T’areb e Rran Ngay

In e duw nga tomur, me yag ba pagael ngak e fagar rog nikan tunguy Brigham ngak. Tomuren nikan gargeleg, ma ba m’ar Brigham ko mit e m’ar nikan noeg e Hunter syngdrome ngay, ni dabi n’uw nap’an ni nge fas Brigham. Reb e rran ma be yan Brigham nge tabinaew rok ko temple, me ga’ar Brigham: l’agruw yay nibe ga’ar, “Ku ta’areb e rran.” Me migid e rran, me yim’ Brigham.

Gu waen ko taliw rok Brigham in yay, ma gubin ngiyal’ ni gura yan, mug sul u dakean fare thin “ku ta’reb e rran.” Mug leam nag ko mang e be yip fan, mang e ra rrin’ u lane yafos rok ni nggu nang ni kari mus ni ta’areb e rran ni kugu bay. Urogon ni nggu ayuweg e ppin rog, pifakag, nge gidii’? Urogon ni nggu athamgil ni nggu gol? Urogon ni nggu ayuweg e dowef rog? Uw urngin yay ni nggu meybil ma gube be’eg fapi chep nib thothup? Gube leam nag demtrug e kanawo’ ma ra boran ma “ku ta’areb e rran” e gadaed ra lem nag—gadaed leam nag ni ngad murwel gaed ko chi ngiyal’ nem nib fel’ rogon.

U lane Bin Kakrom e M’ag ma gadaed be be’eg mornga’agen Hezekiah, pilung u Judah. Fare profet Isaiah e yoeg ngak Hezekiah ni bay mus e yafos rok Hezekiah. Nap’an ni rung’ag e thin rok fare profet, me tabab Hezekiah ko meybil, nge wenig, ma be yoer nib gel. Ngiyal’ nem, me tay Jehovah 15 e duw ko yafos rok Hezekiah. (Muguy ko Isaiah 38:1–5.)

Fa’anra kan noeg ngodaed nib ngoch e ngiyal’ ni ngad fas gaed, ma sana ku gadaed ra wenig nag e rran ko yafos rodaed ni bachan e pin’en ni thingardi rrin’ed fa susun ni kad rrin’ed nib thil rogon.

Demtrug e ngiyal’ ni Somoel, u fithik e gonop Rok, nike dugliy ko n’en ninge pi’ ngodaed, ma ta’ab ban’en e gadaed ma nang: gadaed gubin ma bay e “daba’” ni ngad pired, ma kiy ko rran rodaed ni nge mangil e ngad adaged ni ngad paged ban’en.

Ke yoeg Somoel ni ngiyal’ ney nikan noeg e daba ngay nge taw ko ngiyal’ nike yib fare Fak, e rran ko miligach” (D&C 64:23; kan uneg ngay).

Boech e thin e fare thin ni miligach e ke yib ko thin nu Latin ni sacer, nibe yoeg nib “thothup,” ma facere, e be yoeg ni “ngan fal’eg,”—ma reb e thin ni ngan fal’eg e pin’en nib thothup, ngan tay fan row.

“Miligach e ma pi’ e tawa’ath u tharmiy” (“Praise to the Man,” Hymns,no. 27).

Mang kanawo’ e ra fal’eg e rran rodaed nge tawa’ath ko miligach?

Bin somm’on, pagem e ma pi’ gelngin daed me ga’fan nag e pin’en ni gadaed be miligach ni fen.

Boch e duw kafram ko fa Madnom ko fast, ma ba ppin nib labthir ni yib ngalang nge yoeg e mich rok. Ma paer u lane donguch u Iquitos, u Peruvian Amazon. Yoeg ngomad ni ngiyal’ ko tawfe rok, ma gubin ngiyal’ ma ba adag ni nge thapeg e gam’ing ko temple u Lima, Peru. Ma pi’ e miligach rok nib fal’ rogon me kunuy e salpiy rok nike bukun e duw.

