Gam’ing ko Thapeg e Ra Fek fare Tomilang nib Ma’ang’ang Ngodad
Gube micheg ni fa’an nran un ko fapi gum’ing min tay fan fapi motochiyel ma ra fek fare tomilang ko ma’ang’ang me ayuwegdad ulan e ra fayleng ney ni ke kireb.
Pi Walageg nib mo’on nge ppin, Gube un ngomed ngad falflaen’gaed ni fan fare gaspal, nge machib rok Kristus.
Bay fagar ni fith ngak Elder Neil L. Anderson, fare ngiyal’ nem ni ke chongin fare Medlip i Ragag, e thamtham ninge gay e welthin u poewchraed 21,000 e gidii’ ulan fare Conference Center. Elder Anderson ke fulweg, “Fare 21,000 e gidii’ dar ma karang e murus ngog; i’ir fare 15 e Walageg ni yaed be paer nga chiya’ u kerum.” Kug sminmin, machane chiney Gube thamiy. Gube a’dag mug sustain nag fapi 15 e mo’on i yaed pi profet, tayi’iy, nge tathogthog.
Somoel ke fil ngak Abrabham ni udakaen e bitir rok ma udakaen e priesthood, ran taw’athnog urngin e tabinaew ko fayleng ko urngin e taw’ath ko Gaspal, arragon e yafos ni manemus” (Abraham 2:11; muguy guruy ni 2–10).
Pi taw’ath nin micheg ko gaspal nge priesthood e kan fulweg nga fayelng, ma nap’an e 1842, fare Profet Joseph Smith ke gagyeg nag fare endowment ni pi’ ngak ri’in e mo’on nge ppin. Mercy Fielding Thompson i’ir reb e pi gidii’ nem. Fare profet ke yoeg ngak, “Ra [endowment] ney e ra fekem u wuru’ e lumor ngak e magal nib tamilang.”1
Daba’ Gube a’dag ninge weliy’ moranga’agen fapi gam’ing ko thapeg, nima fek e magal ngodaed nib tamilang.
Pi Gam’ing nge pi Michmicheg
Ulan Michaen’ ngak fare Mich gadadba be’eg: “E gam’ing i’ir e ngongol, nib thothup e ban’en ningan gagyeg utangin e mat’awaen ko priesthood. [Fare] gam’ing [nib] t’uf ko tayfan ngalang rodad … ni kanoeg e gam’ing ko thapeg. Yaed be tawfe, confirmation, nge thapeg ko fare Priesthood ni Melchizedek [ni fan e mo’on], endowment ko tempel, nge mabgol ni m’ag paa’.”2
Elder David A. Bednar ke fil, “Fapi gam’ing ko thapeg nge tayfan ngalang ningan gagyeg ulan fare Galasia ni kan fulweg rok Somoel … ba yangi rogon ninge yib fapi taw’ath nge gelngin u tharmiy nga yafos ko gidii’.”3
Woed rogon la’agruw i barba’ e salpiy, urngin e gam’ing ko thapeg ba un e michmicheg rok Got. Got ke micheg e taw’ath ngodaed fa’an ngad michaen’gaed ngak fapi michmich rok.
Fare profet Amulek ke yoeg, “Biney… e re ngiyal’… ni ngar mugu’uliyed yaed ni ngar mada’ gaed Got” (Alma 34:32). Urrogn ningad taermeliyed? Udakaen e thapeg ko pi gam’ing ufithik e mat’aw. Ma thingar ningad, woed rogon ke yoeg President Russell M. Nelson, “Athamgiliy ko kanawo’ ko michmicheg.” President Nelson ke yoeg, “E michaen’um ninge fol en Tathapeg ningam fi’leg e michmicheg Ngak ngam fol fapi michmicheg nem nira bing e maab ko urngin e taw’ath ko ya’el nge tin fel’ ko e mo’on, ppin, nge bitir u gubinfen.”4
John and Bonnie Newman, woed rogmed, kar thapegew fare taw’ath ko ya’el ni kan michmicheg President Nelson. Reb e Madnom, tomuren ke yaen nga misa’ ko delip e bitir nib chigchig, Bonnie ke yoeg ngak John, ni gathi ba member ko Galasia, “Dabiyoeg ningu rrin’ fa’an yigo’ gag. Thingar ningam me’leg fa’an gara yib nga misa’ ngog fa ngam me’leg reb e galasia ningad dared ngak uta’abang, machane bitir thingar ningar nanged fan e chitamangraed ba’adag ngak Got.” Bin magid e Madnom nge urngin e Madnom u tomuren, John ke yaen nga misa’; machane ke pigpig, ngongoliy fare piano u bo’or e ward, branch, nge Primary ko bo’or e duw. Kug mada’nag John u April 2015, ma nap’an fare mo’olung nem, kug sabethingow marunga’agen fare bin fel’ e rogon ninge dag e t’ufeg rok ko Bonnie ninge fek nga tempel, machane dabiyoeg fa’an dawori tawfe.
