Fal’eg Rogom Ningam Mada’nag Got
Gay rogon e muruwel nu tharmiy ufithik e mat’aw, ta’bang, nge fel’ rogon ra taermedliy ngodad ningad mada’noged Got.
Eliza R. Snow, ke non marunga’agen e yarmiy ko fare Temple U Kirtland (ke un ngay), ke yoeg: “Fapi gam’ing ko yarmiy kanoeg u somm’on, machane dariy’ e thin u gidii’ ninge weliy’ nib fel’ rogon e tin ma’ang’ang ku tharmiy ni ke buch u rran nem. Boech e angel kar m’uged ngak boech, ma ke yib e thamtham nu tharmiy ngak e gidii’ ngaram, me urngin e gum’racha’ karsuged ko falflaen’ nge thamtham jo fel’ngin nib polo’.”1
Fatin nu tharmiy ke buch ulan fare Kirtland Temple kar ayuweged e fan ko fare Galasia ku Yesus Kristus kan sulweg ninge yoeg e thap nge tayfan ngalang ko urngin e bitir ku Chitamangdaed nu Tharmiy.2 Nap’an gadadba taermedliy ningad baed ngak Got, rayog ningad nanged fan e muruwel rodad nib thothup nap’an ngad filed marunga’agen fapi key ni ke fulweg ulan fare Kirtland Temple.
Ulan fare meybil ko yarmiy, ufithik e sobutaen’ fare Profet Joseph Smith ke wenig ngak Somoel “mu thapeg e na’un ney … ni kam motochiyelnogdaed ningad toeyed.”3
Tomruen ta’areb e wik, nap’an e Madnom ko Easter, fare Somoel ke m’ug ulane lik’ay nib fel’ make thapeg e temple Rok. Fare n’em ni ke buch u April 3, 1836, ma nap’an 182 e duw u tomuren ko rran ni Madnom ko Easter daba’. I’ir e ningyal’ ko Passover—e ningyal’ ney ni dabi buch yo’or I yay napan ko Easter nge Passover ma buch u ta’ab e yay. Tomuren ke mu’ e lik’ay, delip e profet nu kakrom, Moses, Elias and Elijah, kar mug’ed ngak mar pii’ed fapi key nib t’uf ninge yoeg e fan rok Somoel ninge sulweg e Galasia Rok u tiney e rran. Re fan nem be yip fan, ninge, mukun’ e gidii’ ko Israel, m’ag pa’angin e tabinaew uta’abang, ma taermedliy e fayleng ko bin La’agruw e Wub ko Somoel.4
Arragon Elijah nge Moses ningar m’ugew i’ir “‘ban’en nib fel’ ko e yalen ko gidii’ ni Jew, nima weliy’ ni Moses nge Elijah ra taw uta’abang nap’an fare ‘tomur ko ningyal’.’” 5 Ulane machib rodad, biney e wub ke mugu’uliy e sulweg ko boech e key u tin tomur e rran ma bin tomur e yay, nap’an e ningyal’ ko urngin e ban’en u tomur.”6
Fare Kirtland Temple, u radan’ nge gi, ni dariy’ fan. Machane u rrogon e tin gaa’fan ko e gidii’, nike thilyeg e tin ko manemus. Boech e profet nu kakrom kar fulweged fapi key ni fan e gam’ing nibe thapeg ko manemus rok fare gospel ku Yesus Kristus. Nike gay e falfalen’raed fapi chongin nib michaen’raed.
Fapi key ma pii’ e “gelngin nu lanelang”7 ni fan e muruwel nu tharmiy ninge mugu’uliy bin dayif e fan ko Galasia.8 Nap’an fare rran ko Easter nem ulane fare Kirtland Temple, ke fulweg delip e key:
Bin Somm’on, Moses ke m’ug me ke fulweg fapi key ninge mukun’gaed Israel uta’abang ulongob e fayleng, i’ir e muruwel ko tamachib.9
Bin La’agruw, Elias ke m’ug me ke pii’ fapi key ko e mfen nga gospel ku Abraham, ni’ir e fulweg ko e michmicheg rok Abraham.10 President Russell M. Nelson ke fil e fan ko fapi key ko michmicheg ninge taermedliy urngin e chongin ko gil’lungun Got. Ke yoeg, “Gadadmanang e fithingandaed ma [gadadmanang] e tin Got ba’adag ngodad.”11
Bin Dalip, Elijah ke m’ug me pii’ fapi key ko gelnginiy ninge m’ag paa’ u tiney e rran, ni’ir e muruwel ko chepin e tabinaew nge gam’ing u temple ni fan e gidii’ nibe gay e thap ngak e gidii’ nibe fas nge yam’.12
Bayi, utanging e fanow ko fare Bin Somm’on e Presidency nge Ulung ko fare Ragag nge La’agruwi Apostle, delip e mo’olung ulane pi headquarter ko Galasia nibe gagyeg niged fa delip e muruwel nu tharmiy ney udakaen fapi key ni kan sulweg ulan fare Kirtland Temple. Yaed fare Missionary Executive Council, fare Priesthood nge Family Executive Council, nge fare Temple nge Family History Executive Council.
