Ngan Machib ni Woed fare Tathapeg

Gadad ba tawa’ath ni gadad ba fos ko ngiyal’ ney ni gadad be guy fare yi’iy rok Got! Gadad ra sap nga m’on ko fare “ni boed rogon nike weliy Got,”¹ nike buch ma ra yib ni woed rogon ni kan weliy nira buch ko ngiyal’ rodad, ni gadad ba fal’egned rogon dad ko fare bin Migid e Wub rok fare Tathapeg.²

Ma dakriy reb kanawo’en nga biyang ni ngad fal’egned rogon dad ngad mada’ Niged ni ngan boeded Ir u dakan fapi ta machib rodad ngodad! Woed ni fil Yesus Kristus ngak fapi gachalpen u m’on ni yarmiy rad, “Fa’an ra gub t’uf romed ma thingar mu pigpig gad ngog.”³ Pi ta pigpig rodad ngak boech e gidii’ e amargon ni gadad be dag e t’uf rodad ngak Got nge Fak, Yesus Kristus.

Boech e ngiyal’ ma gadad ma lamnag ni ngad rin’ed ban’en nib ga’ ma “fin aram” e rran sap ngay ni gadad be pigpig ngak’ e gubuliyoror rodad. Ma ku woed e pigpig ni dani ga’ e ra yag ni nge thiliyeg e gidii’—fa ka’an gadad. Mang e rin’ fare Tathapeg? U nap’an fare Bayul nge Fos ko Yam—ni’ir e gadad ra tayfan ko re Madnam nifen e Easter—“ndariy be’ ni ke rin’ ni aray gilngin nike par fa bayi par u [dakan] e re fayleng ney.”⁴ Ma fel’ owchen, ma non, ma yan, ma motoyil, ma pi’ e ngiyal’, pi’ e athamgil, ma fil, ma kay, ma ki n’agfan. I pigpig ngak e tabinaew nge pi tafagar, nge pi gubuliyoror nge gidii’ nib thil, me pining e gidii’ ni demtrug nge gidii’ nib tu’uf rok ni nga yog tawa’ath ngorad ko fare gaspal Rok. Pi ta pigpig ney nib “achig” nge t’ufeg e kan tay ngalan e babyor ni fan e machib ko daban’ey e rran.

Nap’an ni rayag ni ngam ‘uneg fare Tathapeg ulan fapi ta machib rom, mfith ngom, “Uw rogon ni rayog ni ngu dag fare tamilang ko fare gaspal ko chan’ey fa ko re tabinaew ney? Mang e be yog fare Thothup ngog ni ngu rin’?”

Pi machib e rayag ni ngan rin’ ni bo’or kanawo’en. Ere ba urgon ya’an?

Pi ta machib e boed rogon ya’an fare quorum ko elders nge Relief Society presidencies ni yad be meybil nag fapi murwel rorad. Gathi kemus ni tiyugang’ e be pi’ a babyor, woed ya’an ni yibe weliy mornga’agen facha’ fa fare tabinaew nap’an ran pi’ fare murwel ngak fapi pumo’on nge bpin ni be machib. Woed ya’an ni yibe yan u butt’, ma yibe fengfeng talne gosgos, fa yibe ‘og nag e pigpig, fan pigpig ngak boech e gidii’. Woed ya’an ni yibe guy facha’ fa yibe non u fon fa yibe yol ko text. Woed ya’an ni yibe pi’ a kard ko birthday fa yibe ‘og ngalang ko game ko soccer. Woed ya’an ni yibe weliy reb e quot fa reb e verse fa reb fare tok ko conference ni fan ngak facha’. Woed ya’an ni yibe sbathin nag reb e duwer ko fare gaspal min ser nag fare mich ni ngan guy nib tomilang rogon nge gapas. Woed ya’an ngam mang bang ko facha’ mag ayuweg. Woed ya’an ba interview ko machib ni yibe weliy mornga’agen gelngin e tin nib t’uf ban’en. Woed ya’an ni fare ulung ko ward e be yarmiy ma be pi’ e ayuw nib ga’ ko gidii’.

