Lokiu a Chedaol Teletael
A chimal a Rubak a omekrael er kau. Ngokiu a “chedaol teletael,” e Ngii a chelsechusem er a ikel mekekerei el tekoi er a klengar kau me a dirrek a meklou el tekoi.
Rodam me a rodos, chelechal kdechor tial omekellomes el klou el ongdibel er a beluulechad el rokir e kulchesuar a klisichiu me a rengmiu, e ak di omdasou a tekingel a Apostol Petrus el kmo: “[Rubak], ng kmal ungil el ki mngar tiang.”1
Tia diak el uai sel le dilii a Alma ruruiul er a lolisechakl er a rechad er a Ammonihah. A Alma a tilobed er tial beluu el mekngit lomerellir a rechad a uchul. E ng di mle mereched a anghel el duum er a Alma e dilu er ngii me “lobult el muut el mo er a beluu er a Ammonihah, e luut lolisechakl er a rechad.”2
Me a Alma a di mle “mereched,” el soiseb er “tial beluu lokiu a tara rael.”3
“Me lesiseba er a beluu e ng mle songerenger, me ng dula er a chad el kmo: ng sebechem el msa ngariou a rengul mesiungel a Dios a sesei el kall”?
“Me ngikal chad a dula er ngii el kmo: Ngak a Nephite, e medengei el kmo kau a chedaol profet er a Dios, le kau a ngike el chad el anghel a dilu er ngak er a ues el kmo: Ak mo ngoikau.”4
Ngika el chad a mle Amulek.
Chelechang , tiang di mle chung er a Alma el metik er a Amulek? Ng diak, ng dimlak el chung er ngii el siliseb er tial beluu lokiu a tara rael e luchul e ng mlo metik er ngika el mui er a klaumera el chad el uriul taem e ng mo kldemel.
Elder Neal A. Maxwell a mle tal losaod el kmo: “Ng diak a ta er kid el mo mui el mtab aikel techall el sebechel dubech lokiu a resechelid. Kemiu me a ngak a sebeched el kmo aika kuk di ‘chung’er kid. Tial a tekoi a bleketakl er a rechad, e ng di a chung a diak el ngii a tekoi el dousbech er ngii el mesaod a urerel a Dios el ngii a medengei a rokui el tekoi. Ngii a diak loruul a tekoi lokiu a ‘chung’ ng bai … okiu a ‘chedaol teletael.’”5
A klengar kid a uaia dama e a Rubak a obekid el mo el mei er a tara basio el mo er a tang—alsekum e kede olngesenges er a odbechel a reng. E a uriul e dolbedebek, e ng sebeched el mesa Chimal er a klengar kid.
Kede mesa tial teletael er sera Nephi er a lluut el mo melai ikel tibereberk el sintsyu er a Laban. Ng mle “ulekrael er a Chedaol Reng, el dimlak lodengei ruchei aikel [ngii] a kirel mo meruul.”6 A Laban a di mle kiul me chemolt er ngii el kmal chetelaol me a Nephi a milkodir, e ngilai aikal tibereberk el sintsyu, e chiliis el me er a rubekul. Ng locha kuk mlo chung er ngii el metik er a Laban el uaisei? A lechub e ng ulekiu “chedaol teletael”?
A meklou a belkul teletael a duubech er a chelsel ebangkelio me a Ikelesia el meleketek er a rengedel a Dios er a beluulechad. Aika diak di le ngii el duubech ng bai okiu a moktek er a Dios. Ngike el Ngii a lilchesii a lecheklel tial beluulechad a sebechel cholleklii a daob lolab a Tekingel, e mesiulii a Alma me a Amulak, me a Nephi me a Laban el mo er a chimol basio er a kmal di osisiu el taem.
Osisiu, a teletael me a omesuul a duubech er a klengar kid el ngii a melemolem er a urerel a Dios er a beluulechad.
