De Chelbangel Ngesou
A bebil ra kot el meklou a belkul ngeso el dodars a ngara chelsel a telungalek er kid, mora resechelid, ikelesia er kid, me a beluad.
Ikal mla memong el klebesei, e kede mla mes a betok el tellemall er a beluu er a beluulechad er a rua Mexico, Merikel, Aisa, Caribbean, me a Africa. El ultebedii a klungiolir a rebetok er a telael chad el siliseb lolengeseu er a re mlara chelsel kerior, ma rengesool ma re ngara klengit el reng. Ak mle ungil a renguk el mesterir a rengeasek el redil ra Texas ma Florida, el, ulebengterir a rebebil, el mla ubail a Helping Hands el chelechedal a bail e olengeseu el meledaes a blai er a besbas ruruil er a mesisiich el eolt. Ng betok ra retelael a sorir el mortial klou a usbechall er ngii omko te kmeed. Me te bai di, ullengeseu lokiu a uldars el mo er tirkal ngara ringel. A blekokouii ma klechubechub er kemiu a ulekrael el di uai a teletelel a Kristo.
Chelechal sils eng soak el mo dulii a tebechedel omesiou el ngii a kumdasu eng klou a belkul el mora rokui—el diak el iior er a basio el omngarngii. Tiang a telengtengil omesiou el kid el rokui el mla omes a chisel a dirk dilubech el kerior a ulmechesiu er kid el diak dodengei a bo doruul, a nger a locha kmal di ngar medad.
A Osobel a ulsisechakl, “E leng kel mo osebelii a klengar er ngii a mo oridii: eng di ngkel choitii a klengar er ngii el kirek, a mo metik er a klengar er ngii.”1 President Thomas S. Monson a millekoi er tial chedaol llechukl el kmo: “A kumera el kmo a Osobel a melekoi er kid el kmo dil merko dechoit a klengar er kid el mesiou ra rebebil, eng kmal kekerei a moktek er a klengar er kid. Tirkel kiei el di kirir a di mol mechimetemet el belkul tia el tekoi a choitii a klengar er tir, eng di tirkel chemoit a klengar er tir el mesiou ra rebebil a mukeroul e mo bekerredechel—e sel bo le nguu a osobelii a klengar er tir.”2
Kede kiei el siukang a di merael el mocha chemau tial kekerei, el screen el ngara chimad e bai diak dechau a chad el ngar bita er kid. Kede mla mtechir a ungil klekasoues ra medad e klikmechur, malechub, e kede kasoues e kadecheduch lolab a text ma tweet. Kede blechoel el kerekikl er a ildisir e re roltirakl me a re sorir kid e diak el bai do ngaichiklang ra sechelid lolecholt a beltikereng, ulekereu, ma meral ngara rengud. Ng mera lungil a ikal beches el klekedall el dolab lomerk a klumech ra ebangkelio er a Jesus Kristo e ngosukid lomak er kid ma telungalek me a resechelid, alsekum meng diak de krerekikl ra ungil ulsechellel aikal klalo, e ng dirrek el sebeched lobult el di mo chemau kid e obes er a meral otireklel a ebangkelio el ngii a omesiou.
Ak mui ra beltikelreng ma klaumera el kiriu a rengeasek ma remekekerel chad. Ak mla mes e melchesuar ra klemeriar reng er kemiu el mesiou e ngodechii a telkib ra belulechad. A kumerang el chedal a ikelesia a mesa omesiou el rengul a telbiil el ngiluu me tir el oltirakl. Eng di sel bebil eng ngar ngii a mo mengesengsang malebchub e kede mo osiik a ungil uldasu el mo melodech ra belulechad e mo diak desa aikel ngii a meklou el ngelsonges el sebeched el kudmokl el kirel a telungalek er kid, resechelid, ikelesia er kid, me a beluad. Ng remutech a rengud a de ues el ringel ma meklou el ulsbechall el ngii a cheroid ra beluad, e bai diak des el kmo ngarngii a chad el ousbech omengelim el kmal di dengchokl er a bita er kid er a klass.