Rogon e tiney e machib e pi’ gelngin reb fapi bpin nike palog u tabinaew nin nap’an ni tabab figirngin ko graduate skul. Dariy e telafon ma ku bay e bitir rok ni kab achig, ma dar fel’ rogon e par rok, nibe thamiy ni yigu’ir rok nib palog ko gubin. De n’uw nap’an, reb e bpin ko fare Relief Society e yib ko mab rok ni bay l’agruw chi sus nike fek ni fan fare tir, me fek row ngalan e karo rok, me fek row nga kantin. Ni yoeg fare bpin, “I’ir facha’ ni ayuwegneg ko nap’an ni ri gub gafgow!”

Tin riyul’ e machib e dag reb e bpin u Africa nin pi’ ngak ni nge guy reb e bpin ni darki ma yib nga Galasia ni ke n’uw nap’an. Nap’an ni yan nga tafen fare bpin, me piri’eg ni kan mad’ad ngak ma kan iring e chugum rok, ma dani yo’or e gaan ni nge kay, ma dariy e mad rok nib mangil ni rayog ni nge chuw ngay ko Missa ko Madnam. Fare bpin nin tay chilan ngak e yib ni fal’eg rogon ni nge matal, me fek boech e gaan u milay’ rok, thin nib thothup ni nge be’eg, ma fal’ e thin rorow. Fare “bpin ni dan’i yib” nga galalsia e sul ma chiney e bay reb e liw ni kan pi’ ngak ni bachan ni manang ni baga’ fan ma yib t’uf rok.

Puthuy fare ayuw ko Relief Society nge fare quorum ko elders e ra fekdad nga ta’abang ma ran guy ni yibe mon’og i yan. Ta machib e ra mang ta’areb e murwel ni ra ayuweg fare murwel ko priesthood ni “ngan guy urngin e tabinaew ko fapi chongin e galasia” min “tamgiy fare galasia ni gubin ngiyal’, un ngak min ayuweg,” ⁵ ni woed rogon ni ngan thapeg fan fare Relief Society ni ngan ayuweg boech e gidii’ ni ngar thapegned fare yafos ni manemus.⁶ Murwel u ta’abang u tan pa’ bisof, fare quorum ko elders nga presidencies ko Relief Society e ran thogthog nag ngorad rogon ni ngar ayuwegned e pi cha’ fa tabinaew nib t’uf e ayuw rorad.

Gog ngom reb kanawo’en. Bay reb e mitin ni ke yib e cancer ngak. Den’uw nap’an me tabab nag e taflay, ma chingiyal’ nem, fapi bpin ko Relief Society e ra tabab gad ko murwel, rogon e ayuw ni ngan pi’ ko gaan, ma’af ko taflay, nga ku buch e ayuw. Yima yan ngan fingichiy ni bukun yay, ni baga’ ni tin ba’aray e gidii’ ni rayog ni ngar sasbathin gow boech. Ko ngiyal’ nem, ma bay fare quorum ko fare Melchizedek Priesthood ni kube pi’ e ayuw. Kar fal’agned e tabinaew rok fare bpin ni nge mom ngak ko klosis nge mol. Fapi fel’ yangran e ra pi’ed e ayuw. Nge fapi bpin nib fal’ yangran e kar uned ko ayuw: boechi yad e i tiyan’ ko fare kus nifak fare bpin ni gubin e rran. Bo’or e rran nga tomren, ma fare ward e kiyad be ul’ul ko pigpig ni yad ba tay ngak, ni yad gubin ma yad be dag e t’ufeg ngak ni gathi kemus ni fare bpin nib m’ar machane ngak gubin gidii’en e tabinaew rok.