Tomuren ke yaed ngak Fare Galasia ko Yesus Kristus ni fan e Gidii’en Got ko Tin Tomur e Rran ko 39 e duw, John ke tawfe ko 2015. Tomuren ta’areb e duw, Kar m’agew paa’row John nge Bonnie ulane fare Memphis Tennesse Temple, 20 e duw tomuren Bonnie ke thapeg e endowment rok. Fakrow ni mo’on ni 47-e-duw rok, Robert, ke yoeg morang’agen e chitamangin, “Papa’ marib marib, falflaen’, nap’an ke thapeg fare priesthood.” Bonnie ke yoeg, “John i’ir e bee’ nib falflaen’, machane nap’an ke thapeg fapi gam’ing make michaen’ ko michmicheg rok ke gaa’nag e murnguy rok.”
Bayul rok Kristus nge Fanow Rok
Boech e duw u faram, President Boyd K. Packer ke ning koel chiya’, “Ngongol nib fel’ fa’an dariy’ e gam’ing ko gaspal darm yoeg e bayul fa tayfan ngalang ni fan e gidii’.”5 Arragon, gadadba t’uf e gam’ing nge michmicheg ningad suloed ngak Chitamangdaed, machane gadadba t’uf e Fak Rok, Yesus Kristus, nge Bayul Rok.
King Benjamin ke fil nigo’ udakaen e fithingan Kristus ninge yoeg e thapeg ngak e bitir ko mo’on (muguy ko Mosiah 3:17; kum muguy ko Articles of Faith 1:3).
Udakaen e Bayul Rok, Yesus Kristus ke bayuliydaed ko tin kireb ko Mul rok Adam me bing e wo’en ngodaed ningad kalgadngaen’gaed ningad thapeged e tayfan ngalang. Udakaen e Yafos Rok, Ke tay e fanow ngodaed ningad thapeged e gam’ing ko thapeg “ni udakaen ningan dag e gelngin Got” (D&C 84:20).
Tomuren en Tathapeg ke thapeg e gam’ing ko tawfe ninge “mugu’uliy e tin mat’aw” (muguy ko 2 Nephi 31:5–6), Satan ke lumelnag Ngak. Woed rogon, e lumel rodad dani ta’leg tomuren e tawfe fa m’ag paa’ rodad, machane udakaen fapi gam’ing nib thothup nge michaen’ ngak fapi michmicheg ninge yag e magal ni tamilang ngodaed ninge pii’ gaa’ gilingdaed ningad chamgaed ngad gelniged fapi lumel.
Ta’amagran
Isaiah ke profesynag moranga’agen nap’an e tin tomur e rran, “ra alitniged e fayleng… bochan e yad be… thilyeg fare gam’ing” (Isaiah 24:5; kumguy ko D&C 1:15).
Reb e ta’amagran, ni ke yoeg ngak Profet Joseph Smith, ni boech e gidii’ ra baed ngak Somoel ko thin roraed, yaedra fil ko gaspal ngofan fapi motochiyel e mo’on, bay e yalen got roraed, machane yaedba fekyathin e gelngin riy” (Joseph Smith—History 1:19).
Paul e ki ta’amagran ni bo’or e gidii’ e ra “yalen got, machane fekyathin… gelngin riy: ngak e pi’in ngem mu [pii’ kerum]” (2 Timothy 3:5). Gube yoeg bayay, ngak e pi’in ngem mu pii’ kerum.