Gadad Ba Mugu’uliyed Fapi Muruwel nu Tharmiy Ney Nib Fel’ Rogon?
Bin somm’on, ko Moses nge fulweg rok ko fapi key ningan mukungaed Israel, daba’ bayi chuchgur ko 70,000 tamachib ulongob e fayleng nibe machib niged e gospel Rok ngak e gidii’ Rok. Aray e tabab ko e mugu’uliy ko e muruwel nib gaa’ ma’ang’ang ni ke guy Nephi ko gapi gidii’ ni Gentile nge gidii’ ko Israel. Nephi ke guy e ningyal’ rodad nap’an e Gidii’en Got ra yaen nga ulongob e fayleng, machane matheg roared ran chigchig ni fan e kireb. Machane, ke guy yaedra fek "e talin e mael ko tin mat’aw nge gelngin Got u fithik e fel’ngin."13 Ulane chepin ko Galasia kan fulweg, e muruwel ko tamachib nib ma’ang’ang. Gababe guy e mugu’uliy ko e lik’ay rok Nephi. Matheg rodad e ba chigchig, machane gadadba athamgily ko rayog rodad ningad thapeged e gidii’ nira fulweg ko mulwol rok Tathapeg.
Bin la’agruw, Elias ke m’ug me pii’ e mfen ko gospel ku Abraham, me yoeg ni udakaendaed nge bitir rodad ko urngin e mfen u tormuren ran taw’athnograed. Nap’an e mo’olung ney, ke yib e powiy’ nib fel’ urrogon ningad ayuweged e machaelboeg ko Gidii’en Got ma taermedliyraed ningar uned e gil’lungun Got.14 Fare thilyeg u lane Mo’olung ko Priesthood ko Elder nge High Priest Quorums ra pi’ e gelngin nge matawon ko priesthood. Home nge visiting teaching chiney e “machib” ni ke fil u lan biney e mo’olung ra ngongoliy e Gidii’en Got ni ngar mada gad Got.
Bin Dalip, Elijah ke pii’ fapi Key ko mag paa’ ko mfen ney. Ni fan e gidii’ nibe fas ko bingyal’, e noemownog ko pi temple nge chepin e muruwel ko tabinaew e ba ma’ang’ang. Ra yaen nib papay mada’ ko e bin La’agruw e Wub ko Tathapeg richey en fayleng ra dariy’ fan nap’an e wub rok.15
Chepin e tabinaew, ke yoeg e taw’ath ku tharmiy udakaen e technology, kan noemownag nib gaa’ u boech e duw. Nib kireb ningad wagaeygaed ko biney e muruwel nib thothup ney ma lemnag e Aunt ni Jane fa reb e tha’ rom ra mugu’uliy urngin e muruwel; gube pii’ e thin ko President Joseph Fielding Smith: "Dariy’ e bee’ ninge chuweg ko e muruwel ney. Nib chilyen ko urngin e apostle nge elder nib sobutaen’ [fa ppin]. Gi, fa gil’, fa bo’or e duw ko pigpig u Galasia … dariy’ reb e bee’ ninge dariy’ fan e thap ko bee’ nib yam’.”16
Chiney bay bo’or e temple ulongob e fayleng nge salpiy ni bo’or ko aptron assistance fund ningad ayuweged e gidii’ nib t’uf dariy’ fan e palog ko e temple.
Ni fan e bee’, ni fel’ rogon ningaed lemniged ko e rayog rodad ningad mugu’uliy e murwel ko tamachib, temple fa muruwel ko family history, mag taermedliyed ningad mada’noged Got.
