“Ngar ngii a Urerem el bok Beskau”
A dersta er kid a ngarngii a klou a belkul ngerchelel el kirel a urerel a Dios.
A Dios a millekoi, er a Moses, el kmo ngar ngii a urerem (mesa Moses 1:6). Ngar ngii a tang me bo momdasu el Chedam ra Babeluades a ngarngii a urerel el bo moruul? Ngarngii a meklou a ultutelel tekoi el Ngii a mla kudmokl el kirem—el kmal di kirel kau—a mo kudmokl? A kuuchais el kmo a nger ra ikang a choi!
Ka de nguu ra Girish Ghimire, el milechell e mukeroul er a beluu er a Nepal. Sera le ngeasek, eng mlora omesuub ra beluu er a Sina, a le dilak el mesuub a ulechotii a ebangkelio er a Jesus Kristo el mo er ngii. Meng ka, el Girish a mlora Brigham Young University loureor el tebedechel a skulel e miltik er a mlo bechil. Te mlo kiei er a Salt Lake Valley e rirdelterir a reteru el ngalek er a Nepal.
Betok el rak ruriul, ea betok er a 1,500 el mlo diak a delengcheklir el ngara Nepal a milengai el mora Utah,1 Girish a mlo mukrael el mo olngeseu. Meng ngungil medengei tekingir me a siukang er tir, a Girish a mle olngeseu el oleiuid a tekoi, olsisechakl, e omekrael. Omerolel a taem el mla mekedmokl a delengcheklir ra beluu, e a rebetok er tirka el Nepali a mlo rengii a klemeriar reng er tir er a ebangkelio. A ikelesia el lousbech a tekoi er a Nepal a mlekedmokl, e a uriul ea Girish a mlo mesiou el branch president er ngii. Ng dirrek el mle oureor er a oidel a Babier er a Mormon el mo tekoi er a Nepali.
Kau ng sebechem el mesa Chedam er a Babeluades el kildmeklii a Girish e ousbech er ngii?
A Dios a Ngarngii a Urerel el mora Derta er Kid
Rodam me a rodos, ngarngii a meklou a ultutelel el ureor el mlara Dios el mera derta er kid. A tekingel a President Spencer W. Kimball a mora a tal redil a klemerang el mora rokui el chad meng ulsisechakl el kmo: “Uchei er a de mei er tiang,e [ke] de ngilai a urered. … Ke de mla obes ikel komakai el teletelel, ng diak el bol temelii a klemerang el kid a kilengei el mo meruul.”2 Ng meral lomekellomes el klemerang! A Demad er a Babeluades a ngarngii a keltukel e meklou a ultutelel el tekoi el kau me ngak a kired el mo remuul (mesa Efesus 2:10).
Aikal chedaol el ureor a diak el dil bora remekesai e mecheleoch ng bai mora rokui—el diak el iior er a chiro ra bedengem, rekim, beluam, ududem, deruchellem ra buai, malechub a ngerchelem er a Ikelesia. A bek el chad a ngarngii a ngerchelel el kirel a berkel a urerel a Dios (mesa Moses 1:39).
A rebebil a mo oker el kmo ngkal Chedam er a Babeluades ng sebechel lousbech er kid el mo mengedmokl e odars a meklou a ultutelel ngeseu. Ka di, bo molbedebek, Ngii a blechol el ousbech er a redi hutsui el chad el mo meruul a meklou el tekoi (mesa 1 Corinthians 1:27–28; D&C 35:13; 124:1). Kid a oderuchel ma klisiich a ngar kid el mo olekiis er a remelemalt (mesa D&C 58:27–28).3
A President Russell M. Nelson a silodii el kmo:
“A Dios a klou a ngara uldesuel el kirem el diak el uaia ngara uldesuem el kirem! Ko mla medechel el kirel tiaikid el taem ma basio. …
A Rubak ousbech er kau el mo ngodechii a beluulechad. Sel mkengei e moltirakl er a soal kirem, e ke mo metik er kau el remuul aikel diak el meruul.!”4
Meng mekera bo dodengelii e doruul er a ureor el Dios a soal a doruul er ngii? Me bok beskid a klouang el osisechakl el ngii a mo ngosukid.
