Ta’areb Lunguy
Ra ngad taw gaed ko gin nib t’uf ni ngad taw gaed ngay, ma gadaed be tu’uf rodaed, ma ba tu’uf ni ngad ta’reb gaed.
Reb mit e yafos nibay u dakean e fayleng e fare saalboy. Chuur nga Mexico ningan Krismas gad e tabinaew ko figirngig, ma gamad guy e gin nibay e saalboy riy, gin ni bukun e milyon e saalboy riy ni yibe paer napan e winter. Ba falel’ ni yibe yaliy ya’an ma yibe leam nag e wo’en e ta’areb nge fol ko pi motochiyel rok Got nike dag e pin’en nike sunmeg Got.1
Mitnef e saalboy nikan noeg e monarch ngay e ba cheg nag ko wawliy. Yad ma murwel ko rogon e yal’ ni ngan pir’eg e kanawo’ nib tu’uf ni ngar raned ngay. Gubin e spring, ma yad ma changag ni bukun e biyu’ e mayl u Mexico nge taw nga Canada, ma gubin e fall, miyad sul nga fithik e paan u Mexico.2 Yaed ma rrin’ e biney ni gubin e duw, poey nib achib ni yibe murwel ngay. Napan e milekag roraed, miyad yib nga ta’abang ko gak’iy ngar ayuwegned giyad ko garbeb nge gamanman ni ra longoy raed.3
Ulungi saalboy e kanoeg e kaleidoscope ngay.4 Gathi ban’en nib falel’ ya’an? Ra reb e saalboy u lane kaleidoscope ma ba thil, machane pi yafas ney e Cha’an Tasunmiy e ke sunmiy ni ngar fas gaed, mar chuur gaed, mag wereged e yafas napan ni yad be yan ko reb e floras ngo reb, ni yibe wereg e polen riy. Ma demrtug rogon ni ra reb e saalboy ma ba thil, ma yaed ma murwel u ta’abang ni ngan fal’eg e fayleng nge paer nib fal’ ya’an.
Boed fapi saalboy nikan noeg e monarch ngay, ma gadaed be sul nga tabinaew rodaed u tharmiy ko gin ni gadaed ra sul ngak e Galabthir rodaed nu Tharmiy.5 Boed e pi saalboy, ma kan pi’ ngodaed e pin’en ni gadaed ba cheg riy ni ngad dared u lane yafas, ni ngad “[rrin’ed] e tin nikan pi’ [ngodaed].”6 Boed raed, ma fa’anra gadaed ra tay gumircha’en dad nga ta’abang,7 ma ra ayuweg daed Somoel ni boed e “alabol nike [ulnguy] pifaak nga tan poen”8 me pilyeg daed ngad manged e kaleidoscope.
Pi bulyol nge pi pagael, ppin rugod nge pagael ni fal’ yangren, walagey, e gadaed bay ko re milekag ney u ta’abang. Ra ngad taw gaed ko gin ni ngad taw gaed ngay, ma gadaed be tu’uf rodaed, ma ba tu’uf ni ngad ta’reb gaed. Ke ga’ar Somoel ngodaed, “Mu ta’areb; fa’anra danga’ ma gathi gab mang ngog.”9
Yesus Kristus e wo’en ni yow ba ta’areb e Chitamangin. Ta’areb fan row, ko tu’ufeg, nge lane murwel, “n’en ni ba adag fare Faak e ra ta’areb ko n’en ni ba adag fare Chitamangiy.”10
Urogon ni rayog ni ngad fol gaed ko wo’ rok Somoel nib mangil ni yow ba ta’areb e Chitamangin ma gadaed ta’areb Ngorow nge ngodaed?