Falfalen’ rok ni yan ko temple nge thapeg fapi gam’ing e weliy ni ga’ar: “Daba’ e rayog ni nggog ni kari pagan’ug ni nggum’. Gag ba ppin ni gub falfalen’ u fayleng; ku kunuy e salpiy, ni danum nang ko uw n’umngin nap’an, ni nggu waen ko temple, ma tomuren medlip e rran u lane lul’ nge 18 e awa u bas, mug taw ko na’un rok Somoel. Nap’an ni gube chuw ko re gin’em nib thothup, mug ga’ar ngog, gubin e miligach ni kug rrin’ ni nggub nga temple, ma dabgu pag ban’en ni nggu pag e pi m’ag ni kug fal’eg; ya ra dariy fan. Biney e ba m’ag ni rib ga’fan!”

Ku fil ko re ppin ney ni miligach e ban’en nima pi’ gelngin daed ngad rrin’ed e tin ni kad rrin’ed. Miligach rodaed e ma mithmithed daed, nge m’ag rodaed me pi’ fan e pin’en nib thothup.

Bin la’agruw, miligach ni gadaed be rrin’ ni fan ngak e gidii’, nge gidii’ nibe rrin’ ni fan ngodaed, e ma fal’eg wa’athan daed ni gubin.

Nap’an ni guma yan ko skul ko dental, mug nang ni rogon e salpiy riy e dani fal’. Be wagay rgon e salpiy ko reb e rran ngo reb.

Kugu manang e re duw nap’an ni gu un ko murwel ko surgery; ma ba t’uf ni nggu thapeg e tin nib ga’fan u m’on ni nggu un ko re semester nem. Galabthir rog e ba cha’ariy e salpiy rorow. Machane reb e nep me buch ban’en. Ku wared ni nggu chuw’iyed e pin’en nib t’uf rog, mug pir’eged ni salpiy ni kug ni bay romad ni rayog ni ngan chuw’iy e twijer riy—dakriy ban’en. Gu suled nga tabinaew ni dariy ban’en u pa’ mad ni kan kirbaen’ ni dabiyog ni nggu waen ngaa college. Machane, rib tumgin, me ga’ar e nina’ rog ngog, “Taylor, mu un ngog; darow nga waen.”

Gomow yan nga donguch ko gin ni bukun yang ni ma chuw’iy e jewelry riy. Nap’an gu taw gow ko ba kantin, me feek e nina’ rog ba bachal nib gold u lane waay rok nibay e thin riy nibe ga’ar, “Yan ngak fakag nike yib ko papa’ rom.” Bachal nike pi’ e tutuw rog ngak ko reb e birthday rok. Ma arame, u pow’cheg, me pi’ ni chuway’.

Nap’an ni thapeg e salpiy, me ga’ar ngog, “Fa’anra bay ban’en nib mich u wun’ug, ma gu ma nang ni gara mang e dentist. Man ngam chuw’iy gubin e tin nib t’uf rom.” Chiney, rayog ni ngam tafney nag ko miti mang student e ku mang? Gu ba adag ni nggog ni ku ug athamgil kug mu’ nag e skul rog nib peay ni bachane gu manang e miligach nike rrin’.

Kug fil ni miligach nibe rrin’ e pi’in nib t’uf rodaed e ma ayuweg daed nge pi’ gelngin daed ni boed nikan pi’ e raen ngodaed u dakean e desert. Mit nem e miligach e ma pi’ e athap nge athamgil.

Bin dalip, miligach ni gadaed be rrin’ e ba achig ko bin miligach rok fare Faak Got.

Mang e rib ga’fan ko ba bachal nib gold ko miligach rok Faak Got? Urogon ni rayog ni ngad tayed fan e binem e miligach? Ra reb e rran ma rayog ni ngad tafneyed dad ni bay ta’areb e rran ni ngad pired ma ngad yul’yul’ gad. Ke ga’ar Amulek, “Arragon, gubaʼadag ni ngam baed iyib ma dab kum ʼelʼel niged e pi gumʼirchaʼ romed nge nʼuw napʼan; ya musap gaed, chiney e ireray e re ngiyalʼ i nʼen nge re rran ni ngam thap gaed riy; ere arame, faʼan gimed ra kalngaenʼ ma dab mu ʼelʼel niged e pi gumʼirchaʼ romed, ma rib gur ni yira fek fare woʼen e bayul iyib ngomed” (Alma 34:31). Reb e thin riy e, fa’anra gadaed ra pi’ e miligach ngak Somoel ni gumircha’ey nike munguy nge ya’el nike munguy, me yib e tawa’ath ko fare wo’en e falfalen’ nga lane yafos rodad.

