Lak Ko Medakt el Meruul a Ungil

Rodam me a Rodos, Ak meluluuch loba ngariou reng el kmo a Reng er a Rubak bo lobengked sel kungedecheduch er a chelechang. A renguk a mui er a omereng el saul el mo er a Rubak, el tiang sel Ikelesia er ngii, el kirel a tekoi el dulmelchesiu er a nglunguuch, olisechakl, me a ungil chelitakl er tial ongdibel.

Sel mlo merek el April [Ongeua el buil], e sel cheldechedechal a President Thomas S. Monson a kmal rirtechii a rengrir a rechad el meliuekl er a beluulechad, el ludimukl er ngak. Ng milngedecheduch el kirel a klisichel a Babier er a Mormon. Ng soal a bo dosuub, domtab, e doruul aikel osisechklel. Ngii a mle yaksok el kmo alsekum bek el sils el dosuub e omtab e oltirakl a llechul a Dios el ngara chelsel a Babier er a Mormon, eng mo er ngii a mesisiich el klaumerang er kid el kirel a klemerang er ngii, me a klaumerang el kirel a ngar el Kristo el mo ngosukid sel dechau a kerior. (Mesa “The Power of the Book of Mormon,” Liahona, May 2017, 86–87.)

Di uai a betok er kemiu, Eak rirengesii a tekingel a profet el uai a lengor er a Rubak el merngak. E, dirrek el uai a betok er kemiu, eak mililt el mo oltirakl aikel tekoi. Serak dirk ngeasek el buik, eak mlo omelchesuar er a sioning er a Babier er a Mormon a tekingel a Dios, ea Chedam me a Ngelekel Sechal a mlo ocholt e mengedecheduch er a Joseph Smith, ea tirkel Apostol er a ngara mong a mlei er a Profet Joseph el mo oluut er a kiis er a priesthood el mera Ikelesia er a Rubak.

Loba tial klaumerang, Engak a mla menguiu er a Babier er a Mormon er a bek el sils el mla mo betok er a okeim el rak. Eleng ngak a mla rulii tiang, Engak a mle sebechek lomedasu el kmo aikel tekingel a President Monson a mo er a tara chad el bai diak el ngak. Engdi, di uai a betok er kemiu, Eak mlo omelchesuar er a profet loutkeu er ngak e siotai er ngak el mo blak a renguk. Betok er kemiu a mla ruli tial kuruul er ngii: meluluuch el ngara rengum, omtab a chedaol llechukl, e melasm el mo mesiou er a Rubak me a rebebil el Kirel.

Sel lungil kekka el mler ngak, me a betok er kemiu, sel ngii a profet a mle yaksok el kirel. Tirkel tir kel kilngei el ngiluu tial omellach el mo er a rengrir a mla rorengesii a Chedaol Reng el kmal bleketakl. Kid a mla metik er a klou el klisiich el lotngakl a olasm e mla mo klou a klaumerang er sera Jesus Kristo bekiis er a kodall, el ngara ebangkelio er Ngii, me a Ikelesia er Ngii.

Chelchal taem el betok a klauedikl er a beluulechad, tirkel mesisiich a klaumerang er tir a diak a lomdednger malechub el medakt e bai omelchesuar er a budech. Oltitrakl er sel omellach er a President Monson a ngar ngii erul tekoi el riruul el merngak: Kot, sel Chedaol Reng el ngii a mle yaksok a rulak el mo oureng aikel mo dubech er a ngar medad el taem el ta tial luldikel er a beluulechad a meral mo klou. Ea ongerung, el Rubak a mla meskak—me a kau—a klou el Beltkil a Rengul el mo er tirkel ngara kerior. Kid a mla omlechesuar er a klou el klemeriar reng el mo olngeseu er a rebebil. Tial klemeriar reng sel kmal mle klou a belkul el sel lurelel me a osisecheklel a President Monson.

A Rubak a mle yaksok er a klou el beltik el reng el mo er a rebebil me a blak el reng el mo er a Profet Joseph Smith me a Oliver Cowdery el ikel lurelir a locha kmal mle oberaod. A Rubak a dilung el kmo a blak el reng el lousbech er ngii a mei lokiu a klaumerang er tir er a Rubak el kmo ngii a uchul a klisiich.