A Elder Joseph B. Wirthlin a millekoi el kirel a taem el President Thomas S. Monson a dilu er ngii el kmo: “Ngarngii a chim el ngarbab lomekrael a rokui el tekoi. Ng blechoel sel dubech a kmo ngerang, e ng diak el di ble lengii el duubech. A tara klebesei, e sel bo domtab aikel dulemdasou el kmo ng di mle ngii el duubech er a klenga rkid, e kid a locha mo medengei el uase ng dimlak el kuk di ble lengii el duubech.”7
Oumesingd, e a ikel ungil omerelled a di mekesai el chad a medengei. E ng di, aikang a kmal llechukl er a babeluades. A tara klebesei, e ked emo dechor e sioning er a rengud el rokir e ra blak el reng er kid er a llemalt. Ng diak a ngii di longarm me a kerior el tomelli a uldesuel a Dios er a deureng. Ng meral tekoi, lokiu a “chedaol teletael,” e a “deureng a mei ruriul.”8 Ak mlei er a beluulechad el me meruul [a] soal a Chedam,”9 Ng ulisechakl a Jesus el uaisei. Rodam me a rodos, kid meng kired el mo uaisei.
Ngultuil er a ikel kuk mla duubech el mei er ngak el tekoi, e ak medengei el kmo a Rubak a omesiull er kid el mo meruul a Urerel. Sel rengud el kmo ng kuk di mlo chung, a bai, lodengelii a oubeltik el reng el Chedam er a Babeluades, el ngii a sebechel mechur a cheiul a chad er a bdelul.10 A charm meng diak el rebet er a chutem el diak lodengelii a Chedam.11 A omerellel a Chedam el kired a sebeched el mes er a chelsel a mekekerei el tekoi, e a ikaikid el teletael dubech me a techall a mo kudmeklid el mo mesebechakl a telungalek er kid me a rebebil sel dolngeseu el meleketek er a rengedel a Dios er a beluulechad. Molbedebek, aikel tekingel a Dios el mo er a Abraham el kmo Ngii a medengelii a ulebengelel er a uchelel; a leuaisei e a Chimal a mo omekrael er kid.”12
A Rubak a ngilikak el mo er a delengchokl lobengterir a rungil el chedam me a chedil. A denguu er a tekoi er a beluulechad e te di mle hutsu el chad; a demak, el blak a rengul, a di ulemekall a torak; e a bekokeuii el delak, a dimlak loureor e di ngara blai. A Rubak a ngilsukak el metik er a klebokel el bechik, er a Melanie; e Ngii a mikroli a chad er a siobai el chad, el kmal mlo ungil sechelik, el milskak a techall er a ureor. A Rubak a milkodongak el mo er a mission, er a kngeasek el chad me a dirrek er a klunga el chad el mlo merredel er a mission; Ngii a milkodongak el mo chedal a Chelechad er a Rokeuid; e chelecha e Ngii a mla mekodongak el mo Apostol. Sel kulbedebek, e ak mtebengar el kmo ngak a dimlak kungedmokl aika el tekoi; ng Rubak a riruul, el di uai Ngii el mengedmokl a meklou a belkul tekoi el kirem me tirkel betik er a rengum.
