Babier er a Moromn: Ng Mo Uangera Klengar Kau Omko ng Diak?

Sera 1986, E ak mlongit el mo mengedecheduch er a daingak er a beluu er a Accra, Ghana. Seikid ak mlo kebetech ngak me a rebebil er a re ngarbab el chad, luldimukl er a king er a tara kebliil er a Africa. Sera ki mechadecheduch ruchei er a miting, e ngika el king a milngedecheduch er ngak, loku a chad loleuiud a tekingel. Ak millekoi er ngika el chad, e ng kuk oiuid a tekingel el mo er a king.

Uriul er a cheldechedechak, e ngika el king a mirrael bedul ngak, el dimlak lobengkel a chad loleuiud a tekingel. E mlo mechas a renguk, le ng mle meduch el melekoi—a tekoi er a Ngebard, el kmal ungil tekoi er a Ngebard, tekoi er a England, ak dochelii!

Ngika el king a ko er a ua blel mechas a rengul. “Kau ke kmal techang?” ng uleker.

Ak dulang, “Ak mla moterekokl el Apostol er a Jesus Kristo.”

Nguleker ngika el king, “Ngera sebechem losischeklak el kirel a Jesus Kristo?”

A kulenger loba ker: “Msall e kuker el kmo ngera ke medengei el Kirel?”

A nger ngika el king a ulechotii el kmo ng kmal dmolech omesubel er a Biblia e mle betik a rengul er a Rubak.

A kuleker el uase ng locha medengelii odngelel a Jesus Kristo el mo er a rechad er a ngara mo el taem er a Beluu er a Merikel?

E ng uaia di ble kudengei, ng dimlak lodengei.

Ak silodii el kmo uriul er a Omengerus me a Okiis er a kodall er a Osobel, e Ngii a mle duum er a rechad er a irechar el mla er a Beluu er a Merikel, e Ngii a ulsischeklii ebangkelio er Ngii. Ng kildmeklii a Ikelesia er Ngii e ulengit er a roltirakl er Ngii el lemuches a teletelel a Urerel el mo er tir.

Ak millemolem el melekoi el kmo, “Tial mla meluches,” a “ki modengelii el Babier er a Mormon. Ng ta er a ouchais el kirel a Jesus Kristo. Ng chedaol llechukl el kldemel a Chedaol Biblia.”

Tiaikid, e ngika el king a kmal mlo semeriar. A kulebult el bedul a merredel er a mission lulbengkek e uleker el kmo ngar ngii a Babier er a Mormon lobang. Ng ultebedii a chimong er a til.

Ak milkengii el mo er a 3 Nephi er a teruich me a tal bliongel, e ngak me ngika el king a mocha menguiu osischeklel Osobel el mo er a re Nephites. E ak mocha nguu tial Babier er a Mormon el msang. Ng kmal diak kubes er a nger ngii: “Ng sebechem el meskak a diamond ma rubies, eng di diak a ngera el muut el ngaruchei el uai tial dechelel a klemedengei el kirel a Rubak el Jesus Kristo.”

Uriul er a lolchesuar a klisichel a tekingel Osobel er a chelsel a 3 Nephi, e ngika el king a melkingang, “Omko a kubult el mo chedal a Ikelesia, e ak nguu a rokir el kleblillek lobengkek.”

“E a, King,” ak dulang, “ng diak leuaisei. A bult a ultuil er a dersta el chad. A Osobel a ulisechakl er a re Nephites lou dersta er tir. E dersta el chad a ngiluu a sioning ma klaumerang er a ebangkelio er a Jesus Kristo.”¹

siasing/Llecheklel

Jesus Kristo loldingel er a re Nephites

Rodam me a rodos, nguangera kerresel a Babier er a Mormon le ko er kau? Omko chad omeskau a diamond malechub eng rubies malechub eng Babier er a Mormon, ngera ngii omngiltii? E a mera er ngii, ngera er ngii a klou a belkul el me er kau?

Sel ongdibel er a tutau er a Sandei er sera April 2017 el klou el ongdibel, e a President Thomas S. Monson a ulengit er a “dersta er kid el mo ngara nglunguuch e melbedebek er a Babier er a Mormon er a bek el sils.”² Betok a mla meruul er tial ongtil a profet.

Msall e kuchais el kmo ng diak el ngak malechub el eai a rekil Riley a mle medengei el kmo ngarngii a chad el melai a siasing. Ko mesa Riley el menguiu er a Babier er a Mormon lobengkel a telkib el babier el llechukl a “I Am a Child of God” er ngii.

siasing/Llecheklel

President Nelson me a Riley el mesuub chedaol llechukl

Ngar ngii a kmo ngera el mesisiich el teletael el duubech sel sekum a ngelekel a Dios osiik el mo Medengelii me a Ngelekel Sechal. Aika el klemerang a diak debetik el mosisechakl er a ngii di el ker ng di tal chelsel a Babier er a Mormon.