Ng dilu el kmo lak kom medakt el meruul a ungil, ele aikel bo molalm aikel bo moridm. Maluasei, alsekum ungil a delmelel, e ngmo ungil a omeridmem el ngii a mo ngkedem.

Maluasei elak kom medakt el meruul a ungil. E le alsekum a beluulechad me a beluu er a ngau a mo dmak lomtok er tir, ea beluulechad me a beluu er a ngau a mo mechitechut alsekum kemiu [Joseph me a Oliver] a obengkel a Rubak.

A Rubak a dimlak el tomer er a Joseph me a Oliver. Ng bai dilu er tir me lorael e lak luut el meruul a klengit. Ng kirir el remuul a urelir loba black el reng el ngii el lureor a Rubak a mla dmu er tir.

A Rubak a dirrek el dilung momes er ngak lolab a bek el luldasu, elak moumedednger malechub e medakt.

Momtab aikel telemall el belsibs er a Kekengek, me a ultil a deel el ngara Chimal me a ochil. Bol ngar ngii a klaumerang er kemiu e moltirakl a Llechuk, me bol sebechem el nguu sel rengedel a babeluades (mesa D&C 6:33–37).

A Rubak a dilu tirkel meredel el ngii a milutk er tir el kirel a olutel a Ikelesia er Ngii, e Ngii a uchais er kid, el kmo sel doba klaumerang el ngara Rubak, ea omdednger me a dakt a mo dibus; ea klemeriar reng el mo meruul a ungil a mo klou. Sera dekengei er sel siotai er a President Monson el mo ungil kudmeklii sel klaumerang er kid er a Jesus Kristo, e kid a ngmai a klisiich, klemeriar reng, me a blak el reng el mo olngeseu er a rebebil e diak de simbai el kirel aikel dousbech.

Ak mla mesang tial klaumerang me a blak el reng el betok el taem sel tirkel Uriur-klebesei el Santo a mlo cheamu a meringel el olasm. Ua tial okesiu, Ngak a mla er a Idaho sera sel dam er a Teton a meteruud er a June 5, 1976. A ralm a ulmaoch el meriou. Telael el chad chiliis er a keblirir. Telael el blai ma siobai a milteruud. Ngongasireng, el di mle mekesai ra 15 [teruich ma teim] el chad a mlad.

Sel kilsang er sei, Eak mla mesang sel tirkel Uriur-klebesei el Santo a mesisiich sel klaumerang er tir er a Jesus Kristo. Ele te medengei el kmo Ngii a omes er tir, meng diak el medakt. Te mo mechoi a ringelel e bai mo olngeseu er a rebebil. Me te meruul er tiang eleng sel beltkil a rengrir el mo er a Rubak, e diak lolengit a sengk.

Uai tial okesiu, sera dam er a Teton a lemeteruud, ea obekl el Uriur-klebesei el Santo e mla omerael, el mle kmal cheroid er a blirir. Sera rengesii a chai el ngara rasio, e te di mle mereched lobult el mo er a Rexburg, Idaho. Te dimlak lebo er a blirir mel lesang el kmo ngua ngerang, te bai mlo osiik er a bishop er tir. A bishop a mlara chelsel a building lousbech er ngii el recovery center. Ngii a ulngeseu el mengedereder er a retelael el chad el el meremang el ngara bibrurk el bas er a skuul el mo olngeseu.

Tirkal obek a milrael el mo er a bishop er tir e uasei, “Ak ki dirk ke mlei. Bishop, a ki mo er ker e olngeseu?” A bisoph a milsterir a ngklir a telungalek. Tirkal obekl a ulngeseu el loltobed a dechudech me a ralm er a obliil. Te ulngeseu er a mechuadech el mo milekolk el mlo melai a klebesei. Te mocha olenguul me te mlo omes er a blirir. A blirir a ulbechakl er tial imui, e dimlak ngdil ngera mo medechel. Me te di mle mereched lobult el liluut el mo er a bishop er tir. Te uleker, “Bishop, ngar ngii a chad el sebechemam el mo olngeseu er ngii?”