Mat’aw, Ta’abang, nge Ta’abrogon u poewchen Got Ni’ir e Dayiy ko Chilyen Ko Muruwel Ney
Marunga’agen e tin mat’aw,e yafas ney i’ir e ningyal’ ningad taermedliyed ningad mada’niged Got.17 Fare Babyor ku Mormon ba weliy’ bo’or e chepin nibe weliy’ e tin tagan’ nira yib ngak e bee’ fa gidii’ ni dar folgaed fapi motochiyel rok Got.18
Nap’an e yafas rodad, e magawon ko fayleng kar thilyeged bo’or e rogon—ko ban’en ni dariy fan nga tin tagan ban’en. Nib fel’ ni kan thilyeg e galong ni dabki pi’ mat’won19 Rogon e galong nem ba tha’ab e motochiyel rok Got nge ko gidii’. Machane, e gidii’ nima nang fan e kanawo’en Got thingari cham ko e galong ni dariy’ e mabgol, I’ir reb e denen. Milwol ko tabinaw rodad ngak feylang ba yoeg e koel chiya’ ni e gidii’ nira tha’ab e motochiyel ko mabgol, nira gechignog e mabgol fa bitir [fa demtrug e bee’] … ra yibi buch ningar sak’iy u pow’chen Got ngan pufthin nag.”20
Nap’an ngad sapgaed, rayog ningad guyed e tin tagaen’ ko lumel nge addiction u gubin fen. Fa’an, woed rogon e gidii’, gadadba tamdag ko pufthin rodad ko Tathapeg rodad, thingar ningad gayed e n’ag fan. Kug rus ni bay bo’or e gidii’ nibe lemnag Got ni dariy’ fan ma dar gayed e powiy’ ko pi babyor nib thothup fa pi profet. Fa’an, gadad gubin, ra lemnag marunga’gen e tin nira yib udakaen e denen, bo’or e gidii’ ra cham ko pornography fa e objectification ko ppin.21 Woed rogon Alma ke yoeg ngak e fak ni Corianton ulane fare Babyor ku Mormon, “denen e dariy bingyal’ ni bay e falfalaen’ riy.”22
Marunga’agen e ta’abang, en Tathapeg ke yoeg “Fa’an dab kum ta’abang dab kum gidii’ rog.”23 Gadadma nang e ya’el ko cham bayib ku mo’oniyan’.24
U tiney erran rodad, e chiylen ko babyor nib thothup ningad ta’abangnogdaed e gidii’ dar motoyilgaed ngay, ma bo’or e gidii’ ba puluw ko e ban’en nib thil rodad,25 ko e gil’, mo’on fa ppin, nam, fa fla’ab. U bo’or e nam, sana ulan urngin e nam, e gidii’ ba cham ko yalen roared. Ulane fare Galasia ku Somoel, rimus e yalen gadadra fol ngad filed i’ir e yalen ko fare Gospel ku Yesus Kristus. Ta’abang gadad ba’adag ningad uned en Tathapeg nge mafil Rok.26
Nap’an ngad filed marunga’agen fapi fan nib kenginn ko Galasia, urngin ba weliy’ marunga’agen e ta’abrogdaed u powechen Somoel27 ma folgaed e yalen ko gospel ku Yesus Kristus. Marunga’agen e muruwel ko tamachib, e tin t’uf ko tawfe ningan sobutaen’ u poewchen Got ngan yib udakaen e gum’racha’ nib sobutaen nge ya’el nib gechig.28 Mafil, fla’ab, gidii’, fa nam ni dariy’ fan.
Arragon, fapi tamachib ma pigpig nib sobutaen’ u gi ni kan pinningraed riy’. Dar gayed rogon ningar pigpigniged ko e yalen ko gil’ fa fla’ab. Yaedma pigpig ko urngin e gum’rach’raed, rayog roared, laniyaen’raed, nge gelingtaed ulan urngin e nam. Dar me’leged e companion ko mission roared, yaedma gay rogon ningar thapeged e tin ku Kristus,29 i’ir e kenginn e yalen ku Yesus Kristus.