A Osengem le bo er a Rebebil
A kot, a osengem le bora rebebil. Ng sebeched loltirakl er a Kristo, “el ngii a milrael el meruul a ungil” (Rrellir 10:38; dirrek el mesa 2 Nephi 26:24).
A uriul er a bok rei el mle missionari, e ak mlo oureng aikel kulruul el moktek er a bek el sils el mle soak. Ng mle kirek, el oltirakl a telbiil el kulab, mo nguu a skulek, omuchel ra telungalek er ngak, e sikii a urerek. Eng di ak millebedebek el kmo kele lengarngii a lmuut el bebil, el tokubets, el Rubak a soak a bo kuruul. Uriul er a kulbedebek er ngii el betok el buil, e ak chiliuii tial bades: Alsekum meng soam, e kemo dongu el meruul a moungil er tial telecheroll (mesa D&C 11:8). A Chedaol Reng a ngilsukak el mo ungil medengelii el kmo a meral moktek er a chedaol ngerachel a kired el mo omekngeltengat er a rebebil el “meruul a ungil.”
Ng sebeched el mes a ikel bo dolib er a klengar er kid—el ua ngera kmo mesuub, ngera lurreor a bo kuruul, malechub e ak mo kiei er ker—el osengem er ngii a olngeseu er a rechad.
A tara telungalek a millukl el mora beches el mats. Ng dimal losiik er a blirir er a rebetok a remerau er ngii el basio, te bai mlukrael el mora beluu el ngii a klou a ulsebechel a tekingel a buai me a udoud. Aikal betok el rak, ea Rubak a oureor lokiu tir el lolngeseu er a rebetok el chad e omekedechor er a ward me a Stake.
A toktang a mlarngii a basio er ngii lomes ra resmecher e mlukrael el mo ieklii a tal sils er a chelsel a tal sandei el mo omes er a rsmecher el diak a ududir. Ng mle mededaes a rengul ng kal chad el lomekngeltengat er a rebebil, ma Rubak a ngilsuterir el mo olngeseu er a rebetok el dart el smecher, e mle sebecherir el kutmeklii e mle klou el klengelakel er tir.
Bo modengei e bo Momekdubech a Chedaol Sengk
Ongrung, bo modengei e momekdubech a chedaol sengk. A Chedam er a Babeluades a milskid a ikal sengk el mo ngosukid el mes, remuul, e oldeu a rengud er a urerel el Ngii a omeskid.
A rebebil a melchedech, “Ngarngii a ngii dil sengk el kulab?” Ak lemuut, a nger a choi! A bek el chad [ma redil] a ngiluu a sengk el mlara Reng er a Dios … me lolengeseu ra rechad lobang (mesa D&C 46:11–12; smisichii a belkul).5 Ng betok el sengk er a Chedaol Reng a llechukl er a chedaol llechukl (mesa1 Korinth 12:1–11, 31; Moroni 10:8–18; D&C 46:8–26), el muut el ngarngii a betok.6 A bebil er ngii a rua, bekokouii, ngarngii a urungulir, kladikm er a rechad, meduch el mengedmokl, meduch el melekoi e meluches, ungil lolsisechakl, meduch a rengul el chad ra ureor.
Me kede mekerang e mo medengei a sengk er kid? Ng sebeched el lomes a ikel klengeltengat ra ucheled, oker er tirkel lungil medengelkid, e mes a ikel de meduch er ngii e soad. Sel klou a belkul, e kede olengit er a Dios (mesa Jakobus 1:5; D&C 112:10). Ngii a medengei a sengk er kid, le Ngii a ngilai el meskid (mesa D&C 46:26).
Sel bo dodengei a sengk er kid, eng ngarngii a ngercheled el lomekdubech (mesa Mateus 25:14–30) Mo lmuut er a Jesus Kristo meng dimlak el mecherungel er a kot, ng milemolm el ngara ta ra krasia el mora tang (mesa D&C 93:13).