Tial ongasireng er a budech er a blak el reng me a beltik el reng—el bliochel el beltik el reng er a Kristo—a melemolm el ngar ngii el meliuekl er a beluulechad. Ng dilubech er a ikel mle meringel el taem er a oltuub me a olasm sera Prophet Joseph Smith el ngara Missouri. Ng dilubech sera Brigham Young loked er sel omerael el mlara Nauvoo e diluu er a re Santo mebo raikel basio el diak a rechad el kiei er ngii el ngara dimes er a Merikel, el mo kaingeseu el rulii a Zion el mo er a Rubak.

Alsekum meke menguiu aikel cheldechederir a ruchelel, e kemesang el klaumerang a metechir a omdednger me a dakt. E kau a chiluiu el kirel a re Santo el milechei aikel ngerchelir e bai mlo olngeseu er a rebebil el mora Rubak, er a uchei er a luut el mo oungerachel a cheremir el sib me a sersir el dirrekak el mesib.

Ak milsang a osisiu el ongasireng er aikal mlo merek el klebesei er a uriur er a Hurricane Irma a letemelii a Puerto Rico, Saint Thomas, me a Florida, el Uriul-klebesei el Santo a mlo dmak lobengkel a bebil er a klechelid, me a chelechad er a beluu, me a chelechad er a beluulechad e olngeseu er a kedmeklel a beluu.

Ng uaia resechelik el ngara Rexburg, e a robekel el diak el chedal a ikelesia er a beluu er a Florida a ulengeseu er a beluu e bai dimlak longedmokl er a maori er ngii. A rebebil er a Ruriul-klebesei el Santo a bocha lolngeseu el mengurs a teblo el meklou el kerrekar el melenget er a rolir, e tirkal obekel a millekoi el kmo ng kmal mechas a rengrir me te olngeseu er a rebebil, e oumera el kmo a Rubak a mo sobechekelterir er a ngeso el kuk kirel a delengcheklir. Ngika el sechal a ulechais ruchei er a lemei tirkal chedal a Ikelelsia el me olgneseu, el tirkal obekel a mla meluluuch el kirel. Tem la nguu a nger er a nglunguchir el kmo a ngeso a mei er tir. Ng mlei er a di chelsel a tela el sikang.

Ak mla remenges a bebil er a chais el kmo a rebebil a omekedong er tirkel Uriur-klebesei el Santo el loubail a bibrukl el chelchedal a bail el lechukl a Helping Hands [Chim lolngeseu] el kmo “Bibrukl el Anghel.”A tal redil el Uriur-klebesei el Santo a ngiluu a mlim el mo meruul er ngii ea chad el lulngeseu er ngi a ulchais er ngii el kirel a “chedaol okesiul” el tirkel chad loubail a bibrukl al ngilai a kerekar el mla er a mekesekesel, e dilung, te “milngitak a bebil er a chelitakl el kmo ngak a ngelekel a Dios.”

A kuk tara chad er a Florida—el dirrek el diak el chedal a ikelesia er kid—a millekoi el kmo a Ruriul-klebesei el Santo a mlei er a blil er a longedmokl er a di beriid er a komi el mekesekesel e omelchesiu el mesikang, mekeldang, e sokol lemangel. Tirkal mle olngeseu el chad, ngii a melekoi el kmo a, “mle ongasireng.” Ng dimlak di le blak a rengrir loureor e te dirrek el kadereuakl e ungil a rengrir, el diak a ngera longerchir ngii ruriul.

Ak milsang e rirngesii tial dereuakl, er a ieta sils er a Sabadong, er a bo kuldingel er a Ruriul-klebesei el Santo er a Florida. Te ulebail a bibrurk el chelchedal a bilir el llechukl er ngii a “Olngeseu el Chim.” Tirkal ulengeseu a mlo diak loureor telkib e a ki kaiuereked chim. Te millekoi el kmo a rokolem el chedal a stake er tir er a Georgia a mla kudmeklii a teletael el kirel a ngeso el mo er a Florida er sel kesus ruchei.

Te tilobed er a Georgia er a eua el klok er a tutau e ulemekall el tela el sikang, e ulereor el tal sils el mo klebesei, e millatk a lmuut loureor er a bol kukuk.

