Me bo le Cherrungel a Deureng er Kemiu

Kede mekerang e mo re Ngii? Tial mlo merek el Ongeua el buil, ea President Russell M. Nelson me a Elder M. Russell Ballard a orimel er kid el mo mesuub er sel “The Living Christ”⁷ el tebechedel a omesuub el kirel a Osobel. Ng betok el chad ra Ikelesia a mle kongei e milasem e mlo ngmai a klengeltengat. Engdiak el meketeket, ea sechelik a milsterir a remeklou el ngelkel a babier el ngar ngii a siasing er a ebangkelio el louchais er a tekoi el ngara chelsel. Ngulengit er a rengelkel mel ngusuterir a rengelkir mebo lodengei el lomtab aikal tekoi. E a uriul, ea sechelik a ulechotii a video er a elolem a rekil ngelekel a ngelekel redil, el Laynie el melekoi aikal tekoi e blal suub e kmal lungil a rengul. Ak mlo omtab el kmo alsekum a edei a rekil a sebechelm me ngak meng sebechek!

siasing/Llecheklel

Laynie, el mesuub er a “The Living Christ”

Sel bla kusuub er a klengar ma osisecheklel a Jesus kristo el blak a renguk e sel babier “The Living Christ” a mera uldesuek, me a omereng el saul ma beltik el reng el mo era Osobel a mo klou. Bek el kerbai er tial babier a ngar ngii a olisechakl el mla smisichii sel klemedengei er ngak el kirel a chedaol Ngerchelel me a urelel er a beluulechad. Aikel bla kusuub e ulmelchesuar er tial mle temel a omesuub e kumtab a oterkeklii el kmo a Jesus a “meral llomes, e klengar, e reng el mo er a beluulechad.”⁸ Aikel chedaol llechukl er a chuodel el taem me a ikel tekingir a re profet er a chelechal taem el llechukel malechub e te melekoi el loldanges er Ngii a ouchais el kmo “Ngii a rael el mengetikaik el mo ra ungil klengar er chelechal taem me a diak a ulebengelel klengar el ngar sel mei el beluulechad.”⁹

Mesel mosuub er a klengar er a Kristo me a osisecheklel lokiu a betok el teletael, ea klaumerang er kau er Ngii a mo klou. Kau a mo medengei el kmo Ngii a betik a rengul er kau e kmal lungil medengelkau. Chelsel a okedei me edei el rak sera le ngar er a beluulechad, Ngii a mlo chemau a oltngakl, kelbus, klengerenger, chedel reng, e mlo mesaol a bedengel;¹⁰ sabisi, ringel er a omelekoi me a bedengel, ma, meringel el kodall el mlara chimorir a re mekngit el chad.¹¹ Sel sers er a Gethsemane, me a kerus el ngara Calvary, Ngii a mlo omelchesiu a rokui el ringeled, ongarm, ongitikaik, serch, ma klechitechut el reng.¹²

Meng diak belkul a kmo ngeral ringel a dechau, Ngii e a omekungil. Tirkel mla obangel a ngidil teletael ra ongarm, kerior, rakt, mechitechut a bedengem, klautelchakl el diak el merang, meringel el kelbus, malechub e ngidil chedaol telemall el mlara klengit malechub ng eluid el tekoi a sebechel mo cherungel lokiu a Osobelel a beluulechad. Engdi, Ngii a diak el sebechel soiiseb alsekum meng diak kom siotai er Ngii. Kid a kired el mo er Ngii e mecherei meng kutmokl a ikel meang el ngerchelel.