A ta el kekerei el chad a liluches a sunga er a ikelesia le bla rengii el kirel a miting ra sacrament. Sel kot el soak a sunga er a Osobel, a llecheklel a bereked er a blik. Ngkal lodam a tilketek e ousbech a sengk er ngii ra sunga. Ngulkiu ngii, e a Demad ra Babeluades a ulemekrael ra rechad ra ikelesia el smisicheterir ra omengull er tir e mo ngoriakl ra omesiungir.
Bebil ra taem e kede melchesuar el kmo ngdiak a tokubets el klou el sengk el dobang. A telirem a rengul el derrir a mekekerei el ngalk a mlo melchesuar a uai tial teletael. A ta ra klebesei eng ullengit, “Rubak, ngera sel kuk urerek?” Ng ngulenger, “Momtab er a rebebil.” Ng mle sengk er a reng! Ng mla metik er a deureng sel lomtab er tirkel blechoel el bla dobes er tir, e a Dios a oureor e lokiu ngii lomekngeltengat er a re betok el chad. A bebil er a sengk a locha diak el meklou a belkul a denguu er a osengel a beluulechad, eng di ng meklou a belkul er a Dios me a Urerel.7
Mchebengelii a Ringel
Ongedei, mchebengelii a ringel. A ongarm el de ngarngii a ngosukid el metik e mengetmokl el kirel a ikel ureor el Demad ra Babeluades a meskid. A Alma a silodii el kmo nguriul er a betok el ringel, e a Rubak a rirelii el mo donguu er a urellel (Mosiah 23:10).8 El di ua Osobel, el sel tngakireng el tilngetengii meng sebechel lolngeseu er kid (mesa Alma 7:11–12), e kede ousbech a klemedengei er kid el de ngilai ra desiseb ra ongarm el mengususeu, melisiich, e omekngeltengat er a rebebil.
Nguriul ra mle meduch el merreder er a klou el obis ra bo lak loureor, eng milnguiu er sel patriarchal blessing er ngii e milchesuar el mlulekrael el mo omuchel lolngeseu ra rebebil er a re meduch er a ureor el smiik a urerir. (Ngii a dirrek el ngilsukak el metik er a urerek sera luut er kemam ra ki mosiou.) A Rubak a ulesbech er sel longarm el mlo rengii el dodai el lolngeseu er a rebebil, e msang a lmuut el lungil techall.
A mekekerei el kaubuch el chad a mlad a ngelekir ra cheroll. Me te ngara klengit el reng, e te sorir el mo kulii ngkal ngelekir redil el mo olengeseu lomekrael e olsisechakl er a roungalk lotekau osisiu el tekoi. A Rubak a ulureor lokiu tirka lobekel e leng tokubets a klaumodengei er tir, lulekiu a ongarm.
Multuil er a Dios
E a ongeuang, multuil ra Dios. Sel dolengit er Ngii lokiu a klaumerang el ngara rengud, e Ngii a mochotii a chedaol ngercheled.9 Sel tal bo dodengei a ikal ngercheled, e Ngii a ngosukid el kutmokl a ngii el ngercheled. Rokui el tekoi a ngar medal (D&C 38:2; dirrek el mesa Abraham 2:8), sel lungil taem, e Ngii a meskid a techall lungil el kired (mesa Revelation 3:8). Ngii a dirrek el mla odureklii a Ngelekel, el Jesus Kristo, meng mo sebeched lousbech er Ngii el kirel a klisiich el kuk mesisiich er kid (mesa Filipi 4:13; Alma 26:12).
A ta el odam, a bekikl er a uldasu ra amt, a milchesuar el semeriar el mo remuret el mo chad er a buai. Meng mle chetiteuokel el rurt, e ngii a ultirakl ra klaumerang er ngii e ulekeed a klekedall er a rurt. Ma bol merek, eng dimlak el ngesechekl engdi milchesuar el Rubak a milkrolii e smisichii meng silaod a meklou el tekoi lorechudel el kirel a beluu.
A mesobil el chedil, lomekeroul ra rengalk el chitechut, a uleker el kmo ng sebechel moungil lokeed a usbechellel a telungalk er ngii. Meng locha mle meringel, ngii a milchesuar el Rubak a melisiich er ngii el kutmokl a ikal kot lorechudel el ngerchelel el moungil.