Tomren bukun yay e ayuw, me yim’ fare bpin ko m’ar ko cancer min kay’ag. Gabe lamnag ma fare ward e kar falfalan’ gad yar mu’gad ko fare murwel rorad? Dangay, fapi bpin nib fel’ yangraned e ul’ul’ gad ngar ayuwegned fachi kus ni fak, ma fare quorum ko priesthood e ra ul’ul gad ngar machib nigad fare matam nge tabinaew rok, nge fapi bpin ko Relief Society e ra ul’ul gad ngar daged e t’ufeg. Pi walageg, iraray wo’en e ta machib—iraray e t’ufeg ni woed fare Tathapeg!

Reb e tawa’ath ko ra thogthog ney ni kan pi’ ngodad e bpin nib fal’yangren ko duw ko 14 nge mada’ ko 18 e ngar uned ko ta machib ngak fapi bpin ko Relief Society, ni woed rogon e pagal ni ta’areb e duw rorad ni be machib ko Melchizedek Priesthood. Pi fal’yangren ney e rayog ni ngar pi’ed e ayuw ko fapi tawa’ath ni kan pi’ ngorad ni nga yag ni ngar ilal gad u fithik e thothup miyed pigpig u charen e pil’al ko murwel ni ngan thapag. Uneg e fal’yangaren ko pi ta machib e rayog ni nge ga’nag fare ayuw ko Relief Society nge fare quorum ko elders ma ra ga’ ayuw ni yibe pi’ ni bachan ba yo’or e gidii’ nibe pi’ e ayuw.

Nap’an ni gura lamnag fapi bpin nib fal’yangren ni gumnang, ma fal’falan’ug ngay ngak fapi bpin ko Relief Society ni ran tawa’ath nagrad ko n’en nib cheg fapi bpin nib fal’yangraned u nap’an ni yad ra pigpig u charen rad. Ma kub fal’an’ug ngay ni ran fanow min fil ngorad e tin ni ngar filed ulan fare Releif Society. Biney ni ngan rin’ e ra ga’nag gil’lungun Got ma rib ga’fan ngak fapi bpin nib fal’yangrenrad, ayuwegrad ngar fal’agned rogon rad ni ngar pigpig gad ulan fare Galasia nga lan e community nge lan e tabinaew rorad. Ni woed rogon ni weliy Sister Bonnie L. Oscarson fowap, bpin nib fal’yangran, “ba’adag ni ngar pigpig gad. Ba t’uf ni ngar nanged ni yad ba t’uf ko fare murwel ni ngan thapeg!”⁷

Riyul’, bpin nib fal’yangren e yad ba machib ngak boech e gidii’, ni dawrin dugliy. Bay ba tabinaew ni gum nang ni be pay u bang nib be’ech ni dariy be’ ni yad manang. Bin somm’on e wik, buchreb e bpin ni 14 e duw rok e yib ko tabinaew roroad nibay e plate u pa’ nibay e cookis riy, nibe fingichiyrad ni kar bad ngaram ko ginem. Chitinngin a bay u karo nibe drive nag, nibe ayuweg fak ni ba’adag ni nge pigpig.

Reb e mtin e m’agfan’ ni boran riy ma bpin ni fak nib 16 e duw rok e dani yib nga tabinaew ko ngiyal’ nima yib. Nap’an ni taw fachi bpin, ma chitinngin e duwer nag ko ngan e imoy riy. Me fulweg fare rogod nib 16 e duw rok ni ke yib i pi’ e floras ngak ban’ib bpin ni dariy figirngin. Make nangfan fare chitinngin, are ma pag fare rogod rok ngani guy fare pbin nib labthir ni dariy figirngin. Ri fal’ e thin rorow, ma yow ma mada’ ni bukum e duw.

Oran e pi bpin ney nib fal’yangren, nga ku boech ni woed rad, e kar guyed e tin nib t’uf ku be’ ma kar pi’ed e ayuw ngorad. Bpin nib fal’yangren e bay ba murnguy rorad ni rayog ni ngar uned ngak boech e bpin nib ilal ngar pi’ed e ayuw ko machib.