Sera le kot lomuchel tial ongtil a President Monson er a elolem el buil er a memong, e ak mla melasm loltirakl er ngii. Dirrek el bebil er a tekoi, e ak mla lemuches a tekoi el kirel, a Babier er a Mormon, ngerang melisiich, el tekoi, ngera diak, el klemerang, e ngerang kudmokl, ngerang meketakl, e ngerang ocholt. Sel kumes er a Babier er a Mormon er tiaikid el teletael eng kmal mla meskak a llomes me a ungil osisechakl! A kulengit er kemiu me bo morul el uaisei.

Chelsel aika el elolem el buil, e ak dirrek el mla olengit a kakerous el chelechad—luldimukl e ra Rodam er ngak er a Chelechad er a teruich me a terung, me a remisionari er a beluu er a Chile, me a remerredel a mission me a rebecherir el kldibel er a Argentina—el mo omdasou a keldei el osisiu el ker el dirrek el kungelechel er kemiu el mo omdasou el kirel er chelechal sils.

A kot, ng ko mo uangera klengar kau omko ng diak a Babier er a Mormon? Ongerung, ngera ikel mo diak modengei? E a ongedei, e ngera sel mo diak?

A mesisiich el nger er tirkal mla er a ikal chelechad a meral mla er a rengrir. Aikakid a bebil er a tekingir:

“A lak a Babier er a Mormon, eng mo rrau a renguk er a kakerous el osisechakl me a uldasou el kirel a betok el tekoi. Ak locha di mo osisiu el chad ruchei er a kbetik er a Ikelesia, ser a kusiik a llomes, klaumerang, me a urungulek.”

A kuk tang a dilu el kmo: “Ng mo diak kudengelii a ngerchelel a Chedaol Reng er a klengar ngak.”

E a kuk chimong: “Ng mo diak kudengelii a moktek er ngak er a beluulechad!”

A ku nger er a tang a dilu el kmo: “Ng mo diak kudengei el kmo a klengar a melemolem ruriul er a kodall. Ngokiu a Babier er a Mormon a uchul, e ak medengei el kmo a klengar a melemolem ruriul er a kodall. Tiaikid a kot el ngaruchei el moktek er a urered.”

A ulebongel el tekoi a rirellak el mo melbedebek ra klengar ngak er a ngaramong er a ak ngeasek e kusuub el mo toktang. A tara oberaod el ngerachelel a toktang, a lebebil er a taem, a ouchais er a telungalek sel lemad a chederir. A tal ospitar el kulureor ngii, eng mlarngii a tokubets el delmerab el medemdemk a kbekbel le bor ngii a rechedal a telungalek. Seikid, e a rebebil er a rechedal a telungalek a sebechir lolab a bderrir el merirm er a kboub sel renges a chisel a chederir el mla mad. Ng meral soak louchais er tirkal chad el kmo a kodall, el kmal meringel er a re kiei, a telengtengil a klengar er a chutem. A kodall a meskid a techall el merael bedul sel ku tara beluulechad.³

A kuk chimong a ulenger er a kerik el dilu el kmo: “Ng dimlak a moktek er a kelngar ngak el mol muut er a taem el kunguiu er a Babier er a Mormon. Ng uaisei el bla kululuuch e omais el mo er a ikelesia er a kekerei el me klou, ng di Babier er a Mormon a ngilsukak el ketengek el meral mengedecheduch lobengkel a Chedam er a Babeluades.”

A kuk tang a dilu el kmo: “A lak a Babier er a Mormon, eng diak bo kudengei el kmo a Osobel a dimlak di blol charm er a ringel el kirel a kengtik, ng dirrek el omekungil a ringel me a klengit el reng el ngara ngak.”⁴

E a kuk tang a kmo: “Ng diak bo kudengei el uase ngar ngii a reprofet lomekrael er kid.”

A bo demui el mesuub a klemerang er a chelsel a Babier er a Mormon eng sebechel ngodechii a klengar kid. A tara ngelekir a rengelekam el mle misionari, el Sister Olivia Nelson, a mle yaksok er a chad el milsuub el mo alsekum eng menguiu er a Babier er a Mormon er a bek el sils, e a teng er ngii er a skuul er a daingak a mo ungil. Ng mlo meruul uaisei, me a teng er ngii a mlo ungil.

siasing/Llecheklel

Sister Olivia Nelson

Rodam me a rodos er ngak, a kuchais el kmo a Babier er a Mormon a meral tekingel a Dios. Ngolab a nger er a ikel kot el meringel el ker er a klechad. Ng olisechakl a osischeklel a Kristo.⁵Ng mok e meketakl a betok el “beot e mekreos”⁶ el klemerang el ririid er a ngara mong el taem me a betook el oidel a Biblia.