Tekoi Lomeklatk
Ngosisiu el taem e a Dios olengeseu er kid el kutmokl a chedaol el ngerachel, e a cherarou a kuk oureor el mengeuid e mengeblad er kid ra klengar el ngarngii a belkul.
A klengit a di bital kot el klou el melibesongel er kid, mengitechut meng diak ke dolchesuar ra Chedaol Reng e torebengid el nguu sel klisichel a reng. Sel bo dongetmokl a ikel lureor el Demad ra Babeluades a mo meskid, eng kired el melasem el di klikiid (mesa 3 Nephi 8:1). Kid kede kiei e lokiu a teletael el Dios e sebechel lousbech er kid?
A Diablong a dirrek el mengeuid er kid lolab a diak a belkul el tekoi. A Rubak a milngelechel ra ngaramong er a milnguteling ra Ikelesia el kmo a uldesuel a cheltekiil er a tekingel a beluulechad ra bai kuk tekingel a Dios ma omesiou el ngii a mla mokedong el kirel (mesa D&C 30:2). Kid kede mechesang er a tekingel a beluulechad me kede mla mesim ra ikel chedaol ngercheled?
Osisiu, a Diablong a mengitechut a rengud el ua dolngesonges. Ngii a remuul a urered el ua le meringel malechub eng chetituokel. E ng di, kid oumerang er a Dios! Ngii a betik a rengul er kid. Ngii a soal kid bo de ngeltengat. A Rubak a omekrael er [kid]; ngobengked, Ngii a diak el chitid (Duterronomi 31:8; mesa el dirrek a Psalm 32:8; ; Osisechakl 3:5–6; ; Mateus 19:26; D&C 78:18).
A Diablong a dirrek el lorrimel er kid el omes a urered el diak a belkul el uaia urerir a rebebil. A bek el ngerachel er a Dios a klou a belkul, e kid a mo metik er a deureng sel “ungil a rengud er sel bla el beskid a Rubak” (Alma 29:9).
Sel Dios oureor lokiu kid, e a cherarou a mo mengitikaik er kid me de ngai a chetengakl ra ngidil lungil lomeruul. Engdi, kid a sebeched lotireklii a klengariou el rengul a Osobel el merrob a chetengakl el kired e bai kobkelii a Demad (mesa Mateus 5:16; ; Moses 4:2). A chad er a simbung ra lolasem e loltobed a chisel a Mother Teresa el kirel a klengar er ngii el mesiou er a re mechebuul eng ngul nger el kmo: “Tia urellel a Dios. Ngak a kora oluches el ngara imal. Ngii a omdasu. Ngii a meluches. Sel loluches a diak a kangester er ngii er tial lureor. A oluches a di modurech sel ngarngii a ngerchelel.”10
Ulebongel
Betik er a renguk el rodam ma rodos, ak siotai er kid el rokui el mo “chemau a Dios … el ua donguu ra llemalt” (Rom 6:13). Sel chemau a ouchais er Ngii el kmo ng soad a lousbech er kid, Ngii bo losisecheklid, e Ngii el roled er a klisiich.
El di blechoel el uaisei, mei me domes el bedul a Jesus Kristo, el melemalt lokesuid. Sera klengar ruchei, e a Demad ra Babeluades a uleker, “Ng techa bo kudureklii?”
Ma Jesus a ulenger e dilu er a Demal ra Babeluades me modureklak (mesa Abraham 3:27; dirrek el mesa Isaiah 6:8).
A Jesus Kristo a kilengei, e mle keltmokel el kirel, e milngetmokl a mle ngerchelel ruchei el kirel mo Osebeled e Olsobel. Ngii a kiltmeklii a soal a Demad (mesa Johanes 5:30; 6:38; 3 Nephi 27:13) e kildmeklii a Ngerchelel.
Sel doltirakl er a okesiul a Kristo e blak a rengud el mo chemau a Dios, e ak medengei el kmo Ngii a dirrek el mo ousbech er kid el smisichii a Urerel e omekngeltengat er a rebebil. Loba ngklel a Jesus Kristo, amen.