Bay e kanawo’ ni ran pir’eg u lane Acts 1:14. Gadaed be bi’eg nibe ga’ar, “[Fapi pumo’on e ri] ngongliyed reb e ulung ngu’ur meybilgad ni yad e ppin.”11
Gube leam nag nib ga’fan e re thin nem ni “ta’areb” ni i m’ug ni bukun yay u lane babyor ko Acts, gin ni gadaed be bi’eg mornga’agen pin’en nike rrin’ e pi gachalpen Yesus Kristus nib tumgin napan ni sul nga tharmiy nike fos ko yam’, nge pi tawa’ath ni kar thapeged ni bachane murwel roraed. Baga’ fan ni gadaed ra pir’eg ta’ab ban’en u fithik e pi’in nib yul’yul’ u dakean yu Mariken ko ngiyal’ ni yib Somoel nge machib ngoraed. “Ta’areb” e be yoeg ni ke fal’ e puruy’, ke ta’ab lunguy, ma yib ulung nga ta’abang.
Boech ban’en nima rrin’ e pi Gidii’en Got nib yul’yul’ u ta’abang u bang e yad ma micheg mornga’agen Yesus Kristus, ma yaed ma fil mornga’agen e thin rok Got u ta’abang, ma yaed ma machib ngoraed u fithik e tu’ufeg.12
Pi gachalpen Somoel e ta’ab fan raed, u fithik e tu’ufeg, nge lane murwel. Yaed manang ko yad mini’, yad manang ko mang e ngar rrin’ed, ma kar rrin’ed u fithik e tu’ufeg roraed ngak Got nge ngoraed. Yad bang ko fare kaleidoscope nib falel’ nibe yan nga m’on ni yad ta’areb.
Boech e pi tawa’ath ni yaed be thapeg e ba sug ko fare Kan ni Thothup, pi ma’ang’ang e be buch roraed, be ga’ fare Galasia, ma dariy e to’ogor u fithik e gidii’, ma ke fal’eg Somoel wa’athan raed ko gubin ban’en.13
Rayog ni ngad leam niged ni fan ni ri yad ba ta’areb e bachan ni yad manang Somoel. Kar chugur gaed Ngak, ma kar guyed e murwel Rok nib thothup, nge pi ma’ang’ang nike rrin’, nge Ir nike Foskoyam’. Kar guyed ma kar math gaed ko faath u pa’ nge ay. Kan nanged ni ri Ir fare Messiah nikan micheg, fare Tabiyul ko fayleng. Kar nanged ni “Ir e fan e gubin e gol, gapas, nge manemus.”14
Demtrug ni daworun guyed fare Tathapeg nga owchen daed, ma rayog ni ngad nanged nib fas. Napan ni gadaed ra chugur Ngak, napan ni gadaed ra gay rogon ni ngaan thapeg e micheg u dakean fare Kan ni Thothup ni mornga’agen e murwel Rok ni thothup, ma gadaed ra nang fan nib fal’ rogon fadaed; fare tu’ufeg rk Got e ra paer u lan gumircha’en daed;15 gadaed ra ta’areb u lane pi kaleidoscope ko tabinaew rodaed, ward, nge binaew rodaed; ma gadaed ra machib ngodaed “ko kanawo’ nib bi’ech, mab mangil.”16
Ma buch e ma’ang’ang nap’an nima murwel e pifaak Got u ta’abang nibe gagyeg nag raed fare Kan Nthothup ni ngan ayuweg e pi’in nib tu’uf e ayuw roraed.
Kad rung’aged bukun mornga’agen e tu’ufeg nike rrin’e gidii’ napan nima buch ban’en. Boed, napan ni yib e n’ew nib gel nga Houston ko fare duw ni kafini thimur, ke pagtilin e gidii’ mornga’agen e tiroraed ban’en kar raned ri pi’ed e ayuw. Ba elders quorum president e ning e ayuw ko binaew, nge 77 e booch e kan fal’eg rogon nib papey. Gidii’ e yaen ni yibe feek e tabinaew nga lane na’un rodaed, gin nikan pi’ e ayuw ngoraed. Pi’in ko galasia nge pi’in ni dani member e yibe murwel u ta’abang ni ta’areb fan.