Demtrug e duw rodad, nap’an gadad ra tafney nag rogon ngrayog ni ngad machib gad nib yal’ow, gadad ra fith, “Mang ab t’uf [rok]?” Ta’areb nag nga ta’abang e biney e duwer nga fare yul’yul’ ni yiba ‘dag ni ngan pigpig, ma aram ma rayag ni nge thothog nag dad fare Thothup ko n’en ni gadad ra rin’ mara thamiy facha’ e t’ufeg rodad. Gathi blich mornga’agen e bpin nge mo’on ni guma rung’ag ni yad ma fingichiy e gidii’ nibe yib nga Galasia, fa send nag e text fa email, pining ni nge un ko gosgos, fa ni ayuweg ko tin momaw’ ban’en. Labthir ni yigo ir, be’ech ko galasia, gidii’ ni ke mo’war, tin ndariy figirngin, fa fal’yangren ni ke mo’war ab t’uf ni sap fapi mo’on nge bpin nibe machib ngorad. Puthuy e ayuw ko quorum ko elders nge presidencies ko Relief Society ma ran nang ko ‘uw rogon ni ngan pi’ e ayuw.

Tomren gubin ban’en ni kug gog ma ka m’ay, tin riyul’ e machib e ran mu’ nag ni tata’areb nib m’un e t’ufeg nge athamgil ngay. Fal’ngin e machib e ma thilyeg e yafos! Nap’an ran bing gim’ircha’endad ma gadad b’adag ni ngad t’ufegned, min pi’ e athmgil, ma fare gelngin fare machib e dabiyag ni ngan digey. Ya fa’an rab mu’un e t’ufeg ngay, ma ma’ang’ang ara buch, ma gadad ra piri’eg kanawo’en ni ngad sulwegned pi walagdad ni kar “palog” gad ngar suled ko fare gaspal ku Yesus Kristus.

Fare Tathapeg ir e wok ko gubin ban’en—ni gathi kemus ko n’en ni ngad rin’ed machane fan ni ngad rin’ed.⁸“Yafos Rok u fayleng a [be] piningdad—ni ngath athamgil gad boech, ni ngad pagtalined e pi oloboech rodad [magdad] ayuweg boech e gidii’.”⁹ Nap’an ni gadad ra rin’ nib polo’ i gum’ircha’andad ni ngad machib I ged pi walagendad, ma ran tawa’ath nagdad ni nge gel e thothup rodad, ma gadad ra chuchgur ngak Got, ma gadad ra nangfan fare gagiyeg Rok’ u rogon ni gadad ra ayuweg i gadad ngad suled Ngak. Ma gadad ra poey fapi tawa’ath Rok’ ma gadad ra ‘adag ni ngad pi’ed boech ngak e gidii’. Ma gum’ircha’endad e ra ta’areb lungun nga lamandad:

Ngad daged e t’ufeg nge magar rok Got ko pi ta machib ngak fapi walagendad nib bpin nge mo’on.¹¹ Fare fal’ngin nra yib riy ko tomur e fare thamtham ko fare ulungi gidii’ ni mu’ulung nga t’abang u Mariken 100 e duw kafram tomren ni yibe m’ug fare Tathapeg ko nam roraed.

“Me yibe buch ni dariy e male’eg thin u lan fare nam … ni bachan e fare t’ufeg rok’ Got ni bay u lan gum’ircha’en fapi gidii’.

“ … Ma dariy e mo’owean, ara togopluw, … ma rriyul’ ni dakuriy ba ulung i gidii’ ni aram fini falfalaen’ ngab yang u fithik’ gubin e pi gidii’ ni sunmiy Got nga pa’.”¹²

Gube micheg ni pi thogthog ney ni kan pi’ e kab rok Got, nap’an ni gadad ra fek i polo’ i gum’ircha’endad, ma gadad ra mon’og ni ngad mada’ niged fare Fak, ni Yesus Kristus, ko fare wub Rok. Ma ran chuchgur nagdad nga t’abang ni woed e gidii’ nu Zion ma gadad ra thamiy fare fal’falan’ ngak e pi cha’en ni kad ayuwegned ke yib ko fare pi’i kanawo’en e fanow. Ni tiney ni ngad rin’ed ni gube meybil nag u dakan fithngan Yesus Kristus, amen.