A Babier er a Mormon a meskid a kot el mui e meral klemedengei el kirel a Tngakireng er a Jesus Kristo el diak debetik er a ngii dil ker. Ng olisechakl er a meral belkul a lmuut el mechell. Ngara chelsel a Babier er a Mormon e kede subii a omengidb er a reberiid el chad er a Israel. Ngera uchul me kede ngara tial beluulechad. Aikang me a lmuut el bebil er a klemerang a mesisiich e omult e mosisechakl er a Babier er a Mormon er a ngii di el babier. A mui el klisiich er a ebangkelio er a Jesus Kristo a ngara chelsel a Babier er a Mormon. E merekong.

A Babier er a Mormon a meketakl a osischeklel a Mastang e ocholt a blekerdelel a cherarou.⁷ A Babier er a Mormon olsiechakl a meral osisechakl el choroid a blulak e uldelid el tekingel a klechelid el uaia kmal mekngit el teletael— er a techolbechelid er a retolechoi.⁸ A Babier er a Mormon a meskid a moktek er a klengar el orrimel er kid el mo melbedebek el kirel a diak a ulebengelel klengar me a “diak a ulebengelel deureng.”⁹ A Babier er a Mormon a torob a blulak el klaumerang el kmo a deureng a di debetik er ngii er a chelsel a mekngit lomeruul¹⁰ e a ungil lomerellel a chad a klebech el sebechel losisebii er a rengedel a Dios.¹¹ Ng cheroid a blulak luldasou el kmo a chedaol ocholt a mlo merek a klsel er a chelsel a Biblia e a babeluades a chelsimer er chelechal sils.

Sel kumdasou el kirel a Babier er a Mormon, e kumdasou el kirel a klisiich. A klemerang er a chelsel a Babier er a Mormon a ngar ngii a klisichel lomekungil, mengelaod, oluut, e olngeseu, melisiich, mengellakl, e odeuir a rengud.

Rodam me a rodos er ngak, ak yaksok el sel bo doluluuch e dosuub er a Babier er a Mormon er a bek el sils, e ko mo ungil melilt—bek el sils. Ak yaksok el kmo sel molbedebek aikel mosuub, e a chesmerel a babeluades obok, e ko mo ngmai a nger el kirel a keremiu me a ulekrael er a klengar kemiu. Ak yaksok el kmo sel mosuub er a Babier er a Mormon er a bek el sils, eng sebechiu el mochib er a mekngit, luldimukl er a kengtil osengel a mekngit el siasing er a deleboes me a lmuut el bebil er a mekngit el teletael.

Sel krengesii a chad, luldimukl er ngak, el kmo, “Ak medengei el kmo a Babier er a Mormon a klemerang,” eng soak loldiu el kmo, “Ngungil, ng di diak el klebech!” Ng kired el mo omelchesiu er ngii, el meral dmolech el “ngara chelsel” a rengud,¹² el kmo a Babier er a Mormon a meral tekingel a Dios. Ng kired el melchesuar a delechel meng diak el soad locheueklii a tal sils el cheroid er ngii. Msall e kedebengii a tekingel a President Brigham Young (1801–77) el kmo, “A kureng me a oto er a ngerek a ua derumk lomkerokl er a rechad”¹³ el kirel a klemerang me a klisichel a Babier er a Mormon.

Ng kired el mo uai ngkal ngeasek el misionari el mlara Europe el mlo omelchesiu er a klemerang el kirel a Babier er a Mormon meng rirurt loba tial hong el mo er a chad el mlara park el ngii me a kldemel a miltik er ngii.

siasing/Llecheklel

Missionary el remurt

A kuchais el kmo a Joseph Smith a mle e ngii a profet er chelechal uriul klebesei. Ngii, lokiu a sengk me a klisichel a Dios, e ng uleuiid er a chedaol hong. Tiaikid e a hong el mo ngosukid el mo kldmokl er a beluulechad el kirel a Ongeru Lemei a Rubak.

A kuchais el kmo a Jesus Kristo a meral ngar el Ngelekel a ngar el Dios. Ngii a Osobeled, e Olsobel er kid, e ngarbab Lokesiu, e Mesebechakl er kid er medal a Chedam. Ngii a mle telbiil el Messiah, e chad el Messiah, e mo Messiah er sel merael mei el klengar. A kuchais loba renguk rokir el kmo chelsel a kot el mengasireng e ngodech el teletael, e a Babier er a Mormon olisechakl er kid el kirel a Jesus Kristo me a ebangkelio er Ngii.

Ak medengei el kmo a President Thomas S. Monson a profet er a Dios el ngara beluulechad er chelechal sils. Ng betik a renguk er ngii e oldubech er ngii loba renguk el rokir. Aika kuchais el ngara chedaol ngklel a Jesus Kristo, amen.