U Santiago, Chile, ma president ko Relief Society e ba adag ni nge ayuweg e pi immigrant u lane binaew rok nikan nib u Haiti. Mar noned e pi toygang’ ko priesthood u ta’abang, me ir nge boech e toygang’ e ri dugliyed ni ngan pi’ e clas ko Spanich ngak e pi immigrant nem, man ayuweg raed ni ngar pired ko tabinaew roraed nib fal’ rogon. Gubin e kadbul ko Sabado, me mukun e pi tamachib nga ta’abang ni yad e bitir. Gara thamiy nikan ta’areb u lane re na’un nem nib wo’ ko gidii’ nib thilthil rogoy ni yibe pigpig u ta’abang.
U Mexico, ma bukun mira’ay e gidii’ ko galasia e milekag ni bukun e awa ni ngan ayuweg e gidii’ nike mad’ad ko fare duru’. Kar baed nibay e talne murwel roraed, masin, nge tu’ufeg ko pi’in ni bay u to’ben raed. Kar baed nga ta’abang u lan reb e na’un ni yibe soen ni ngan noeg ko mang e ngar rrin’ed, ma fare mayor u Ixhuatán e aw nga but nge yoer nike guy e “adag rokʼ Kristus nib machalbog.”17
Chiney e ke pi’ Somoel e kanawo’ ngodaed ni ngad non gaed u ta’abang u lan reb e pul ko ulung ko priesthood roadaed nge Relief Society, ya ngeyag ni ngad murwel gaed u lane kaleidoscope rodaed nib ward fa branch—bang ni rayog ni ngad bad ngay nge gin nib tu’uf ayuw rodaed ni gubin.
Gubin e gidii’ ko kanawo’ rodaed e ba thik, machane kad uned ngoraed u ta’abang. Kanawo’ rodaed e gathi mornga’agen e n’en ni kad rrin’ed fa gin ni kad baed riy; mornga’agen e gin ni ngad dared ngay nge n’en ni gadaed be mang, u ta’abang. Napan ni gadaed ra non u ta’abang nibe gayeg nigey fare Kan ni Thothup, ma rayog ni ngad guyed e gin ni gadaed bay riy nge gin nib tu’uf ni ngad baed ngay. Fare Kan ni Thothup e ma pi’ e sap ngodaed ni dabyog ni nga=e guy owchen daed, ya bachane fare “yi’iy e ba warer u fithik daed,”18 ma napan ni gadaed ra tay e pi yi’iy nem nga ta’abang, ma rayog ni ngad sap gaed nib tamilang boech.
Nap’an ni gadaed ra murwel u ta’abang, ma fan daed e thingar ni sap man rrin’ e tin ni ba adag Somoel; athamgil rodaed e thingari mange tu’ufeg ni gadaed be thamiy ni fan ngak Got nge cha’an nib chugur ngodaed;19 ma n’en ni gadaed ba adag e thingarin “murwel u fithik e yul’yul’,”20 ya ngeyag ni ngad fal’eged e kanawo’ ni fan e sul rok fare Tathapeg rodaed. Re kanawo’ ni kemus ni rayog ni ngad rrin’ed e “ngan ta’areb.”
Boed e pi saalpboy ni monarch, ma ngad ulul gaed ko milekag rodaed u ta’bang ni bay fan, ni ra bagdaed ba bay e tin nib cheg riy nibe pi’, ni yibe murwel ni ngan fal’eg e biney e fayleng—tata’reb e yan nge fithik e gapas ko motochiyel rok Got.
Somoel ni Yesus Kristus rodaed e ke micheg ngodaed ni napan ni gadaed ra mukun nga ta’bang u dakean fithngan, ma bay u fithik daed.21 Gube micheg nib fas ma ke fos ko yam’ ko fare rran nib fal’ ya’an ni boed e daba’. Ir e Monarch ko gubin mit e monarch, “Pilung ko gubin e pilung, Somoel ko gubin e pilung.”22
Aygud ta’reb gaed rok fare Chitamangiy nge fare Faak ni Magirag Rok, napan nibe gagyeg nag dad fare Kan ni Thothup, e meybil rog u dakean fithngan Yesus Kristus, amen.