Fapi Babyor nib thothup ba powiy’nogdaed marunga’agen e tha’ rodad nib thabi gaa’fan. En Tathapeg ke fil fare bin somm’on e motochiyel ningan “ba’adag Somoel i Got rom.” Nge bin la’agruw ningam “ba’adag e yoror rom ni woed rogom.”30
U tomruren en Tathapeg ke weliy’ ni urngin e gidii’ i yoror rodad.31 Fare Babyor ku Mormon ba weliy’ ni dariy’ e -ites, gidii’, fa gil’.32 Thingar ningad manged uta’abang ngad ta’abrogondaed.
Gam’ing nib thothup nge muruwel ku tharmiy ngan toey ko dayif ney. Gube lemnag ni e birom ulane temple sana ta’abrogog. Nap’an kug chuweg ko e muruwel rog u San Fransisco mug waen nga Oakland Temple, Guma thapeg e thamtham ko t’ufeg nge gapas. Yangi gaa’fan ningu Gub ni chuchugur ngak Got nge pi fan Rok. Pi gam’ing ko thapeg e ba gaa’fan rog, machane yangi thamtham nem ke yib bachan e ta’abrogon nge ta’abang ulane temple. Urngin e gidii’ kar chuw e mad nib wechwech. Dariy’ e sayin ko fla’ab, gil’, fa gelbugwaen ko mafil; gadad gubin e walageg nib mo’on nge ppin ningad sobutaen’gaed u poewchen Got.
Ulane singil nib thothup ko m’ag paa’, e gam’ing ko meybil nib manemus nibe ta’abrogon ko urngin e gidii’. Gube a’dag nib riyul’ e mabgol nib sobutaen nge mabgol nib fla’ab nira thapeg ta’abrogon e ban’en ulangin. Yaedra chuw ta’abrogon e maed mar fi’leged ta’abrogon e michmich u ta’ab e altar. Bayi ta’ab e taw’ath nib manemus ko priesthood roraed. Ran mugu’uliy pin’ney ulan temple nib fel’ kan toey udakaen e tithe ko pi Gidii’en Got ni’ir fare na’un nib thothup ko Somoel.
Mugu’uliy e muruwel ku tharmiy, udakaen e mat’aw, ta’abang, nge ta’abrogon u poewchen Got, ra yoeg e falflaen’ nge gapas u fayleng ney nge nira taermedliydaed ko yafas ni manemus ulane fayleng ni bay yib.33 Ra fa’eg rogdaed ningad mada’ niged Got.34
Gadadba meybil ni fanmed, dariy’ fan e rogom, ningam thapeg e fanow ko bishop romed ningam mat’aw ko recommend ko temple.35
Kad faflaen’daed ni bay bo’or e gidii’ nibe taermedliyed ningar ranoed nga temple. Bay bo’or e matheg ko e gidii’ ni bay e temple roraed ko boech e duw. Limited-use recommend ko e youg nib mat’aw ke noemoenog nap’an la’agruwi duw. Arragon e gidii’ nib michaen’ ulane Galasia ram ang gaa’.
U tomur, wenig ningam nang ni urngin e tiyugang’ nib tolang ko Galasia nibe gagyeg niged pi fan ko Galasia ma thapeg e ayuw ku tharmiy. Biney e powiy’ nima yib udakaen e Ya’el ma boech e ningyal’ udakaen en Tathapeg u sabethin. Urngin miit e powiy’ ko ya’el ngan pii’. Kug falflaen’ ni kug thapeg e powiy’ nem. Machane e powiy’ nima pii’ udakaen e ningyal’ ko Somoel’, guruy nga guruy nge fanow ko fanow,36 nap’an “a Somoel nima nang urngin e ban’en ba me’leg ninge filngodad.”37 Powiy’ ni fan e Galasia nima yib udakaen e profet Rok.
Gadad gubin kug thapeg e rogon ningad sustain nag President Russell M. Nelson ni’ir e profet nge President ko Fare Galasia ku Yesus Kristus ni fan Gidii’en Got ko Tin Tomur e Rran u mo’olung ney. Fare Ragag nge L’agruw, ko e mo’olung nge bee’, kug thapeged e ma’ang’ang ko ya’el nap’an kug tayed e paa’maed u loelgen President Nelson nge President Dallin H. Oaks, udakaen e lam, kug yarmiy ninge mang President ko Galasia. Gube micheg ni ke me’leg u somm’on make taermedliy ko urngin e yafas rok ninge mang e profet ku Somoel u mfen rodad. Udakaen e fithingan ku Yesus Kristus, amen.