Me ngera kirem losiik er a ngii er a klengar kau? Ngera ike ongasireng er a Dios el mekletkau el kmo Ngii a di kmeed, e melekoi el kmo, “A kmal di ngara tiang”? Molatk aikel taem, er a bek el sils, er a klengar kau—e mluut el mo ngara omeruul. Bol mekreos er a rengum el ngii a taem el Rubak e ulechotii a klaumera er ngii er kau er a ikel molilt el meruul. E becherei me luut el rullau el kmal mo mesisiich loltirakl er Ngii le ng diak el sebechem el di kau. Bol mekreos er a rengum a Omerellel. Bebil er a taem e kede omdasou a ngeldechel a moktek er kid el uaia le cheleuid er a klengar kid. Bai mluut el mo omes el uase ng kot el dauch er a urerem el mo er a Rubak.13
Sesei el buil er a memong e a ngelekel a ngelekam el redil a mle teloi er a chelechad er a rengeasek lomes a bebil er a basio er a reksi er a Ikelesia. A ulebongel er tial lomerael e te mo chengelak er a basio el ochedal sechal, el ngelekel a ngelekam, a mesiou el misionari. Ngika el ngelekel a ngelekam el redil a dimlak er a uldesuel a mesa ochedal er chelechal le ngara mission. E ng di, a lesiseba bas er a beluu el ngika el ochedal a ngarngii, e a re teru el misionari a lomes er tir el merael er a rael. A ta er tirkal misionari a mle ochedal.
Te millengiil er a tara ngeasek lolengit ra omekall mel stob me bol sebechel mesa ochedal. Kekedeb ra tal bung ruriul, er a lungil er a chiuosech ma ungil cheldecheduch, e ngika el ochedal a luueta el merolang el mo meruul a ngerchelel misionari. Uriul e a ki mlo medengei el kmo ngika el ochedal a kmal dirk kesai er a eim el bung er a le bo er tial rael, el ngara omerollel el mo er a mlirir.
A Chedam er a Babeluades a ngoikid el mo er a chelsel a teletael el ngarngii a moktek er ngii. Ng mla kudmeklii er a chelsel a klengar ngak, e Ngii a dirrek el meruul er ngii leko er kau, el di ua ikel Ngii a miruul er a klengar er a rengelkir a rengelekam.
A dersta er kid a mekreos e betik er a rengul a Rubak, lomekerreu, mengelulau, e omes er kid er a chelsel a ngeldengodech el teletael. Ngii a kmal mellomes e kmal mesisiich er a sechal me a redil. Ngii a medengei a mondai el dengara chelsel, me a ikel bo demisiich er ngii, me a melemalt el soal a rengud.
Kmeed el tal rak er a memong, er a kurael mo er a Temple Square, e a tal redil el misionari a ulsiueklak e uleker, “Ke medengelkak? Ak chad er a Florida.” Ng dillii a ngklel er ngak, el Sister Aida Cilan. Oi, ak medengei er ak bo kumes er ngii ma rechad ra blil. A merredelel a stake er ngii a ulengit me ki bo modngelii a telungalek er ngii. Ng mlo bleketakl el kmo a ki mlong el kirel a ngelekir redil, er a Aida, el dirkak el metecholb. Uriul er a odngelam, me a kmeed el tal rak ruriul el kimolisechakl e oldingel er ngii, e a Aida mocha miltecholb.
Uriul er a klaiuedingel er kemam er a Temple Square, eng a milluches el mei er ngak. Ng dilu el kmo: “Ak mui el medengei er a renguk el kmo a Chedam er a Babeluades a medengelkid e Ngii a melemolem el mekrolid el mo kebetech er a omeroled. Ke mesulang el tara misionari el mle osiik er ngak e miltik er ngak er a eim el rak er a memong.”14 A Aida dirrek luldureklii a cheldechedechal kirel a beltel louchais er a “chedaol chung” el dilubech er a klengar ngii el uchul e ng mlo nguu a techolbechelid me a oterkeklel, e mo er a mission er a Temple Square, me a dirk dilubech el chebechielel er a templo.15
Ng locha di mle tekoi er a chung el ngika el merredel er a stake a ngilikemam el mo remei er a Chilan a lechub a uriul taem e ngii me a ngak a mo kebetech er a Temple Square? A klaumerang er a Aida a olchotel a kmo tia kmal mle telengtengil a “chedaol teletelel a Dios.”