A Sister Linda K. Burton uluchais a chisel a stake Relief Society president el, uluureor lobengteir a rebebil, e chiludel a bar lousbech a rechad er sera 1900s. “Ngii me a ngelekel redil a milkelii a torak el mui er ngii el bar el mla ra London el mora Kosovo. A luut er ngii el moremei eng ngiluu a ulekrael el kmal rirtechii a rengul. Tial ulekrael a tiakid: ‘Tial omrirelii a kmal ungil tekoi. Chelechang e bomrei, e moreael el mora bita el rael e mngesouir a tonari er kau!’”3
Ngerang rulii alsekum meke dosebelii a beluulechad e choitii a ousbech a ngesou el ngar bita er kid me tirkel doubeltikelreng er tir? Ngerang klungiolel sel rulii a beluulechad el moungil, alsekum ma rengar bita er kid a ngara ringel e diak dolchesuar? A Chedam er a Babeluades a ngiltiterir tirkal kmal lousbech er kid el mera bitar kid, leng medengei el kmo kid a sebeched el mo ngosuterir.
A rokui el chad a sebecherir el mes e mesiou el diua Kristo. Acounselor er ngak el, Sister Carol F. McConkie, a dirk ulechais er ngak ra 10 a rekil ngelekel a ngelekel el Sarah el, sera bo lodenglii a delal smecher eng di mle ngii e tibir lolengeseu. Ng ulkisii a merrengel e milii, urmetii a ngerel, sondii a chiul, e remuul a kelel ma delal a sebechel lolengull. Ng dimlak longerodech e remuul aikal beot el tekoi ra omesiou el dimak oldurch er ngii e leng milsa ousbech a ngesou e mle soal lolengeseu. A Sarah dimlak el di lomekngeltengak ra delal, ak dirrek el medengei el kmong mlo ungil a rengul medengei el kmo ng mla ngosur a berraod er a tara chad el betik ra rengul, e a omerellel, a smisichii a deleuill er ngii me a merrengel. President James E. Faust a dilu el kmo: “A mesiou er a rebebil a sebechel lomuchel ra ngii di el taem er a klengar ra chad. … Ng diak a belkul le sal luldirekork, e kmal lungil sel len gara chelsel a re ke blid.”4
Kemiu a rengalek komedengei el kmo ng kmal rutechii a rengrir a rechad ra blimiu sel mues a techall e molengeseu er a blimiu? Kemiu el ngeasek, a melisiich e olngeseu ra rechad ra blimiu a kirel kot el ngarbab er a rokui el teleletael el bo molodech er a beluulechad. Ungil omeruul me a ulekerreu el mora re ta er kau ma delam ma demam a ngosouir meng morngii a kltalreng e nguu a Chedaol reng el mera blai. A ngedechel a beluulechad omuchel ra melisiich er a telungalek er kid.
A tara kired lomes er ngii el sebechel lolengeseu a telungalek el ngara ikelesia er kid. Sel bebil ea rengeleked a oker er kid a ker, “Ngera me ak mora Mutual? Ng diak a kmal ngera el knguu er ngii.”
Alsekum meng mle techellek el chedam lolisechakl, e a kunger, “Ngera rullau el mo omsdasu el kmo ke mora Mutual leng kirel ngarngii omnguu er ngii?”
Ngeasek el sechelik, a kuchais el kmo a bek el miting er a Ikelesia el om ngarngii a ngarngii a kmong techang el sabisi, ngara ringel e ousbech er a sechelei, malechub eng melchesuar el diak el ta er kemiu. Kau a ngarngii a kmong ngerang el klou a belkul kirem lodersii er a bek el miting ma bek el omngar ngii lomeruul, ma Rubak a soal omomes er a omtal basech e molngeseu er tir el di uai Ngii.
A Elder D. Todd Christofferson a ulisechakl, “A kot luchul me a Rubak a ou ikelesia a mo mekdebechii a chelechad ra re Santo el mo melkakl er a ta ma tang el ngar tial ‘kekerei e chibutek el rael el bedul a diak a ulebengelel klengar.’” Ng millemolem el melekoi, “Tial klechelid a diak el dil tal chad lomekerreu ra di ngii; kid a bai, rokui el mlokedong el mo mesiou. Kid a medal, chimal, bdelul, chochil, me a bebil er a tebedechel a bedengel a Kristo.”5
Ng klemerang el kid a mora Ikelesia ra bek el sandei el mo meruul a chedaol ruoll, mesuub a suobel, e melai a ulekrael, eng di a tara kot el klou a belkul me kede mong a, kid a telungalek er tial ikeleisa e oltirakl ra Osobel Jesus Kristo, kede kaukerreu, melisiich ra tang, e omes aikel sebeched lolengeseu e melisiich ra tang. Kid a diak di dolai a ikel ngarngii ra ikelesia; kid a lousbech er kid loldars e oltobed el mora rebebil. Ngeasek el redil ma sechal, sel omluut el mora Mutual, e lak momes aikel loruul a resechelim ra dengua er kau, mterbengii, momes el meliuekl, e dil kau loker er kau, “Ng techa ousbech er ngak er chelechal sils?” Kau a locha nger el mo rutechii a klengar er chad el ua klungem malechub e komekduch a rengul a sechelim el ngii a dilmut e ngar ringel.