Fare wo’en e bayul e ke yag ni bachan fare miligach rok Yesus Kristus. Ir Rok e weliy rogon ni ke gafgow ko fare miligach, ni mus ngak Got, nib gel ko gubin, ma ke dada’ ni bachane amith, ke map’en e racha’ rok ni gubin yang, ke gafgow ni dowef nge ya’el, me yoeg ni dabin chuweg rok, me pag” (D&C 19:18).

Ma bachane re miligach ney, tomuren nikan fol ko kanawo’en e kalngan’uy, ma rayog ni ngad thamiyed e tomal ko oloboch rodaed nge denen nike chuw. Ya, kirkireb, tamra’, amith, kirbaen’, ni gadaed be ted daed nga but e ra thil nge, tamilang, falfalen’, nge athap.

Ta’ab ngiyal’, ni nap’an ni gadaed ra tay fan e miligach Rok ma gadaed falfalen’ ngay, ma rayog ni ngad thapeged nib gel ni ngad adaged ngad manged pifaak Got nib mangil, ni ngan palog ko denen, man cha’riy e m’ag nib fal’ rogon ko kafram.

Ma arame, boed Enos ni kan n’ag fan e denen rok, ma gadaed ra thamiy ni gadaed ba adag ni ngad paged gadaed ngad gayed ban’en nib fal’ ko pi walag daed (muguy ko Enos 1:9). Ma gadaed ra adag ni gubin e “ku ta’reb e rran” ni ngan fol ko fare thin rok President Howard W. Hunter ni ga’ar ngodaed: “Fal’eg thin. Gay e fagar ni kan pagtilin. Chuweg e marwaer ko pagan’. … fulweg nib munguy. Pi’ e athamgil ngak e bitir. Mu dag e yul’yul’ rom ko thin nge mithmith. Cha’ariy e n’en nikam micheg. Mpag e domomow. N’ag fan e kireb rok bee’ ni dabum daken. Mu siro’. Gay rogon ni ngam nang fan. Sap ko rogon e thin rom ngak e gidii’. Leam nag bee’ ko somm’on. Mu gol. Mu munguy. Minmin boech. Pining e magaer. Pining bee’ ni da num nang. Mpi’ e falfalen’ nga gumircha’en reb e bitir. … mog e t’ufeg rom mukum moeg bayay” (Teachings of Presidents of the Church: Howard W. Hunter [2015], 32; adapted from “What We Think Christmas Is,” McCall’s, Dec. 1959, 82–83).

Aygun suguyed e rran rodaed ko pi mithmith nem nge gelngin e miligach rodaed nge miligach ni gadaed be fal’eg fa gadaed be thapeg rok boech e gidii’. Ma, aygun falfalen’ gadaed ko gapas ma gadaed falfalen’ ni fare miligach rok fare Magirag ni Karimus rok Got nike pi’ ngodaed; arrogon, re gapas nem e kanoeg nap’an ni kad be’eged ni mul Adam ni nge yag ni, gidii’—gur—e ngam guy e falflaen’ (muguy ko 2 Nephi 2:25). Re falfalen’ nem e ba falfalen’ nib riyul’ ni kemus ni gare miligach nge fare Bayul rok fare Tathapeg ni Yesus Kristus e rayog ni nge pi’.

Meybil rog e ngad fol gaed Rok, me mich u wan’ daed Ngak, me t’uf rodaed, ma gadaed thamiy e t’ufeg nike rrin’ u dakean e miligach Rok ko gubin ngiyal’ ni gadaed be paer u fayleng. U dakean fithngan Yesus Kristus, amen.