a Ikelesia ra Rubak, e a re meredel el kmeed er a Profet Joseph Smith a mlo muchel el mesaod a kengtil. Molmuut ra ike bla le ues e medengei ra deruchelel ma Rubak, a blekerdelir el lomtelub e mechechei a ulebriid el kora mekngit el rakt. A tara re Teruich ma terung a ulechotii er kid el rokui sel lolkael ra klaumerang ma keldung el kired e lobang alsekum e kede mesiou ra rengedel a Rubak.

Tiakid sel cheldechedechal: “A rebebil ra re elders a milkidongii a miting ra elsel a templo elmo er tirkel lomdasu a Joseph Smith a mlamo mekngit el Profet. Te mlo sorir el melilt ra David Whitmer elmo beches el meredel ra Ikelesia. … Uriul me lorenges a ikal mondai el kirel a Profet, e a Brigham [Young] a milkiis e sioning, ‘Joseph a mle Profet, e ngak a medengei, e te locha mo mekngit e loleiis er ngii e melekoi el mekngit er ngii elmo ra ikel sorir; ngdiak el sebechir el torudii sel lokodongel a Profet er a Dios, te di tir el temall a klisichir, lochedii sel lomak er tir elmo ra Profet elmo ra Dios, e di tir el ngobeit elmo ra beluu ra ngau”’ (Church History in the Fulness of Times Student Manual [Church Educational System manual, 2003], 2nd ed., 174; dirrek el mesa Teachings of Presidents of the Church: Brigham Young [1997], 79).

Ngarngii a omak el somesemid elmo ra Rubak sel dosiou. Ngulech er a ikel de ngarngii el mlo kedong elmo mesiou ra renged, elmo er tirkel mlo kedong el mengederedel er kid ra priesthood, elmo ra profet, e ngii e a lechet elmo ra Rubak. Ngoeak a klaumerang ma kle ngariou reng el mesiou ersel basio me kede mlo kedong, el moumerang el kmo a Rubak a milkidongid me tirkel mengederedel er kid, e mo olterkokl er tir e loba mui el klaumerang.

Ngmo rengii a taem, eldi ua ikel sils er a Kirtland, el bo dousbech er a klaumerang e melmalt el uai a Brigham Young elmo mesiou el kirel sel Rubak a milkidongid el kirel, kedung elmo ra profet er Ngii e mor tirkel meredel el Ngii a ulmekedong er tir.

A kuchais er kemiu ra klemerang e dmeu a renguk el sioning el kmo a Rubak el Jesus Kristo e a omtebechel. Ngii e a mengederedel ra Ikelesia er Ngii ma re mesiungel. Ak sioning el kmo a Thomas S. Monson a di imol chad e loba el ouedikel a rokui el kisel a chedaol priesthood ra beluulechad. E ak meluluuch el kirir a re ngariou a rengrir el mesiou el ngara rengrir e ungil ram la moluut el Ikelesia ra Jesus Kristo, e Ngii omekrael er ngii. Ak medengei el Joseph Smith a milsang a Dios el Chedam ma Jesus Kristo. Te milngedecheduch er ngii. A ikel kisel a priesthood a mloluut el kirel lomekngeltengat ra rokui el ngelekel Demad ra Babeluades. Ng ngercheled e klaumerang er kid elmo mesiou ra ikel de ngarngii ra moktek ra Rubak. Loba ngklel a Jesus Kristo, amen.