Molengit ra Demam er a Babeluades me lochotii tirkel ngar bitar kau lousbech a ngesou er kau me bo lokrolau me meduch lolngeseu er tir. Molatk el kmo a Osobel a blechoel lolngeseu er a derta el chad er a ta el taem.
A ngelekel a ngelekam el Ethan a 17. Ng rirtechii a renguk er chelechal summer e ra ledu er ngak el kmo, ng mlukrael ra okesiul a delal, meng meluluuch er a bek el sils el kirel a techall el mo olngeseu er a kmong techang. Sera kim dak el ngara blirir, e a kulemes er a Ethan lobengterir a rebebil er ngii loba kllou el reng, beltikelreng, ma blekokouii e olngeseu ra delal ma demal e osiik a techall e olngeseu er a rebebil. Ng chilsir a renguk le ngungil medengelterir a rokui el iliuekl er ngii me a sel rengul soal lolngeseu er tir. Ngungil okesiu el merngak. Sel doruul a uaikel loruul a Ethan, lolengit ra Rubak el mo olngeseu er kid el metik a sebeched lolngeseu el kirel, a msa Chedaol Reng meng mok a medad el mes a lousbech a rengar bitar kid, el mesa ngkel tal chad lousbech er kid er sel sils, e momeduch lolngeseu er ngii.
A lmuut el tara sebechem lolengeseu el kirel el diak el chad ra blim malechub a ikelesia, a omes a techall el molngeseu er a hang me a beluu. Sel bebil e kede mokedong el molngeseu ra klou el kereior, e ng di sel bek el sils e ngungil domes a techall lolngeseu er a ikel de ngarngii el melisiich e olngeseu er tirkel lousbech a ngesou. Ak ngiluu osisechakl er a Area President, el mesiou er a tara klou el beluu el betok a ngesengesel a siungel a klengar er tir, el kmo a kot el ungil rael el molngeseu er tirkal ngesool el ngara merkelel a belulechad a mo harrau a bekokouii el omelenget er a sengerenger, melenget el mora Church Humanitarian Aid Fund, e omes a bebil ra teletael el mo olngeseu er tirkel ngara beluam er a ngidil basio el omkiei er ngii. Ka di momdasu er tiang a rokui a mo mukngeltengat alsekum a rokui el chad a oltirakl er tial losisechakl!
Rodam ma rodos, tokuni a rengeasek, sel molasem el mo ua Osobel Jesus Kristo me mkiei loltirakl a telbilem, e ke melemolem loba klemeriar reng el mo mengider a ringel e olngeseu er tirkel diak lungil beserir. Ng diak mobes el kmo a betok lousbech a ngesou a dingar bita er kau. Momuchel lolengeseu er a rekeblimiu me a telungalek er kemiu. Aikang a deleuill el sebechal ngarngii el mo cherechar. Ngii malsekum—e a tokuni alsekum—a delengcheklem a diak el sal lungi, eng sebechem el smiik rolel e mosiou, mongebekakl, e molisiich. Momuchel er tial omngarngii, e moubeltikelreng er tir, e mongedmokl er a telungalek el ngii a soam er a ngar medam.
Moluluuch lolengit a ngsou el mo medengelterir tirkel telungalek el ngara ikelesia lousbech a beltikelreng ma olisiich er a reng. E lak bora Ikelesia loba tial ker “Ngera knguu er tial miting?” e bai moker, “Ng techa ousbech er ngak er chelechal sils? Ngra sebechel lodersii?”
Sel mo mekngeltengat ra delengcheklem ma rechedal a ikelesia, e momes a teletael el kau a sebechem el rulii el mo omekngeltengat er tirkel ngara beluam. A le betok a temem lolngeseu malechub eng di sesel sikang ra buil, e sel dechal a rengum a mo omekngeltengak a klengar e dirrek el mo omekngeltengat er kau er a teletael el ngii a lmuut el ngarbab er sel omesang.
President Spencer W. Kimball a ulsisechakl: “A Dios a diak lomes el kired, ngomes er kid. Engdi tia blechoel lokiu a tara chad eng ngosukid.”6 Mei ma derta er kid lesang a techall el mo mengedmokl a urerel a Demad er a Babeluades e de kedmokl a ulsbechall er a Rengelekel el ngara ngklel a Jesus Kristo, amen.