Fapi tin nib wagaey nge lumel ko yafos i yaed boed e “wolf nma k’ad ko” (Matthew 7:15). Fare tachathowliy nib riyul’ nra taermedliy, matangiy, nge ayuweg fapi saf ko ulungi saf nap’an fapi wolf nem ni bay yib (muguy ko John 10:11–12). Gadad gubin tapigpig ko tachathowliy ningad gayed rogon ningad folgaed e yafos nib machaelboeg rok fare Tachathowliy nib Fel’, gadad e tachathowliy ko ya’el’ rodad nge reb e gidii’? Udaken e fanow ko pi profet, tayi’iy, nge tathogthog ni fin sustain nagrad, ma udakaen fare gelngin nge taw’ath ko fare Kan Thothup, rayog ningad guyed fapi wolf nibe yib fa’an gadadba posnag mug taermedliyed. U reb e rogon, nap’an bayi tachathowliy nib wagaey ko ya’el rok fa ya’el rok bee’, bayi yim’. Wagaey nira yaen nga yim’. Gube pinningdaed ningad manged e tachathowliy nib michaen’daed.
Nang Fan nge M’ag
Fare sacrament i’ir e gam’ing nima ayuwegdaed ningad athamgiliyed ko kanawo’, ningan fek udakaen e mat’aw i’ir e pow ningad folgaed fapi motochiyel riy ma reb e gam’ing. Boech e duw kofram, nap’an le’engig, Anita, nge Gag ku pigpignigew ulan faer Arkansas Little Rock Mission, Kug warow ningu un l’agruw i missionary ko mafil. Nap’an fare machib, walagen ni kug machibniged ngak ke yoeg, “Kug gub nga galasia rom; mang fan gamedma kay e flowa mu un’um e erran urngin e Madnom? U galasia roamed, gadmaedma rrin’ l’agruw i yay ko duw, Easter nge Christmas, ninge gaa’fan.”
Kug weliy’ed ngak ni kan motochiyel nogdaed ningad “mo’olung gaed ngar feked e flowa nge waeyin” (Moroni 6:6; kum muguy ko D&C 20:75). Kug biy’eged Matthew 26 nge 3 Nephi 18. Ke fulweg ni dabiyoeg ninge nang fan e tin gaa’ fan riy.
Mug pii’ed e fanathin ney: “Mu lemnag ni kam crashnag e karo rom. Kum k’aed ma dabiyoeg ningam od. Bay yib bee’, me guy ni ka mmol, me kol nag e numba ko emergency, 911. Bay yib e togta ninge fel’ rogom ngam od.”
Kug fitheg ngak fare walagen nem, “Nap’an gara od ma guy e tin urom, bayi duwer rom?
Ke yoeg, “Gube a’dag urrogon kug taw ngaram ma mini’ ke piry’eg geg. Gube a’dag ninge pinning e magaer ngak urngin e rran bachan ke thap e yafos rog.”
Kug weliy’ed ngak fare walagen urrogon en Tathapeg ke thapeg e yafos roamed nge thingar ningad pinninged a magaer Ngak urngin e rran, urngin e rran, urngin e rran!
Mug fithed ngak, “Gama nang ni Ke pii’ e yafos Rok ni fandaed, wi’in ni gaba a’dag ningam kay e flow mu un’um e raen ni yowi pow ko downgin nge racha’ Rok?
Ke fulweg, “Guma nang fan, Guma nang fan. Machane bay reb e ban’en. Galasia rom e ba chachalbaen.
Ere kug fulweged ngak, “Ngad sapgaed nga maab rom. Mang gara rrin’ fa’an fare Tathapeg Yesus Kristus e ra yib nga maab ko tabinaew rom?”
Ke yoeg, “Chingyal’, gura ragbug nga but’.”
Kug fithed ngak, “Aram e thamtham rom nap’an gama yib ngak pi chapel ko Gidii’en Got ko Tin Tomur e Rran—liyoer ngak en Tathapeg?”
Ke yoeg, “Guma nangfan, Guma nangfan, Guma nang fan!”
Ke yib nga galasia nap’an fare Madnom ko Easter make athamgiliy ninge yib.
Gube pinningdade ningad fithed ngodaed, “Bin ningan e gam’ing, arragon fare sacrament, thingar Ningu thapeg, nge bin ningan e michmicheg thingar Ningu fi’leg, fol, mug liyoer ngak?” Gube micheg ningam un e gam’ing mu liyoer ngak fapi michmicheg riy’ nira yoeg e magal nib tamilang ngomed ma ran ayuweg nem ko re feyleng ney nibe sug nag e tagan. Udakaen e fithingan ku Yesus Kristus, amen.