Te mle kadereuakl e ungil a rengir sera louchais el kirel. A kulmelchesiu er tir el dimlak el sorir a rechad a loureng a sulirer mel sebechir el di meruul a urelir. A stake president a mla mekereklii a chainsaw wer ngii e meluk er a kekerekar el milukel ea bishop a milngeroid a rechelel a kerekar ser a kimngasech er a mlai e kimorael el mo omes er a tara rescue team.

Uchei er tiang, el sera ki morael, ea tal sechal a milrael el mera mlai, e nguu a ulekungel, e oureng a sulam el kirir tirkel rechad lolngeseu. Ng dilung, “Ngak a diak chad er a Ikelesia er kemiu. Meral diak kumerang aikel blam ruul el merkemam. Rubak lomekngeltengat er kemiu.” Ngkel chad er a Ikelesia mle dechor er a bita er ngii loubail a bibturk el bail a di olengesngasech a ongelngelel el uaia lak el soal aikal chetengakl.

Malta tirkal rechad el mlara Georgia a mlei lolngeseu er ngikal chad el diak el loumerang el kmo tirkal chad a mlara tara beluu el me olngeseu er ngii, re dart el Uriur-klebesei el Santo el mlar sel telemall el tebedechel a Florida a mlo er aikel bebil er a part er a Florida e klou a telmellel.

Seikid el sils, Eak mlo melbedebek, e mlo ungil medengelii, sel tekingel a Profet Joseph Smith: “A chad el mui er a beltkil a rengul a Dios, a diak dil lungil a rengul el kirel a klengeltengat er a telungalek er ngii, ng bai osiik el meliuekl er a beluulechad, el soal mo omekngeltengat er a rokui el chad” (Teachings of Presidents of the Church: Joseph Smith [2007], 426).

Kid a mesang tial beltik el reng el ngara klengar er a Uriur-klebesei el Santo el ngara ngidil basio. Bek el taem el ngar ngii a kerior er a ngidil beluu er a beluulechad, ea re Uriur-klebesei el Santo a odars e olngeseu er sel lurelel a humanitarian er a Ikelesia. A skel a rechad el mo olngeseu a kmal di beot. Meng klemerang, a lebebil er a taem, ea ki olengit er tirkel rechad el mo olngeseu ma uchei er a lorael el chilii a tekoi el kmo ngmla mo sebechir el mong.

Tial klemeriar reng el mo omekngeltengat a kekka er a rechad el mo er ngii a klaumerang er tir er Jesus Kristo, ebangkelio er Ngii, Olutel a Ikelesia er Ngii, me a re profet er Ngii. Sei a uchul me rechedal a Dios a diak el lomdednger e diak el medakt. Sei a uchul ma re missionari a mo oureor er bek el beluu er a beluulechad. Sei a uchul ea chedam me a chedil a meluluuch lobengterir a rengelkir el kirir a rebebil. Sei a uchul me a merredel er a Ikelesia a siotai er a rengeasek (el ngara ward me a stake) mel bol ngar ngii a rengrir el kongei er sel ongtil a President Monson el mo dmolech a omsubir er a Babier er a Mormon. Sel kekka er a uriur er tial siotai a dimlak luchul el remerredel er a Ikelesia a ulengit er a rengeasek, ngbai luchul ngar ngii ele rengeasek a milruul er ngii loba klaumerang er tir—el mlo chuarm meng sebecherir el rulii. A klaumerang er tir a mlo er ngii lokiu a chuarm el ulemult a reng meng mlo sebecherir el omelchesiu er a beltkil a rengul a Dios.

Aikal rengud, a uaisei, a mo obult alsekum kid a melemolm lotirakl er a omellach er a re profet. Alsekum kid a stob er a uriur er a di tal klisichel a ureled, e sel bult a mo dibus.

Remekedung el Uriur-klebesei el Santo a mla melisiich a klaumerang er tir er a Rubak el Jesus Kristo, el kmo klemerang el Babier er a Mormon a tekingel a Dios, ma olutel a kiis er a priesthood a ngara chelsel a meral Ikelesia er Ngii. Tial klaumerang a mla meskid a klou el blak el reng e mo bekikl er tirkel rebebil el ngelekel a Dios. Engdi aikel ringel me a techall el ngarmedad a mo ousbech a lemuut el betok.