A tal klebokel el sils eak milcherei a chesimer meng blok meng sebechek louteliill a beches el iolt. A kekerei el suebk el charm a silebek el tmuu er tial blok el chesimer e metebengar el kmo tiang a diak el soal el ngar ngii. Ng silibek el meliuekl er a delmerab, el melmolm el suebek losiik er a rolel meltobed. Ak milasm lolngeseu er ngii el bedul a chesimer, engdi mle medakt e di suebk. Ng mocha dechor er a bebul a mado e kmal lomeksaik. Ak ngiluu a oriik e mekekokak el nguu el bedul ngikal suebk el charm. Me sera kureked er a oriik el ngara bita er a ochil, e ngikal suebek el charm a ngmasech er ngii. Mekekokak, el kmal mekekokak, el merael bedul a tial tuangel, e kmal lungil loreked er tial oriik. Mesera ki bor tial blok el tuangel, e ngikal suebk el charm e silebk el tuobed.

Ng di ua ngkal suebek el chard, a bebil er a taem e kid a medakt el loumerang eleng diak dodengelii sel kmal beltkil a rengul a Dios me a klemeriar reng er Ngii el mo olngeseu er kid. Engdi sel dosuub er a moktek a Demad er a Babeluades me a urelel a Jesus Kristo, e kid a mo medengei el kmo sel kot el moktek sel ngar ngii a diak ulebengelel deureng me a ureor.¹³ Tir a dmeu a rengrir el mo olngeseu er kid sel dolengit, dosiik, e dolengod.¹⁴ Sel dousbech er a klaumerang e ngariou a rengud el ngmai a nger er Tir, e kid a mo mengubet er aikel rau el reng me a delbochel el tekoi, ea rael bedul ruchei a mo chemolt el merkid.

A Jesus Kristo a uchul a budech. Ngii a siotai er kid el mo “ulsirs e ra klisichel”¹⁵ e yaksok er a “budech … el mo cherrungel el medengelii,”¹⁶ e omelchesuar er sel Chedaol Reng er Ngii el mesaod er a budech el merkid”¹⁷ el diak el ior er a ngidil longarm el meliuekl er kid. Ma le blol longarm el me rekid, mondelngel a telungalk, malechub eng telemall ra buai, a budech a mei a dou merang el kmo a Dital Ngelekel a Dios a ngarngii a klisichel el smuld a ringel el ngar kid.

siasing/Llecheklel

Snježana Podvinski, chedal a ikelesia er a Croatia

Snježana Podvinski, el Santo el ngara Karlovac, Croatia a mlo ultuil er a Osobel sera bechil ma demal me a delal a lemad el di mle elolem el buil a delongelir er tial mlo merek el rak,. Meng mekngit a rengull, engdi ngar ngii a klaumerang er ngii el kirel a diak a ulebengelel telungalek, ngulusbech aikel rokui el lududel el mlo er a templo el ngara Switzerland, meng mlo rongedii el mo er a bechil me a demal me a delal. Nguluchais el kmo ngkmal mle ungil a rengul er aikel sils el ngara templo. Eleng klisichel a klaumerang er ngii er a Jesus Kristo me a Tngakireng er Ngii, eng mlo melchesuar ra budech me a omekungil el ngii a dirrek el milisiich er tirkel ngara bit er ngii.

A klaumerang er a Jesus Kristo a meskid a lemuut el betok el sengk ra bai omekungil me a budech. A President Henry B. Eyring a dilu: “Ak mereng a saul el kirel aikel betok el teletael el Rubak a mle oldingel er ngak loba Chedaol Reng sera kusbech a budech. Engdi a Demad er a Babeluades a diak el dil bekikl el kirel sel lungil a teleteled eng dirrek el kirel a ungil lomeroled.”¹⁸

E leng sel Tngakireng er a Jesus Kristo, el luldimukl er a sengk er a ngebetel a klengit me a okiis er a kodall, e kid a sebeched el mo ouchel a rengud, mengodech, e melemolem er a omerael. E leng sel klisiich el Ngii a mileskid sel dekedung, eng sebeched el lemuut el mo ungil ra bai di kid lobekid. Kid a locha diak el sal cherrungel el medengei el kmo kede mekerang, engdi a ta me a ta er kid el mla omelchesuar er a klaumerang er a Kristo e lomkuuk a dirrek el mla nguu a klou el klemedengei el kirel a chedaol teleteled ma moktek, el mengitikaik er kid el mo melilt aikel ngii a osisiu ngii ma klemedengei er kid.