A Rubak a soal me obengked. Meng diak kuk di le tekoi er a chung sel momelchesiu er a Chedaol Reng e moltirakl er a odbechel e kau a melchesuar el uai sel yaksok er Ngii el kmo Ngii a mo okiu medad, e Ngii a mo ngara klisiched me a katur e a Reng er Ngii a mo kiei er a rengud, e a reanghel er Ngii a mo iliuekl er kid, e sobecheklid.16
Kid el rokui el ngarngii osisiu el tekoi el duubech er a klengar kid. Kede locha mesa chad el dodengelii, e chadecheduch kid ma dodengelii el chad, malechub e kede metik a dosisiu er ngii kid ma ngodech el chad. Aika sel le duubech, e a Rubak a omeklatk er kid el kmo kid el rokui a meral di “odam e odos.” Kede meral ngara chelsel a osisiu el moktek—el sel lomekedong er ngii a Joseph Smith el kmo ng “moktek er a Kristo.”17
A mimokl el melilt er kid ngara keskelel tial “chedaol teletael”? Kede melilt el oltirakl malechub e ng diak doltirakl er a Osobeled me a re mla mengilt el Mesiungel. Tial teletael a bleketakl el ngara chelsel a Babier er a Mormon el Nephites a ulebult el mo ikrii a Rubak. A Mormon a ulemekikngit el reng e melekoi el kmo:
“A Helaman a mlo ngara klengit el reng el Chedaol Reng er a Rubak a dikea lomecheliu er a re Nephites e mla mo cheroid er tir le Chedaol Reng er a Rubak a diak el kiei er a chelsel a mekngit el chad—
“A leuaisei e a Rubak a mlo diak lomecheliu er tir lolab ongasireng lomeruul me a klisichel, le tir el mla mo diak loumerang e mla mo meruul a mekngit lomeruul.”18
Ng diak el rokui el tekoi el Rubak olengit er kid a ultuil er a klisiched, klaumera er kid, malechub a ikel dodengei. Momtab er a Saul el Rubak a dilum er ngii er a lengara omerollel el mo er a Damascus. Ng dimlak loruul aikel ngii a mle kirel meruul er a klengar ngii e dimlak el iior er a kmo ng merael bedul ker. A Saul e mla rengii chedaol chim lomekrael er ngii. Uriul e ng mlo Paulus a ngklel, e a urerel el apostol ochotii sel ble lodengelii a Dios el kirel me a ikel ngii a sebechel mo meruul, e diak el ikel ngii a Saul a mle soal mo meruul. Osisiu el tekoi, e a Rubak a medengelii a sebechel a dersta me a dersta er kid. Ngera ngullisechakl a Apostol Paulus? “Kede medengei el kmo a rokui el tekoi a dmak loureor el kirel a klungiolir tirkel loubeltik el reng er a Dios, tirkel mokedong loltirakl er a moktek er ngii.”19
Sel demelmalt, blak a rengud, e sebeched, sel dolasm el mo klikiid, e kede ngoriakl el mo er a basio el dimlak domtab e mo obengkel a Chedam er a Babeluades er a “chedaol teletael.” Kid a ngarngii chedaol teleteled. Sel desa Dios loureor lokiu kid e obengked, eng locha mo mesisiich a rengud, e mereng a saul er a ulekrael er ngii. A Chedam er a Babeluades er a ledu el kmo tia urerel e klebkellel—el uchul a diak el luut el kodall me a diak a ulebengelel klengar el mo er a chad,20 e Ngii a millekoi el kirir a rokui el Ngelekel—oumesingd a kemiu.
A Chimal a Rubak a omekrael er kau. Ngokiu a “chedaol teletael,” e Ngii a chelsechusem er a ikel mekekerei el tekoi er a klengar kau me a dirrek a meklou el tekoi. El uaisel ngara Proverbs el kmo, “Multuil er a Rubak loba rengum el rokir; … e ngii a mo omekrael er a rolem.”21 A kuchais el kmo Ngii a mo omekngeltengat er kau, e smisichau, e meskau a budech. El ngara chedaol ngklel a Jesus Kristo, amen.