Kid a diak el sebeched el mo medengei a aikel rokui el omesodel, engdi kid a medengei aikel mo dubech er medad. Kid a medengei el kmo aikel uriur el sils, ea beluulechad a mo ngara uldikel. Kid a medengei el kmo sel dechau a ngidil kerior el mei, ea Rubak a mo mengetikaik er tirkel mekedung el Uriur-klebesei el Santo el mo nguu a ebangkelio er a Jesus Kristo el mo er a bek el beluu, kebliil, omelekoi, me a rechad. E kid a medngei elk mo tirkel mekedung el mesiungel a Rubak a mo klikiied e keldmokl el mo Nguu sel luut el mei. Kid a diak el kired el medakt.

Malta, e kid a mla mo er ngii a klaumerang me a blak el reng er a rengud, a Rubak a soal lemuut el doruul a betok—me a telcheroll lokiueled. Ng kirir el mo meduch a rengrir e bekeu eleng tir a mo meruul a lemuut el meklou e meringel el teletael e raikal bla deruul. E tir a mo chemau a betok el ultok er a cherarou.

Sel olechotel a ungil tekoi el ngarmedad el taem a bilskid a Rubak: Momes er ngak loba bek uldasu, lak momdednger, e lak ko medakt (mesa D&C 6:36). A President Monson a ulechais er kid el kmo kede mekerang e meruul er ngii. Kid a kired lomtab e meruul aikel olisechakl el ngara Babier Mormon ma ikel tekingel a re profet. Blechoel moluluuch. Bo moumerang. Mesiou er a Rubak loba rokui el rengud, uldesued, me a klisiched. Ngkired el meluluuch loba a rokui el klisichel a rengud meng sebeched el nguu a sengk er a beltik el reng, el bliochel el beltkil a rengul a Kristo (mesa Moroni 7:47–48). Me a sel kot er a rokui el tekoi, eng kired el blechoel e blak a rengud loltirakl er a omellach er a profet er kid.

Mesel rael a meringel, eng sebeched lultuil er sel yaksok er a Rubak—el ngii a yaksok el President Monons a blechoel lomeklatk er kid er ngii. Chelsel tial yaksok, A Rubak a dilung el kmo ngii a mo obengkel ngkel ngii a nguikid, eleng Ngii a mo oiak ruchei er kid. Ngii a mo ngara klisiched me a klitechetud, ea Chedaol Reng er Ngii a mora rengud, ma re anghel er Ngii a mo meliuekl er kid e olngeseu er kid (mesa D&C 84:88).

Ak ouchais el kmo a Rubak a moruchei er kau sel omoruul a Urelel. Al bebil er a taem e kau a mo anghel el Rubak a uldureklau el mo olngeseu er a rebebil. Al bebil er a taem ea re anghel a mo iliuekl er kau e olngeseu er kau. Engdi kau a mo blechoel loba Chedaol Reng er ngii el ngara rengum, el blel yaksok er kau er a bek el temel a chedaol belsoil. Kau a kmal di kirem el mo oltirakl a Llechul.

Aikel lungil sils a ngar medad el mo er a rengedel a Dios el ngara beluulechad. A ultok a mo smisichii a klaumerang er kid er a Jesus Kristo el di uai sera ltemel a Profet Joseph Smith. A klaumerang a blechoel mo mesisiich er a dakt. Sel dedak loureor a rulid el mo chimong. Ea betik er a rengud el Dios a mo remenges e onger a nglunguchem el mo er a rebebil. Ngii a diak lolengellokl ma lechub e le mechiuaiu.

Ak ouchais er a sioning er ngak el kmo a Dios el Chedam a kiei e soal kau a omluut el mo remei el mo er Ngii. Tiang a klemerang el Ikelesia er a Rubak el Jesus Kristo. Ngii a medengelkau; Ngii a betik a rengul er kau, e Ngii a omes er kua. Ngii a mlad el kirel a kengtim me a ngak ma kengtir a rokui el ngelekel a Chedam er a Babeluades. Oltirakl er ngii a di chimol rael el mo er a diak a ulebengelel klengar.

Aika kuchais e meskemiu a klengeltengat me a beltkil a renguk el mo er kau. Loba chedaol ngklel a Jesus Kristo, amen.