Malta a beluulechad a melasem el meruul er kid el mo ngariou a derucheled el ua “charm,”¹⁹ el medengei el kmo a Dios a Demad a milnglou a rengud el kmo kid a ngarngii a chedaol techeled ma yaksok. Mal ta beluulechad a ouchais er kid el kmo tial klengar a diak a moktek, e medengei el kmo Ngkel Di Tal Ngelekel a Dios a mla rulii meng sebeched el mo melubet a kengtid e mokiis er a kodall a rulid elmo oureng er a diak a ulebengelel lureor.

Sel dosuub el kirel a Jesus Kristo, e a klaumerang er kid er Ngii a meral mo klou e kid a soad el mo oltirakl a Teletelel. Oltrakl a Llechul a mo sel kot el dourreng er ngii. Ng mo ngar ngii a klemeriar reng er kid el mo olngeseu er a rebebil el ngara ringel el di uai Ngii, e kid a soad tir bol ngar ngii a budech ma deureng er tir el di uai kid.

Ngera uchul mesel dolasm el mo meruul aikel riruul a kmal mesisiich? Eleng sel dousbech er a klaumerang er kid, ea Chedaol Reng a ouchais er a diak a ulbebengelel klemerang.²⁰A Jesus a milekoi er tirkel Mesiungel el mo oltirakl a Llechul eleng Ngii a medengei el kmo sel doltirakl er a okesiul, eng mocha muchel el mo rengii a deureng el merkid, mesel dolemolm er a Rolel, e kid a mo nguu a mui el deureng. Ngii a dilung, “A ikal kulekoi er kemiu ma deurreng er ngak le bor a chelsiu, me bo le cherrungel a deurreng er kemiu.”²¹

Aikal klaumerang er kid ngultuil er a Jesus Kristo me a ebangkelio er Ngii? Sel bo er ngii a ringel er a klengar er kid, e kid kede meringel losiik a ngeseu er a internet? Sel dolai a temed el melisiich er a klaumerang er kid er a Jesus Kristo a mo meskid a nguked er sel ngar ngii a telemall me a kerior. Omenguiu el chedaol llechukl er a bek el sils e omdasu aikel tekingir a re ngar el profet; meral ngar ngii a belkul a nglunguuch; melai er a chedaol belsoil er a bek el sandei; olngeseu el uai a Osobel a lolngeseu—aikang el beot el omeruul a mo ua le bo luchetemel a deureng er a klengar.

Ngera meskau a deureng? Sel mesterir tirkel betik er a rengum er a uriur er kemanget el sils? Ngsel omerelel a ureor a mle ungil? Ngsel llomes el ngara mederir a re momotk a beredir? Ngikel tekoi er a chelitakl er a ikelesia el rutechii a rengum? Sel morkedii a chimal a sechelim? Bol ngar ngii a taem el kau a mo omtab a klengaltengat er kau, e msikii a rael el bo mouchais el kirel. Mesel molemolm el lolngeseu er a rodam me a rodos er a buai malechub eng beluulechad, el klungang a uldikel er ngii e kau a mo omelchesiu er a klou el budech me a omekungil me a ungil lureor.

Ak ouchais el kmo sel omnguu a Jesus Kristo el mera chelsel a klengar er kau, e kau a mo metik a deureng er a ngidil omeruul el bom chau. Ochoi, “Ngii, el di Chimong,”²² e a nger. Sel bo dodengelii a Jesus Kristo lokiu a blak el reng er a omesuub, e mengetmokl ra klou klaumerang er kid er Ngii, e melasm el mo uai Ngii, e kid a dirrek el mo soad el kmul uasei, “Omereng el saul el mo er a Dios mesel sengk er a chedaol Ngelekel Sechal.”²³ Loba chedaol ngklel a Jesus Kristo, amen.